قصيدة موجهة إلى الشاعر محمد بن جاعد الظفيري

يا محمد الرابح تراجع للفلس

فازت بها يا صاح ناس مفلسه

يا ويح قلبي كل ما زاد الغلس

قامت تضاعف بي هموم مرمسه

يا ليت للشعّار ضباط وحرس

وإلا قضاة للنشيد مسيّسه

حتى تفرق بين شعّار الهلس

ناسٍ لك الله بالقصيد مهلوسه

كل على الشعّار قال انه درس

لا من بدع بيتين قالوا مدرسه

تضحك له النقاد لا منه جلس

أنا أشهد إن بعض الرجال مكيّسه

يعد شطر البيت ويجر النفس

ياتيك في مظهر نعيم ملمسه

هذا زمان كل ما فيه انتكس

شوف الأوادم كيف جات منكّسه

الصينعاتي صار حيال الفرس

يمشي على البيدا وكلّه غطرسه

أقطعك يا وجه الزمان اذا عبس

يذلل الرجال ثم يفرسه

-----------------

صابه هوس

رداً على قصيدة الشاعر راشد بن ناصر بن زميع القحطاني

شعر – محمد بن جاعد الظفيري

الشاعر اللي ما كتب بيت بحدس

الله عليم في شعوره واحدسه

واللي على بالك يا بوناصر همس

بان المرض على الوجيه المعبسه

يا للأسف حتى الشعر صابه هوس

من كثر شعّار الفلس والفلفسه

قام ايغنج لا عد شعره وانحمس

دنّع براسه قام يفرك محبسه

مره صرخ مره هدى مره رفس

مره بكى مره ضحك في بسبسه

كنه يمثل في مسلسل مع دلس

لا طير عيونه وارخى بنفسه

ساس الخلل يا صاحبي ما هو نحس

نقادنا يمشي بوجهة ريّسه

لا جاك تارس بطنه بأكل العدس

غرك بشكله قبل كشخة ملبسه

بعض البشر مفروض تربطه بمرس

ودّك تكسّر فوق راسه مكنسه

إن أصبح الصانع على المجلس رنس

لا بارك الله من جلس في مجلسه

والحر الأشقر يوم ما راشد خنس

قامت تخيفه يا بوناصر قبسه