شجرة صداقة زمانٍ ما تضلل صديق
لابو جذور سقاها الغدر (دم) اصدقا
ياصاحبي والوفا حطك لي اغلى شقيق
يالابيض اللي سواد الوقت زادك نقا
كم قلت لك واحذر اللي نام لازم يفيق
ياما سألتك:ورى اللي خان بي وش بقا
الخاين اللي جعل عذري لحلمه طريق
ما يدري ان هالعمر حفنه اسنين امحقا
في وقتنا اللي زفيره خان عهد الشهيق
وبه المنافق جعل صدقي ال كذبه وقا
امسى صديقي عدو وعدوي اصبح صديق
واحترت ما بين ألد اعداي والأصدقا
والطيب يصرخ وسط بحر المصالح غريق
ويقول يا العصر الاول ياسقا الله سقا
ما يلتقي في نسب راكان ب آغا شفيق
وان التقا المشكله ماهي ابكيف التقا
المشكله كيف أبا لقى طب جرح الرفيق
لاصار جرح العدوطبة ابصدر اللقا
وألا الفكر لاغزا صدري بونّه وضيق
ماله سوى الصبر مخلف هقوة اللي هقا
وأنا عزومي بَنَتْ للصبر قصرٍ عتيق
لارحّبت بي سنين الياس قال البقا
والكتف دامه يشيل (يطيق اوما يطيق)
والله لا أرقى جبال الطيب:واللي رقا
(ان ماوصل) فا الصقر لاصار ما هو طليق
عذره من المرقب العالي: اسبوق السقا
عقب انتحار الصداقه ونكسار الصديق
معذورمن قال ماله (يوم طاح ) اصدقا
