أجرى برنامج «الناصية» الذي يبث على «الوسط أون لاين» اليوم (السبت) في حلقته هذا الأسبوع لقاء مع عدد من هواة تربية طيور الحمام، وكان الهوات هم: سيدهلال وعبدالجليل وإبراهيم الدرازي وعبدالغني، وفيما يأتي نص القاء:
سيد هلال من متى تربي طيور وشلون ربيت طيور؟
- التربية الصحيحة من 10 سنوات تقريبا يعني كنت أربي هذيك الأيام قبل 10 سنوات الأشياء العادية مثل صفافيق مكاويات دوربين شغلات بسيطة، بس الحين اشتغلت في الأشياء مثل أبوفوطة شماسي بخارى لونق فيس اللي الحين أحبها والسوق بعد تبغيها.
في أحد من أهلك يربي طيور؟
- أبوي يربي من قبل وكان هاوي هذا الشغل وهذي أخذناها من أبونا.
أبوخليل تشارك؟
عبدالغني من متى تربي الطيور؟
- من الصغر أو من أيام الدراسة وللحين أنا أربي طيور بس وقفتهم فترة أيام اللي كنا بكرانة لأن البيت ضيق ولأن انباقوا بعد، وتركتهم لمدة لين ما حصلت بيت في مدينة حمد ورديت بدأت بالشغل من جديد.
هذا الشي يرجعنا لشغلة وهي اللي يتركهم أرد يرجع ليه؟
- هذه الشغلة تمشي في الدم نفس المخدارت ونفس الجكاير لما تجرب مرة وتدمن عليه ما يروح من الدم.
وهل الهواية تروح لولدك مثلا؟
- أكيد عندي أولاد متعلقين بالحمام 100 في المئة وكل واحد يميل لشي معين بس بما إن يشوف أبوه -وأنا بعد ورثتها من جدي وأبوي- موجود بالبيت.
كم سنة صار ليك تشتغل هالشغلة؟
- تقدر تقول من سنة 78 .
أسعار الطيور ديك الفترة؟
- ذيك الفترة في أسعار نازلة وفي أسعار مرتفعة، أنا أتكلم عن روحي أخذت طيور بـ 100 دينار في ذيك الأيام والمئة دينار أيام المدرسة تعني لي واجد، وفي طيور بـ 10 دنانير وبدينار وبثلاث روبيات الدشاتة.
عبدالجليل شاركنا؟
- مربي جديد مو من زمان، بس كانت هاوي للطيور من الصغر، بس ما في مجال أربيهم يمكن مشاغل الحياة.
كم صار لك تربي طيور؟
- صار لي أربع سنوات من ابتدأت فيهم لين ما حصلت بيت.
والأنواع اللي تربيهم؟
- هاوي لكل الحمام.
لو يعجبك طير بسعر مرتفع تشتريه؟
- أول ما دخلت السوق اشتريت كريميات بـ450 دينار.
أبوخليل إبراهيم الدرازي من متى تربي طيور وشلون ربيت؟
- 37 سنة.
متخصص بالصفافيق؟
- لا بكل أنواع الطيور.
تذكر وين كانت السوق قبل 37 سنة؟
- كانت في المحرق وتالي في سوق الحدادة وتالي جو المنامة وبعدين مدينة عيسى بس الأساس هو المحرق.
عبدالجليل أغلى طير اشتريته بكم؟
- 450 دينار.
وأغلى طير بعته بكم؟
- 300 دينار.
كم من الوقت تقضيه ويا الطيور؟
- والله طول وقتي بالشغل أجي 5 أو 4 ساعات اقعد وياهم أيام الإجازات.
وش تسوي في الأربع ساعات؟
- تنظيف سوالف مال الحمام.
عبدالغني وش رأيك اللي يقول إن في ناس ينامون ويا الحمام من زود حبهم إليهم؟
- والله يصير كلشي جايز.
ما جربت أنت؟
- نوم ويا الحمام ما جربت بس قعده ويا الحمام اقعد وياهم أكثر من أولادي.
يعني الواحد يخسّر على الحمام أكثر ما يخسر على أولاده؟
- لا ما اعتقد، بس تجيك فتر معينة شي ثمين جوهرة تشوفها لازم تدفع فيها، نفس العملية .
أغلى طير اشتريته بكم؟
- 1200 دينار
وش نوعه؟
- أبوفوطه.
وللحين عندك؟
- سنة وحدة ومرض وذبحته وقطتيه.
أغلى طير بعته بكم
- ما يتعدى 300 دينار.
يعني السالفة كأنها ما فيها مدخول؟
- هي هواية أزيد مما هي مدخول، الهواية دائما خسارة ما تربح فيها شي.
وشهريا كم تخسر عليهم
- شهريا بين أربعين وخمسين دينار، شيل وقتك وجهدك مجرد آكل وهواء
وانت هاوي هل أنتجت طيور؟
- أنتجت طيور واشتغلت على طيور من جديد واشتغلت على النفاخ لون الرديوس سحبته من المدينة طورت على نفاخ واشتغلت على الدرابيل وسحبته من اللنوق .
سيد هلال دخلت في معارض للطيور؟
- أي قبل ثلاث سنوات.
معارض محلية طبعا؟
- وحصلت مراكز بس مو المراكز اللي أطمح إليها ويرجع لأن المشكلة من الطيور أو ساعات مشكلة من الحكم أو ساعات يكون الطير وقت التحكيم ما يبرز وساعات تخسر جدي بس هذي المرة عندي 12 طير أبوفوطة بدخل بهم.
وجربت تشارك معارض بالخارج؟
- لا.
ورحت معارض بالخارج؟
- لا.
تعتقد ان طيور البحرين تقارن بطيور الخليج والعالم؟
- 100 في المئة فالبحرين منبع للخليج تقدر تقول هي نفس اللؤلؤة تورد للخليج كامل من الطيور والسبب إن عندنا استيراد ولهذا إحنا نستورد أفضل الطيور من أفضل المربين من برى أميركا واستراليا وهولندا وعدنا استيراد و يمكن على دول الخليج صعب أو غير مسموح ليهم، وثانيا تحصل جميع الألوان في البحرين، لأن المربي عندنا فقير ويحاول يطور من الطيور اللي عدنا ويحاول قد ما بقدر مايقدر يحك روحه بالفلوس يسوي شي يسوى، وبالمقابل الخليجيين عندهم فلوس يدفعون وإحنا نتعب وهم يدفعون علشان يحصلون طيور زينة.
أغلى طير بعته بكم؟
- 3700 دينار
شو نوعه؟
- نفية بخارى كاكية، على واحد اسمه مساعد الغريافي من السعودية.
وأغلى طير اشتريته؟
- هي نفسها ومع طير 4000 دينار.
طبعا أبوخليل متخصص في نوع الصفافيق، فهل شاركت في معارض وحصلت مركز زين بطيورك؟
- أي نعم في السنابس وحصلت المركز الأول.
والطير وين راح؟
- الله يرحمه! عندي عياله.
للحين عندك
- فرخين بس طلعتهم والباقي منهم ما طلعتهم.
وبكم بعتهم؟
- سعر حليو مو غالي إحنا «رامز».
وبس ما دخلت بطيور غير في معارض؟
- لا أبدا.
وبجي يوم تترك الطيور؟
- ما يندرى عدنا حسين هو يستلم الشي يوم أنا بقيت بالعملية هو كان مكاني؛ وأنا بالعملية وأنا أحاتي حلالي ما أهدهم.
عبدالجليل ويش رأيك باللي يقول إن مربين الحمام ما هم في دنيا قعدات وبسطات، ما يعرفون شنو صاير بالديرة؟
- الهاوي أسعد واحد إذا يمارس هوايته ويكون أسعد إنسان فيها ومو كل الوقت يبقى مع الحمام، وما أعتقد إن كل الناس جدي.
طيور البحرين من أحسن الطيور؟
- نفس ما قال سيد هلال ان البحرينيين ناس فقاري ياخذون الزين مو التوب ويطلعون أحسن مستويات بعدين يجون الخليجين يشترونهم.
أسعار الطيور طاحت؟
- في فرق إنك تودي طيورك السوق أو يجي الشاري عندك بالبيت وياخذ الطبة خمسين دينار، في فصل تلاقيه بالسوق بخمس دينار بس في طيور تجي ليها بالبيت ما يبعه لو بأي سعر .
وهل بجي اليوم اللي تترك فيه الطيور؟
- كل واحد يرجع لهوايته ويش اللي يحب بما إن هو طير هو هاوي يدفع فيه ويرجع ليه مهما كان
- عبدالغني: مادامت الصحة موجودة ما اعتقد إن الإنسان يتركها إلا بعجز أو شي.
- سيد هلال : انا بواصل، وأتمنى إن ولدي يتعلمها، ولدي يطالعني ويش أسوي ويقدر يقيم الطيور.
العدد 2654 - الجمعة 11 ديسمبر 2009م الموافق 24 ذي الحجة 1430هـ
دلوووعه
ليش راعي صبياان بلعكس هووايه حلوووه
وكل واحد يحب هذي الهوايه بيكوون كله قاعد وياهم ويه ربعه مو احسن من يهييت لو يطلع ويه ربع السوووء
والله يوفقكم ان شاء الله واتمنى اليكم كل الخير
رد على رقم واحد
كل من يراى الناس بعين طبعة رد على رقم واحد اكيدصايدينة
هواية
اعتقد ان هواية تربية الحمام هي مثل غيرها من الهويات الي ايمارسها الناس .. مثل تربية الخيول الي ايمارسها الشيوخ والاغنياء او مربين البقر وغيرها واعتقد انة من العيب الاشارة إلى مثل هؤلاء الناس على انهم (( راعين صبيان )) او تشبيههم بتجار المخدرات .. لازم كل واحد ايحاسب على كلامة. وقبل لا ينطق يفكر بعقل ، ولا لانها شغلة مالت فقارة مو مالت تجار قمتون اتهينونهم وتقللون ادبكم عليهم . الله ايوفقهم وانشاء الله يعطيهم الخير ويعوضهم عن خسارته في هالهواية اللي ايمارسونها .
خخخخ !!
لهدرجه يعني خخخ عجبني هالمقطع >>هذه الشغلة تمشي في الدم نفس المخدارت ونفس الجكاير لما تجرب مرة وتدمن عليه ... كلشي وقابلتون في هالبرنامج هنود وطيور وحمام وحلاليق وبلاوي خخخخخ ! . . . هالمره الدور بجي على منهو ما يندره . . . لو تاخدون فره وتجيبون اليكم حشاش لو واحد مال مخدرات لو شي من هالقبيل وتجوفون كلامه ابرك ليكم خخخخخ .