أنا وغيري كثار يا جماعة ما نعرف سر تصميم الشوارع الضيقة إللي صايره موضتها ألحين، شفنا نموذج فاشل في المحرق حوالين مخبز دلمون... شارع الداخل فيه يفكر روحه داخل مدينة حمد من كثر الدوارات إللي فيه، والثاني ألحين يشتغلون عليه وجريب يخلصونه في عراد.

عاد شارع عراد الله لا يراويكم حالته... أنا اقترح يسمونه شارع قطّاع الارزاق... أي نعم قطّاع الارزاق... بالله عليك نصف الدكاكين إللي في الشارع انقطع رزقهم بسبب هالأرصفة إللي حاطينهم إللي جنهم مسارح من ارتفاعهم والسبب الثاني هو ضيق هالشوارع ومشروع الدوارات الفاشلة إللي شفناه في المحرق يتكرر في عراد... ليش ما أدري؟

سنين نصيح من أن الشارع سيئ... بس مو معناتها انكم تسونه لنا أسوأ! كل السالفة وما فيها كان الشارع محفّر... وبس... لكن ألحين الشارع صار مبلّط ولكنه زحمه... بسبب التصميم (الذكي) إللي مسوينه!

بحسب الظاهر إن المهندس العبقري إللي صمم الشارع كان يبغي يطّلع مواقف للسيارات بأية طريقة ومن تحت الأرض الى درجة انه يأخذ من عرض الشارع... وخذ عاد كل سيارة بترجع ريوس وتبي تدخل الشارع يتوجب على كل الموجودين في الشارع ينتظرون حضرتها تعدل سيارتها وتدخل! واحنه ويش ذنبنه يعني! ناهيك عن الزحمة إللي بتصير من أقل حادث يصير وعلى ما يجيك المرور يكون سواق السيارات إللي تجمعت صادهم أعصاب.

لن نطلب كثيرا يا وزارة الاشغال... شيلوا هالأرصفة إللي جنهم جدران من رفعهم... وبلطوا الشارع عدل وخلوه على ما هو عليه، تراه أرحم بكثير من تصميمكم (التعبان) إللي شارف على الانتهاء... ويا دار ما دخلك شر؟