يا جادل الشرق روحــك لا تعــذبها

رغبــتك ماني على نفسي براضيها

ما كل فــــــرصه تناسبني واناسبها

الا الفــــــروض التزم فيها واصليها

النزوه الطايشه خسـران صاحبها

فكر بعقلك نصيحه لا تســــــويها

بعض المــواقف ترى قدني مجربها

والسالفــه ما تـــموت بموت راعيها

نفســي على كل ما تكــره مدربها

واحاول انـي بعض الايـام اسليها

راجعت الافكار حاضرها وغايبها

والبيض والسود شفت اهوالها فيها

قــريت قصــه ولادري وين كاتبها

والمشكــله بيــن كاتبــها وقــاريها

على ســــــباع الفلا تمكر ثعالبها

معــروفه اشكالها من قبل اساميها

قد قال شيخ العرب فارس مواكبها

(الذيـب جايع وشبعانه حصانيها)

سلمـى عجيــبه ويا مكـثر عجايبها

الخـير فيها وشـــر الناس ماليها

تحتار ما بين صادقــــــــها وكاذبها

ويضيـــع مستقبلك في طـي ماضيها

يا آدمــي كان حلــت بك مصـــايبها

ارجع لـــــربك وهو قادر يجليها

(ام الدواهي) قبل تغويك حـــاربها

واستنجد بقــــــوة الايمان ترميها

(جريحة الشرق) تشكي جورغاصبها

وعيـــون خـلانها تنظــر وتبكيها

افكارهم من يترجـــمها ويعـربها

ويفهـم الناس وش مغـزى معانيها

وش رايكم نجمع النسبه ونضربها

والخارطة قبل ما تمتـــــد نمحيها؟

الناس من حقها تحمــــي مذاهبها

وتعيش في امن واستقرار يكفيها

(حواء) لاربع شـروط اعظام نخطبها

من قال من دون شـرط وقيد نبغيها

(حبيبة الناس مشـرقها ومغــربها

لا عاش منهـــــــو بنية سـو ينويها

مناهج اسلافنا واغلــــى مكاسبها

بالاحــــمرين وسواعد سمر نحميها

اقلــــــــوبنا ما تحب الا حبايبها

ونفـــــــوسنا صافيه للــي يصافيها

والفاتنه كل مـــــــا تفتن نعاتبها

وان مارضت نعتــذر منها ونراضيها

العين ماتعتلي من فـــــوق حاجبها

لاشك بعض العيـون الخوف معميها

الساعــه ان كانها قـرت عقـاربها

ما عاد يمكن تســــــيرها ثوانيها

واللابه اللي تقاعس دون واجبها

وش عــــذرهــم في مقادمها وتاليها

ما يستــوي موجب الكلمه وسالبها

كلمه تسرك وكلـــــــــمه لا تطريها

الاحـرار لوكان ماتـدمي مخالبها

ماكـان واحـــد من العـربان يشريها