طالب عدد من بائعي الخضراوات في سوق المنامة المركزي بالمزيد من الاهتمام الرسمي ودعم مهنتهم التي يقتاتون منها، معربين عن اعتزازهم بهذه الوظيفة التي تربوا وترعرعوا فيها منذ صغرهم، على حد قولهم.

جاء ذلك خلال برنامج «الناصية» الذي يبث على «الوسط أون لاين» اليوم (السبت)، حيث تجولنا هذه المرة في سوق المنامة المركزي، والتقينا بعض المواطنين والمقيمين من الباعة، وكانت حصيلة جولتنا هذه اللقاءات السريعة:

عرفنا باسمك؟

- منصور أحمد عبد علي ناصر

من وين؟

- السنابس

كم سنة صار ليك تشتغل في هذه الشغلة؟

- والله ويش أقول لك ولدي، أنا من فهمت ويا أبويي إلى حد الآن يعني 50 سنة 45 سنة هذي شغلتنا.

يعني شغلتك...

- حيوانات والخضرة هذي.

الخضرة هذي أنت اللي تزرعها؟

- هذي أنا أزرعها.

فيه فرق بين الحين والأول؟

- من أي ناحية تقصد

من جميع النواحي من المشترين مثلاً، من نوعية الخضرة، بعد الأول أفضل لو الحين؟

- والله الأول أفضل، لأن أول عندنا مثلاً دعم من دائرة الزراعة اللي هو الكيماويات هذي، أو مثلاً الرش مال الحشرات، الحين دعم ما فيه، وإن جابوا الدواء ما يصلح، أنروح نضطر نشتريه من برى، فنشتريه غالي. وإن جينا مثلاً في السوق أهني أنت على موجب ما تشوف ما يحتاج أنا أقول ليك، إذا أنت عمال عندك، أجار عندك، عليك عمال كل شي من عندك أنت، وتلاحظ التابل أربعة بربية خمسة بربية ستة بربية، أنت ويش اتوفر؟، فأول عندي أنا أفضل واجد أول من الحين.

قل دعم الدولة إلى المزارع، المزارع مثل ما تقول أول يعني متوفرة أنجيت أنت تعطيني ضمان وغيرك يعطيني ضمان، اليوم ما أقول ليك ترى أحطها على الدولة، حتى أحنا فينا مو أوادم، أنا يمكن أعرف تقريباً يجي 10 أو 12 زراعة متضمنينها ناس ويعطونها الأجانب، فإحنا أبدا من الأجانب، أنت لما تعطيها أنت ولد الوطن اشتغل فيها أنت، ليش تعطيها أجنبي، اشتغل أنت اتعب على روحك، أنا هذا عندي عامل فعلاً لكن العامل ما أهده بروحه، أنا إياه لأن مضرتك أنت مواطن مضرتي أنا واحد، هذا عامل يأخذ معاشه رأس الشهر ويمشي عنك، لكن أنت لاحظ الناس.

إذا أنت جيت أخذت زراعة وعطيتها بنغالية ثلاثة أربعة خمسة وزرعوها وأنت المواطن حطيت أيدك على خدك اتقول له يا فلان أنت ما تزرع عطني أنا المكان، قال: لا، اتأجر ليك القطعة بهالقد، هذا صار الخراب من منهو؟ منا أحنا لو من الدولة؟ منا أحنا فعلاً. وبعض المزارع أقدر أحسب ليك تقريباً 15 أو 20 زراعة هكي موجودة وطلعوا منها أهاليها على أساس بيسوونها بيوت سكنية، عندك البدوية عندك المقسم عندك سيابوا ويش أعد ليك، عندك أبوفور، عندك أرض بكر، يعني ويش أعد ليك، واجد ومستعد أطلع إياك وأراويك قدام أعيونك قدحات موجودة، ماي هكي مهجورة، طلعوا منها وخلوها، وجعفر ولد السموم أبوه خمسة وثلاثين سنة بالضبط أبوه وهو ثلاثين 65 سنة الحين الصبي حاط أيده على خده ويش أيسوي يعني هذا زين؟ ومراعاة ما عدنا حتى أنا بيني وبينك امعزّم بسوي رسالة حق سمو الأميرة سبيكة بنت إبراهيم آل خليفة لأن هذي تقريباً عندها دعم ويانا أو وقفت إيانا، وإذا تكون تشرفنا والله براويها هذي المزارع، جدحات مالهم مهجورة ورعاتهم طلعوهم حق ويش يعني.

انزين أنت بس تزرع خضرة يعني؟

- كل شيء موسم إليه، مثلاً القرعة هذا الموسم اتصير، البوبرة هذا الموسم اتصير، شنهوا بعد، إصير عندنا هذا الموسم البصلة، هذا الموسم إصير تقلعها يعني.

يعني أنت تزرع وتجي اتبيع بعد؟ أجي بشكل يومي من الضحى؟

- يومياً الليل أجيب خضرتي والصبح أقعد إياها.

انزين وإذا ما بعته وين أتروح الخضرة تخليها إلى يوم ثاني؟

- اللي يصلح ليوم ثاني أخليه واللي ما يصلح أوديه للحيوان.

بس شرايه يعني ما فيه؟

- لا شرايه بعد بالنسبة إلى السوق أهناك فرق واجد، واجد واجد يعني، ضرونا ضر مو اشويه، اللي فتح المشروع هذا ضر العباد وهذا مو زين ولدي، والمفروض أن الوزير يطالعنا يعني برحمة لأن أحنا أولاد وطنه. اتفضل هذا السيد هاك وينه؟ وغيره وغيره؟ أهناك الحركة غير أهني.

يعني أنت تطالب أن يجمعونكم؟

- نفس المكان واجد محترم

ها كنتم برى يعني ما يخلونك داخل؟

- أيه برى، تفضل هذا أنت إذا حران جدي والخضرة تمت ويش إصير ولدي؟ تخمّل لو ما تخمّل عليك؟ ولكن أهناك تمشي حالك، أهناك أجيك بالكارتون يشتري بالكارتونين يشتري أهني أجيك بربية بربيتين وثلاث متى أنت أتخلص هذي؟.

يعني أنت تشوف أن المفروض على الحكومة الدعم؟

- المفروض على الحكومة الدعم لينا، المفروض على الحكومة أتلاحظ هذي الجماعة اللي مأجرين زرايعهم على أجانب أو المفروض هذي الزرايع اللي طلعوا رعاتها وهاكي مهجورة، المفروض الحكومة تحط بالها إليهم، أنا كمواطن ما أقدر أسوي شي، أنا محتمي بالله وبحكومتي، إذا حكومتي هدتني بعد أنا وين أروح؟ يعني باجر لو قالوا أن بقت لا تعايرني خلتني أبوق الحكومة، مو أنا اللي بقت، أما أنا أجيك أنت الحين رجال صار لك ثلاثين سنة في الزراعة وأجارها ألفين دينار أجي من وراك وأضربك وأنت صاحب عائلة وأقول لهم ثلاثة آلالف دينار هذا زين يعني؟ يرضي هذا الكلام؟ مو زين يا ولدي، أنا والله هاكوا زرايع موجودة إذا تشرفونا يعني أنت جنابك إذا تشرفنا ويا أحد من المسئولين والله مستعد أوديك 10أو 12 أو 15 زراعة هاكوا مهجورة والجدحات فيها الماي موجود، أنا أكثر ما أطالب بدعم الدولة إلينا ومراعاتنا في الأجانب اللي يعطون، المواطنين ربعنا اللي ياخذون الزرايع بضمان ويعطون الأجانب، اللي هو الزرايع الخليه اللي بيعدمونها وبيسوونها وحدات سكنية هذا المفروض الدولة توفرها.

أنت شكلك متعلق واجد بالزراعة؟

- وين أروح ولدي؟ بتشغلني أنت؟

لا يعني قصدي أتحب يعني الزراعة؟

- أيه فعلاً أحب الزراعة، لأن أعوذ بالله لو اتصيدنا كارثة يا ولدي ما عندنا زراعة في الديرة. أنت يمكن ما لحقت أنا لحقت، أبويي من نطلع من المقبرة مالت النعيم إلى أن نوصل البديع يمين ويسار مزارع وين راحت ولدي؟ كلها راحت. وين الموميا؟ وين محي الدين؟ وين الطويقية؟ وين دولاب العود؟ وين الحين ما في.

هذي كلها داليات يعني؟

- دواليب مو دالية، مزارع على مستوى كبار مو اشويه، دولاب العريض وين أيصير؟ وين أبوحلاوه؟ وين المقبرة مالت السنابس؟ من المقبرة رايح إلى أن توصل محل سيدعبدالله سبير بارك هذي كلها زراعة الجمة؟ أيه إلا أحين فيها سيد عبدالله هذي كانت زراعة، إلا على يدك اليسار وأنت رايح غرب هاكي لازالت زراعة ومهجورة، وأنا اللي رحت إلى راعيها واحد عجمي قال لا أن بيبسها وببيعها أراضين. هذا زين؟ هاكوا جدحة فيها؟ الفسلة هاكوا سووها نادي، ويش بقى عندنا؟ أنا أقول إذا اتساعدنا بهذا الطريق وأهم شيء تساعدنا في السوق السوق أحنا أهني أنضرينا أنضرينا.

إنشاء الله الوزير وسمو الأميرة سبيكة بنت إبراهيم آل خليفة والمسئولين يسمعون كلامك ومناشدتكم؟

- الوزير والله على عيني وعلى راسي، بس الوزير يبغى رجال أوادم تروح له وتفهمه بالوضع، أنا أخاف منك حق شنهو؟ أنت الله خلقك أنا الله خلقنا، أنت بد اللي في رأيك بس لا تغلط على عباد الله، ابدي اللي في رأيك وخله ينظر الوزير. وليش خلوه وزير؟ لأن عقله غير عقلك؟ تفكيره غير تفكيرك؟ لازم هو تفكيره أكثر من تفكيرنا؟ ما يحكم على عشرة إلا عنده عشرين؟ وما يحكم على عشرين إلا عنده عقل أربعين؟ بس أحنا مو مترابطين في بعضنا بعض؟ في نفس الوقت بس أنضرينا أنضرينا، هذا أنا إلى متى بقعد أهني؟ أكثر من الساعة 12 بغيت؟.

صحيح أنا رحت إلى الموالي سويت إليه مقابلة مسكين الحجي محمد الموالي وبعد...

- من ساعة قاعد ويايي، عنده تقريباً 350 تابل و250 اللي هي ريحان، هذا من أمس صادتها الكرتون والسوق داخل أهني، ويش صارت انخمقت وراحت، يعني تعبته وتعبت عماله راحت مجان، لكن لو برة يضربك الهواء أشويه ولو بعت برخيص لكن حلالك يمشي، ها تفضل هذا حاط أيده على خده، هذا الزراعة مال نوخذاه ويش باع هو من الصبح إلى الحين.

وجه كلمة أخيرة من خلال «الوسط» إلى اللي تبغيه؟

- أنا أقول الله يخلي جريدة «الوسط» بالمساعدة، ويخلي ملكنا إنشاء الله ورئيس الوزراء أن يكون يدورون لفت نظر إلينا، ولا سيما الوزير الحالي الموجود في البلدية أيكون يراعينا ويحسبنا كأولاد إليه أو أخوان إليه أو آباء إليه، ويمدون لينا بالعمر إنشاء الله.

مشكورين

- حياك الله يا ولدي

* ثم انتقلنا إلى بائع آخر، وكان هذا الحوار:

شنو اسمك حجي؟

- اسمي خميس أحمد.

من أي منطقة حجي خميس؟

- البلاد القديم.

من متى في السوق؟

- من زمان.

كم سنة في السوق؟

- عمري كله قضيته في السوق، في الزراعة وكل السوق، هذي شغلاتنا في الزراعة، ما اشتغلنا في شركات ما اشتغلنا.

أنزين من جيت من يوم أنت صغير تبيع هذي الأشياء، تزرعها وتجيبها تبيعها؟

- نزرعها ونبيعها، نزرع صبار، بابية، تينة، كل شيء، بقل، رويد، تابل، اسبنت، گت.

والحين هذي الأيام أيام شنهو؟

- هذي أيام موسم الخضروات التابل وأسبنت ورويد وبقدونس، هذا هو في السوق مشحونة يزرعونه ويبيعون، لصبار الحين موسمه.

وفيه هاكو بذور بعد اتجيب بذور يعني وتبيعها؟

- إيه هذي بذورأسويها، شي أزرعه وشي أبيعه.

البذور اشلون طريقتها اتسويها؟

- أسويها من أمهم، أمها تحبب لها موسم يحبب، قت يحبب، له موسم هذي التابل والاسبنت.

عندك خبرة يعني فيها اشلون اتشيلها؟

- عندي خبرة من زمن جدي وأبويي يزرعون وأنا ربيت وياهم سيده في الزراعة.

تعرفها أن هذي مثلاً محببة زينة وإلا ما عندك؟

- المحببة زينة المحببة أعرفها، إذا وردت أعرف الوردة أنهي بتحبب ليها إشارات ورد.

واتشيلها تيبسها لو سيدي تخليها؟

- تنضج في أمها أول، لين أخذت مازمها في امها أشيلها أيبسها، وبعدين أنظفها. نفس هذا رويد وقت هذا يدقونه لين وزف يشيلونه يخلونه في الشمس يدقونه دق هذا زمن أول، الحين طلعت ليه سيارات ادوسه علشان تسويه بذور.

وتخليه تالي في أكياس وتبيعه؟

- ايه أخليه في أكياس شوي أنبيعه كيلوات أو زمن الأول أنبيعه ربع نبيع أمنان.

وتحصل ليه شرايه لوما في ليه أحد.

- اشلون ما نحصل؟ الأول الشرايه الزراريع يشترون بعضنا بعض، أشيوخ نبيع عليهم بأمنان كت.

انزين ليش ما فكرت اتسوي ليك مشروع مثلاً محل كبير أو شيء لأن هذي الشغلة مو سهلة مو كل من يعرفها؟

- لا الشغلة هذي نحط ليها الأوادم اللي يفهمون ليها، إذا احتجنا لأعمال لو عمال نقاطع ليهم عمال، عمال يمشون شغلتهم يشتغل الأرض ويفصلها شرط عليه يشتغلها ويفصلها ويسقيها لين طلعت قبانية تمام للزرع أنجيب البدر نزرعها قطايع أنسميها، نعطيهم، يشتركون الأول فيها، مع بعضنا بعض رعاة خبرة في الأرض يزرعونها يحرثونها.

وهالبذور علمت شغلتها أولادك لو ما علمتهم اشلون يشيلونها؟ لو ما ليهم في هذي السوالف؟

- الحين الأولاد، الحين الشباب، الحين ما عندهم خبرة، ليش أنا من اربوا في المدارس درسوا واشتغلوا ما عندهم خبرة.

ما تعلقوا في الزراعة بعد نفسك؟

- لا ما نشغلهم الحين، عندنا أولاد كبار صاروا رجال في الزراعة ما يفهمون شي.

أنت بشكل يومي اتجي، حتى هاكوا عندك حليب الظاهر؟

- أيه حليب عندي، حياوين بعد بقر ودجاج.

واتجي من الضحى؟

- أيه الأول أجي من الضحى أجي من الساعة أربع الصبح قبل الأذان ويا الأذان، أقعد وأسوي حليب للبقر أحلبها وأطلع حليبهم وأبرزه.

والحليب هذا تبيعه بكم؟ 300 فلس؟

- الأول أول شيء بعناه بربيتين، الكيلو ربيتين، تالي صار ترقى ترقى ترقى تغير الزمان وصار الشوار والعلف غالي ظلينا نزيد نزيد الحين نبيعه 400 فلس الكيلو.

بس ما تسوي زبد وروب؟

- انسوي ساعات زبد وروب ونسوي دهن بعد.

تعرف إليها بعد اشلون طريقتها اتسويها؟

- يعرفون لها الشغلة، طريقتها هذا الحليب يروبونه يسوونه لبن يطلعون الزبد يسوونه دهن هذا منه، الزبدة الدهنة كل من الحليب.

انزين وإلى الحين عندك زراعة والمحل هذا إلى الحين؟

- إلى الحين.

تبغي توجه كلمة إلى المسئولين؟

- ويش يعني.

يعني بخصوص السوق أهني؟

- السوق أهني أحنا وياهم عايشين وياهم من الأول والحين، وشالونا وحطونا ودونا أهناك وجابونا أهني سنين قضيناها، هذا الزمان يمشي.

مشكورين يا الحجي..

- ما قصرت.