أشيا كثيرة لا احضرت يحضر فراق

وجهك بعلبة عود وسطور زرقا

أشيا كثيره كثر ما انتي بالاعماق

تحضر وينزل حزنها بي ويرقا

يطيح من كفي: أنا واطعن اشراق

يسيل صبح وغصن وتطير ورقا

ويذوب فمّي فوق فمّي والاحداق

شرفات ليلٍ ترمي الدمع شرقا

عطرٍ اشمه باغنيه واذكر عناق

اهز جذع الدرب ويطيح ملقا

حبيبتي بعض الحزن ماله اوراق

واحسه اليا سال اشقى وانقى

اشتاق لين الصبح ينساب رقراق

وبعد الفجر لليل اشتاق واشقى

وان قلتها بيصير (هـ) الظل حرّاق

وكاني كتمت النفس بالسر حرقا

اهواك ينبت راكٍ بقلب مشتاق

اهواك عين الشوق بالشِيح غرقا

أشيا كثيره كثر ما انتي بالاعماق

تحضر وينزل حزنها بي ويرقا

تحضر ويحضر كل وجهك وينراق

للعود عرق الجمر وسطور عرقا

اهواك ماهي شي ان قالها فراق

وان قلتها للوعد لقيا بفرقا