التقى برنامج «الناصية» الذي يبث على موقع «الوسط أون لاين» اليوم (السبت) البائع المعروف بـ «أبوعبدالأمير»، الذي تحدث عن مشوار حياته في البيع، وقال إنه ترك البيع في سوق المنامة بسبب عدم وجود من يشتري بضاعته، ما جعله ينتقل إلى البيع بجوار مسجد «الشيخ عزيز» في السهلة. وعما إذا كان ينوي الرجوع لسوق المنامة مجدداً، قال متنهداً: «الحين ما ضل رزق الى الناس، خدوه دولين هلهنود، ما نقدر انبيع اهناك شي، السوق كله ليهم للهنود الحين». الحاج «ابوعبدالأمير» لا تكاد طلته تبارح زوار مسجد «الشيخ عزيز» كلما ذهبوا للصلاة، حتى ارتبط وجوده بالمسجد وصار جزءاً من هيكلته البسيطة والجميلة التي يأنس بها زوار المسجد. وأول ما يفتتح به الأطفال الذين يرتادون المسجد زيارتهم هو الشراء من «بيعة ابوعبدالأمير». هذا الأسبوع خصصنا حلقة من برنامج «الناصية» للحديث مع الحاج عن ذكرياته وسؤاله عن مشوار حياته وأسباب تركه لسوق المنامة... فكان هذا الحوار:

خلاص حجي عبدالأمير تركت سوق المنامة؟

- هذا أنا اهني الحين (في مسجد شيخ عزيز).

من يوم انت صغير في المنامة؟

- ايه.

وش اتبيع اهناك؟

- فانيلات، ملابس.

عجل من يوم انت صغير ما تعلمت شغلة غير؟

- ما رحت مكان انا، ما خدوني حتى الشركة بعد رحت يوم بـ اربع آنات اشتغل.

تالي اشتغلت في بيع الملابس؟

- اي هناك سوق العتيقة الحين اللي اهني بنوها، هناك، تالي جيت اهني.

كنت من وين تشتريهم انت الفانيلات؟

- من عند التجار، بعد من وين بعد.

وألحين تركت المنامة وجيت اهني؟

- اي.

من كم سنة انت اهني؟

- اجي 7 سنين 8 سنين.

والاول الشرّايه غير عن الحين؟

- الشرايه... اربع خمسة دينار، عشرة دينار ساعات، بسيطة.

وانت الأول اتروح المنامة في ويش، في نقل الاول ما في نقل؟

- لا الاول على حمير انروح، وبعدين اروح تالي چدي بسيارات اصغار، انروح وانجي عند السباحية المحطة ونركب.

اتسمونها السباحية اهني.

- اي هذي السباحية.

لش سموها السباحية؟

- هذي الاول نسبح فيها، عذاري اهني له، هذه اللي اتشوفها البراحة هذي ساب عذاري، اهني الماي الى اهني يطمي علينا، انجي نسبح يوم احنا جهال.

ما اشتغلت في الزراعة ولا شي؟

- اشتغلت في الزراعة بعد كرفوني في الزراعة ما خلوني، انا تالي رحت المنامة، احنا توفى ابونا وبعدنا جهال.

واعتمدتون على نفسكم؟

- قام خالي الله يرحمه «حجي عبدالله الرفاعي» وتالي يوم كبرنا ودانا الزرايع نشتغل انحش، انجز، انسگي، بعدين تمكنا، وطرنا مني مني رحنا المنامة حصلنا بعد بناية العتيقة اللي بنوها الحين 6 طابق.

والتجار اللي وياك تذكرهم اللي كانو يبيعون؟

- اي واحد اسمه عبدالرحيم واحد اسمه عبدالرحمن تجار الأول زينين.

الحين كلهم تفرقوا؟

- ما ضل احد ما ضل احد، كلهم اتنفرقوا، لا اله الا الله، بعد الله كريم ما ضليت الا انا، انا ادنات ساعة ما شي من هذي الدنيا، اقاسي الريح والغبرة، لول انا تحت الدرج اهناك وين مكان الدعيسي دكاني مقابل الجنوب وساعات اجي الفية اهني عند الدعيسي مني عند الشربت رعات الشربت عند عبدالرسول خمدن نسيبنا ما خد رضيعتي هذا عبدالرسول خمدن الله يرحمه.

بس ما تروح المنامة؟

- لين احتجت اروح له.

قصدي تبيع؟

- لا ما بيع اهناك ابيع ويش، الحين ما ضل رزق الى الناس، خدوه دولين هلهنود، ما نقدر انبيع اهناك شي، السوق كله ليهم للهنود الحين، انت شوف الحين ما ميش قليل بحريني الا هناك، ما ميش الا الحلواجية الا اهني الا عند الحلواجي اللي عند عبدالجليل اللي اهني في صوب مقابل الشمال هذا يعطيه العتيق وياخد الجديد.

والسهلة الاول بس الجنوبية ولا وياها الشمالية بعد.

- هديك الشمالية وهذي الجنوبية.

جديدة ولا من زمان بعد؟

- لا هادهم في شارع، يعني الاول اهني هصوب مني ... لبسيتين.... كله نخيل، النخلة قلعة الاول السلوق اسلقون.

السلوق يعني ويش؟

- اسلقون لخنيزي