( 1 )

أَحِبّكْ يا وَطَـنْ وَاحْمِي ترابِكْ

جِدُوْدِي يا وَطَنْ وَاهْلِي تَرَى بِكْ

يا نُوْرْ اِلْعِيْنْ وِعْيُوْنِي تَرَى بِكْ

فِداكْ اِلرُوْحْ وُما مِلْكَتْ يَدَيِّهْ

( 2 )

غَرِيْبْ اِلدارْ لا مُوْنِسْ وَلا مالْ

تِهِلْ دَمْعَتْ حِزِنْ لِي صِحْتْ يا مالْ

أَنـا مَقْدَرْ عَلَـى افّادِي اِذا مالْ

لِصُوْبِكْ يا وَطَنْ ماهُوْ بِيْدَيِهْ

( 3 )

هِيَ بْلادِي فِداهَا الرُوْحْ وِالمالْ

وِهِي سْنادِي اِذا وَقْتِي عَلِي مالْ

وَنـا حُبِّي لَهَا شَرْاواةْ لِشْمـالْ

صِلِيْبْ وُتارِسْ شْراعِي عَلَيَّـهْ

( 4 )

بَحَرْ بَحْرِيْنْ خِيْراتِهْ فِي مايِهْ

يِصِيْحْ اِلْهِيْرْ غِيْصِي وِيْنْ مايِهْ

مِنْ اِلْبَحْرِيْنْ عَلِّي بِهْ يا مايِهْ

أَنا أْتْمَنَى إِبْوَلَهْ يَلْفِى عَلَيِّهْ

( 5 )

هَـلْ اِلْدِيْرِهْ عَرَبْ حِنا نَسِلْهُمْ

تَعالُوْا مْعاي لِكْبارْهُمْ نَسِلْهُمْ

سِيُوفْ اِلْهِنْدْ في الوَقْعَهْ نِسِلْهُمْ

عَلَى رْقابْ اِلعِدَا تَهْوِى هَوِيِّهْ

( 6 )

هَلِمْحَرَّقْ بَعَدْ عُمْرِي وُحالِي

وُتاجْ اِلراسْ شِيْرَةْ كِلْ حالِي

هَلِمْرُوَّهْ فِي ماضِيْهُمْ وُحالِي

نَسِلْ اَحْرارْ وِرْجالْ اِلْحَمِيِّهْ

( 7 )

أَنا الظاعِنْ مِنْ أَرْضِكْ يا لِمْحَرَّقْ

وَنا مِشْتاقْ أَحِسْ قَلْبِي مْحَرَّقْ

آرِيْدْ أُوْصَلْ أَحْبابِي وِلِمْحَرَّقْ

أَزُوْرْ أَهْلِي فَرِضْ واجِبْ عَلِيِّهْ

شعـر : خليفة العيسى