في حضرة الشعر يومي ما هو بعادي

طار الخفوق وتعدى نشوة الهامه

جيت أحضن الشوق واذكر أجمل أعيادي

وأشوف تاريخ غالي وسط رزنامه

تاريخ جمّع شتاتي لقلبي الغادي

خلاّني أسرح مع التاريخ واعوامه

يا نشوة الحب طبعي ما هو بْهادي

أبقلب أوراق فكري وأسكن أحلامه

أبذكر الخوف والميعاد والوادي

وجبال تحضن دفانا وتحضن تهامه

يا حلو ذاك المصيف وريحة الكادي

ريحٍ يخالط عبير الشوق وانسامه

بكيت أنا غيبته والدمع ما فادي

صرت آتحرى يعيد الحب وأيامه

يا ليت خلي يعيش ويسكن بلادي

ترتاح نفسي وقلبي ما أحَد لامه

لا من ذكرته أشوفه بأصغر أولادي

سميه اللي... أفز إن حرك ابهامه

هذاك والله أشوفه نقوة اجيادي

خيلٍ عشقها لميع السيف وعمامه

يا منتهى الذوق جيتك لملم ابعادي

دامك طبيب الهوى ومعلق وسامه