الأحد: بعد التقرير الصحفي إيّاه إللي قال بأن كل مترشحين الجمعية الاسلامية اياها فايزين ومن غير منازع، أقترح على الباقي من المترشحين بأن يكتبون على خيامهم «صاكين»!!

الاثنين: أحد مترشحين النيابي في المحرق يرتب جدول فعالياته بمثل جدول فعاليات مترشح آخر في دائرة ثانية، علشان لين خلّص الفعالية قال للحضور خل نمر على أخونا (.....) نتعشى عنده !!

الثلثاء: وأخيرا ... ساعة الانتخابات اقتربت من الصفر ... وإللي عنده حيله من المترشحين إياهم فليحتال، فقد حان وقت إنكشاف المستور وسقوط الاقنعة.

الأربعاء نائب سابق في العـ.....، كل إنجازاته هي تجنيس الجاليات الباكستانية في دائرته، إذا فاز مرة ثانية بنقول على النيابي السلام مرة أخرى.

الخميس: طول السنة الفائته ما ظلت لجان ما أسسها ولا زيارات للمآتم ما سوّاها، ولا زيارات للسفارات بسالفة ومن دون سالفة ما راحها، وآخرتها يختمها بشريط كاسيت يسب الناس فيه ويبغيهم يصوتون له بعد !!

الجمعة: «إن لم تستح ... فافعل ما شئت» هذه المقولة تجاوزها أحد المترشحين الاسلاميين وصاروا أهله يطقون البيبان وكأنهم ديّانه يستجدون التصويت له .

السبت: أحد المترشحين صار له اسبوع وهو يصد ويرد من منافسه الأوحد، وفي نهاية كل تصريح يقول ما يبغي يدخل في مهاترات مع المتنافسين إللي معاه في الدائرة !