طالب منظفو السمك البحرينيون في سوق المنامة المركزي المسئولين في وزارة شئون البلديات والزراعة بتكييف أماكن عملهم لمقاومة ما اعتبروها «نار الصيف» والحر الشديد.
وخلال حوارات مع عدد منهم أجراها برنامج «الناصية» الذي يبث على «الوسط أون لاين» اليوم (السبت) أشاروا إلى أنهم تحركوا عدة مرات فيما كان المسئولون يوكلونهم إلى العضو البلدي والآخر يعيدهم إلى الوزارة من دون جدوى.
ولفتوا إلى إلى أنهم على رغم المبالغ الزهيدة التي يتقاضونها (200 أو 300 فلس للكيلو) فإنهم راضون بقسمتهم، ولكن ما يتمنونه فقط هو تكييف أماكن عملهم لمساعدتهم على تحمل حرارة الجو، إذ بدأ عدد من زملائهم بترك المهنة لهذا السبب. وهذا نص الحوار:
حسين أول شي نرحب بك... كم سنة صار ليك اتنظف سمك؟
- ممكن 20 سنة الحين أو 22 سنة يعني في السوق.
أول ما بديت تذكر في وين كنت تشتغل؟
- في السوق العتيقة اللي برة على الجبرات.
في المنامة يعني؟
- لا أهني قبل ما تصير هذي السوق الجديدة هذي عام 1992 فتحوا هذي.
لو سألناك كم كان تنظيف كيلو السمك؟
- من قبل الكيلو 200 فلس.
والحين؟
- الحين صار الكيلو ثلاث، 300 فلس بس على بعض مو متواصل ساعات جدي وساعات جدي بس أزيد شي 300 فلس.
وأنت بشكل يومي اتجي أهني؟
- أيه بشكل يومي.
يعني ما عندك شغلة غير؟
- لا ما عندي بس أهني.
شغلتك هذي الوحيدة؟
- بس هذي هي الوحيدة.
أنزين وهاني، كم سنة صار ليك تشتغل في هذي الشغلة؟
- أنا صار لي حوالي 15 سنة.
15 سنة ما تشتغل شغلة غير طبعاً؟
- لا، أشتغل بس متقاعد.
متزوج؟
- متزوج.
والأخ... ويش اسمك؟
- محمد حسن
كم سنة صار ليك تشتغل؟
- 22 سنة 23 حتى 25 سنة. قديم.
حسين لو سألناك في هذي الشغلة في هذا الحر وتنظيف السمك يعني ما عندكم احتياجات شي؟
- أكيد نحتاج لكل شي، أول شي مكيف نبي يعني يحوطون أهني ويكيفون لينا أهني واجد ما تقدر تقعد أزيد من ساعة الحر ضارب إلى وين ما تقدر ايدور رأسك وأحنا طالبنا البلدية من قبل أن يكيفون لينا أهني، كله يقولون راجعوا... (العضو البلدي)، ويش يعني ما يسوون لينا شي صراحة... قلنا ليه بس يعني ما أحنا مستفيدين بس هذه كل على ما يرام بس كلام بدون فعل.
يعني أنتون بشكل يومي تنظفون سمك بس ما عندكم شي عن الحر عن المطر؟
- في وقت المطر أكيد يدش لينا أهني ساعات الماي والحر أنت تعرف ما فيه محل يجي هواء حتى هذي مغطية علينا مال حمامات ويش أنسوي أحنا نطالب يعني نبي على الأقل بس تكييف على الأقل نقدر نقاوم في تنظيف السمك ترى أهنا الجو واجد حار ما نقدر أنقاوم أزيد من جدي ممكن بس الواحد بس من يقعد نصف ساعة خلاص يدور رأسه يقول لك أنا بمشي الأول الجماعة يشتغلون حتى إلى الظهر إلى الساعة 2 الحين من يأذن الأذان قال أنا بس في الحر ما يقدرون.
أنزين لو سألتك حسين هل شغلة تنظيف السمك تأكّل عيش؟
- على حسب أنت تعرف يوم اللي فيه سمك واجد نحصل لينا كم ربية وقت ساعات إذا جاء الشتاء ويجي هذا بس يمكن دينارين ثلاثة جدي يعني ساعات نحصل لينا خمسة ستة يعني الحمد لله.
ما فكرتون ترفعون سعر تنظيف كيلو السمك؟
- لا رفعنا ثلاث مئة فلس الحين. أحنا سوينا ثلاث مئة الزبائن اللي يجون يقول ليش ثلاث مئة واجد كل مكان مئتين فلس قلت ليه من زمان ثلاث مئة نسوي يقول ما يصرف يمشي وما يعطونا يروح، مئتين فلس تبون ما تبون كيفكم أحنا نرفض وما نسوي ليه وبعضهم يسوي ليهم.
وتستخدمون شنهو من الأدوات؟
- القدوم، السكين، السفاطة، ناس بمقص، كل واحد ليه خبرته في أي شي يستعمله حق تنظيف السمك، فيه واحد ويانا من مقابة الحين راح المنامة يستعمل بس هو الوحيد اللي يستعمل بالمقص بس الحين الجماعة اتعلموا بعد ناس يأخذون مقص وناس ما يأخذون مقص.
ما فكرتون حسين أن تتعاملون مثلاً ويه فنادق أو شي أن تأخذون وياهم تنظيف الأسماك على طول؟
- لا ما تعاملنا لحد الآن لا ويه فنادق ما نتعامل. لأن ما يتواجد كل في المركزي أهناك يتعاملون وياهم أهني مال فنادق بيأخذون الكيلو بستة لأن أهناك يجيبون هوامير كل مال عمان.
يعني معتمدين أنتوا على المئتين فلس؟
- ثلاث مئة فلس على الأهالي يعني؟
وتنظيف الروبيان بكم الكيلو؟
- نفس الشي ثلاث مئة فلس وبعضهم مثل ما قلت ليك بعضهم مئتين فلس يعطونا. عاد مو الحين، الحين ممنوع مشكلة الحين يصيدونه 300 دينار صادو ناس واجد صادوا واحد أنظف ليه أهني سعودي أخذوا ربيانه قالوا له لو ما أنت سعودي وديناك بعد، بعدين عطوه ثلاث أجياس وأخذوا منه جيس قالوا له لأن أنت سعودي...
مطالبكم في مهنة تنظيف السمك؟
- يطلبون بس مكيف أهني بس التكييف أهني، كل مرة أنقول لهم كل موسم أجي موسم الحر نقول ليهم الشتاء أنقول ليهم قالوا إن شاء الله، إلى متى كلمة إن شاء الله قالوا سوو رسالة سوينا رسالة بس ما لينه أحد يسمع صوتنا.
حسين؟
- والله أتمنى من الجميع يتعاونون ويطالبون بعد هم الجماعة أطالب البلدية أن تكيف لينا هذا المحل يعني هذا الشي ليهم، لو أحنا ما نجي أهني حتى اللي أهني الجزازيف ما يستفيدون، جيتنا أحنا أن ناس يأخذون سمك يقولون لك أحنا ما نبي ألا منظف أحنا لو ما نجي حتى اللي يبيعون ينظرون شوي بس أتمنى من الجميع أن يكلمون البلدية ويساعدون في هذا الشي. وأشكرك وأشكر «الوسط» على هذي المقابلة.
العدد 2843 - الجمعة 18 يونيو 2010م الموافق 05 رجب 1431هـ
ردا على الخفافيش
ردا على زائر 7و10 أنا رجل مسلم وموالي العترة الطاهرة ياخفافيش الليل
الله يعطيكم الصحه والعافيه
الله يعطيكم الصحه والعافيه ويزيدكم من الخير انتم فخر للوطن بتواضعكم وحبكم للعمل
تحية اجلال وتقدير
تحية اجلال وتقدير لكل من يعمل تحت اشعة الشمس الحارقة واتمنى توفير لهم مكان مخصص ولو كان مراوح ذات دفع عالي
المســـــــــــــــــــــــــــــتضعفيــــــن في الأرض
حقيقة أنا بحرانية لكن لأول مرة أرى بحرينيين يعملون بهذه المهنة البسيطة!!!!!!!!!!!!
لكــــــــــــــــــــــــــــــــم الله وكان الله في عونكم
حقا كم أنتم شـــــــــــــــــــــــــــــــــــــــــرفاء وهذا أبلغ دليل على تواضع البحريني وقناعتــــــــــــــــــــه
لعلكم تعتبرون ياأولي الألبــــــــــــــــــــــــــــــــــــاب
أنتم الشرفاء
لكل بحريني وخاصة اللي يعملون بالسوق في ستره أنتم اليد التي يحبها الله ورسوله .وبهذا العمل ارفع لكم القبعه عاليا واشد بايديكم .. وأتمنى لكم الخير وزيادة الرزق ان شاء الله ..
إلى زائر 3
هذا دليل على إنك مو بحريني.. الليي في سوق المنامة المركزي وجدحفص وستره كلهم برحينيين آسف أقصد بحارنه فقط للعلم وهذا موعيب..الكد من عرق الجبين....
عبير الورد
والله كفوا رجاااال والنعم
هاي الشعب البحريني الاصيل المكافح
الي يدور على رزقه بالحلال بغض النظر عن نوع الشغل..
كان الله بعونكم ويفتحها عليكم من اوسع ابوابه
وانتوا فخر لنا
الله يعطيكم العافيه حبايب قلبي
وتحية اجلال لكم ولكل بحريني اصيل فقط
ودمتم سالمين يااااارب
لا لا لا تلموني
العمل الشريف مهب عيب العيب اللي ايمد ايده للناس هاذولا الناس اشرف الناس ان الله ايزيدهم من البركه واجر والثواب العظيم .. الله ايبارك لهم ويعطيهم الصحه والعافيه بحق محمد وآل محمد
مكسبهم جيد
تبون الصج كان لازم الصحفي يسأل كم تكسبون في الشهر لأنه حسب علمي هالشغلة تطلع ما لا يقل عن 500 أو 600 دينار في الشهر
لو كان الزبون الواحد معدله كيلوين يعني 600 فلس وبيجيك أقل شي في الساعة ثلاثة زباين يعني 1.800 في السعة ضرب 8 ساعات يعني حوالي 14 دينار اليوم صافي + أوقات الازدحام وانتو حسبوها.
البحريني البحريني يكسب قوتة بعرق جبينة وليس ؟؟؟؟
البحريني المكافح له الف قبله على رأسة وتحية اجلال واحترام له .............
البحريني البحراني له الكرامة في العيش , يأكل من عرق جبينة وليس من فم لقمة الغير ................
البحريني يواجة المستحيل في اكله الحلال ويناضل براحتة لكسب العيش الحلال.....................
البحريني عاش في وطن كرموا فيه الاجنبي علية ودائما وابدا الولاء لوطنة.
البحريني البحراني يحب وطنة وانظروا ماذا الوطن عمل له .................
اكرم الجنبي والغي حقوق المواطن الاصلي وهو البحريني
تحياتي ام حسن
..
هذا هى الحياه الكريمه التى تتطلع اليها الحكومه
مكافحين ومجاهدين ليل ونهار من اجل لقمة العيش الحلال
بس ما اعتقد ان وزارة البلديات راح تحقق ابسطت مطالبكم لان الوضع اللي صاير الحين من دفان البحار والسواحل هذا يهدد ارزاق الصيادين والبحارة لان هذا اللي يبوونه ولانه معظم وكل البحارة ينتمون الى الطائفة الشيعية الكريمة وهذا اللي حاصل الى اخواننا البحارة من ظلم في حقوقهم وهذي مشكلتهم من زمان ومن زمن قديم بامكانهم ان يحلوونهها ويطورونها ويقدموونها ولانهم متوقفين لسبب واحد ولوكانوا مجنسين خلووهم فووق راسهم ودائما هذي الطائفة الله يكون بعونها تمر بظروف جدا صعبة على رغم مطالبتها بأبسط حقوقها ولكم التحية
كلي فخر برجل البحرين
انا كلي فخر برجل البحرين الاصليين الاصليين احنا لانة الفخر بارجل
غريب في وطنه
اخاف بدل من يكيفون المكان يمنعونكم من العمل بحجة عدم وجود رخصة عمل او حجة اخرى ، الله يكون في عونكم وهذا ما يحتاجه البحريني ان يعيش حياة كريمة
3 اكيد انصدمت
لا صدق احنا ديما انظف سمجنا قبل ما يوصل البيت وهم بحريني ومعظمهم عمل معيشتهم ولا غيرة واكيد تنصدم فانتم من ينادون بأن ليس ناك فقر بالبحرين طز عيونك
في حقهم
الإستجابة يا وزارة البلديات لهذا الأمر للشباب أمر مهم وحسّاس المفروض أخذ أمرهم بعين الإعتبار ووضع لهم مكان خاص و مكيّف ليزاولوا أعمالهم عن نار حر هذا الصيف إرحموهم يرحمكم الله وساعدوهم في قضيتهم ومحنتهم .
علاوي
جزاءكم الله الف خير الله يعطيم الصحه والعافيه او انتمنى ان يتكيف المكان اليوم قبل باجر لو البلديه تبي تكيف المكان تغمض عيون تفتح عيون هدا لو يمني عطوه بيت لاكن بحريني مكيف موحاطين ليه لان البحريني عليه واجبات او اليمني اليه حقوق
حنون بس مجنون
الله يعطيكم الصحه وعافيه او دا قال ستراوي ونعم الحياه او عمل كفاح مو سهر ونوم انا ما في شهر ما اجي فيه ستره انشالله ادا جيت او انا انتمى تتكيفون عطاه بيت لان البحريني عليه واجبات
14نور:: للذين يسألوننا على الدوام ماذا تريدون من الحومة أكثر مما أعطت ؟؟؟
هذا هو الرد عليكم شبابنا يعمل في الحر و العرق وتحت أشعة الشمس والأجنبي أفضل منهم حالاً وعندما نتكلم عن الحقوق يخرج لنا أصحاب العيون المغلقة ليقولون لنا بأن الحكومة قد فعلت وفعلت و و و و ولكنها لم تفعل ما يجب فعله فبلدنا من أغنى الدول في العالم من خيراته التي يستخرجونها من باطن هذه الأرض ولكن أهلها يموتون من شدة الفقر
المواطن
المواطن حاله حال الاسيوي في الاشغال
إلى البلديات
ليش مايعتبرونهم موظفين حكوميين خصوصا انهم صار ليهم سنين في هتاشغلة مساكين ويعطونهم رواتب ويكون ليهم اشتراك في الضمان الاجتماعي ويسوون ليهم مكان عدل يمارسون فيه شغلهم الشريف بظروف أحسن من جذي... المشكلة المسؤولين قاعدين في مكاتبهم المكيفة ومايدرون وش حالة المواطن المطحون اللي يدور لقمة العيش بشرف... دعوة اليهم ينزلون شوي للشوارع ويشوفون معاناة الناس بشكل واقعي بعيد عن المظاهر...الشغل مو عيب لكن العيب انك ماتحصل ناس تقدر هالتعب...الله يعينكم جميع ياهل البحرين الشرفاء الأصلييييييييين وبسسسسسسسس
محمود الستري
انا اقول بس سؤال تسئلة اهل الخليج ؟ في قطري يشتغل سائق ؟؟؟ مو ينظف سمك بعد عندنا ؟؟ او اسال في كويتي يشتغل عامل ؟؟؟ او اماراتي يبيع خضرة ؟؟؟ اتحداكم واحد واحد وانا مو قصدي الاستهزاء بالوظيفة بالعكس الشغل مو عيب العيب هو ان الخير للغير وان الدولة مستحقرة المواطن حجتها تدعم الاعمال والعمالة الوطنية وتراث وهي ماخلت شي في تاريخ الوطن وشتغلت على التجنيس وبدلت الشعب وعزت الاجنبي ورفعتة وذلت اهل الديرة
.. بنين ..
هذا هو حال البحريني الفقير
محتاج الى وسائل بسيطة مثل المكيف ولكن بالنسبة لهم صعب تنفيذها ..
اتمنى وضع المكيفات لهم .. ولو يمشون لهم راتب شهري يكون احسن بعد
رد على زائر رقم 3
ليش ما تصدق انهم بحرينيين روح بس سوق جدحفص وانت تصدق أو السوق المركزي أو سوق سترة شكلك مو بحريني لو بحريني كان صدقت انت الظاهر ما تروح سوق السمج !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
هل انت مسلم زائر 1
اذا كنت مسلم فعرفنا بنفسك يالذي تضحي بنفسك من اجل مصالحك ........
الله يساعدكم الشغل موعيب
الشغله حلوه ومدخوله حلو يعني اصفط الكيلو 200 فلس كم كيلو في اليوم افضل من بيع السمك لانه البيع السمك مايحصل في الكيلو 200 فلس ساعات لاويخسره بعد
الله يكون في العون
وينك يا الممثل البلدي للمنطقة ؟؟؟؟؟؟؟؟؟؟؟؟؟؟؟ بس معاش تقاعدي .
الى زائر 1
انت لا ستراوي ولا مهزي انت من الي هم
ام بدر
والله شباب مكافح بس ياريت من البلدية توفر لهم مكيفات يعني شنو يصير لين توفر لهالشباب متطلباتهم يابلدية انتي موخسرانه شي لان فلوس البلدية موقليله يعني كم مكيف ماراح يأثر على الميزانية
عاشت الأيادي
والله انها أيادي يحبها الله ورسولة "وقل اعملوا" شوفوا ماانتظروا قاموا بأمر العمل الوارد في الآية وانطلقوا للعمل والباقي على الرزاق الكريم ، روحوا عسى الله يوفقكم ويفتح ليكم أبوابه ويرزقكم من حيث تحتسبون ومن حيث لاتحتسبون
شكرا للشباب المثابر لأجل لقمة العيش مع الشكر الجزيل للجدحفصي
200 أو 300 فلس للكيلو في هذا الجو اللهيب وكسر الظهر ومعاناتهم مع اللي يساومونهم و و ...الخ
الله يكون في عونهم ويعطيهم العافية
اتمنى من بعض الزوّار اللي يقول بأن البحريني يبي شغلة نفس المدير وغيرها
خلة يجي يشوف هؤلاء الشباب اللي ما يرفس النعمة وشاكر ربه
إلى المسئولين في البلدية أنتم داخل المبنى وتحسّون في بعض الأحيان بحرارة الجو الحار لهذا نتمنى منكم بمساندتكم إلى هؤلاء الشباب المكافحين لأجل لقمة العيش
يسروا ليهم عشان الله ييسر للجميع
تكييف وراتب شهري...!
لو أن المسئولين في البلدية يلتفتون الى هؤلاء الكادحين ويخصصون لهم راتب ولو رمزي شهري لكان معظم الشباب العاطل تجدهم يكدحون كما اخوانهم ...! أرجو من المسئولين النظر في هذه المسألة..!
لا
هادلين بنغالية مو بحرينين بحريني ينضف سمك ؟ انا في حياتي ماشفت بحريني ينضف سمك هادة كدب وفتراة بحق البحريني وانا الطالب الجهات امختصة محاسبت المسولين عن هادة الجريمة بحق البحريني الشريف.
عوار قلب
جوفو البحرينين شنو يشتغلون هل بالخليج تلقى كدح وتعب مثل الشعب البحريني ليش الظلم المترامي علينا ليش وربي عورو قلبي شتعيش هالمئتين فلس ولاشي بس الحاجة
ابناء سترة مهزة البواسل الشرفاء........
بارك الله في هذه الايدي التي تأكل من عرق جبينها افضل من بعض الناس طول الليل سهرانين واذاجت حزت الظلام الخفافيش راحو يحرقون تايرات في شوارع الديره بسكم حرايق روحوا اشتغلوا بسكم نوم الى حزت الظهر يافاشلين سياسيا واجتماعياودينياوخلقياودراسيا...وللحديث بقية.
مع تحيات مهزي أصيل يتبع قول وفعل العلماء الشرفاء.........