صبَر صبري على صبري وشوقي شب قنديله

يسامر نوري الظامي على دلّة شقا ياسي!!

على ذكر الخناجر.. جفني البارح طعن ليله

شياطيني بكت من دمّها الراكد على فاسي!!

حبيبي.. والجروح اللي بروحك ما لها حيله

إذا ما سقتها يمّي.. وش اللي يحبس انفاسي؟!

قتيل الفتنه «الفتنه» ودمعي ينتخي سيله

دخيلك لا تموت اجروح «جرحي» واشهر افلاسي!!

على سور الكتابه «حرفك» ازدانت تفاصيله

لبسني.. واستلذ المسأله.. واختل مقياسي!!

أقود جيوش هرجي يم صمتك واعبث بخيله

تجندلني عيونك في غرامك وافتقد باسي!!

أشيّد لك مباني من شعورٍ صعب تحليله

أخادع صحوتي واكذب.. أقول ان الجبل راسي

لعنت الدفتر الفاجر على غفوة مواويله

صرخ سطر المصيبه: ما تعدّل طبعك القاسي

رساله للصباح اللي شنقني قبل ما اجيله

تراي من الهباله أربط النكبه على «راسي»!!

عقيمه محكمة حبك.. وعدلك طاح قنديله

تبعثر نوره بساحة ظلامي واشتعل ياسي!