الغاء ساعتين الرضاعة

ما يحتاج ساعتين الرضاعة للمدرسات و عشنا و تعلمنا قبل بالمدارس بدون ساعات رضاعة ولا غيره و الحين كل وحده قامت تطالب بساعتين رضاعه اصلا طول وقتهم بره المدرسة و لمصالحهم الخاصة اي ساعتين رضاعه بعد من بيعوض الطالبات حصصهم و من بيكمل معاهم المقرارت و المناهج كلها كله استهتار من الادارة و المدرسات و اطالب الوزير بأنه يلغي ساعات الرضاعه و اللي تبي تحمل تقعد في بيتها و تستقيل من شغلها و تخلي غيرها يشتغل ماتجي الاجازة الا نصهم حمل وطالعين للوزن و بعدها اجازة الوضع و يا سلام ساعتين رضاعه بعد

هناك من يستحق التوظيف

ما رأيك توظف العاطلين الجامعيين خاصة في مجالات تحتاجها الوزارة بشدة كالخدمة الاجتماعية وأخرى

لا نقص ولا نريد أجنبيات يا وزير

يا ربي صرت ما استحمل هذي الأكاذيب.. لا توجد أي مرضعة بالمدارس مسببة نقص لأنها تأخذ نصابها كامل، والإ
دارات تشدد عليهن بتكملة أعمالهن في المنزل وتسليمها يوم ثاني، وبسكم جمبزة علشان تييب لنا هالمصريات الخايسات قليلات الأدب ولا يعرفون يشرحون بس روحوا سمعوا الشكاوي عليهن من التلميذات وأولياء الأمور وزميلاتهن المعلمات، يا وزير لا تتجاهل ولاتصد أذونك قبل ما يهر الخياس خارج البحرين وبعدين تندمون.

ما دخل مصلحة الطالبات ،وساعات الرضاعة؟؟؟؟؟؟؟؟؟

المسألة متعلقة بحصص الفراغ الخاصة بالمعلمة والتي تمكنها من أخذ ساعة رضاعة واحدة أو ساعتين
إذا سمح لها جدولها بهذا
أما التي عندها عشرين حصة فالله يكون في العون /أي ساعة رضاعة محسوبة عليها
ومصلحة الطالبات تكون داخل الصف أثناء الحصة مع المعلمة
ولا توجد معلمة ،بل ولا يسمح لأي معلمة بالخروج لساعة الرضاعة وهي عندها حصص
فما دخل مصلحة الطالبات في الموضوع
أما المعلمات الأجانب ،ما اعتقد أن يتمون بدون أولاد
وهم بدون أولاد وياخذون أيام للسفر ،وأيام التجهيز للسفر وغيره

ساعة الرضاعة مالها أي دخل

أي نقص تسببه ساعة الرضاعة والمعلمة نصابها تاخذها كامل اذا مو أكثر،، لأن المعلمة تاخذ كل حصصها ولأنها تطلع ساعة الرضاعة فهي تاخذ باقي شغلها للبيت يعني تشتغل 24 ساعة..
وبعض الادارات تتفنن في التضييق على المدرسات المستفيدات من ساعة الرضاعة فيطلبون منهم متطلبات كثيرة حتى يضطرون يقعدون في المدرسة ولا يطلعون.. الله المستعان

حراااااااام

أني مدرسة عندي ساعتين رضاعة.. والله شاهد على ما أقول ما أطلع من المدرسة إلا وحدة ونص من زود الشغل ولا أرجع البيت ولاعندي وقت لولادي وإذا طلعت قبل ربع ساعة من الدوام أوحتى ساعتين على قولتهم وهي مو ساعتين بل حصتين دراسيتين إلا مخلصة شغلي ( وما اعتقد الإدارة بتسمح بخروجي وأني علي شغل)
(( كأن اللي يسمع تصريح الوزير أن المعلمة اللي عندها رضاعة مخفض نصابها حالها حال البقية في النصاب يعني الشغل واااااااااحد))

معاناة الممرضات

من لكم يا اهل التمريض الممرضات الآسيويات يوظفن وهن حوامل وتأخذ ساعتين الرضاعة وقبل أنتهاء فترة الرضاعة تحمل مرة ثانية لتواصلها لمدة أربع سنوات والراتب تستلمة بالراحة علما أن خروجها من العمل يسبب ضغط على الأخريات لكي يواصلن تغطية مكانها وهذة مشكله ومعاناة أكثر بكثير مما يقال عن المدرسات وأكثر جديه .!!!!!!! اين وزير الصحة أين المسئول التعابة أين جمعية التمريض من هذا .

بنت الديرة بايره

كل هذا بسبب المصريات الي مايعرفون يشرحون وكثرة التجنيس عندهم ولااد وااجد

سعادة/ وزير التربية - الموقر

لا يجوز لكم عدم منح ساعتي الرضاعة للموظفات لديكم ، لأن المشرع البحريني منحكم سلطات كبيرة لإتقاء مشاكل تطبيق القانون حيث منحكم التعيين الجزئي ومنحكم التعيين المؤقت ، لذلك نرجو عدم الانزعاج - محامي

أبي تعويض يا وزير عن ساعتي الرضاعة

أنا معلمة المفروض عندي ساعتي رضاعة .. بس الجدول ما يسمع مثل ما حطته المديرة المساعدة الله لا يسامحها .. واذا ناقشناها في الموضوع سوت من الحبة أبة .. صراحة مهزلة .. في مدرستنا ساعة الرضاعة على ناس وناس ..وفي ناس ما عندهم ساعة رضاعة يوصلون المدرسة الساعة 9 ونص بس لأنهم مقربين من الادارة .. الدنيا حضوض .. بلد طائفي .. المشتكى لله منكم

ههههههههههههههههههههههه

ما بينت في عيونك الا ساعتي الرضاعة بحق المدرسات الفقيرات ........... يعني اللعبة والجمبزة في نفس الوزارة ماتشوفها

Pleeeeeeeease

remove two hours we are no need it.
some teachers takes two hours for shopping or something else
you can reduce to half hour

على شنو النقص الحاد؟؟؟

اذا كل معملة تطلع بحصص فراغها يعني تكون المعملة الثانية وصلت حصتها وين النقص يبا استغرب من هالتصريحات اللي مالها معنى يعني ماتبونا نتهنى حتى في هالساعة ياريتها ساعتين الله وكيلكم نطلع الساعة 12 وبيوتنا بعيدة نوصل 1 وقت الهدة والله ماتعودنا عليك ياوزيرنا

اللحين جت السالفة على ساعة الرضا الله وهالساعتين لين طلعنا 12 ونص واايد زين وبعد حاسدينا على هالساعة وتطلع من جبدنا اصلا ما نطلعها الا بحصص الفراغ يعني مو من الحصص الغالي وزيرنا انت نفذت القرار بس شكلك متأسف ----- الواحد اكون قد كلمته

المدارس ما تعطي المدرسات حقهم كامل

ما في مدرسة نفذت ساعتين الرضاعة بل تعطي المدرسات حصتين والحصة وقتها 40 دقيقة حرام وزارات يستفيدون من الساعتين ونحنا ما نستفيد لان مسافة المدرسة الى البيت تروح في الساعتين وما نستفيد شئ

نقص حاد

نقص حرام عليكم هذا ظلم والاجحاف في حق الأطفال الرضع حتى هذه الفئه الضعيفة البريئه لم تسلم من الحقد والظلم

فكروا في مصلحة الطالب يا معلمات ..

أكثر المستفيدات من ساعة الرضاعة نشوفها ما تخلص السنتين إلا وجايبه طفل جديد .. لي متى هذا الاستهتار بمصلحة الطالب اللي ما تقدر على الالتزام بالشغل تقعد في بيتها وتاخذ إجازة حق ولدها وعطوا المجال حق غيركم يشتغل..

ردّينا ...... !!

سبق وأن علقت بهذا التعليق بتاريخ 3سبتمبر 2007م/ هل سعادة الوزير على غير علم بأن غالبية المعلمات اللاتي يخرجن يكن قد أنهين حصصهن وواجباتهن وبترتيب من إدارات مدارسهن ، وهل يعلم كذلك بأن هناك إدارات مدرسية لا زالت إدارتها ترفض منح المعلمات المرضعات ساعتي الرضاعة؟! بل أن هؤلاء المعلمات في سبيل نيل ساعتي الرضاعة كحق مكفول ، فإنه يتم تنحية غالبيتهن من كل ما له علاقة بأنظمة الحوافز والمكافآت والتقارير المنصفة.وأن المشكلة تكمن في النقص الذي تعانيه غالبية مدارس البنات من قلة عدد معلمات الاحتياط.

الوزير فضح نفسه !!!!!!!

ادا كان هذا كلامك عن جد انت ما تدري الي يصير في المدارس ساعة الرضاعة تاخدها المدرسة متى ما سمح الجدول والا قاعدة بالمدرسة والبعض يطلع بالفسحة ويرد للي بيتها قريب وكلامك هذا ان دل يدل انك اطرش في الزفة وصج ورطك الي نقل لك حجي غير وانشري يا وسط ومن قربت الانتخابات وبشت الوزير كل يوم انشوفه بالجريدة يبي يرزونه مرة 2

والله مهزلة

نقص حاد وظفوا البحرينيات .. هالبلد تناقض في تناقض والله مهزلة، حرام حرام العناء اللي يعيشه المواطن لا وظيفة لا بيت لا أمن، احنه في دولة خليجية لو في أحد الأدغال ما أدري، والحل بشنو بالتجنيس آآآآخ يا ديرتي

رأي مدرسة

بصراحة ومن اللي نشوفه في المدارس والمدرسة اللي ادرس فيها ما في نقص بسبب ساعات الرضاعه واللي يقول في نقص يككون مشموووخ
شلون يصير نقص اذا المدرسة تاخذ نصابها كله واذا في جانس تطلع رضاعه عقب تطلع
ومافي تقصير من اي ناحية لا في التدريس ولا في الامور الادارية لان غصب عنها تكمل شغلها حتى لو بتطلع ساعات رضاعه فشلون يصير النقص اصلا شكله يبي يكنسل هالساعتين وقاعد يبوب ...
الله يستر على هالفقارة

لاهل ديرتي

شوفوا الوزير اشلون ديمقراطي يعرض المشكلة عشان الجميع يدلي بمقترحاته وارائه ويشاركه في الحل بالرغم انه الطفل الرضيع يقدر ايحل المشكلة بتوظيف عدد من العاطلات لكن السالفة فيها ان

جامعيات بدون وظيفة

اكو وشقدمن الجامعيات الدارسين مو محصلين وظايف
وظفوهم له عشان ما يصير نقص
مو تجيبون لينا مدرسينن من مصر و اردن

الادارة الحكيمة تحكم بحكمة

الادارة الحكيمة تحكم بحكمة في نقص من المعلمات بسبب ساعتي الرضاعة ان يدرس المعلمات ساعتي الرضاعة في البدائية الدوام ويترك المعلمات الغير محتاجات الي ساعتي رضاعة الي الحصصة الباقية حتي يملي فراغ المعلمات بسبب الرضاعة ويساعد المعلمات بعضهن بعضا ء ومن كان في عون اخية كان الله في عونة واتمني الي الجميع الخير والبركة في الدنياء والاخرة

تكتيك

تكتيك حكومي قوي عشان الاجانب اتجي وياخذون جنسية

صح لسانك زائر رقم 47

كلامك عدااال فيكم خير شغلونااااااااااااااا
اعنا عاطلووووون لمتى تاخذون ربعكم بس وحنا على الهامش حتى ما تتذكرون تطالعون اوراقنا

بحرين العجايب

اليوم وصلت مدرسة فلسطينة مدرستنا (نظام فصل) كأنه مافي عاطلات بحرينيات من هالتخصص

وعلى نفسها جنت براقش

وظفوا العاطلات.....وبعدين المدرسات حصتين رضاعة مو ساعتين وياخذون حصصهم كاملة فالنقص من قلة التوظيف

.......

المعلمة مظلومة الحقوق ما تطلع ساعتي الرضاعة الا ماخذة كل حصصها وزايدة عليهم حصة احتياط أو حصة تعليم مساند ( درس تقوية ) يعني هي بالاسم ساعتي رضاعة بس هي حقيقة ساعة واحدة فقط اذا تم احتسابها من الساعة 12 ظهرا روحوا شوفوا الموظفات غير المعلمات ما تجي الساعة 11 الا وهي في بيتها . وترى مو كل المعلمات تأخذ هالساعتين الرضاعة بعضهم يفضلون المكوث في المدرسة للتصحيح والتحضير لليوم التالي وحتى اذا طلعت ساعة الرضاعة تأخذ شغلها وياها للبيت! .........

...

مسكينة مرت اخويي تخرجت من سنتين تقريباً من جامعة البحرين - قسم تربية - وللحين مو محصلة توظيف !!! والوزير متفرغ للاجانب بس ..لكن الله يفرجها .. الطلب من غير الله مذلة .. والحمدلله على احوال الناس في النهاية الناس لها كرامة ..

أنوثي

بسكم عاد بسكم والله كسرتون أضهورنا وين قاعدين في السنقال احنا عذاب جهنم ارحم من هل البلد الي فيها مصايب وبلاوي قهرتونا والله قهرتونى ودستون على كرامتنا وظفووووو أبناء البلد ..

كــــــــــــــــــــلام متنــــــــــــاقـــض

يــــــــــــه خـــلـــصـــوا خـــريـــجـــي الــتـــربـــيـــة !! ...
خـــلاص منسوي حفلة الى كل عاطلين التربية من بـــكـــرة بـــوظــفونـــا ...
مـــــــــــــاكـــــــــــو شـــــــــواغــــــــر ...
خخخخخخخخخخخ ويلي والله ضحكت وايد ليوم

الحقيقة عندي

مساكين يا البحارنة الفقارة اذا الوزارة وظفتكم ، الابراج اللي في الجفير من بيسكنها ،وكيل في وزارة التربية يخسر محد بيجي يتأجر من عنده

الحل المراضع يا وزير

ما أدري الحل المراضع؟ وإلا توظيف الفقارة العاطلين..!!
صدق مطنزة

مجرد اقتراح

اقترح على وزير التربية والتعليم ان يخصص غرفة في كل مدرسة للمدرسات اللاتي لديهن طفل رضيع مع جهاز لاسلكي لمعرفة إذا الطفل بكىيكون معهن في الفصل مع تعين نساء يكونون مع الاطفال لحين انتهاء المدرسه من الحصه وبذلك وفرت الوزارة على نفسها الجهد والوقت مع خلق فرصة جديدة للعمل

لا الاه الا الله

صراحة المدرسة البحرينية ما يهمها الا الحمل ولا عليها من الطلاب والسنة اللي هي حامل فيه كل غياب على طول والحجة انها حامل وبعد ما تولد السنة الثانية بعد نفس الشيء غياب والسبب الولد مريض و السنة الثالثة حامل والله مو حالة الاجنبي أفضل حتى في الالتزام وهذا كله من الواقع

ويش على نتائج الثانوي ما الفصل الاول متى بتنزل

متى النتائج نتظر احنا يوم الخميس والله متى قعد يتكلام عن ساعتي الرضاعة اتكلام عن النتائج وشكررررررررررررا

بسكم عاااد

اولا ساعة الرضاعه مو بس رضاعه رعايه ورضاعه
ثانيا النعيمي ووجهه يتفلسف ولازم كل اسبوع له شي ع اساس خايف ع مصالح الشعب؟؟
النصاب المدرسه تاخذه وفوق شغل متلتل
واذا احتاجوها في شي العصر راحت
الا في هاللجنه والا في ذيك
تاخذون حقكم ثالث ومثلث. . .
وحرام عليكم بسكم اللي يقول حللوا معاشاتكم. . شايفين المدرسين عندهم بطاقة الوزاره ومتى ما بغوا يسحبون
والله شغلهم اتعس الشغل. . .
واذا شوقي قال قم للمعلم
غيره قال لو جرب التعليم شوقي مره
والله حرام
واذا توفى ولدج الله يرحمه لان الله كاتب يموت

الباحثة عن الحقيقة

هرااااااااااء يا سعادة الوزير
انا مدرسة واقول لكم الواقع المعاش:
جميع المدرسات لا يأخذن ساعتي الرضاعة الا بعد أن يتممن نصابهن اليومي وأحيانا يأخذن حصص احتياط أيضاً.
اضف الى ذلك انه في ايام ضغط العمل فإن تلك الساعات تضيع في مهب الريح
باختصار" ماشفنا خلل في تغطية الحصص جراء ساعات الرضاعة" وهالتصريح أشم وراه قرارات جديدة تضغط على المعلمات اكثر من الضغط اللي يعانونه"
بسكم خفوا علي المعلمين وانسوهم اشوي خلهم يشتغلون بسبحانيتهم.. الطب النفسي فاض بيهم

حرام

والله المدرسه الي عندها رضاعه لازم تقعد في بيتهم احسن لان الاهمال بكون في المدرسه وترك الاطفال بروحهم مثل ما صار حق ولدي الله يرحمه ومات قبل 3 شهور بسبب اهمال المدرسه الي عندها ساعات رضاعه حسبي الله عليها تركت ولدي عشان ساعات ارضاعه والتيجه ولدي طاح ومات ومحد عرف عنه الا الاطفال الي كانو معاه وخبر المشرفه

حضانات

عندى اقراح برغبة ليش ما يخصصون غرفة لحضانة الاطفال في كل مدرسة و يوظفون مربيات

أنوثي

دام التوظيف (سري للغاية) أبشرو بالزين الكوارتين محد ليهم (الكوارتين= العاطلين)

خخخخ تبي توظف المصريات العزابيه لا والله ما نبيهم اني طالبه وما نبيهم

روح نام وخيس رووووووح والله اني طالبه واشوف المدرسات ما يطلعون من المدرسه الا وهم مكملين كامل حصصهم واحنا اصلا كلش مو متضررين بالعكس ياخذونا المدرسات بدل الحصص الي تضيع ,,, بدل ما تحل هالمشكله حل لينا مشكلة الحصص الي ما تكفي الى مقررات ابو ساعتين مو ناط لينا بسالفه ساعتي الرضاعه ويش ناويه بعد تقعد البحرينيات وتوظف المصريات الي ما وراهم لا زوج ولا عيال والله حاله مو ناقص الا انته مو كافينكم خلفوه وعمايله فينا تجي انت بعد تكملها علينا والا يمكن هو الي حادنك علينا والله كل شي جائز .... روح نام وخيس

بل

بل ما في استراتيجية في الوزارة وين التخطيط

الحقيقة ..

الحقيقة ان هناك عدم توظيف .. والمشكلة لا علاقة لها بساعات الرضاعة والدليل ان اغلب المعلمات "المرحلة الثانوية" لديهن 20 حصة اسبوعيا .. بغض النظر عن ساعات الرضاعة .. نتمنى من الوزير الكلام الواقعي ..

حليب نيدو

أبصم لكم بالعشرة بان 99% من الموظفات بجميع الوزارات الحكومية والخاصة .... تخلين عن الرضاعة الطبيعية .... وهذا عذر أقبح من ذنب .

وظفوا مدرسات اكثر

إحنا في مدرسة ثانوية وعدد الطالبات فيها كبير جدا ونحتاج لمدرسات اكثر، وظفوا مدرسات اكثر ولا تتحججون بساعات الرضاعة

والله والله ..انهم اعداء الشعب ومدمرينه

احاول اخلى لساني نظيف عليكم بس ما اقدر .. تنبط جبدى من اشوف مجنسين جايبينهم مدرسات .. والله انقهر ..ليس اتسوون جديه فينا ..ليش ليش .. دمرتون البلد الله يدمركم ويفنيكم .. حرام عليكم حرام ورب الكعبه انكم تدمرون الشعب

انوثي 2

ياسلام بيجيبون لينا مصريات وبنات البلد قاعدين في البيت ياسلام ---(لا توظفون البحرينين).
عجبتين مشاركة 7777 يقول وين راحو الخبراء في الوزارة طارو لو ما في خبراء

اشششششششششششش تقصد يا حضرة الوزير

يعني شنو يا وزير ناوي تجيب مدرسات من مصر مثلا ما ايبون عيال قول شتفكر فيه فكر ببصوت عالي خل الناس تسمعك انت ووجهك

عاطله علم اجتماع

انتوا السبب تجيبون مجنسين وكل سنه تجيب جاهل على نفقه الوزارة طبعا لاحسيب ولا رقيب بنات البلد اولى من المصريات والتونسيات والمغربيات واذا حرمتونهم من ساعات الرضاعه يخلون الخدم يرضعونهم يعني

وزيرنا الغالي رجل التعليم الاول,,

اعترف ,, جم مصرية تبي تجيب؟

اشلون يصير نقص بسسبب ىساعتين الرضاعه!

اشلون يصير نقص بسبب ساعتين الرضاعه و أصلا ما قي تخفيف نصاب و الفرق بين المرضعه و العاديه هو ضغط جدول المرضعه و عدم تقليل نصابها!

هم وغم في وزارة الجلف

عسى الوزير يحمل ويحس ان شاء الله

مع احترامي للمدرسات العزيزات

الغاء ساعة الرضاعة ولا في داعي لها الحين يا حبيبتي صابرة 7 ساعات دوام ونصها اوقات فراغ ما تتحملين تصبرين ساعة اقول لو هالساعة اتكميلين احسانك وتكملين الدروس وتكون لقمة عيشك حلالا احسن ليكواالله يبارك في الحليب الصناعي ما قصرومسامحة عزيزاتي
ام مريم

لو كان حريصاً......

رجع الوزير حاملاً قميص الحرص على العمل!!
لوكان حريصاً كما يدعي، ليلتفت مرة واحدة إلى موظفيه القريبين جداً في الوزارة: متى يحضرون ومتى ينصرفون؟ ثم لينظر أيضاً لكبار المسؤولين عنده في الوزراة، ويفتش عن جواب السؤال السابق. ولو كان حريصاً على العمل لوظف المزيد من المدرسات بدل أن يحارب توظيفهم بحجج واهية، ولو كان حريصاً على العمل لحارب الطائفية التي تنخر وزارته وتعطل الإنتاجية والجودة المرجوة.

والحين

عدكم الحل وظفوا العاطلين الجامعيين البحرينيين لو بتقول بعد مانجحوا في المقابله والامتحان وبتروح تجيب مصريين واردنيين

ما هذا الهراء

ها ويش عندك جايب دفعة من المجنسن تبي
تسد النفص الحاد روح وظف اللي دفعوا دم قلبهم
الى الجامعات اللي درسوا فيها على حسابهم تسوون للطلبة امتحانات وبعدين تقولون ما عندهم كفاءة تطلعون اليكم حجج كفاية ظلم لا عندكم نظام ولا استراتيجية و لا قوانين تنفع بلدكم واجتماعات حق شرب القهوة و الشاي

جمري

هذه مقدمة لجلب مدرسات من دول عربية - لسد الباب عن البحرانيات

معاد

كم مرة عاد النعيمي نفس الكلام في الجرايد، إذا ما عنده أخبار جديدة لا يعيد و يزيد على الأخبار القديمة.. و إذا يمبي يطلع في الجرايد خل ينقل أخبار زينة..

طبيعي بكون نقص

طبيعي بكون في نقص حاد بسبب الرضاعة لأن اغلب المدرسات اجانب مصاروة والا فلسطينيات وهذولا كل سنة يفرخون, اما على ايام البحرينيات ماكان في هالنقص واللبيب بالإشارة يفهم... ووظفونا في الوزارة عشان لا يكون عندكم نقص احنا على وشك تخرج وخايفين ننقع سنين في البيت.

77777

أكيد أكيد نزلت أعلانات في مصر وبشكل عاجل وفي خلال 7أيام وبيوصلون المعلمات والشغل والسكن والراتب جاهز وبنات البلد عاطلات والي تحب تشتغل تقدم طلب في مصر

طالبة سابقا

بعض المدرسات ماشاءالله عليهم مو محتاجين ساعتي الرضاعة هم بدون هالساعتين كل بره و لاا كأنهم مداومين بمدرسة و هذا عملهم كأن قاعدين بالبيت الا بتطلع بتروح تتسوق كأنهم عارضات أزياء مو مدرسات و الي قالبين غرفتهم كأنها مطعم وضحك و سوالف و قدوع و بخور وكل طالعين بالمستشفى حق الوزن او اللي تقول رايحه محاضرة بالجامعه و اللي مايدرون وين راحت اصلا و مساكين هالطالبات قعدوا درسوا المنهج بروحكم و يوم الامتحان لا حول ولا قوة الا بالله العلي العظيم ومع احترامي لبعض المدرسات ولا اقصد الكل

عاطله جامعية مبطوط جبدها

حتى هى بتحرمون الامهات منها يازعم في يوم الصحة تشجعون على الرضااعة الطبيعية اجوف كلااام بس... يوم سالناكم ان ليش ما وظفتونا وحنا اجاوزنا الامتحااان وناجحين في كل شي قلتون ان ما لينا مكان ما عندكم نقص اكو طلعت الفضااايح وظفون بدل ما تتحججون وهذا وزير التربيه كاان يدفع المعاشاات من جيسه ما يوظف في نقص وظف

هواش على ساعة الرضاعة

مو كل الادرات يسمحون للمدرسات ان ياخذون ساعتين الرضاعة والتي في الغالب تقلص الى ساعه وتكون بين الحصص يعني المعلمة تروح بيتهم وترد مره ثانيه لاكمال نصابها حالها حال العاديه , واذا كان بيتهم بعد في منطقة بعيدة يعني تروح بس على الدرب ذهابا وايابا ...فما تأثر ولا شي ...
ليكون ناويين تقطعونها بعد؟؟؟باعتبار ان المعلم طوفة هبيطة ...صح والا اني غلطانه؟؟!!!

أنوثي

الى مصر سر وأقدم جالبا معك المزيد لتغطية التجنيس ودع عنك العاطلين واسرع ..

وين طاقات الوزارات وأين الخطط الاستراتيجية للوزارة اين القائمين عليها اين الخبراء في الوزارة طارو ..
والله مقصة

إلى متى يعني؟؟؟

يوم أن في نقص ليش ما توظفونا و في النهاية تقطونا في القطاع الخاص ليش لأن ما في وظائف في الحكومة والله هذا حلال على المجنسين وحرام على أهل البلد. احنا نعاني عشان لقمة العيش نشتغل في الخاص ونص معاشنا طاير على الباركات و القروض. الله يأخذ حقنا وحتى عندنا ساعة وحدة للرضاعة وبالغصب نأخذها و إلى الحين ما صدقوا على القانون الجديد اللي بيعطينا ساعتين.إلى متى يعني علينا نصبر؟ إلى متى؟؟؟

انى حامل اخاف انحرم من 2 الرضاعة

مبروك عليكم يا وزارة الامومة وعقبال الحكووووووومة

اتفق مع الوزير بجزئية كبيرة.......

اتفق مع الوزير بجزئية كبيرة لأن بصراحة يبهض الوزارة بشكل كبير..... والوزير ما يخصص شيعي او سني ,.....
تخيلوا مدرسة بنات كبيبرة 10 الى 20 مدرسة تطلع ساعة رضاعة....... عجل التلميذات وين يروحون......

خير يا طيير

خيير يا طيير ! انزين وظفوآ نااس أكثر فالحييين توظفون لينا مجنسيين وظفوا المواطنين العاطليين

وظفوا مدرسات بحرينيات

هناك الكثير من الخريجات البحرينيات على قائمة الانتظار لمدة تزيد عن 5 سنوات لماذا لايتم توظيفهم للتغلب على المشكلة ، اذا تعذرتم بعدم وجود الميزانية ، فلماذا توظفون الاجانب ؟؟؟ الا يكلفونكم رواتبهم ، السكن ، المواصلات ، التأمين الصحي ....... الخ لو بس هرار وفرقعة اعلامية

كذب وتضليل

المدرسات إلي عندهم ساعتين رضاعة ياخذون نصابهم كامل وبعدين يطلعون هذا إذا سمح ليهم الجدول يعني سبب المشكلة النقص في عدد المدرسات والحاجة إلى التوظيف وليس ساعتي الرضاعة. واي شخص من المسؤولين في الوزارة يوصل لك كلام غير هذا كذاب روح المدارس بنفسك واسئل المدرسات انفسهم.

ابتسامة بدون دراسة

خبزا خبزتي اكليه

هاااا ويش عنده وزير التربية بعد؟يعني مافي مشاكل في هالبلد الا ساعتي الرضاعة؟

ويش عنده وزير التربية يتحجج بساعتي الرضاعة؟
هاكو عندك عطالة جامعيات ماشاء الله وظفهم وعوض عن نقص عدد المدرسات بدل توظيف كل من هب ودب من الجلف من ميزانية البحرين

نقص حاد

يعني الشواغر موجودة ، واحنا صار لينا سنين قاعدين بالبيت وكل الامراض تجمعت علينا من ضيقة نفس وغيرها والسبب انتون . توظفون هالجلف الغجر والبحرينيين اصحاب الواسطات واحنا اصحاب الكفاءات محرومين ولا تقولون ما في ميزانية وانتون تلعبون بالفلوس

والمعنى!!!!

وش المقصود بطلب توضيح أكثر خوفتي خاطركم تحرمونه منها!!!!