يتخلى كثيرون منا عن هواياتهم المحببة بمجرد أن يكبروا ويرتبطوا بمشاغل الحياة، غير أن البعض يظل متمسكاً بهذه الهوايات مهما بلغ من العمر، ويقف برنامج «الناصية» في حلقته التي تبث على «الوسط أون لاين» اليوم مع أحد هؤلاء، وهو المواطن البحريني صالح طارش من قرية بني جمرة، الذي أكد أنه مازال يستمتع بهواية جمع الطوابع والصور المحببة إليه منذ ستينات القرن الماضي، لافتاً إلى أن لديه الكثير من الأصدقاء من جميع أنحاء العالم الذين تربطهم معه علاقة الهواية نفسها... وهذا نص اللقاء:

ممكن تعطينا نبذه عن هوايتك، سمعنا من بعض الأخوة أن عندك هواية قديمة كلش، تعطينا نبذة عنها؟ اشلون صارت عندك هذي الهواية؟

- كانت يعني عدة هوايات عندي، بس ركزت على هواية جمع البطاقات البريدية من الستينات يوم كنت أنا في الابتدائي لين رحت إعدادي والثانوي والدراسة الجامعية وحتى وأنا في الشغل وتزوجت وجابوا لي أولاد وأنا كنت أمارس الهواية هذه، يعني حتى زوجتي مضّايقة من كثر الطوابع والبطاقات والرسائل التي تجيني والمادة التي ادفعها عليها مكلفة ساعات تشتري بطاقات حق تبادل ابهم، بعد عندي هواية تجميع البطاقات مال الهواتف التي تجي عليها الصور وعندي تقريبا بطاقات مال هواتف من جميع أنحاء العالم يعني من الصين إلى أميركا كلها احتفظ بها وعندي البحريني الأولية التي تجي عليها الورود والمناظر المحلية في البحرين هذي تراث ما تقدر تستغني عنه فأحتفظ ابهم بعد.

اشلون جتلك هذه الهواية؟ مثلا شفت الطوابع يوم كنت في الإعدادي وسيده جبيتها أو شنو بالضبط؟

- لا أنا بعد كنت أحب تعرف المراسلة، يعني مراسلة الأصدقاء اتجيك رسالة طوابع جميلة تلفت نظرك فأنت شيء جميل تخسره أو ترميه، فحبيت الهواية هذي مع الوقت شفت ان الطوابع البريدية هواية حلوه، فواصلت عليها يعني.

وهل كانوا وياك من أصدقائك كانوا بعد يجمعون الطوابع مثلا يصير ما بينكم كل واحد أكثر يجمع؟

- يوم كنا في الابتدائي في واحد من الدراز للحين موجود شوف يعني كنا في تنافس يعني الرسائل إللي اجي أكثر أو أنا أكثر، وكنا نراوي بعضنا بعض، فهذي المرحلة اللي مريت بها بالتنافس.

ما صار عندك هواية مثلا غير عن تجميع الطوابع أو خلنا مثلا في الطوابع ما صارت عندك فكرة مثلا إن تجمعهم وترتبهم بشكل معين مثلا طوابع البحرين أتخليهم في البوم معين طوابع الولايات المتحدة في البوم معين، هذه السنة في البوم معين، هذه المناسبة في البوم معين، يعني الطابع عادة يقولون تاريخ، يعني هذه المناسبة العيد الوطني أصدروا هذا الطابع هذا؟

- بديت في الهواية هذه وكذا البوم سويته بس بعدين يشتغل الواحد بأشياء كثيرة، مثلا في الشغل في البيت، العمل الاجتماعي فما يعطيك مجال أن تركز على شيء معين، بس أنا بديت في هذه وعندي عدة البومات مقسمة إلى جميع البلدان حتى البطاقة.

أغلى طابع اشتريته بكم؟

- هو طوابع البحرين مو غالية.

اقصد دولية اللي أجي بعضهم في المناسبات معينة أجي سعرهم مرتفع اشوي؟

- أغلى شي أنا كنت اشتري من مجلة ماجد مالت الأطفال كانوا يبيعون الطوابع هذه وكنت اشتري من عندهم مجموعات كثيرة يعني فإذا أنت تحب شي ما يغلى ما يصير غالي عندك تعتبر رخيص، لو تدفع أي ما تدفع هو يعتبر يعني هو غالي بره بس أنت عندك تستمتع به فما يعتبر غالي عليك.

وهل صار عندك مثلا هواية تبادل الطوابع، في الظاهر هذي قديمه السالفه؟

- طبعا أنا في المقابل كنت أنا أطرش للأصدقاء اللي بره يشترطون أن يكون الطابع بره البطاقه، مو داخل البطاقه، فأي إصدار يصدر من البحرين أول بأول مثلا آخذه وأحطه على طابع على بطاقه أو رساله وأطرشه حق الأصدقاء اللي بره، وهم نفس الشيء يطرشون لي آخر الإصدارات اللي عندهم.

وهل مازالوا أصدقاءك موجودين؟

- الحمد الله عندي يمكن اراويك الرسائل التي احتفظ بها، في بعضها الماء صادها بس من قديم عندي أصدقاء من جميع أنحاء العالم، يعني بس «إسرائيل» طبعا ما عندي أصدقاء لأن ممنوع، عندي مثلاً في بلادين ما سمع بها إلا هو (ماني مور) سمعت ماني مور هذي؟

بس ما زالوا؟

- مازلنا نكتب في بعضهم لما حكيت لهم عن البحرين وجي من البحرين يزورونا ويشوفونا فألتقي وياهم.

هل أولادك صار عندهم هذه الهواية؟

- لا والله مع الأسف يعني أولادي مهتمين بالكمبيوتر والرياضة ريال مدريد وبرشلونة المحرق والأهلي هذه كلها مهتمين ابها.

لو قلنا لك كلمة أخيرة علشان نختم ابها اللقاء بخصوص الهوايات للشباب حاليا؟

- الهوايات الواحد ياخذها على أساس يستمتع ابها بغض النظر عن انشغالك بأي شيء، إذا عندك هواية تحبها حاول تنميها بأشياء واجد بالدراسة بالقراءة، اتشوف لك ناس مثلا هوايتهم نفس الهواية تتعامل وياهم والبحرين الحمد الله الحين في جمعية البحرين للطوابع هذه بعد هم يساعدون اي ناس يبغون ينمون هوايتهم تساعدونهم.