منتديات مملكة البحرين

- مجنونة بس حنونة: بصراحة تقريبا الكل مو راضي على تغيير الاجازة.

تفاجأنا بالخبر وخصوصاً ان في الاستفتاء اللي صار خلنا نقول الغالبية اذا مو الكل صوتووو على عدم تغيير أيام الإجازة الأسبوعية.

يعني الحين أول يوم في الإجازة بيصير الجمعة، والجمعة إجازة الهنود فشوف الزحمة اللي بتصير في هاليووووم.

شكلنا ننحكر في البيت أحسن لنا.

بعدين صديقاتي اللي يشتغلون ويدرسون في الوقت نفسه، كانووو يداومون من السبت إلى الخميس، ويوم الجمعة يريحون شوي عشان الشغل والدراسه، بس الحين بيصير الدوام من السبت إلى الخميس ويوم الجمعة إجازة ويوم السبت يرجعون يداومون في يوم إجازتهم بعد، يعني لا يطلعون ولا يريحووون

- حسين إبراهيم: بصراحة انا انتقد الحكومة في امور كثيرة، وخصوصاً في النواحي المعيشية في البحرين، لكن مسألة تغيير الإجازة الاسبوعية انا معها، المشكلة يا جماعة؟! الإجازة كانت يومين (الخميس والجمعة) والحين بعد يومين (الجمعة والسبت) ولا تنسون في ناس يعملون في القطاع الخاص، ومتزوجين وإجازتهم كانت مثلا (أول ردي) جمعة وسبت، ولكن عيالهم في المدارس مثلا إجازتهم الخميس والجمعة، وايضا اللي متزوج و يعمل في قطاع خاص وزوجته تعمل في القطاع الحكومي أو العكس، الحين راح تتوحد اجازتهم، وايضاً دولة قطر مطبقة القرار من مدة، والامارات راح تطبقه الحين، والان البحرين، فراح تكون الإجازة موحدة على الجميع، والبنوك بطبيعة الحال والشركات هي المستفيدة الكبرى من هذا القرار، لكن محد راح يتضرر بالعكس يوم السبت ثقيل، والحين بيكون إجازة.

- ظبيه: انا احس انه المسألة تعوّد لا أكثر ولا اقل وان شاءالله راح نتعود واحس الوضع بيكون اريح.

محرقاوي حتى النخاع: لازم يحترمون وجهة نظر الشعب يوم استوى التصويت صوتنا والغالبية مايبون تغيير يبون كل شي على حاله...!!

- كشكوشة: اخذوا الموضوع بروح رياضية دام قرروا وبينفذون محد يقدر يوقفهم.

- ابو محمد: وين المشكلة... عادي... المهم عندكم يومين اجازة... احمدوا ربكم عندكم يومين... احنا ما عندنا الا الجمعة والحمدلله والشكر... نعمة... ما تفرق معانا إجازة الحكومة خميس وجمعة او جمعة وسبت... المهم الجمعة موجودة والواحد يقدر يزور اهله.

- محمد الليث: المسألة بتنحل بالتعود.

و اتوقع ان اسباب التغيير اقتصادية، لأن المصارف والبنوك حول العالم تصك السبت والأحد.

منتدى قطر فوتبول

- غرفاوي 696: أول شي كنا رافضين انه اجازتنا تكون الجمعـة والسبـت لكن مع الوقت تغير الوضع وصرنا نتقبل هذا الشي وبالعكس تحس انه الاجازة اطول.

مثل ما قالوا الاخوان كأنها 3 ايام (الخميس - الجمعة - السبت).

فلو فتحنا باب المقارنة بين السابق بالحاضر... استرييييييح.

وأنا اعتقــد والله اعلم انهم يبون يحضرون الناس لتكون الاجازة يوم السبت والأحد علشان يواكبون التطور في العالـم مثل ما يقولون.

«والله مادري شدخل التطور في اجازة السبت والأحد لكن هذا عذرهم لو تم هذ الشي».

عالعموم الله يرحم أيام قبل يوم كانت الإجازة يوم واحد (يوم الجمعـة) صج كانت الحياة مملة ومتعبـة.

- محرقي: بالنسبة إلى الاجازة اخوي سد قطر انه عن نفسي كنت متحمس ومؤيد لها.

ما نقدر نحكم عليها لانها لي الحين ما تطبقت، باقي بس ايام معدودة، لكن عن نفسي اعتقد ما بيتغير الوضع، واللي عندهم ارتباطات او اجتماعات عائلية يوم الخميس، وانه منهم، يقدر يسوي لهم «شفت» يوم الجمعة.

بالعكس السبت من اكره ايام الاسبوع ووقت الدوام اذا خلص السبت يعني نص الاسبوع خلص... وايد زين السبت يصير اجازة... تغيير الاجازة يخدم المصلحة العامة للبلد ككل.

- ريمية: عن نفسي ما كنت حابه الفكرة بتاتا.

بس يوم شفت اهلي في قطر تأقلموا مع التجربة وتعودو عليها من اول اسبوع ، قلت ما راح تضر ان شاءالله.

خاصة وان هالثلاث دول (بالنسبة لي) اكثر تقارب لان هلي فيها... وتوحيد الاجازات في صالح هلي شخصيا!

بس عندي استفسار...

بالنسبة للي يقولون ( تحس ان الاجازة بتطول خميس جمعة سبت).

زين نفس الشيء كانت بالنسبه لنا؟ (أربعاء خميس جمعة) ما فرقت؟

ومثل ما السبت طويل... اكيد الاحد راح يكون طويل بعد؟

ولا شرايكم؟

- كواسر البحرين: بما أني بحرينية فأنا معنية بذلك... أليس صحيح!

طبعاً أنا نظام مخي ليس منضبط مع هذه الاجازة بسبب تعودي ليلة الخميس على متابعة الفيلم الهندي وتجمع العائلة يوم الخميس.

ولكن مع مرور الأيام والشهور سأتعود بذلك وسأرضى به

- زيوون المدريدية: صراحة انا كلش مو عاجبني لان مو متعوده بس قالوالي ان الاجازة يوم الجمعة والسبت احسن بوايد وأتمنى اني اتعود بسرعه عالوضع لان كلش مو عاجبني.

- بحرينية: اللي يقول الحين لو عارضنا برجعون الخميس إجازة... احنا معارضتنا بس في الهوا لأن في النهاية القرار راح يتطبق راح يتطبق سواء وافقنا أم لا.

والله يقدم اللي فيه الصلاح إن شاءالله...

- اسير: بصراحة الإجازة صارت اروع بالف مره يوم خلوا الجمعة والسبت إجازة لانه احس انه ماخذين ثلاثة ايام خميس وجمعة وسبت وصدقوني ياهل الامارات والبحرين كلها شهرين ولا ثلاث بيعجبكم الوضع وبتستانسون أكثر وأكثر.

- غرفاوية موت: انا احس بيفتلون على الإجازة.

نفس احنا عندنا، كلنا كنا معارضين ومانبي ومستغربين الوضع... بس شوف شلون الكل حب الاجازة... واتمنى هل البحرين والامارات بعد يحبون القرار وما يتضايقون منه... لانه بيكون شي حلو.

ومع الايام بيتعودون... وبالعكس احس الشي ايجابي جدا على الأقل الواحد لين راح حق هله ف البحرين لو الامارات... يشوف الاجازات متشابهة... مب نفس أول ما يقدر يروح ف الويك اند والسبة انه ما بيقعد الا يوم واحد...!

- مسز الريان: اي والله الاجازة يوم الجمعة والسبت احسن بواجد ونفس ما قلتم ان الأسبوع بيمر بسرعة بس اعتقد في البداية بيحسون بشي متغير نفس ماحسينا وعقب بيرتاحون.

- بحرينية: بصراحة بالنسبة لي كنت مستغربة انتون شلون متحملين الإجازة الجمعة والسبت، وشلون لكم خلق تداومون الخميس.

قال لنا الزمان صبروا، سافرنا ورجعنا إلا يقولون القرار من شهر 9 الإجازة الجمعة والسبت، والله محد متقبل الأمر كلش... وخصوصاً ان احنا عندنا ارتباطات في يوم الخميس كيوم عطلة، البعض عندهم عادة إن يوم الخميس الغدا في بيت الجد مثلاً وغيرها وغيرها.

ما نقدر نحكم على شي ما جربناه، بس ماجه على بالنا ان بننحط في الموقف.

ونترك الأمر للأيام... وبنقول لك راينا بعدين