ابشري بالشعر يا شيخة دواوينه وتاجه

لو طلبتي شاعرك يكتب لك امن أزرق وريده

بس انا لاجيت اباكتب ينشغل بالي بحاجه

كيف أبكتب بك قصيده توصفك وانتي قصيده

لك دلال الشعر وغيابه وتعقيدة حجاجه

بك تغليه وجموحه وابتسامته العنيده

لك حضور النور والفجر وتفاصيل انبلاجه

اسمه ورسمه وذعذاعه وطلاته وعيده

تذهلين الخيزران بسمح قدك واعوجاجه

تسلبين الريم فزاته ولفتاته وجيده

تشبهين الما ولا انتي الما ولو فيك ارتجاجه

لا تشاقى طفل يلمس صفحته باصابع ايده

لا تزمي الورد في ثغرك ويتعكر مزاجه

من غواية شاعر ما انتي بطفلته الوحيده

واغفري للشاعر المتلعثم ذنوب انحراجه

والله ان الجرح الاول لكن الطعنه جديده

شاعرك ما خاف جرحه ما يخاف الا علاجه

لايريد اللي يقول ولا يقول اللي يريده

ما دخل في سوق الا بعد ما يعرف خراجه

النخل ساسه تحت الاقدام وعذوقه بعيده

ما علينا كلما اشتد البلا قرب انفراجه

طعنة ما تذبح الرجال يا "نوره" تفيده

بعض ما فيني كتبته وان بقى في القلب حاجه

لك على الخاطر كلام ولك على بالي قصيده