في حلقة جديدة من برنامج «الناصية» الذي يبث كل يوم سبت على «الوسط أون لاين» نلتقي بالحاج عبدالعزيز البني الذي يبيع «الباجلة» والحليب، لنتحدث معه عن عمله وعن أوضاع جيلهم المعيشية قبل عشرات السنين، وفيما يأتي نص اللقاء:
ويش اسمك حجي؟
- اسمي عبدالعزيز أحمد البني
من المصلى؟
- نعم
انزين ويش تشتغل الحين؟
- أنا أشتغل في دكان
ويش تبيع فيه؟
- حليب، لبن، روب، باجلة ونخج
من متى تشتغل هذي الشغلة؟
- تقريبا من 25 سنة
قبل 25 سنة كيف كان شكل المصلى؟
- والله المصلى عاد أحنا لحقنا على أبوتنا يسمونها المصلى
كان كل نخيل؟
- نخيل وزراعة وماي هذا دولاب
تذكر انزين اهني فيه عندكم عين كانت؟
- في ثنتين
ويش أساميهم؟
- وحده اهني قريب الغاز... والثانية شرق...
ما ليهم أسامي يعني؟
- لا والله
تروحون تسبحون فيها؟
- هذي العين يسمونها أم الحصم عين أم الحصم
وتروحون تسبحون فيهم بعد؟
- ايه نسبح فيهم... الحين ما ميش عيون ولا ميش سيبان رمل ولا ميش زراعة... ما ميش إلا الطابوق
الأول البيوت من ويش يسوونهم عندكم؟
- انت جيت مأتم بيت البني؟
إي جيته من قبل
- هذا بيتنا هذا كامل بيتنا
ومن 25 سنة تبيع بعد باجلة؟
- لا... من عشر سنين بس
تركت بيع الحليب؟
- لا الحليب هكو موجود
اشتغلت في بابكو؟
- أنا ما اشتغلت برة أبدا
عجل ويش اشتغلت؟
- الأول فقر... شفت عسكر شفت جو، احنا نروح له على حمير.
ويش تسوون أهناك يعني؟
- نودي خضرة نبيعه... من الفقر ما ميش واحد ما يشتغل من الصبح إلى الليل وما يكد نص ربية، عمي جعفر الله يرحمه يشتغل من الصبح إلى الليل في السقية، شفته هناك هو وكرمكم الله بحماره بـ 24 بيزة.
وكم ظليت في هذه الشغلة؟
- هذي ظليت فيها يمكن 15 سنة
وتالي ويش اشتغلت؟
- تالي -الله يطول عمرك- نروح نقعد بالقضيبية وأم الحصم والجفير والغريفة على حمير نبيع حليب، يعني صار عندنا بعد شوي بقر نودي حليب وغيرها والله يسلمك واللي صار إن الدولاب اخترب ما ميش عمال فيه وتقاسمناه الحين أحنا أربعة اخوان وكل واحد أخذ سهمه...
انزين وتالي اشتغلت ويش بعد؟
- هذي شغلتي
انزين الباجلة من وين تجيبه... لأن أنا سمعت ناس واجد يمدحون في الباجلة مالك يقولون واجد زين؟
- الحمد لله
انزين والحليب أنتون اللي...
- الأول الحليب من بقرنا، وعقب بعناهم ولا أحد يشتغل في الزراعة في البقر
الحين يعني تشترونه؟
- إي الحين نأخذه
تسوون روب بعد؟
- إي أنا اللي أسويه وأنا اللي أسوي الباجلة، أنا ما أحد غيري... صرنا في هذه الشغلة عن القعدة ومومحتاجين لها هم عندنا أولاد يعطونا ولكن احنا قعدتنا في البيت تمرض تكسر...
تحس أيام الأول أحسن لو الحين في البحرين؟
- البحرين الأول أحسن من الحين، الحين خير بيزات وغيرها الأول مو عند كل أحد البيزات... لكن الأول خضرة والدولاب تقعد فيه وتستانس تكيّف تحت هذا الشجر... الحين عليك «إيسيات» الأول أحسن لكن الحين للحياة يعني أشوي يعني...
الأول كل من الدواليب؟
- إي زرايع... الحين البحرين ما فيها ماي... الأول اهني غرب شوي في 20 إلى 30 عين مو 10 لو 20، الحين زمان الطابوق
انزين وحتى الشباب الحين ما يشتغلون نفس شغلات الأول، الحين نجيب صبي يبيع باجلة؟
- الحين ما يشتغلون الشباب، عنده الحين أبوه يدخل له 10 ربيات...
ما يتعلمون شغلت أبوتهم؟
- لا ما يبغونها
يعني انت أخذت شغلة أبوك وأبوك أخذ شغلة أبوه الحين ما يأخذونها...
- الحين ما يبغيها الحين يقول شنو أنا قاعد أبيع باجلة... شنو أن أقعد في دكان شنو أنا هندي أنا أقعد من الصبح إلى الليل في دكان...
بس الشغل مو عيب بعد؟
- عنده هو عيب... أنا أخذت شغلة الوالد
العدد 2766 - الجمعة 02 أبريل 2010م الموافق 17 ربيع الثاني 1431هـ
بارك الله فيكم يا وسط على برنامج الناصية
اي جدي مورايحين لينا الى هنود مال حلاق بابو وما ادري ويش اسمه روحو الى ابوتنا واجدادنا
بارك الله فيكم وحطو البال على البحرينيين أكثر تركو لهنود وانيرو عقولنا بتاريخ اجدادنا الماضين
جدحفصي
ماتقصر جحي عبد العزيز الباجله ناخده كل من عندك الله يطول عمرك
تحياتي لك
الله يخلي البحرين ويحفظ اهلها
ما قصرت يا حجي عبد العزيز والله شي حلو نوقف على ذكريات اجدادنا وابائنا..
خسارة على هذا التاريخ الي بيندثر بدون تخليد لا نعرف قصص اجدادنا ولا عائلاتنا ولا الكتب الي في المدرسة تعلمنا تاريخهم وحتى المساجد ما نعرف شلون انبنت والله حاله!!!
رحم الله والديك على الكلام الحلو وكثروا مقابلات من هذا النوع..
درب الزلق
حلوة المقابلة والكلام احلى
بحرانيه وأفتخر
الله يرحم أيام أول والله يعطيك العافيه وما يأخذك من الدنيا الا ورب العالمين راظي عليك وعلينه يا رب
صباح الخير
الله يعطيك العافيه يا يبه وعساك عالقوة
احس كل دقيقه يتذكر ايامه حتى لو كانت تعب وعلى قولته فقر بس احلى من ها الايام كافي قلوبهم على بعض
الطير الجريح
يا الله على الحوار الحلو والله ترجعك لزمن الطفوله وذكرياتها الله يخليك يا الجدحفصي والله دائما متألق وإلى الأمام دائما واطال الله في عمرك يا حجي عبدالعزيز البني وأنت الصادق زمن أول أفضل بكثير وفيه بركة حتى لو المبلغ ضئيل جدا والحين يا الأبو المعاش ما فيه خير وبركة نفس أول وكله ديون وزمنكم يا حجي مو نفس هذا الزمن الحين الشاب والشابة الأكثرية عندهم هذه الشغله عيب تبع الباجلة والحليب على العموم مشكورين على هذا الحوار الجميل والله تخلون الواحد نفسيتة تكون حلوة من الصبح