ليش تسألني وتروح؟!
ليش تتركني لصلاتي
أتوضّا بالجروح؟!
ما بقى فــ الدمعه عين
ما بقى فــ القلب
نبض من الحنين
لا... ولا فــ الكلمه بوح
آه... وتسأل
هل بقى فــ الروح... روح؟!
من متى وأنا استخير الريح
واتعلّق واطيح؟!
من متى وأنا اتريّاك فــ سطوري؟!
وانت نيمه
فوق
صدر الليل كانت تستريح
اتريّق من كلامي
وأنا اتعشى سهر ليلي جريح
ما بقى فــ الصفحه نور
ما بقى في العتمه
صبح من السطور
آه...
وأنا محاصر مثل عصفور
جدّامي مئة قناص
وجناحي بألم مكسور
آه... وتسأل
هل بقى فــ الليل نور؟!
وين ما اتعب
وأنا دربي طويل؟!
وين ما اتعب
وأنا حملي ثقيل؟!
وين ما اتعب
وأنا كلما بغيت امحي
بدا جرحي يسيل؟!
وين ما اتعب
وأنا كلما نويت اقطف غصن ذكراك
تطلع لي نخيل؟!
هذا شعري اللي كتبته وما كتبته..
هذا عمري لك وهبته
وانت تبخل
حتى بالشيّ القليل
ما بقى فــ السدره ظل
ما بقى فــ الضحكة فل
آه... وتسأل
ليش تقسى هالمحاجر؟!
والمعزه
والمعزه... تصير ذل
آه... وتسأل
هل بقى فــ الروح... روح؟
العدد 729 - الجمعة 03 سبتمبر 2004م الموافق 18 رجب 1425هـ
