مازالت مهنة إصلاح الدراجات القديمة والمتعطلة تجد لها صدى بين بعض الجدران البحرينية، فترى الأطفال يتهافتون على ذلك الرجل ذي الملامح التي تدلل على طيبة قلبه وسعة صدره عبر ملاطفاته مع الأطفال الذين يتعامل معهم كأبنائه، هذا يصلح «البنچر» وهذا يبدل إطار دراجته وذلك يستبدل المقود في حركة وإن بدت بطيئة بعض الشيء إلا أنها تترك لمسة جميلة لواقع قديم مازالت تتشبث به الأحياء البحرينية.
برنامج «الناصية» الذي يبث على «الوسط أون لاين» اليوم (السبت) سلط الضوء هذا الأسبوع على أحد رواد هذه المهنة ليقف معه على خلفية ارتباطه بها... وكان هذا الحوار الذي غلب عليه طابع العفوية:
سولف لينا، أول شي عرّفنا على روحك...
-اسمي السيدهاشم السيدصالح.
من وينه؟
-من جدحفص.
أصلك يعني من جدحفص؟
-نعم أصلي من جدحفص.
وچم سنة صار لك تشتغل في تصليح الدراجات؟
-حوالي 10 سنوات تقريبا، من طلعت تقاعد.
10 سنوات لو أزيد؟
-10 ما هي أزيد، أنا طلعت تقاعد. كان فيه أول واحد غير هنيه، وبعدين تالي استغنوا عنه وألحين طلعت تقاعد وأخذت الشغلة.
يعني كنت في وينه تشتغل قبل؟
-في بابكو.
من هو اللي علّمك تصليح الدراجات؟
-كان من أول يوم احنا جهال نلعب، ونصلّح ويا واحد في جدحفص هناك، نشتغل في هالشغلة.
كان فيه واحد يعني قبل يصلّح؟
-ايه كان فيه واحد يصلّح في بيتهم.
من هو تعرفه؟
-واحد اسمه حجي أحمد، توّفى الله يرحمه.
وتعلّمت منه الشغلة؟
-تعلمت منه الشغلة وتالي يوم اللي هنيه يشتغل يعني اجي وياه العصاري أساعده شوي.
يعني هو بعد نفسه أخذ المحل؟
-لا، واحد اسمه حجي عيسى الأغتم.
ها، يعني المحل من زمان كان لحجي عيسى، لأنه أتذكر يوم كنا صغار كان موجود؟
-ايه كان لحجي عيسى.
ها، فكنت تشتغل وياه؟
-ايه العصاري اجي اقعد وياه العصاري واذا عنده شغل أساعده بس.
انزين وصعب تصليح السياكل والله شلون؟
-لا مو صعب، بس فيه ساعات يصير صعب، فيه أشياء ساعات تصير صعبة، أشغال وساعات ما تصير صعبة، هي قضية بنچر وما بنچر وشسمه تيوب أو تبديل تاير هذا مو صعب، بس تركيب أسيام انسميه، تسوي ميزانية هذا شوي صعب.
انزين وأولادك ما تعلموا هالشغلة؟
-لا لا، أولادي لا، أولادي ولا يجون بعد هنيه.
ما يبغونها يعني الشغلة؟ وأنت انزين إن شاء الله بتواصل فيها بعد؟
-والله هذا احنا قاعدين هنيه كله ولابد ما عندنا شغل، قاعدين هنيه، إن حصلنا شغل اشتغلنا وإذا ما فيه شغل هذا احنا قاعدين هنيه.
يجونك يعني ناس لو لا؟
-والله ساعات يجون ناس وساعات ما يجون وساعات... الرزق يعني على الله، ساعات يصير فيه شغلة وساعات ما يصير، إن صارت شغلة زين، والله ما صارت شغلة هذا احنا ماخذين راحتنا لا علينا أجار ولا غير أجار.
انزين وبچم تصلح عادة السياكل؟
-والله مو واحد السياكل، فيه بدينارين، فيه بثلاثة، فيه بأربعة، على حسب الشغلة.
الأدوات اللي تستخدمها وين؟
-الأدوات سامان السياكل، سباين ما سباين، وتيوبات ما تيوبات، هالاشياء يعني.
وللحين تستخدمون الرقعة إذا بنچر؟
-ايه للحين، بس فيه أشكال من الرقعة الحين، فيه بارد ومال بارد جديه يعني عصارات.
ها، تغيرت يعني عن لوّل؟
-ايه، عصارات، الحين كله عصارات يعني.
لأنه السياكل نوعياتهم تغيرت يعني؟
-ايه، السياكل بعد تغيّرت، أشكال الحين. السياكل كل سنة يطلع لك غير.
وتعرف ليهم؟
-ايه، ويش يبغون بعد!
جم كان أسعارهم سياكل لوّل؟
-أوّل على شسمه، اثنعشر دينار وثلتعشر دينار، كان قبل يوم احنا جهال جديه، وبعدين تالي كلما جاليه يغلون يغلون. الحين فيه ثلاثة وثلاثين، خمسة وثلاثين. الكبير ثمانية وعشرين، وفيه بثلاثين...
طبعا كل سيكل ليه اسم لا، الا هو الريلي وما أدري شنو؟
-ايه، الريلي وهاذه.
الريلي لاويه مسمينه هالاسم يعني؟
-من أول يسمونه الريلي وهاركوليس وما أدري ويش.
وتفتح عادة سيد من متى لمتى؟
-من الصبح الساعة ثمان ونص إلى الساعة احدعشر وربع جديه نبند نروح نصلي وشسمه، والعصر نفتح الساعة ثلاث.
ويش، بتشارك نسيبي في المقابلة لو؟
-حياك الله يا ولدي. بس أنا ماشي مستعجل ما عندي وقت.
ايه بس دقيقة وانت واقف جديه؟
-حياك الله.
جاي أنت المحل ليش؟
-ايه نعم، جايب ليه تاير مال عربانه.
بنچر يعني؟
-ايه حق بنچر.
ومن زمان تتعامل ويا السيد؟
-والله صار لي فترة، يعني أنا جاي علشان العرباين، ما عندنا سياكل ولا شي. عربانة لين اختربت، التاير مال العربانة، بنچر والله شي جينا.
سيد طبعا أنت من زمان هنيه والمحل ليكم؟
-ايه نعم المحل لينا دكان مالنا. ما علينا أجار، إن جا شغل سويناه، ما جا شغل والله احنا ماخذين راحتنا.
وتطلع تروح منيه، تشوف الناس؟
-ايه، جيفه ما نطلع بعد! في الليل نطلع، العصاري نطلع ساعات، وقت اللي شسمه تصير حاجات لازم نطلع بعد.
وأشوف أنه البحرينيين لوّل يشتغلون في كل شغلات، ألحين ما يشتغلون...
-ما يشتغلون فيها بعد، تركوها خلوها على الهنود. حتى هاي السياكل كلهم على الهنود، بس احنا هنيه قاعدين، ماخذين راحتنا. كل واحد يقول جيب هندي، جيب هندي، لهنود بعد يجون يقولون سو ويزا وحنا بنشتغل هنيه، قلت ليه ما في شغل الا داعي لهذا.
إذا البحريني يقدر ليش لا؟
-إذا البحريني يقدر وشسمه، حق ويش أروح أسلّم حق هندي وأنا ما عندي شغل، وشغل مو واجد يعني، واجد واجد، شغل على راحة. مشكورين سيد...
-حياك الله.
العدد 2759 - الجمعة 26 مارس 2010م الموافق 10 ربيع الثاني 1431هـ
شكرا ياوسط على المقابلة
شكرا ياوسط وياريت في الناصية بعد يصير مقابلات ويه اهل المهن البحرينية القديمة
الله يحفظك
الله يحفظك ويطول بعمرك ، جان زين محلك صوبنا . نربحك ولا نربح أجنبي .
الشرف
العمل شرف الانسان
من تكسب على عياله فهو فى جهاد
رآئـع
الله !
يا للرقة والحنان .. العنوان جذاب ..
تحية للكاتب ولصاحب اللقاء السيد هاشم ..!
ستــ نور العين ــرة
الله يحفظك يا حجي والله سوالف اوّل حلوه
مقابلة مميزة ويا ليت الاكثار منها
الشعب البحريني معروف بالمثابرة والجد والاجتهاد ومقابلة واخيتار ممتاز من الجدحفصي
وين يصير المحل
وين يصير المحل دراجة ابني تحتاج الى تصليح
نعم السيد ونعم العامل
هذا الرجل طيب المعامله ودائما نذهب لاصلاح
دراجة ابني
عطاك الله الخير والصحه وطول العمر يا شرف البحرين