يقولون المحب أعمى وأنا اقول المحب يشوف

وصبّك من هيامه ما يشوف ألا انت في عينه

صحيح انه تجاوز واطلق النظره وحس بخوف

على حبٍ من أول غربته لآخر عناوينه

غرامٍ جابه الله بالوفا والمذهب المعروف

غدى ملكي وهو يملك يسار القلب ويمينه

ملكني بالعفاف اللي عليه من الستر نفنوف

ملكني بالوداد اللي عليه أهله موصّينه

ملكني واحتواني لين صرت العاشق المكتوف

أحس إني لو أخرج من يدينه طحت بيدينه

ليا غبت أذكره وأوله على شوفه وأجي ملهوف

وحتى لو نسيته يذكر الدم وشرايينه

ولو مره تعبت يقول حاول والتعب مخلوف

معك حتى لو يطول الطريق الصعب ماشينه

هذاك أصل الحنان أصل البياض بطيبته موصوف

تصدق لاجل يرضيني يدوس القلب ويهينه

نوى مره يعاتبني على غلطه وشع كسوف

وعوّد قال: بعض الناس نظراته مودينه

ألا يا اجمل نساء الكون لو مالك علي حلوف

أنا والله وافي بالعهد وانتي توفّينه

ولو ناظرت وامعنت النظر مره على المكشوف

فضولي شين حب المعرفه بالشي في حينه

تراها بس نظره عابره ما الحقْتها بحسوف

أبعرف هو حبيبي فيه بين الناس في زينه

أنا والله مقدر غيرةٍ قامت تلوفك لوف

أجل محقوق لك واللي تسوينه تسوينه

أحبك واعتقد يكفي وغيرك مستحيل آشوف

محبه من محبٍ صرت كل الناس في عينه