س: هل تتوقع انجازات خرافية للبرلمان الجديد يا بو تيله؟
ناشط حقوقي
ج: ما أعتقد!! لكن وجود هالنوعية من النواب الجدد بيوقف على الاقل من تفاهات وهرطقات بعض النواب وبيرفع من مستواه على الاقل.
****
س: أكره موقف تواجهه عادتا ؟
أم حسين
ج: لين أروح باسحب فلوس من ATM ويطلع لي واحد ماخذ راحته مع الجهاز وعلشان يسحب هالعشره دينار ياخذ له سنه!!
****
س: يقولون بتروح الحج السنه؟ لكن مع أي مقاول؟
بو حسام
ج: والله قاعد أدوّر مقاول ما يقول أكله بوفيه وهناك يطلع روتي وجبن.
****
س: الاخ بو تيله ... في رأيك ويش سبب زحمة الشوارع هذي الايام؟
عبدالله
ج: الدراسات والتخطيط والتنظيم المنعدم لشوارعنه ناهيك عن البحرينيين الجدد إللي في إزدياد !!
****
س: متى آخر مره كان عشاكم من المطعم؟
أم خليل
ج: قصدج متى آخر مره زوجتي طبخت عشه وما كان عشانه من المطعم !!
****
س: بو تيله ... لمن تقرأ هذه الايام؟
الولهانة
ج: غير المجلات والجرايد وأخبارها إللي تغث وبعض كتّاب أعمدتها إللي يبطون الجبد ما أقره!!
****
س: تذكر يوم يطردنا أستاذ العربي من الصف في مدرسة المأمون؟
صديق دراسة قديم
ج: لا والله ... أذكر يوم ينقفل علينا الصف ويقوم أستاذ فا...... بضربنا بذيج الخيزرانه وكأننا خرفان في زريبه !
العدد 1548 - الجمعة 01 ديسمبر 2006م الموافق 10 ذي القعدة 1427هـ
