انكسر صمت الضيوف و عمّت أجواءٍ جديده

واستوى للحفل معنى يوم تنزاح الستاره

العنود اللي تخطت في البهو كنها وحيده

أشبَه بكيس الجواهر حيل لحظات انتثاره

انعِشَت حَشد الضيوف وعاش لحظاتٍ فريده

علِّمَت الاعناق فِعلا كيف معنى الاستداره

موكبية في تِمِشِّيها .. تلقِّنهم نشيده

ما يجاريها تبختِر غيرَها أوتار الغيتاره

ثوبها لون السماوات و بدَت نجمه شريده

كوكبٍ درّي مارِد ما تناسَب له مداره

تطوي صفحات الرخام بخطوةٍ صقله تعيده

تاركة بادراجها عطرٍ تنقته بمهاره

فازت الغمازه اللي بخدّها الايمن رقيده

تحبس الانفاس ضحكتها وتفرج باستثاره

طفلتي هذي لقلبي هي مفتاحه وقيده

من براءتها تجسّد كل تعاريف الطهاره

يُجمِع النُّقاد أجمع وصفها محدٍ يجيده

دام في هذي القضية ما تجوز الاستعاره

ومن تجرا وسوّلت له نفسه ببدع القصيده

يفترض انه توضى ... وقام وصلّى الاستخاره