الطيب صالح
ولدا فالح
من يم ما تبا
وليدا صالح
...
زولا مفضال... مستور الحال
ما بيعرف يقول ده محال
مهما اتغرب ومهما جال
تلقى قليبو مع التربال
...
ترابلة بلدو...
تحت الدومة اتلمو وقعدو
فيهن يونس ود الريس
وداك مريود الديمه مقيس
وداكا الزين زول الله مهيص
...
بت مجدوب ديك حالا براها
مو فهمانى الخبر الجاها
قالو الطيب... نان مو طيب
قامت وقعدت... قامت وقعدت
سرخت نان بالصوت العالى
مالو آناس الراجل الطيب ؟!
....
شان ود صالح قلبو حنين
متحمل آلام الساقى بقالو سنين
شان هى نشافا
نشف قلبو و زادو أنين
....
يسأل نفسو... وين الترباله ؟!
وين يا رب... وين الرجاله؟!
وين يارب... وين الصالحين؟!
وين الفقرا... وناس الدين؟!
...
جاهو الرد من بت مجدوب
شوف آ الطيب... ناسك ديل
ماهن عايشين !!
والزين داك القلبو حنين
جايى يكورك
ديل عايشين... زى الميتين!!
...
فيهن ناسا مرضانين
وفيهن ناسا تجار دين
و فيهن ناس كيفن زاهدين
و فيهن ناسا مو قايلين
يجيهن يوم زى يوم الدين
يوما ينشف فيهو الطين !!
...
و حوضنا الكان دايما رويان
ناشف تب
لا فى مطيره
و لا باجور
حتى النيل
الديمه دميرى
يوم الليلى صبح عطشان!!
...
والزين داك زى الضهبان
يحفر وينقح فى الحيضان
مو قايل
ود حمد صالح بقالو سنين
فى حوش العمدة هناك مرضان!!
...
وناس الحلى اتلمو صباح
بى فقراهن والصلاح
سمو اسم الله وندهو رسولو
يغتى الطيب من كل شر
لامن صادى يجيهن راجع
عاد يوم داك يوم الأفراح
...
وكل الحلى بتسأل... و تسأل
كيفن عاد ود حمد صالح
ياكلو الحوت فى بحرا مالح ؟؟!!
وناس الزين...
وناس مريود...
ود الريس...
و بت مجدوب...
متلمين فى ضل الدومه
راجين جية الولد الفالح!!
...
الكل قام واقف لاحيلو
سمو اسم الله وندهو رسولو
قالو هناك لازم نمشيلو
ولدا مو «مقطوع الطارى»
كل خلق الله أهلن هيلو
...
ود الريس قايد القايدى
وداك مريود جاهن من غادى
وداكا الزين... جارى يخب
تلب فوق حيشان العمده
أول مره يجيهن صادى
...
وبت مجدوب متبلمى تب
عيونا بكن...
دموعا جرن...
على كليمى طلعت خافتى
قالت ديل ياهن اولادى
* شاعر سوداني
العدد 2365 - الأربعاء 25 فبراير 2009م الموافق 29 صفر 1430هـ
