يستهويك منظره المصنوع يدويا من سعف النخيل حيث يتراىء اليك للوهلة الأولى أن صانعيه أما ان يكونوا من أمهر الفنانين أو طغى عليهم الزمن وأعمارهم تجاوزت الستين لكن المفاجأة تكون عنما ترى شبابا متحمسين .
تسمى بـــ ( عريش آل سرحان ) أو هكذا اسموهّ أهالي المالكية نسبة لموقعه الواقع بقرب نادي المالكية وتحديداَ بالقرب من منزل عائلة آل سرحان . عادة ما يجلس بالعريش شباب المالكية بمختلف أعمارهم ويتجاذبون أطراف الحديث فمن حلم القرية النموذجية التي طال أمدها ومرورا بعلاوة الغلاء ومستحقيها ووصولا لإطلاق الدعابات الساخرة حول انفلونزا الخنازير وليس إنتهاء بما اعتبره البعض منهم بغير المقبول أن يسكن الزوج منزل والد زوجته حتى وإن كان يدفع ايجارا عن ذلك .
بدورها ( الوسط ) دونت وهي تحضر إحدى الجلسات في عريش آل سرحان بالمالكية جانبا من هذه الأحاديث فكانت هذه الحصيلة :
الوسط: السلام عليكم.
الحضور : وعليكم السلام.
الوسط: اخذوا راحتكم نبغي نسمع سوالفكم ونسجلها وبعدين نعرضها بالصحيفة والموقع الإلكتروني.
الحضور : افا عليك حاضرين لـ«الوسط» بس عاد اقدع أول وإشرب شاي .
محمد عبد العال : نزين عمار ويش صار عن المدينة النموذجية متى بتنبني؟
سيد عمار : اسرع وقت لا.
محمد عبدالعال : متى عاد اسرع وقت متى لا.
يقولون ما في ميزانية .
غالب عبدالنبي: شوف الحين صاير بالقرية سالفتين .
سالفة لجنة أهلية ولجنة شباب القرية.
شباب القرية هم طالعين يطالبون بالقرية النموذجية .
تحرك للفرضة وقفوها لأن جاي مقاول وقفوها أهالي القرية والمحامين .
الوسط: يعني اللي شاغل بالكم هالايام بالمالكية الإسكان والقرية النموذجية ؟
طالب آل سرحان : الفرضة والاسكان .
يبغون يسوون جدام شوي ياخذون نص الساحل .
محمد عبدالعال : والاهالي مايبغون قريب الساحل يبغون يباعدون شوي .
طالب آل سرحان : علشان يكون الساحل اطول .
يوقفون الطراريد بعد.
علي جعفر : مشروع الفرضة صاير بوسط البحر، وأهالي القرية يبغون يصير مكان الحظور الاولية بحر ميت عكس المكان الاولي فيه حيوية ومكانا ت عائلية ها الساحل كله .
الوسط : نزين ويش رايكم بعلاوة الغلاء ؟ ويش رايكم بشروط اللي حطوها مثلا .
محمد عبدالعال : ما نزلوها للحين .
طالب آل سرحان: علاوة الغلاء شروطها تعجيزية .
سيد باقر : لالالا .
طالب آل سرحان : أكثر المحتاجين للعلاوة إستثنوهم فيها يعني العلاوة للأرامل المطلقات دلين مستحقين المفروض يعطونهم.
محمد عبدالعال : البحرين تقترح والكويت تطبق.
الوسط : خلونا نسأل الشباب .
علي جعفر : اي توه خاطب هذا.
الوسط : نزين ويش رأيكم بسالفة انفلونزا الخنازير.
طالب آل سرحان : بعيد عننا .
المفروض يخلون جهاز مال كشف المرض بالمطار .
غالب عبد النبي : فيه في المطار هذا الجهاز .
محمد عبدالعال : كاميرات موجودة هناك .
يشغلون ليتات ههه.
طالب آل سرحان : تغير الجو الحار هذه الامراض يجي انت تحافظ على طيورك وحيواناتك اللي صوبك ما يحافظ.
اووو
اكو يكح أحمد شكله صاده انفلونزا الخنازير.
علي عبدالنبي : تباعد عننا لا تعدينا ههه.
محمد عبدالعال : احنا ويش مستفدين من انفلونزا الطيور والخنازير
احنا نبغي فلوس نبغي يبنون لينا القرية النموذجية علشان نتزوج.
غالب عبدالنبي : ما يقدر يبني شقة فوق حجرة وحدة .
علي جعفر : أنا ساكن بحجرة أربع متر وياي ولادي فيها وحمام صغير من حقي اطالب يبنون لينا قرية نموذجية لو لا.
طالب آل سرحان : شوف حتى هالعريش اللي احنا قاعدين فيه هذا بالشارع احنا مسوين لينا يعني اللي ابغي اقوله احنا نقدر نعدل ونطور في قريتنا اذا عطونا المجال والفرصة .
علي جعفر :أصلا حتى الشقق بالمالكية ما فيه.
محمد عبدالعال : أقل شيء 200 دينار ايجارها اذا فيه، وهذا سبب في عزوف واجد من شباب القريةعن الزواج .
غالب عبالنبي: اي بعضهم وصل 40 سنة اعمارهم .
محمد عبدالعال: اقدع يا محمد اقدع.
طالب آل سرحان : تدري ان عدد سكان الديرة يوصل عشرة آلاف نسمة .
المنطقة الغربية كامل احنا اكثر سكان عدنا وفي مدرسين عدنا ودكاترة بس و تدري ان ما في ولا مدرسة بالديرة.
غالب عبد النبي :و لو ما بركة الشباب جان ما رجع الساحل ولا طاح الجدار .
محمد عبدالعال : ولا تنسى «الوسط».
وقفة صحيفة «الوسط» ما قصرت صراحة بقضية الحظور.
علي جعفر: اي لولاها ويا تحرك الشباب جان ما رجعوا لينا شيء.
طالب آل سرحان: الدكتور منصور حضر ودعمنا بتحركنا .
سكوتنا عن الاسكان مضرة كبيرة لينا .
الوسط: يعني ما عدكم ولا مدرسة هني.
علي جعفر :لا ولا مدرسة .
طالب آل سرحان: على الأقل مو للصبيان للبنات للاطفال يسونه وحدة لا .
اي هو يمكن ما كانوا يفكرون اجدادنا بحاجتنا للمدارس لأنهم كانوا يقولون مدام في مدرسة بكرزكان المالكية مو بحاجة ليها .
يعني عقول مال زمن اول تعرف .
محمد عبدالعال: بس المالكية ناقصنها اشياء واجد ومنها المدارس والاسكان ضروري كلش هالاشياء .
لو ما نحتاجها ما طالبنا بها .
غالب عبدالنبي: يالله أحمد.
الوسط : من اللي متزوج فيكم.
علي جعفر: انا متزوج هذا متزوج البقايا خاطبين .
نزين ويش رايكم بالزوج اللي يسكن في بيت زوجته.
يعني جا ليه ابو زوجته وعرض عليه شقة ويش رايكم.
سيد باقر :لالالا هذا عيب.
غالب عبدالنبي: عيب.
محمد عبدالعال: ليش عيب .
عدهم فلوس بيت زوجتي وعدهم مكان وبتدفع ليهم فلوس اش فيها السالفة .
لا اذا في شقة وبروحك.
طالب آل سرحان: بتدفع بيزات.
غالب عبد النبي: لالا ما يصير .
عدهم بنات حريم .
سيد باقر : ما ياخذون راحتهم جدي ولا انت بعد .
محمد عبدالعال: حتى لو بروحك ما يصير .
سيد باقر : احراج.
طالب آل سرحان :لالا انا اشوفها عادي.
غالب عبد النبي: انا انعرض علي شقة .
الوسط: اكو واحد نعرض عليه شقة خلونا نشوف ويش يقول!
غالب عبالنبي: ابو زوجتي كان ببني شقة وراء وبيعطيني اياها بس انا ما وافقت لأن هو عنده بنات وصدق انا بشقة بروحي بس هم ما بياخذون راحتهم ولا انا باخذ راحتي .
طالب آل سرحان: اذا مشترك اهني المشكلة بس اذا منفصل بروحك ما فيها شيء بتدفع فلوس مو بلاش.
علي جعفر: اي لو باب بروحك ومنفصل وتدفع فلوس.
محمد عبدالعال: وما يكون على حساب واحد من اولاد عمك علشان لا يتهضم عليك انا اشوفها عادي .
غالب عبد النبي: لا المسألة مو عادية حتى لو بتدفع فلوس ما يصير.
سيد باقر : انا بعد ما اوافق الناس ويش بتقول .
طالب آل سرحان: لا انا اقول هالايام فقر الصراحة لو بتحصل في بيت صديقك بعطيك حجرة بتروح مو بعد في بيت عمك من لحمك ودمك، ما في احد يحصل ليه فرصة ويخليها تروح.
الوسط: لو عرضوا عليك توافق يعني .
طالب آل سرحان : اي اكيد بوافق .
الوسط : وانت اللي قاعد مناك توافق لو عرضوا عليك الأمر
محمد عبدالعال: هذاك تاجر عنده اراضين .
هذا عنده فلوس
ههه
الوسط: في امان الله.
الحضور : اقعد تعشى ويانا.
الوسط: مشكورين وفيه العافية .
العدد 2458 - الجمعة 29 مايو 2009م الموافق 04 جمادى الآخرة 1430هـ
