التقى برنامج «الناصية» الذي يبث على «الوسط أون لاين» اليوم (السبت) في حلقته الجديدة لهذا الأسبوع كلا من الحاج محمد المعروف «أبوكرار» والشاب أحمد البدر وآخرين كانوا يتجاذبون أطراف الحديث فيما بينهم وسط «براحة شعبان» في قرية بني جمرة، وكانت الحوارات الآتية:
قول لينا أول شي ليش سموها «براحة شعبان»؟
- براحة شعبان ما عندي انا معلومية عنها بس كنت اسمع انها براحة شعبان واللي دفنها ابوي.
كيف ماعندك فكرة واللي دفنها ابوك؟
- لان انا ما كنت في جيله.
يعني من ولدوك هي موجودة؟
- موجودة بس ما فيها ماء.
اي صوب؟
- اهني مكان السلندر.
بس ما كان فيها ماي، كان اسمونها شعبان، عين شعبان، بس ليش سموها ما تدري؟
- لا ما ادري.
أحمد ما عندك فكرة عنها؟
- لا ولله.
سولف لنا عن هوايتك في تجميع الصور؟
- والله هوايتي هديله.
من متى انت اتجمع صور، من يوم انت صغير مثلا؟
- لا مو من يوم انا صغير من يوم انا في ألبا.
يعني كم سنة صار لك الحين؟
- يمكن 30 سنة.
ليش جمعتهم ليش صارت عندك هذه الهواية؟
- لاني اروح السوق واشوف مناظر حلوة مثل سمو الأمير... مثل... ولي العهد...
لو سألناك ويا هذي الصورة كم سنة صار لها عندك؟
- هذي من ست سنوات.
بس اقدم صورة من متى؟
- اقدم صورة وش اقول لك عين الدوبية، كانت أول مكان...
هذي عيون الدوبية في بني جمرة بعد؟
- لا هذي في الخميس.
من متى هذي الصورة عندك؟
- هذي من زمان بس ما اذكر متى.
من وينا امحصلنها؟
- امحصلنها من بحرين بازار، وهذي.... الهندل، وهذيك باب البحرين وهذيك بلدية المنامة، وهذي شارع نمرة خمسة.
لو جينا لك أحمد بدر، من متى ترتادون هذا المجلس؟
- من فهمنا احنا نرتاد هذا المجلس.
في شنو اتسولفون، عادة ليليا تجلسون؟
- القعدة تكون العصر وفي الليل، والأحاديث تكون متنوعة، رياضة، اجتماعية، ثقافية، سياسية، متنوعة يعني.
لو سألناك عن هواية تجميع الصور لحجي محمد وش تقول؟
- ولله فكرة حلوة وكلمن يدخل المجلس يعجب بها وتحتاج إلى ترتيب...
وشنو اقترحاتك اليه بدل ما هي مثلا تكون يعني احنا شفنا صور قديمة ونادرة شنو اقتراحك اليها انها تكون أكثر تنظيما...
- فكرتنا احنا انخلي الأشياء التاريخية التي تخص البحرين في جهة، التي تخص القرية الصور الشخصية في جهة، ونسوي لها تواريخ، هذه سنة كم وانحط اسماء الشخصيات الموجودة في الصورة.
حجي محمد كم صورة عندك؟
- مجموعهم يمكن 100 صورة، مئة، مئة وعشرين موجودة.
بس انت تاخذهم طبعا تكبرهم؟
- لا لا، من الوسط هديله اي شوف وحدة ثنتين ثلاثة اربع خمس ست سبع ثمن تسع، تسع من «الوسط».
لو سألتك حجي محمد، اختيارك إلى الصورة على اي أساس، ليش انت تختار صورة هالسيارة القديمة؟ على أي أساس انت اخترتها في صور واجد؟
- لان هديله في جيلي، هديله لا، المحاية اللي يسمونها المحاية أول وهديله... بعد شفتهم.
كلها قديمة، يعني من جيلك، عشان چدي تختارها وتخليها عندك، والحين ما تاخذ صور؟ وقفت يعني؟
- ام بلى حق ويش اوقف؟ احصل اصور.
اتحصل اصور بس ما تاخذها؟
- ام بلى آخذهم.
بس مو من جيلك كيف تاخذهم؟
- لا بس آخذهم، لان الحين متجه إلى الاموات كلمن مات حطيت صورته.
يعني هؤلاء صورهم كلهم اموات.
- اي شوفهم 9،8،7،6،5،4،3،2،1 واجد يعني.
ان زين أحمد، ما جت لكم فكرة انكم اتسوون معرض مثلا ان يجون القرى الثانية يعني هذا شيء جميل، ان بحريني اتحصل عنده هواية جمع الصور القديمة؟
- احنا أول شيء يعني هو شوي ما يوافق ان انطلعه جدي نبرزه بس هذه بغصب وافق ان ايجي «الوسط» اصلن، فإن شاء الله يتشجع هل مرة لين شاف روحه في الجريدة مرات الجاية انسوي له معرض في مناسبة يعني.
حجي محمد سمعنا ان انت تتابع الكرة، سولف لنا عن هذا الشيء؟
- الكورة اي اتابعها.
من متى؟
- من زمان بعد.
واتشجع وين؟
- اشجع النادي العربي.
النادي العربي الكويتي طبعا؟
- اي، ومنتخب الكويت.
وتشجعهم بتعصب؟
- لا لا، النادي العربي اي متعصب اليهم.
لو ضيعوا الكورة تعصب خلاص، وتعرف لاعبينهم الاوليين؟
- اي اعرفهم.
من منهم؟
- نسم ما عندي، بس بعطيك باقول لك، لان الضيقة واجد مسيطرة عليي وما اقدر اتحچى.
حاليا وين تشتغل؟
- الحين ما اشتغل متقاعد.
وتفتح مجلس للشباب؟
- اي افتح من اربع ونص إلى تسع ونص ليليا.
وهذي من متى هالسالفة؟
- والله من زمان.
كم سنة صار ليها؟
- واجد يمكن 30 سنة استغفر الله، لان مجلس الاولي بعد كان مفتوح.
وعندك اخوان؟
- عندي واحد سيد فرَدَاني، سيد ماجد اسمه من القرية يشتغل دكتور بيطري.
وعلى ايام ابوك الله يرحمه كان بعد المجلس مفتوح؟
- اي كان هذاك الاول... كان مفتوح أول، بس إذا يوم كلش انهار تبند، أول كان كل الديرة اهناك..... سنتين ما دري ثلاث وصارت نادي.... وتالي اتبندت.
ان زين تذكر بني جمرة الأول يوم انت صغير اشلون شكلها كان؟
- بني جمرة أول اتذكرها أول شوف هذا حدها، هذا التانكي وغربي بيت حجي علي المختار أول كان، أول كان كلش برية، ما في الا اهني الفريق هذا من بيت الملة وجاي چدي.
كان معظمهم ايسوون نسيج، لو في زرايع بعد؟
- ما في نسيج الحين راحو ما في احد اسوي، والله كلهم أول الشياب... ايسوون نسيج.
ان زين أحمد لو قلنا لك، كلمة اخيرة علشان نختم اللقاء.
- نشكر جريدة «الوسط» على هذا اللقاء وان شاء الله بالتوفيق دائما.
حجي محمد وش بتعطينا؟
- بعطيك عن اللاعبين الكويتيين. شوف ابراهيم دريهم.
هدلين كلهم ماتوا بعد.
- اصبر، فاروق ابراهيم، محبوب جمعة، طرابلسي، أبوزينب... عبدالله بلوشي، صباح عبدالله، سعد الحوطي، العبري، فيصل الدخيل.
ولو سألناك حافظ كم بطولة جابوا؟
- اي جابوا في السبعينات جابو النادي العربي جاب، كل البطولات عنده.
بس ما عندك صور ليهم ليش؟
- ما حصلت، الصقر عندي تاخدها بهوس ما يحطون لا، اطريت اللي اروحون الكويت اصبيان دراوزة، بس ما يجيبون.
خلنا نختم اللقاء بكلمة أخيرة حجي محمد.
- كلمة اخيرة اشكر «الوسط» وبالذات اشكرك انت على حضورك وياي والله يوفق الجميع.
الله يوفق الجميع ان شاء الله.
العدد 2773 - الجمعة 09 أبريل 2010م الموافق 24 ربيع الثاني 1431هـ
جمراوي
مقابلة جميله ولفته اجمل من الوسط للحاج ابو كرار، فمجلسه عامر بالاهالي كل يوم
سؤال للأخ الجدحفصي: ليش ما خليت صور للمجلس عشان تبين الصور التاريخية والتراثية التي يمتلكها ابو كرار
وين الصور
ية غريبة مو حاطين صور حتى الواحد مو مشتهي يقره بس اشوه في تسجيل على الاقل نسمع