أهلين.
- أهلين خوك.
ويش رايك في أسلوبي في النقاش البارحة في القهوة؟
- لطيف.
لا صدق، من غير مجاملة، مو لأني آمرت ليك كابتشينو تمدحني، صارحني صدق.
- معقول.
متأكد؟ إذا مو متأكد قول لأنك انت صديقي ولازم تصارحني، وأنا عادي أكو فاتح صدري لرايك.
- مو كلش.
شلون يعني مو كلش، صدق تبط الجبد، لكن الشره مو عليك، الشره عليي أنا إلي طالع وياك ومضيع وقتي، ومآمر ليك في القهوة وإنت بس شغلتك قاعد في سيارة زقرت وبعدين شارب ليك في قهوة محترمة. إنت أصلاً مو مال كوفي شوب صراحة، إنت حدك شاي أحمر مر مال فاتحة.
- اسمع خوك، أنا لازم أصارحك لأنك لازم تعرف سلبياتك قبل ما ترشح روحك، ترى الناس ما بتصوت إليك أكيد، صدقني.
اسمع حبيبي، شكلك بعدك ما تعرفني عدل، أنا إذا أصنف على شي أحصله يعني أحصله، بالطيب بالغصب أحصله، فاهم، أنا يوم قررت أرشح نفسي أعرف إني مو مؤهل في وجهة نظر الناس، لكن أنا في اعتقادي إني مؤهل، ومو سهل بعد، إنت تدري شنو مؤهلاتي الخاصة الي محد يعرفها غيري؟
- شنو مؤهلاتك حبيبي؟
أنا خوك مو دارس سياسة لكن أعرف شلون أحصل شي أبغيه.
- انزين شلون يعني؟ ويش بتسوي؟
بقول ليك خطتي. أنا أول شي بشوف ويش نقاط قوتي. أنا أعرف روحي متروس سلبيات لكن هذا كله مو شغلي الحين، أهم شي عندي أدور على نقاط قوتي، إذا حصلت نقاط قوتي أدور ليها مكان في المجتمع، وإذا ما في مكان أسوي مكان.
- ما فهمت.
شوف. أنا اكتشفت روحي ما اشتهي ناس معينين في البحرين. ما أحبهم كلش مول. أكرهم. ونقطة قوتي إني إذا أكره واحد أعرف شلون أخلي الناس يكرهونه بعد. فأنا ويش بسوي. الحين الناس ما تكره هالجماعه وصايره عاديه وياهم، فأنا بشتغل على أن أخلي جماعتنا تكره هالجماعة. يعني أتكلم وأكتب وأشتغل وأسوي كلشي وأي شي علشان أحسس جماعتنا بإني أحبهم وأعرف إن الجماعة الثانية مي زينة وأنا قررت أدافع عن حقوق جماعتنا حتى لو تعبت وشقيت.
- انزين وبعدين؟
وبعدين يا حبيبي، جماعتنا إذا خوفتهم من الجماعة الثانية وخليتهم يكرهونهم نفسي بصير أنا زعيم جماعتنا. وبعدين بيصوتون ليي.
- لكن الناس بيعرفونك، بشوفونك شان حملة على ناس آخرين مساكين ما سوو ليك شي.
شوف خوك. أنا ما ببين روحي إني أنا إلي أكره، أنا بطلع ديك الجماعة إنها هي إلي ما اطيق جماعتنا ولا اتحبها وكله تشتغل عشان اتدمرها وتاخذ صلاحياتها. يعني كرهي أنا بخليه يكون كأنه ردة فعل عشان الجماعة. فاهمني؟
- فاهمنك، بس جماعتنا ما راح يتبعونك.
راح يتبعوني لأني بسوي روحي واحد منهم، وبسوي روحي مخلص وتعبان عشانهم. ثاني شي أنا مو لهالدرجة غشيم عشان أخليهم يشكون فيي. وبعدين يا حبيبي أنا أعرف واحد صحفي بايع مخلص، لا عنده دين ولا مذهب، وكل كلامه حرية الرأي وحرية الرأي وتحت هالذريعة مو مخلي واحد إلا وشرشحه. هذا صاحبي صديقي الروح بالروح، وياما سهرنا ويه بعض في نفس القهوة إلي وديتك فيها.
- إي عرفته، بس خوك هذا كلش رايحه عليه.
أنا مو شغلي، أنا أعرف إنه مو خوش، لكن لا تنسى إني أبغى واحد صحفي يكون ويايي على الخط. يعني ينشر إلي أقوله وإلي ما أقوله. يخلي ليي كم صورة وكم مقابله. يعني خبرك يسوي ليي واجهه إعلاميه.
- بس جدي انت بتخلي جماعه تكره جماعه عشان توصل البرلمان.
مو مشكلة بصالح بينهم إذا وصلت البرلمان. والله ويش رايك؟
- تمام له، صراحة مؤهلاتك واجد كشخة
العدد 1457 - الجمعة 01 سبتمبر 2006م الموافق 07 شعبان 1427هـ
