الواحده من بعد ظهر انتظاري
أَخَذتِني بيدي وسافرت وياي
ومن شافت عيوني بشاشة مطاري
مدري انا رايح! ومدري انا جاي
سافرت من داري وما كنت داري
ومدري وش اللي كان يركض مع اخطاي؟
ضيعت في زحمة مشاعر/ مداري
والدمع (يت ك سر) على خد ليلاي
المشكلة! وشلون عاشق يداري؟!
ومن كثر ما بي عشق مليان (مخباي)
لو تسألوني جاوبتكم (عذاري)
النخل يدري يوم (وش وش) له الماي
واغصان شوقي سولفت للكناري
عن قلب يخفق لين (تم تم) له الناي
يضج صدري الحين شوق لدياري
وتغص نظراتي واناغي مراياي
اتذكر امي/ والدي/ وصوت جاري
وأتذكر الغالين في جلسة الشاي
قد لي ثلاث ايام تايه... واداري
يا ناس شهديهم؟! ويا ناس شرّاي؟!
من مملكة بحر المحبين ساري
من دار( ابوسلمان) جايب حكاياي
من (500,000) عارف مساري
شايل ورود اشواقهم بين أشياي
لون (المنامه) ينقري في سماري
وبحة هل (الزلاق) بلحان مغناي
طيب (المحرق) نفح ذيك الحواري
من ضحكة الحلوى على رقص متّاي
الكل ايه الكل... والله شاري
الكل وصاني وبحفظ وصاياي
شاقول؟! شحكي؟! (آآآه) يا حر ناري
مدري شقدم! ويش تعني عطاياي؟!
لين المكارم جات صارت جواري
وتقول (ينبع) تاج راسي ومولاي
ومن بعد ما نوّر لقاكم!... قراري
لقلوبكم... شرّاي... شراي... شراي
يسعد مساكم... أنتم أهلي وداري
واهلا وسهلا في فؤادي وحناياي
الشوق (صوره) و... وارتباكي (اطاري)
وشلون بهدي؟!... واهل (ينبع) هداياي؟
العدد 743 - الجمعة 17 سبتمبر 2004م الموافق 02 شعبان 1425هـ
