حديث الذكريات البارحه طفّى وراه شموع

شرب ليل السهر لين السهر جفّتْ ينابيعه

وقف حتى ذوى عرق السهر واذبل وراه فروع

يسوق الهاجس اللي قبل شوفه صعب تطويعه

جلس مثل الكلام بصدر شيخٍ ما لهرجه طوع

(على غير النشاما) قال هرجي صعب تطليعه

وبعد سال المواجه جف هرجه والكلام دموع

يقول اللي شراني بالغلا لا اموت ما ابيعه

وقال القلب حن وحن من بعده ثمان ضلوع

من اول يوم لآخر يوم كفّك طاح توديعه

وانا كثر ارتباكي يوم قاله ضيّع الموضوع

واثرْه الحب هاذي عادته تربك مواضيعه

وانا ما قلت واصل لا تواصل وصلك المقطوع

لَكِنْ حبل الوصل تكفى لا تجرحني بتقطيعه

أبي منك الخطا حتى اعتذر لك والزعل مرفوع

ما دام انه طريق يجيبني لك... حي توليعه

شبيهٍ بالحيا وانا بدويٍ والحيا متبوع

بدويٍ ما اعتذر لو الحيا تبعد مراميعه

وحديث الذكريات البارحه أشعل وراه شموع

وشرب ليل السهر واسقى السهر مالح ينابيعه