ناشد أهل شابي «امتحان الرياضيات» وزير التربية والتعليم ماجد النعيمي العفو عن الشابين حفاظاً على مستقبلهما بعد أن قررت النيابة العامة يوم أمس الأول (الاثنين) إيقافهما مدة أسبوع احتياطاً على ذمة التحقيق بعد أن وجهت للمتهم الأول الذي انتحل شخصية الطالب تهمة التزوير في محرر عرفي والطالب تهمة المساعدة والاشتراك مع المتهم الأول على التزوير.
وأمل أهل الشابين خلال حديثهم لـ «الوسط» يوم أمس (الثلثاء) أن يتم التعاطي مع المشكلة بحسب وصفهم بحس تربوي حفاظاً على مستقبل الشابين اللذين يواجهان حكماً جنائياً يتراوح ما بين 3 و15 سنة وهما في مقتبل العمر.
وناشدوا الوزير أن يلجأ إلى إجراء تأديبي آخر بحرمانهما أو فصلهما من الدراسة عوضاً عن تحويل القضية إلى القضاء الذي سيضيع مستقبلهما ولاسيما أن الشابين لا سوابق لهما، مستدركين أن الشابين لم تكن لديهما نية التزوير وأن ما حدث لا يعد أكثر من طيش شباب لطالما حدث في المدارس، على حد قولهم.
وأضافوا أن الشابين حديثا الزواج وأن طالب (الفترة المسائية) يتيم ويعيل أسرته، آملين أن تنظر الوزارة إلى القضية بعين الرأفة وتوقع عليهما إجراءً تأديبياً وفق رؤيتها التربوية البحتة.
ولفتوا إلى أنهم علموا بالقضية يوم إيقافهما في الشرطة ولم تعمد إدارة المدرسة لاستدعائهما في بادئ الأمر أو عقد مجلس تأديبي وفق لائحة الانضباط المدرسي في أقل تقدير. وقالوا: «أملنا في شخص وزير التربية والتعليم كأب بأن يحفظ مستقبلهما من تهمة أكبر من ذنبهما».
يذكر أن أحد طلاب (الفترة المسائية) استعان بابن عمته وهو متخرج من الجامعة ليقدم عوضاً عنه امتحان الرياضيات وعند شروع المعلم المراقب للامتحان في التحقق من هويات الطلبة اكتشف أمر الطالب وتم ضبطه وإحالته إلى إدارة المدرسة ومن ثم إلى مركز الشرطة، وبدورها أمرت النيابة العامة يوم أمس الأول (الاثنين) بحبس المتهمين مدة أسبوع احتياطاً على ذمة التحقيق موجه للمتهم الذي انتحل شخصية الطالب تهمة التزوير في محرر عرفي، أما الطالب فوجهت له تهمة المساعدة والاشتراك مع المتهم الأول على التزوير.
العدد 2826 - الثلثاء 01 يونيو 2010م الموافق 18 جمادى الآخرة 1431هـ
هذا يسمونه عدل بالله؟
وش هست 3 إلى 15 سنة وذاك يقتل آدمي ويطلعونه عقب 3 شهور؟
أقووول..
"" يريد الشيخ معاملة خاصة لأحد أقاربه في السجن، أن لا يلبس ملابس السجناء وأن يقوم بأي عمل وأن يصله الطعام من القصر! يبدو بأنه قد نسي بأن الرجل كان مدانا في جرائم قتل. بالطبع فهذا لن يحصل "" ....... واقروا بقية مذكرات بلغريف
شنو هالاحكام والله ما يسوى عليهم هالفقاره
جرايم وفساد ودعاره في البلد وبوق عين عينكم وجت هالفقاره غلطو عاقبوهم عقاب بسيط وبعدين سامحوهم ما قتلو قتيل ابوي ما يقدر الا على امي
لانه.....
....... ما اقول الا الله يفرج عليهم وكفو عليش يا زينب التاجر اتمنى توصلون رسالتي لزينب التاجر بالذات لانها تقدر تحرك القضية وتحلها
خطأ ولكن
اللي قام به الطالبان خطأ واضح جدا ، ولكن الكل يعلم إن المدارس متروسة غش وخصوصا مدارس الأولاد ، هذا الموضوع موضوع تربوي فلماذا مكبرين المسألة ومسوين ليهم محاكمة ، ممكن ترسبونهم في المادة أويفصلون فصل تأديبي مؤقت ، ليش هذا كله ؟!!!!! .
حلال عليكم .. حرام على غيركم ؟؟
الله يساعدهم وانشالله يفرج عنهم وتكون العقوبه اخف والشي الثاني الحين دلين اول ناس ايغشون يعني ؟؟ الغش في كل مكان حتى في الوزارات فيها غش وفي كل مكان
عبير الورد -- الى الي رد علي زائر38
انا اعلم بماهم عليه بانهم حديثي الزواج وانما قصدت بالمراهقين انهم فعلوا شيئا ولم يدركوا عواقبه ولم يكونو بوعيهم. بحجم المشكله التي سوف يقعون بها وبما يسمى طيش شباب هذا مع شكري لك وتحياتي
مشكل عليكم
مشكل عليكم يعنى بس ان تم تتفوقون في امتحان الرياضيات حتى لو كان صعب
إلى عبير الورد
يقولون لج متزوجين وعندهم عيال تقولين مراهقين يمكن قصدج تصرفاتهم تصرفات مراهقين .لا وواحد منهم جامعي .
افراج قريب انشاءالله
ياحبايبي خلو عنكم الشماته
صح الغش حرام بس لابد الواحد يحتاج في المتحان المساعده
بس هم ماعرفو يلعبون الدور صح
وليش الطالب مارح اهو يقدم المتحان وحته لو مايعرف الساتده مايقصرون يعلمون لانه معضمهم اجانب ويبون يطلعون من وقت لانه يروحون في باص الوزاره ويبون يمشون ابسرعه من جدي يعلمون ويبونك اتخلص ابسرعه علشان يفتكون منك وانه طالب واشوف بعيوني
بس لطالب الوزاره تنضر في موضوع المدرسين الجانب الصراحه واجد يتلعبون في المدارس واجد غلطون على الطلبه وقولون كلام ماينقال بس شزفو حل
عبير الورد
والله حراااام العفوا عند المقدره شنو فيها اذا سامحتونهم
حرااام يضيع مستقبلهم بسبب غلطه بالامكان اصلاحها ومهما كان هم مراهقين يعني تعاملوا معاهم باسلووب حذر ومنطقي لمصلحة الطرفين اعتقد كلنا غلطنا في عمرهم ومانحب نكون في موقفهم ذي
الغش جريمة
اقترح اي واحد يتم اعدامه رميا برصاص ولي تلفت بالامتحان يشتقوه انشالله يعجبكم راي
الحق حق
بصراحة يستاهلون ، لو كل واحد بيغض النظر عن الأخطاء إللى قاعدة تصير جان صارت مهزلة ، محد قاله يقوم يزور ويسوي بطاقة بأسم رفيجه ويخلي صورته إذا اليوم سوا جذي بكرة بيزور جواز
والحق حق لازم كل واحد ياخذ جزاه ، شنو ذنب إللي تعبوا روحهم ودرسوا وآخرتها يجي واحد وياخذ الشهادة بارزة ... ترضونها على روحكم أن أحد يخونكم بهالطريقة ؟؟؟؟
وكل واحد وضميره
الحق حق
بصراحة إللى قاعدين يفتون على كيفهم ويقولون حرام وحرام وهذا يتيم وهذا مادري شنو
إذا كل واحد بيتكلم بنفس الطريقة يعني ما سوينا شي ولا أدبنا عيالنا وعلمانهم الغلط
وبصراحة إللي سووه هالشابين مو شي هين يعني يقوم يزور في البطاقة ويحط صورته وأسم رفيجه بس عشان يقدم عنه الإمتحان هذا التزوير بعينة
يا ناس إذا تغاضينا عن الأخطاء البسيطة وسامحنا فلان لأنه يتيم وفلتان لانه فقير شلون بنعيش باحترام وكرامة بين الناس ومع نفسنا بالأخص
آنه أقول صيروا واقعيين وخلوكم مع الحق
أكيد بحارنه
والله مساكين احنه على ايام الدراسه يغشون غش
حتى الا نسبهم في الـ 70 وصلوها 95 وفووووق وتخرجوووا بتفوق من الغششش ومحد صادهم ولا شي
لأنه هم غفور رحيم وغير شديد العقاب
لكن مانقول الا الله يفرج عنهم
زائر 16
قص عليهم إبليس عيل يا وزارة التربية عاقبي وجني إبليس حتى مال غسيل الأموال و ك . ق واللى أعتدى في عالي على طفلين و غ .ن و غيرهم كلهم قص عليهم إبليس ......تره إبليس بيشيل ذنوبه وذنوب البشر الأباليس
نطالب بتوقيف الفتّان اللي فتن عليهم!!!!
لأنه لا يرحم و لا يخلي الناس تبوق؟؟
الديرة كلة مبيوقة ويش فيها لو أنباقت نتيجة ؟؟
و الغشاشين تارسين الديرة و على رأسهم تجار كبار؟؟؟مو السالفة الفقير ممنوع من كل شي بس الهامور له كل شي؟؟؟
طنّش ........ تعش؟؟؟!
رد على والله مصخره
سلام الله على الناس اله في قلبهم رحمه مذهبنه اله تتكلون عنه احسن مذهب في كلشي الحمدلله كفايه علينه شيوخنا لكن اقولكم اتقوا الله في كلشي العفو عند المقدره يعني وايد فضايح في الديره حبكة على غلطه سوها طالبين من غير تفكير لازم كلنه نوقف يد وحده نطالبهم انهم يلتفتون الي سالفة التجنيس وبلاوي ثانيه مو طالبين تفكيرهم سطحي سمعتي يا والله مصخره واسمحوا ليي اقول الاسم لائق على اسلوب الكلام
بحرانيه وأفتخر
بااااااال حرام صدق على الاقل صطروهم وهدوهم بس حرام هلاحكام
عبدالله
هل هذا اسلوب تربوي يا وزارة التربية والتعليم ... لماذا هذه الازدواجة في المعاملة .... لماذا يتم السماح للمجنسين الذي اعتدوا على المواطنين من مدرسة الرفاع الشرقي بالضرب المبرح باداء الامتحانات مع انهم قاموا بجريمة كبيرة وهو الاعتداء على سلامة الغير واحداث الشغب والفوضى والتكسير والتخريب في المدرسة ؟؟؟؟ لماذا هذا الاسلوب ؟؟؟ هل انتم تربويون ؟؟؟ ان اشك في ذلك اشك !!!
صدق الحركة مو عدله بس مو اول ولا اخر ناس!
الحركة صج مو حلوه بس صارت مئات المرات من قبل وشفنا وسمعنا ومو بس في الثانويه حتى في الجامعة ... يجب معاقبة الطلبة نعم بس مو 3 مادري جم سنوات .. اشلا!! تلاقون الطالب عجزز مو مقادر ينجح في هالمقرر...نجحوه يا اخي وخلوه يتخرج .. وثانياً هالديرة مافيها شده الا على قضايا من هالنوع اما قضايا فساد وسرقات من قبل مسئولين ووزراء محد يقدر يفتح فمه بكلمة...
المشتكى لله
الله يفرج عنهم
مساكين ما تسوى عليهم ، ألحين النيابة نست الهوشة اللي في مدرسة الرفاع ودارت حق هالفقارة . ساعات الانسان يخونه التصرف ويقص عليه ابليس. الله يفرج عنهم يارب
توجد قضايا اكبر من هذه ولا احد يدري..
بل ما تسوى عليهم, واحد قدم عن الثاني الامتحان ودخلوه مركز شرطة!! وقضية جنائية تعتبر
الحين كل المصايب والبلاوي اللي تحصل في البلد وفي وزارة التربية بالتحديد من قبل موظفينها تمر مرور السحاب ولا رقيب ولا حسيب عليها, اعرف كم حالة في جامعة البحرين تم فصلهم لتدني مجموعهم وتم الاتفاق مع موظفين في قسم التسجيل للدخول على النظام وتغيير درجاتهم وانجاحهم ولم يفصلوا وواصلوا دراستهم, وهذا الكلام عن مصدر موثوق. ولا احد يدري ولا شيء وهذا الموقف اجرأ من موقف تقديم الامتحان بدلاً عن الآخر!!
السالفة ما تسوه توصل الى النيابة
الموضوع طائفي بحت
الله يفرج عنهم
والله مصخرة
غريبة أمر اللي يطالبون بالعفو !!! هل اللي سووه الطالبين شيء عادي ؟
اذا مذهبكم يسمح بالغش هذي شيئ ثاني !!
ما آقول إلا على الدنيا السلام .....
ستــ نور العين ــرة
مرة مرور وقفني لأني طفت اشارة وفي الأساس كانت استعداد للتوقف لكن المسافة ضيقة بين الأشارة والشارع ما قدرت اوقف "اشارة النبي صالح" وتناقشت معة في الموضوع وتنازل عن المخالفة من جهتة ومن جهتي وعدتة بأني ما اكررها مرة ثانية وصادف هذا الموقف لي مره ثانية بعد اسبوع بالضبط في نفس المكان لكني توقفت ومع الأسف نتيجة توقفي شفت روحي في السيد الثاني بسبب سائق هندي وراي كان مسرع ودعمني
الله يفرج عنهم وعن الجميع
ستــ نور العين ــرة
ليش بعض التعليقات قاسية
وين الرحمة ليش انمحت من قلوبكم
بالعكس لو سامحوهم وعطوهم تعهد بعدم الرجوع مره ثانية لهذه الأمور يكون عطوهم فرصة ثانية وعدلوا من اخلاقهم بعد وبيكون درس لهم ولغيرهم
صحيح من غشنا فليس منا
لكن العفو والتسامح يولد في الأنسان الحب وعدم الرجوع للخطأ مرة ثانية
مثال : عندكم أني لكن مو غش
والله ترتره
المفروض المدرسه الا تحل الموضوع ليش المدرسة مو حق تعليم !! لو صارت بس تضيع وقت وفلوس ؟؟
الحين ما صدقو على الله انه هذي مشكله الا يبون يحلونها خلهم يشوفون مشاكل اكبر من هذي لو ما يقدروون ؟؟
الله يفرج عنهم يارب
هههه
الله يرحم هذيك الأيام
صارت لي هالحركه من قبل .... انتحال شخصيه .. و قررت الوزاره تفصلني نهائيا انا واللي معاي .. بس الحمدلله اهلي واهل الصبي راكضوو على الموضوع وسووها سبوع واحد ورسبونا في الإمتحان ..!
حرااااام
مــساكين حالته صعبه هذا اللي يدرس في الفترة المسائية ( يتيم ويعيل أسرته ) ،، حرام عليهم يحبسونه واذا حبسوه من بيصرف على اخوانه وامه
والله يفرج عنه ويكون في عونه
بيسامحونهم عادى
هى حبكت على ذلين الطلاب صار الغش فى دمهم حته الشطار والى شجعم اجراءات الانضباط الى تطبقها ادارات المدارس الى لاتهش ولاتنش
يتيم يتيم يتيم
نداء عاجل, أتمنى من الوزير العفو عنهم والله كاسرين خاطري خصوصا الشاب اليتيم النيابه لازم تفرج عنهم حالا لان في قضايا في البلد اكبر بكثير من هلقضية والموضوع لازم ينحل في الوزارة مو في النيابة هاي رأي والله هو المستعان والله اصبر أهلهم.
مساكين بس أتمنى من الوزارة التشديد على الغشاشين
لازم يعاقبون عقوبة رادعة، بس مو 3 سنوات ولا حتى 3 أشهر.
أتمنى تفعيل لائحة العقوبات للطلاب اللي يسوون ازعاج و فوضى داخل قاعة الامتحان و عدم جعلها حبر على ورق.
الله يفرج عنهم
والله كاسربن خاطري المفروض يحيلون كل الطلاب والطالبات إللي يغشون إلى النيابة مو بس هم
عاد
الحين مابغيتو الفرج إلا من النعيمي ياليت يرتاح ويريح وبعد إذا كنتو من الطائفة المغضوب عليها ابشروا بدل السنة سنتين المفروض من المدرسة تعالج الموضوع بطريقة تربوية بس شنقول في زمن غلب الظلم صدق الطالبين غلطانين بس الرحمة زينة وهاذي شهادة لا تودي ولا تجيب جت على هالفقارة مساكين
نور البتول
ما تسوى عليهم مساكين .. الله يفرج عنهم وعن كل سجين يارب العالمين والله يهدي الجميع
القناص
أنشألله بيطلعون بكفالة اليوم
وش هالحركات والله
من غشنا فليس منا في نتمني ان يتم الافراج عنهم ويتم فصلهم من الجامعه والتعليم المسائي
al qanas
allah yakon fi 3onkom
العفو عند المقدره.
بس لو اعفو عنهم يعتبر ظلم للي انسجنوا ايضا ولا تنسوا حتى لو اعفي عنهم النيابه لن تعفي عنهم وستطالب بالحق العام.الشخر نخر بالانتظار.ولا احد يزعل من كلامي .