الكلام اللي انتثر كنه مرايا...

الكلام المستبد بصمتي المبطي أشوفه

كنه أوهام وشظايا...

جيت استلهم من سنينك بقايا قصتي...

جيت استلهم شجوني وغصتي...

قال: كنك تشبه رسوم القفر...

قال: كنك «حتف» في صورة «عمر»...

الشعر: بيع وشرا...

مش مهم كم انكتبْ...

مش مهم كم صاحبه خط وقرا...

الشعر: خط ووجاهه...

الشعر: وان كان غيرك منكسر

أو منطفي أو محتضر

عز و رفاهه...

ليه يالفكر الغبي؟

ليه تاخذني من اشيائي البسيطه

والحنان وظل غافه؟؟؟

لاجل تثبت انك حدود المعاني والكلام؟

وانت لا جيت الحقيقه

كل أصل الأصل

في معنى الخرافه...

أشتهي لو أكسرك

لو تكسريني فـ كلمتينْ...

اشتهي... لكن حسافه

كل همك فيللتين وشرْكتين وماستين...

العراقْ...

كنه حديقة حضنْ

لا... كنه فراقْ...

ليه من ألفين عام

تكون مضرب للمثل

في الجرح والحزن العميقْ

وذروة أشكال الخيانه؟؟؟

ليه وانت اللي بدونك

أمة أمة هالعرب

ضعف وسقوط وصمت

واحزان ومهانه؟؟؟

كل البلد تهتف باسِم: عادل امام...

كل البلد هيصه وبنج

وذكريات مشاغبه

والعم فيها «العم سام»...

يالعنبوه... عمٍ... وسام؟؟؟

يالأماني...

يالوصايا مؤجله عشر انقصَتْ ثنتين

لكن لو بغيتي الصدق

كل الفرق بين اللي تبين

أوهام واحزان وتهاني...

يا أمينه...

يا مدى الروح فـ مداها

يا صلاة الخوف

ياحزنٍ تحرّينه... تبينه...

ليه كلك رقه فـْ قسوة زمان ؟؟؟

ليه كنك أول ايامي

وآخر آخر حدود المكان ؟؟؟

كنك الفرحه تبي تكسر

شياطيني الحزينه...

ليه لما الوقت ياخذني حذاك

آكون نسمه؟؟؟

ليه لما الوقت يبعدني

يكون الوقت نقمه؟؟؟

الوهج... كاذب يضج

بْوَهْن وغرور وصفاقه...

الوهج... ماله مع النور امتداد

وما له أيْ ريحة علاقه...

يالظما... يالظما الوجدان

كنك ملح في كون مْتعرّي...

ليه كل الثرثره

والقيل والقال المريض ؟

وانك عماد الفضا والصبح

مير الليل صرتي

يفتقد من له يورّي...

أسمع كلامك وانثره

ميعاد واحضان ولقا!!!

واكسر به ايام التعب

والحزن وايام الشقا!!!

في خاطري كل الكلام العذب

واللّي عذّبك في جفوتي!!!

في خاطري شيٍ تبيه وما أبيه

في خاطري أترك لك أيامك فضا

ولو شدّني قيدك

ولو ضعت فـ بهْاكْ

يمكن ألاقي عزتي!!