(أ) منذ سنوات وهذا الشاعر يعرف كيف يستميل اللغة الى مساحات لا يجرؤ كثيرون على الولوج إليها.
طلّقنا الشعر
يا روحي طلّقنا
سنين طوال
ويّا الهم غرّقنا
لا موجه
وصلت مينا
ولا غيمه
امطرت معنى
تنكّرنا بوجوه الناس
قلبنا الساس
شفنا نجوم
تتساقط مع العتمه
لقينا اصوات
صارت بالزمن غتمه
ونجمتنا
على روس النخيل
تميل
قطفنا الليل
وجاوبني الشعر يضحك
طلّقني
طلّقني
إذا كان بيدك عصمه.
صوت
أغيّر صوت
والاّ الصوت ممنوع!
أبدّل جلد
والاّ جلد مرقوع!
أدورّ حظ
والاّ الحظ في القوع!
أشب شموع
والاّ اطفّي شموع
يا ضيعة نبتتي
بأرض الغرابه
يا حلمي اللّي ذوى
بعمر الصبابه
أدش بجوع
وأطلع من ضنا جوع
أغوص بحور
واغرق في حشا بحور
أدور النور
في ونّات مأسور
أدور النور
في غصّات مقهور
أدور النور
في رفّات عصفور
وشلتك بالعطش والملح
لأنّك جرح
أكبر من سنين الذل
واظل ادور
ضوء
يا صاحبة الضوء الأخضر
خبريني
من غيّب صوتي!
من يفرح في شحّة قوتي!
خبريني
عن سبّة حزني!
عن صوتي الموجود المنسي!
عن قلبي المشبوب المطفي!
عن موتي في لحظة عرسي!
عن عرسي في لحظة موتي!
خبريني
عن زمن الغيبه!
عن سرداب الصمت والريبه!
عن نجمات الحب لصغيره!
تاكلها في الظلمه الذيبه
خبريني
عن نهر الكلمه
ليش يعانق صمت الظلمه!
ليش الحرمه ما هي حرمه!
ليش الوصمه صارت بصمه!
خبريني
من ضيّع صوته!
من صادق أولاد الحوته!
من شرّع أبواب الغربه!
من قطّع أنفاس النوته!
من خلاّ الغيلان تربى!
من عرّى أوراق التوته!
يا صاحبة الضوء
الأخضر
(ب) خليفة اللحدان وتجريبية متكررة نلمس أثرها بعد سنوات من عمله عليها
العدد 1450 - الجمعة 25 أغسطس 2006م الموافق 30 رجب 1427هـ
