لااا حولا ولا قوة إلا بالله

اخو الطالب

السلام عليكم ورحمة الله انا اخو الطالب المذكور وعلى فكره انا ماعندي علم في من الي نزل الخبر في الجريده وما شالله الردود معظمها من مدرسين ولكن مدرسين جبناء لانهم ما قالو عن نفسهم انهم مدرسين والقضيه لاهي انتحار ولا هم يحزنون كل القضيه ومافيها انه الطالب مشاكس زياده حبتين حاله حال الكثير في المدرسه والي مهتم في الموضوع وحب يسمع الصدق يكلمني واذا كان موقدها حبذا لو يكرمنا بسكوته

نقطة على السطر

من ينظر لمصلحة الطالب ومستقبله، سيرى أن أكبر إساءة للطالب هي مثل هذا الخبر وأن الأسلم والأجدى هو إغلاق هذا الملف ..

لا حول

يعني ضرب لا تضربون
تهزيء لا تهزؤن
عقوبة إدارية لا تطبقون
النتيجة السلام على هذا الجيل الذي تربى على التدليل وعدم المسؤولية
على العموم الخبر طلع مو صحيح والمسألة باختصار كانت توقيف لمدة 5 أيام بسبب تراكم مشكلات الولد وبعلم أهله
أما محاولة الانتحار فولدي يقول إن بسبب أن أخوه دسته بضرب في المدرسة وفي البيت وحلق شعره وحبسه فهذا خلا الولد ياخد ردة الفعل هذي
تحية إكبار للمعلمين

زائر 60 حدث العاقل

حدث العاقل بما لا يليق فان لاق له فلا عقل له ليش المشرف يتبلى ع الطالب ويجيب لنفسه المشاكل بس شذي مزاج يعني ؟؟؟ ادعم كلامك بالمنطق . هذا طالب يبدو انه ارتكب مخالفات للقانونو المشرف قام بدوره في حماية المدرسة و لايوجد تبرير للموضوع غير هذا و التبريرات الاخرى فاضية و نابعة من جهل

النرجسي

الى الذين كيبوا التعليقات..شكرا لكم...أقول ..لو دخلتم ميدان التدريس..لكان جوابكم أكثر حكمة..وردودكم مكتنزة بالهدوء النفسي....فالتدريس مهنة شاقة جدا جدا..وللاياء ان يجلسوا مع أبنائهم ساعتين في اليوم..ليكتشفوا عن قرب أتعاب المهنة الشقية..والسلام

مــن قـــال البندول ما يقتل؟!!

بليييييز اللي ما يدري عن شي لا يفتي فيه علشان لا يعطي الناس معلومات غلط. البندول هو أكثر الأدوية استخداما من قبل المراهقين لمحاولة الانتحار، وهذا الدواء إذا أخذ بجرعات كبيرة يتسبب في تسمم الكبد وإذا لم يتلقى المريض العلاج في الوقت المناسب تحدث مضاعفات تؤدي إلى الوفاااة. بالنسبة للقضية لا تعليق لأن المعلومات غير كاملة فما نقدر ننحاز لطرف دون آخر بناء على هذا الخبر.

المشرف من اجل اصلاح الطالب وليس فصله من المدرسه

المشرف دوره كبير في المدرسه ولازم تتفهمون مشكلة الطالب وشنو الطالب يعاني من صعوبات ، مو ما عندكم اسلوب ولا تفاهم ولا دورر تربوي ولا عندكم مؤهل لهذي الشغله لانكم وصلتون الطالب الى الانتحار
ام علي

الى تعليق مشكلة الجهال لما يعلقون ؟

ويعني انت الي مسوي روحك كبير تفهم ماتدري في مشرفين يتبلون على الطالب بس بنظرك المشرف بريئ روح اكبر وترك عنك تفكير الجهال تشوف عيب الناس مثل عيبك

الى بنت ابوها

احنا ما قلنا ان المشرفات او المعلمات يمشون على بنزين بس اني كذا مرة اروح المدرسة وفي كل وقت دايما الاكل تحتها ومرة نايمة لا يكون في بالش يا بنت ابوش ان شغل المشرفات النوم وحتى مرة عندي شغلة ضرورية بالمدرسة تخص بنتي قعدت ساعة وشي ما خلصوني وهي تاكل طلعت من المدرسة ورديت طرشت طالبة تشتري اليها !!!!!!!
اعتقد مثل ما للطالبات وقت للاكل المفروض يكون للمشرفات والمعلمات وقت للاكل ووقت للشغل لانهم ي المدرسة يشتغلوووون مو ينامون واني بنتي ما كان عندها مشكلة مع احد

على هامان يافرعون 2

وعلى فكرة المشرف ليس ملك متسيد بالمدرسة هناك مدير ومدير مساعد لهم اليد الأولى في قرار الفصل يعني مايقدر المشرف يفصل بقرار منه شخصيا وماعتقد في مشرف بيخلي عقله بعقل طفلكم البريء جدا بدون مايكون سبب مشاكل لزملائه قبل معلمينه و خلونا نشوف همة الصحفي النشيط ويعرض على اللكل سبب الفصل , وعمر ماكانت العقوبة للمسيء محرمة أو ممنوعة بأي قانون تربوي بالعالم كله , والله يعين

على هامان يافرعون 1

أساسا مستحيل مستحيل مستحيل وضع تحت الكلمة مليون خط , أي مدرسة بالعالم تفصل تلميذ بدون سبب مقنع وظرف طارئ جدا وطبعا بموافقع المدير , أنا طبعا ماأؤيد التعامل القسي بالضرب مثلا أو بالألفاظ المسيئة , لكن فصا تأديبي لأسباب مقنعة مطلوب وهذا موجود بقانون الوزارة وماحد يقدر يعترض عليه
أقترح على الجريدة بالمرة تبحث عن السبب الغير مقنع من وجهة نظرها لفصل التلميذ وتننشره مثل ماشهرت بالمشرف واقام اللكل يسب ويلعن فيه وماحد كلف نفسه سأل شنو ممكن يفعله هالطفل المراهق بالمدرسة ويسبب فصله ,

تبا للوزارة إن قبلت الخوض في القضية

أعتقد المدرسة فيها مدير ومساعد ومشرف ومعلم
فليش الركضة للوزراة
المفروض إذا وزارتنا ذكية تحول القضية للمدرسة وما تدخل فيها
عشان لا تصير حجة عند أولياء الأمور الغافلين عن أولادهم وكل مرة يروحون ركض للوزارة
زمن متخلف صار الكبير ماليه كلمة ولا احترام
شنو مصلحة المشرف في فصل الطالب ، أكيد الطالب مو مخلي مشكلة إلا متسبب فيها عشان جذي صار الفصل

والله حرام

المشرفين مو مقصرين كل واحد يبي يثبت وجوده على حساب الطالب عشان راتبه يزيد يلعب دور المشرف الصالح وهو في الحقيقه يحب مصلحة نفسه وين الوزارة عن هالمشاكل مثل مهزلة مدرسة النعيم الثانويه الغوث من المشرفين والله على الظالم

دبحني الخبر ,,ق11

الى هالدجة الصبي شااطر ,,ويلي علييه حزنت علييه واجد ,,

بنت أبوي

أنا ما لفت نظري ولا رد عشان ارجع أكتب بس الأخت ما ادري الأخ اللي كاتب المعلمة او المشرفة قاعدة تاكل ، اعتقد ان المغلمة ما تمشي على بنزين ، وعيارة الأولاد وجمبزتهم لو كان مسموح لي اصور لك وش يسوون من بلاوي ( الأطفال الأبرياء ) اعتقد انك راح تغير رأيك ، الي موجود في معترك التدريس والإشراف ويشهد يوميا بلاوي تشيب شعر الراس ما بيتكلم بالطريقة اللي البعض يتكلمها ويخلي المدير والمشرف وحوش ما عندهم رحمة والمراهق الطفل البريء اللي انفصل بلا سبب اللي في يوم من الأيام راح يكبر (ما ادري متى ) ويندم

بنت الحرز

يقولون في الأمثال آخر العلاج الكي واعتقد ان المدرسة اتخذت الكثير من الإجراءات كباقي مدارسنا في البحرين قبل ان تتخذ خطوة الفصل ، وبعدين سالفة (دون أسباب واضحة ) لك عليها شوي ما فيه شيء بدون سبب وسبب واضح جدا جدا ، اللي يقولون 13 سنة ياهل ، صباح الخير عندنا بالمدرسة تلاميذ اصغر من 13 سنة وبسن تلاميذ ابتدائي ويتحرشون ببعض جنسيا وما فيه داعي اوضح أكثر ،، اتصور ان المشرف اتخذ كل الإجراءات اللي كان آخرها الفصل وما هو فصل تام بالتأكيد ، كلها كم يوم ويرجع يصدع راس المعلمين

للعلم

للعلم ان سبب هذا كله انه قد تشاجر ورمى مع احد اصحابه الذي اشتكى عند المشرف وبعد ذلك صالحه بعد انتهاء الدوام ..

.....

...اصلن المشرف هوووو الغلطان مايصير يفصل مني والطريق وذي يااهل 13 يعني صغير ومو اتقولون 13 كبير لاا مو كبير ...واصلن المشرف لاازم يتعاقب ع ذي الشي الي يسووويه ويفصل واحد بدون سبب!!....وانه ضد المشرف ولاازم يتعاااقب عقااب كبير ضد الشي الي سووواه..والله يساعد اهل ذي الولد والله نتمناا له الخير وندعيله .....=)

رد

ويجب ايضا النظر الى ملف هذا المشرف الذي عقد طالب بحلوله التعسفية وفصله عن مقعده والان هو ملاذه الشارع .. وهذا الطالب اعرفه شخصيــــا ,

تابع للردود

ايصبح الطالب سي سمعه عندما يضع الجل في شعره ويتخلف عن طابور الصباح ويحضر الهاتف الى المدرسة ... وان يستحق الطالب ان يخرج من البحرين ويحرم من الدراسة عندما بتشاجر مع زميله الذي من السهل ان يتصالح معه في اليوم الثاني ويلعبون في فريق واحد ويصبح هذا المراهق رجل صالح في المستقبل ... هل ترى ان طرد الطالب من مقاعد المدرسة ويكون الشارع ملاذه وطرده من البحرين عقاب نتيجة مراهقه وهفوات غلطها ويغلطها الكثير من الطلاب ام تهذيب الموقف واصلاحه

اللي ما يفهم لا يحط تعليق رجااااء

اللي يقعد يقول ان أهل الطالب محركين الموضوع لصالحهم اهو ما يدري عن شي خل يبلع لسانه ..
واهو فعلا شنو السبب اللي يخليهم يفصلون طالب عمره 13 سنة !!
ولو كان في سبب ليش يسوي جدي ويتصنع واهو صغير ما يفهم في هالسوالف
وكلش ماعندهم سالفه ، عالأقل يبينون سبب الفصل حق ولي الامر ..

مشكلة الجهال لما يعلقون ؟

اللي اتهم المشرف مسكين ... تعرفون واقع المدارس شلون مو في عقوبات من حق المشرف انه يطبقها ؟ شنو تبون يخلي المدرسة سايبة ؟ تعرفون ان بعض المشرفين صاروا يخافون يطبقون القانون حتى مع من له مخالفات تصل الى حد التحرش الجنسي ؟ الا تعرفون انه من امن العقوبة اساء الادب ؟ شلون تصدقون دعوى الاسرة و مسرحيتها وهي لم تذكر سبب واضح ادى بالمشرف لفصل الطالب ؟ معقولة واحد يروح يفصل طالب مني و الطريق ؟

تابع للرد

وكان هذا الطالب كابتن منتخب كرة التنس البحريني للاشبال وقد خسر تلك الجولة بعكس اقرانه في المنتخب وتخلف عن خضوره للمدرسة في ذلك الاسبوع .. اهذه كريقة نموذجية للتربية في وزارة التربـــــية والتعليم ؟؟

....

بما انك قمت بدور القاضي وتمنيت للطالب ان يجلس في الطب النفسي فماذا تتمنى لزميلك المدرس الذي يحمل العصا في الصف ويضرب الطلاب ويهز وينز بالهوز ,,, وكانه راعي اغنام ,,, مهما كانت الاسباب ,,, حتى اصيب شبكية عين هذا الطالب واصيب بنزيف في العين وتم ترقيده في مستشفى السلمانية الطبي لمدة اسبوع ... يتبع

رد زائر 17

ايتم تعيين المشرف الاجتماعي لحل مشاكل التاخير الصباحي والعلك اثناء الحصه ام لحل المشاكل الاجتماعية الخاصة بالطلبة والتحاور مع اولياء الامور لحل المشاكل وهل من حق المشرف الاجتماعي الصراخ على اولياء الامور وكانه في متجره الخاص وليس في مكتب وزاري محترم لوزارة التــربية ولديه قواعد ونظم وبروتوكولات يتبعا ..

طالب ثانوي

13 سنه ويقولون صغير ولما يصير 14 بعد صغير ولما 15 بعد صغير
انزين متى بيكبر اذا اهله ما عرفو يربوه فالمشرف يعرف يربي ويهذب الطلبه و المشرف لن يفصل طالب تعسفاً.
فقط تكبير للأمور وعشان يربحو القظيه لو يحللو الموضوع ترى الطالب الصغير على قولتكم 100% مسوي غلط كبير وعرفو الاهل وصارت الطحنه على راس الطفل الصغنون رااح وانتحر
وارد اعيد واكرر المشرف ما يفصل مني والطريق هيهيات .
والمشرف هو الوحيد الا مايحمل عداوه ويا طلاب قسمه اي مشرف في الحياة حتى لوكان ظالم مايفصل مني والطريق
13 يعني كبير

غموض

ان الفصل أمر اجرائي يقوم به المشرف ان ارتكب الطالب اية مخالفة تدعوا لذلك’’ فلا اظن ان الامر بسيط حتى يستدعي الفصل والا لم قام المشرف بهذا الامر
شكوى ولي الامر قد تكون غير مبررة
ثم هل يمكن للمشرف ان يقوم بفصل الطالب هكذا دون علم الادارة ؟
الامر غير واضح

مدرسة متمرمرة و شبعانة بندول

واجد ضخمتون الخبر البندول ما يقتل بالعكس يمكن ايخلي راس هالطالب ايخف واللة العالم الحق و ي من والله يهدي الجميع

فصله مشرف المدرسه

والله زمن مر كلمن قعد على كرسي حسب روحه ملك كرسي الاخرة المفروض على المدرسين يراعون ضروف الطالب مثل المهزله الي تصير في مدرسة اذ احط مدرس على طالب اتقفو معضهم وقصفو الطالب

في الأمر سر فلا تستعجلوا !

شكله الموضوع فلم من تدبير الأسرة لإحراج المدرسة ويبدو ان الإخراج من ولي الأمر وبطولة الأب .. ويبدو ان قضية الطالب كبيرة مع ولي أمره والا ماذا يعني لجوئهم للوزارة لحل المشكلة وليس للمدرسة !! يبدو ان الموضوع أكبر من سطور الخبر ويحتاج الى تمحيص وتدقيق ودراسة كافة جوانبه .. وكثير من هؤلاء الطلبة ما يكونون من اصحاب الملفات السوداء : عدوانية .. تدخين .. تحرش جنسي فلا تستعجلوا الحكم على المدرسة وهذا من واقع خبرة معاناة ابنائنا مع امثال هؤلاء الطلبة الذين لا تستطيع المدرسة اتخاذا اي اجراء تجاههم

الله يعين

على قولة المثل، لف صبعك وكل من راح ينعت لك دواء، الحين ما أخذ الناس الموضوع من كل جوانبه والكل راح يفتي، طيب وين تتمة الموضوع، أول مرة أسمع فصل من غير سبب، يا سلام على مدرسة تفصل طالب بغير سبب، وين اللوائح والأنظمة، ليش هذا الطالب بالذات؟ والباقي ليش ما فصلهم المشرف؟ هذا الطالب زايد عنده؟ يا جماعه حابين تعلقون أقترح عليكم تكتبون موضوع وترسلونه بكشكول الجريدة أفضل من تعليقاتكم اللي تظلم المدرسة بدون وجه حق قبل ما تعرفون سبب الفصل من وجهة نظر المشرف أو المدرسة، المدارس متأذية بسبب هالأشكال

يما يما بطني يمة شبي بطني

انة اكول المشرف ينفصل احسن بس لانة مشرف ما ينفصل الجابة يكدر يجيب غيرة

مدرسين غير مأهلين

اذا كان مدرس وماشاف روحة الى مشرف وهوا غير ماهل بيتخذ قرارات غير منصفة في حق اطفالنا . الي تخصصهم مشرفين اكوا عاطلين عن العمل شغلوهم

زائرة31

اي والله قهر اني مدرسة بناتي المعلمات على راحتهم يتاخرون عادي ويغيبون بعد عادي بس الطلبة كل شي ممنوع ما يحاسبون ان ذلين اطفال يمرضون او اني مثلا
اني اودي بناتي المدرسة ومريضة وغابوا 3 مرات زفوهم وفي معلمة تعّيب على بنتي وتناديها باسم ..... مع اني قلت اليها ظروفي وعذرتني ، والمصيبة هالمشرفة كله تاكل ومرة رحنا اليها نايمة وكله تقول تعبانة

مواااطن

هو دائما الطلبة مظلومين
تعالوا يا أهالي الطلبة المدرسة وشوفوا أولادكم شيسون
قلة أدب وعدم احترام لا للمدرس ولا للإدارة ودائما الوزارة تقف مع الطلبة
والمدرس المسكين معه الله فقط
أنا لا أتكلم عن جميع الطلبة حقيقة بعضهم محترمين وخلوقين
لكن يكفي طالب واحد في الصف لكي ينغص عليك حصتك ويجعلك تفقد أعصابك
وأنا هنا أطلب من أولياء الأمور أن يتحققوا في طرد أبنائهم من المستحيل أن يفصلوا من دون سبب كافي أنا أجزم أنه فعل شئيا جعل المشرف يطرده

تابع رد على الله على الظالم

حطموا نفسية ولد أختي بظلمهم فصلوه ظلم وأضطهاد أوما يدركون أن هناك يد أقوى من أيدهم ويمكن يجي اليوم اللي تدور عليهم الدنيا
وتحطمهم وعندهم أولاد والله مو غافل عن كل ظالم. قال رسول "ص" اتقوا دعوة المظلوم فإنها تصعد إلى السماء كأنها شرارة.وقال: اتقوا الظلم فإن الظلم ظلمات يوم القيامة.الحمد لله على سلامة الطفل زين الله سلمه هذا حرام تتحطم نفسيته اللي ما يقدر على تحمل المسئولية يقعد في بيتهم أفضل له من يأذي أولاد الناس لو راح الطفل من المسؤول يا مربين الاجيال؟؟؟

الله على الظالم

قال تعالى: وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ قال الامام علي عليه السلام: اذا دعتك قدرتك على ظلم الناس فتذكر قدرة الله عليك.. طبعاً اني ما اقدر أحكم على من الظالم ومن المظلوم لكن اللي أقدر أقوله ان مدارسنا فيها الظلم الكثير مثل مدرسة .... المشرف والمدير ظلام ما عندهم ضمير قعدوا على كرسي فكروا أنفسهم ملكوا الدنيا بالآخرة ما يعرفون أن هناك من يطلع على أعمالهم! يتبع في الرد اللاحق

القهر يقتل

اني ولية امر طالبة من موحلة الروضة الى يومنا هذا ما تسمع ليها صوت مو عشان بنتي هذا حق وكل يوم المشرفة تهدد مو بس بنتي تعم الجميع واخر مرة متصلة فيني المشرفة وتهددني اني شخصيا كانت بنتي متاخرة الساعة 7 وربع يوم توصل المدرسة و ابوها موصلنها مو متسكعة في هالشوارع و الزحمة 4 مدارس جنب بعض زحمة الشارع تقول هذي 3 مرة تتاخر خلاص بعد غير مرة حرمان من اختبارت نهاية الفصل ليش ما يفكر الطالب ينتحر وحتى ولي الامر مايجن من افعال هالمدارس وتقول لي الحصص كلها غياب ما بداءت الحصة الاولى مو ظلم؟؟؟؟؟؟؟؟؟؟؟؟؟؟

بحرانيه وأفتخر

سكتو سكتو عن هلمدرسه والطلاب اللي فيه كل يوم اشوفهم رافعين البوانطلين الى فوق الركبه ومقعدين عند البرادات ادخنون والجرس اطق ويعجز وطول ما هم داخل المدرسه افلعون المدرسه اللي جنبهم وهي مدرسة ابتدائيه بأنواع الحصى والرمل ومن جم يوم سكبو حبر من فوق سور مدرستهم على أستاذ في مردسة الأبتدائي حشى مو لاد وحوش ولا أحد يقدر أكلمهم حتى الأساتذه أخافون منهم لأن من أحد أكلمهم رفعو ليه الكرسي
دلين لو أنتحرو واجد زين فكونه من شرهم والله خايفين على أولادنه منهم

اعزائي الزوار طفل مراهق 13 سنة فقط

من الواجب على المشرف اعطائه انذار وحضور ولي الأمر .
لا يجوز يفصله بدون علم الأهل .
ثاني شي السبب لم يذكر لعملية فصله اتقومون اتحللون وتحكمون على الطالب والمشرف ليش ؟
ومهما كان عمل الطالب شنيع يجب ابلاغ الأهل .
يمكنن الولد من الشطار وسوه حركت مراهقة ليرضي غروره وزعل على نفسه انه فصل وهو يطمح للأكثر ؟
مايصير يكون هذا السبب بدال التهم الي وجهتوها للطالب والمشرف ؟
اقول اتقو الله ياقراء

والله بلاوي

تعليقات اكثرها ضد الطالب والمضحك الي يقول يعرفه والي يقول مافصلوه من غير سبب اول شي انتون موقاعدين في علم الله حتى لو كان الطالب ع قولتكم راعي مشاكل ليش هالمره مايكون صادق؟؟؟؟ مشكلتكم دائما تنحازون لطرف معين وقبل هذا كله ثبتو فعلا الطالب غلطان خلو موقفكم انحيادي مو انحيازي لاتوقفون مع الطالب ولاتوقفون مع المشرف وقفو مع الحق

عمره 13 ويعرف شلون يخوف الاهل عليه

هذا يا انه ذكي زياده او انه مشاغب زياده
والمشرف لايمكن بيفصل طالب بدون مايخبر اهله المره والثنتين
وثالثا اني اعرف مدرسة عالي ومشرفينها ومديرها من احسنهم في تعاملهم مع الطلبه
لكن الاهل لما يجي المشرف ويشتكي الطالب الله يسامحهم يعطون الاذن السمخه ومايرضون على اولادهم بشي
لو كانوا وياهم في البيت مايستحملون منهم اي حركه سيئه فشلون يطلبون من المدرسين والمشرفين يتحملون كل مساوئهم
الاهل عليهم معظم الحق في تربية ولدهم وزين من المدرسين والمشرفين يتحملون سوء اخلاقهم وتربيتهم

اسمحوا لي لو كان الطالب وأهل الطالب على حق ما كتبوا في الجريدة

ألم يقولوا أنهم اشتكوا بالشرطة ووزارة التربية؟ اذن لماا الكتابة بالجريدة؟ انهم يريدون تضخيم الموضوع ولوي ذراع الوزارة وهم مخطئون ولكن اذا تبين خطأهم هل سيقبلون بتشهير مماثل بهم في الصحف؟ الحين احنا ما انقول (طلاب آخر زمن) انقول (أولياء أمر آخر زمن) لأن اولياء المور هالايام أخس من أولادهم وعلى قولة القايل ما خرب اعبيد إلا أبوه

فصل الطالب بدون سبب؟!!!!!!!1

يعني جاي يتبلى عليه؟ شوفوا ولدكم ويش امسوي؟ لا واللي قاعد ايقول طفل واللي قاعدة تمهس في ان الطفل واللي ما ادري شنو؟ يا حبايبي هذا على باب المراهقة، شوفوا ضارب أحد لو متحرش بأحد تبغون ويش ايسون اليه؟ ايكرمونه يعني؟ ثانيا الفصل من المشرف عادة يكون 3 أيام ولا يكون فصل نهائي لأن الفصل النهائي يكون عبر الوزارة، وفصل 3 أيام هي عقوبة تربوية تنص عليها قوانين الوزارة مو كل واحد منكم ايخور وينجب وايسوي روحه فهيم على هلمخوخ لمصدية ، روحوا ناموا احسن ليكم

والله حالة

الحين هالياهل شعرفه إن كثرة تناول حبات البندول تؤدي للوفاة
ياناس "يرجى وضع الأدوية بعيدا عن متناول الأطفال"

للأخ علي!

أقولك اذا بتتكلم اتكلم عدل او لاتتكلم !! الجاهل عمره 13 وعلى فكره الباندول من أخطر الأدوية في حالات الانتحار!! مو بس لانه احنا تعودنا انه اي شي يصيدنا ناكل بندول عبالك مايسوي شي !
وأقول للوزير أفصل هالمشرف ، مو بس تستعرض عضلاتك على الجامعات الخاصة!

قوووووية

انحار مرة وحدة ما نسيتو ان الي حاول يقتله المدرس المشرف او حاول يفصل راسة من جسدة علمتنا الحياة ان الي يبتلش بأولياء امور مزعجين بهالطريقة يربون اولادهم على الدلع واذا طبقوا اللائح تعال مسح عليه وخله يقعد على راسك ولا تجرح مشاعرة ....صج اولياء امور ما عندهم سالفة

العمر 13 سنة لاكن بعد سنوات سيندم

الكل يعلم بان عمر الطالب 13 سنة واتوقع بعد سنوات سيندم على هذه الفعله لانها فعله قد تدخله النار ,, ولابد هناك اسباب جعلت المشرف يقوم بفصله ولاكن هناك تقصير وعدم اهتمام الوزارة بذلك الشي ولان اي مشرف يقوم بالفصل دون اخذ اذن من مدير المدرسة, والله يكون بعون الطالب والحمدلله على سلامته وانشاءالله تكون عبرة للمشرفين وغيرهم بعدم السرعة في اتخاذ قرار الفصل

من يسمع

الرجاء من وزاره التربية والتعليم مشاهده سجل الطالب السلوكي من المدرسه السابقه .. الى المدرسة الحاليه وبعدها يتم الحكم ..

يا رب انت اكريم

وللمشرف والكادر التعليمي بأكلمه في المدراس ،، اتمنى ان يكون هناك ستراتيجه للتعامل مع الطلبه والأولين يقولون تره اليهال اهم في يدنا مو احنا في يدهم وله طلعت الدنيا وله نزلت تره اهم لينين وسهلين ونقدر عليهم

العام الماضي سوه مشكلة اخلاقية وضع تلفون نقال سرواله الداخلي واتهم عدد مدرسين بالتحرش به اثناء ملاحظتهم للتلفون

العام الماضي سوه مشكلة اخلاقية وضع تلفون نقال سرواله الداخلي واتهم عدد مدرسين بالتحرش به اثناء ملاحظتهم للتلفون

الطالب مشكلجي

الطالب يا جماعة مشكلجي ولو عندي صورة له طرشتها لكم

وش هالخبر ياوسط

الله يساعد المدرسة على مثل هالاشكال من أولياء الامور....واضح ان هناك عدم دقة في نقل الموضوع ...صدق اولياء امور تبط الكبد

الطالب المهزلة

هذا الطالب اعرفه عز المعرفة وكل المدرسة تعرفه صاحب بلاوي ومصايب لو اقول لكم وحدة من هالمصايب جان طالبتو بترحيله عن البلد

الطالب سيء سمعة

ينبغي على كافة القراء أن تتحرى الدقة أثناء ردودها لا سيما إن في الحالة هذه عدة أطراف إذ الطالب المعني سيء السلوك ومتأخر دراسيا بما يجعل الأمر بحاجة إلى تمحيص دقيق.

يا رب انت الكريم

اشوفكم كلكم قمتون على الطالب ويعني المدرسين ملائكه يعني كلهم ،، وتره لو اهو طالب مهمل وله عنده هدف جان سيده على طول في الشارع وله يهمه شي ،، يمكن هالطالب لا اله مهتم في الدراسه وتره هو مو معصوم لو تأثر وبلحظه طياش اليهاله بلع له حبوب ،،، هدنتون كبار وكل يوم سوتون ليكم فعله اليهال ما يسونها والحين انهدتون على هالياهل ،، حطو في بالكم احنا في الزمن الضعوطات حتى وصلت للياهل اي عمره سنوات قليله مو بعد إله 13 سنه ،،،
الله يهدي هالطفل ويهدي سره ويساعد اهله على تعدي هالساحبه من عليهم

زائر 13 هههههههه

السالم عليكم ضحكتنى من الصبح بس تدرى صح لسانك اخر زمن الناس ناقصه تفصلونهم من المدرسه بعد جذى جذى مو محصلين شغل اه حسبياالله ونعم الوكيل مو من حقك يا اللى مسمينك مشرف انك تفصل الطالب فاهم والله افهمك

اي والله الله يرحم ايام قبل

ايام قبل
الطالب: السلام عليكم أستاذ
المدرس: آ يا قليل الحيا!! شايفني اصغر عيالك تسلم علي؟
ويبدي زورو يشتغل بالعصا وبالعقال والترفيس
المدرس: طلعوا الكتب باشوف الواجب.
الطالب: أستاذ انا ما عرفت أحل الواجب وهذي ورقه من عند ابوي يقول لك ان حاولنا نحله وما عرفنا لان بصراحه آخر نقطه في السؤال مو فاهمنها
المدرس: .......... أنت وابوك وورقتك شايفني بنك جايب لي ورقة؟؟ عطني ايدك باشوف تنسى حرارة العصا مثل ما نسيت الدرس؟

تربية وتعليم

مهما كانت الاسباب لا يحق للمشرف او المدرسة فصل اي طالب او طالبة الا باستدعاء ولي الامر واطلاعه على الموضوع والوقوف على الاسباب

معلم

يا سلام على دلع اولاد هالزمن الله يرحم ايامنا وبســــــــــــــــــــــــــــكم د لــــــــــــــع

همسة لطفل و لمشرف وزارة والأسرة والى مجتمع بأكمله

قرأت موضعك ولكن حزنت على حالتك لماذا هربت من موقفك انت استسلمت ولو انك كنت مظلوم الله يراعك سؤال . لو مت في هذه لحظة مصيرك جهنم هل تحب جسمك يتعدب ام ماذا ولو شفيت سوف يحاسبك الله على فعلتك ولكن غفار الله يغفر ذنوب جميعها ونتمنى أن يغفر لك الله اما مشرف ان بمنزلة معلم ولديك حقوق يجب ان ترعاها اما الأسرة هي كيان مجتمع . مسخرة .حياة انتم لا تعلمون معنى الحياة وهذا مؤسف جدا .

عيل شنقول احنا المدرسات والمشرفات في مدرسة الخوارزمي : بعض الطلبة المفروض يتم نقلهم لمدارسي بنين ولكن الوزارة عمك اصمخ

الله يهداهم 7 - 8 من كل صف مخربين على باجي الطلبة و لا تقدر المعلمة تشرح ولا تفهّم الباجي!
أصلاً المفروض من يخلصون نظام فصل على طول يكونون عند مدرسين!
لكن شنقول!

!!

ما اعتقد تناول البندول يسبب الانتحار ول و كان بكمية كبيرة .. صحيح انه راح يسبب مشاكل في بعض اعضاء الجسم لكن انتحار "نو واي " ... و ما اعتقد ان المشرف قام بفصل الطالب بدون سبب ,, لابد من وجود اسباب مقنعه

ويش اقول ويش اخلي

ادنيا عجائب وغرائب

لو ولدهم ويش سوا

في هالسن عليهم يصبروون وما صاروو مشرفين الا هم كفء للمهمه مو بس للمعاش لااااا

الحين لو راح هالجاهل منهو بعوض اهله بقول مادري ومادري لكن الحين الفصل يستاهله المشرف

حرام والله

ليش يفصل عمره صغير انا معلمة وأرفض هالتصرف صحيح هالجيل تعبان ومشحون عنف وقلة أدب بس هذه سمة العصر بالنسبة لهم كل جيل له مواصفات إنجان خليتوه يولي بمشاكله لازم وزير التربية يحط حد للفصل ويمنعه منعا باتا هذيلة في سن حرجة ويقومون باي حركة بدون تعقل فاتقوا الله ياقراء وتخيلوا هالولد واحد من أبناءكم فهل ترضون هذا الكلام عليه وانتو لم تعرفوا أصل القصة وماهو ذنب الولد .. أطالب بالعفو عن هذا الطالب وأكيد المشرف مابيده حيلة بس لا تتسرع في الحكم كونك مشرف حتى لو شفت بعينك مهما يكون هذيلة في سن مراهقة

حسبي الله

خافوا ربكم هذا جاهل عمره 13 سنه
وقرار الفصل ليش .في اجتماع مع ولي الامر احتضان الطالب قد يعاني من حالات نفسية يتم علاجها
قبل ان نقول كلام هجومي نحسب حسابنا في كلامنا

هذي حركات مراهقين((نويدراتي))

الصراحه الطالب واهله أذكياء عرفوا كيف يحركوا الموضوع لصالحهم .... والا المشرف لا يمكن أن يفصل طالب من غير أسباب واضحه كما يدعون.
المفروض يكون في سجن في كل مدرسة مو بس مدرسه الرفاع الشرقي لان السجن على الاقل يعلم الاولاد حدودهم لان المدرس صار في هالزمن
بدون قيمه وبدون احترام وكل هذا من جاي من قرارات التربية المقيدة للمدرس في التعامل مع الطالب.

ستراوي

اتمنى ان يفصل نهائيا من المدرسة ويحول للطب النفسي، المكان المناسب لهذا المريض العقلي قبل ان يؤثر على زملاءه

علي

تناول أقراص البندول بكثرة لا يؤدي للوفاة قطعاً، إلا إذا كان قد تناول أكثر من 8 حبّات في مرة واحدة فحينها من الممكن أن تحدث مشاكل في الكبد.. فالرجاء عدم تضخيم الخبر

حالة اجتماعية مزرية

المدرسة ما هو إلا أنموذج مصغر من المجتمع ، ومن السهل جدا معرفة الحالة الاجتماعية والاخلاقية للمجتمع بدراسة حالة المدارس ، والاخوة في الاشراف الاداري يموتون ويحيون ألف مرة يوميا لأنهم بين مطرقة المهام الجائرة وسندان الطلاب الذين بحتاجون لرعاية اخلاقية بالاساس بالمنزل. ان جزء غير قليل من العائلات البحرينية تخلت عن دورها في تربية أبنائها وأهتمت فقط برعاية مشربهم ومأكلهم ولبسهم بسبب صعوبة العيش وضنك الحال مع الرواتب الضعيفة، لا أقول الا إنا لله وإنا اليه راجعون لأنها مصيبة حقيقية.