استضاف برنامج «الناصية» الذي يبث على «الوسط أون لاين» كل يوم سبت، مجموعة من كبار السن في منطقة سترة (سفالة)، للحديث عن الذكريات التي مازالت عالقة في الأذهان، سواء كانت سعيدة أم حزينة، ومقارنتها بزماننا حاليا، فإلى نص الحوار:
* تعرفنا على أسمك؟
- جعفر محمد علي عبدالله الشيخ جعفر
* من سترة طبعا؟
- أيه من سترة.
- سعيد أحمد ربيع.
- جعفر محمد.
* سولف لينا، عن ويش تبون أتسولفون.
- أبومنير عنده سوالف واجد يعني تاريخ حتى عنده قصة عن جالبوت وعن زيارات الأول، سنة الطبعة على قولتهم، حوادث واجد.
* سولف لنا عن سنة الطبعة؟
- لا عن سنة الطبعة أنا جابوني في سنة الطبعة، ولكن الطبعة ألي أنا شاهدتها في 1972، جايين هم الله يسلمك من العراق ولكن الأول طبعا على لنج باخرة لنج هذي، هو صارت الطبعة بالضبط محل ألحين المريدين، هذا ألي هو يسمونه النوخذة أو ألي يسوق اللنج ما أدري أغلط أو أغلط أو نايبة المهم راح على هذا المكان وأهناك جبل رفيع بس مغطنه الماي فصادها وأنكسرت وراحوا منها أكثر شي من البلاد وعندنا من سفالة، وطبعا القرية ما أعتقد راح فيها أحد من القرية لكن أكثر شي من البلاد ومننا، إللي من البلاد حتى عميان يعني فيهم، المهم من عندنا أهنا من سفالة أبنية وبتها وولدها، والحجي هذا أراد ينقذ هذه البنية لأنها زوجة أخوه بس ما قدر يعني كلش إلى أخر أنه نجا زوجته.
* يعني في ناس عاشوا من السالفة؟
- أيه فيه ناس عاشوا، اللي ماتوا تقريبا أكثر من 15 بس ما عندي الإحصائية كاملة لأن من البلاد ومن سفالة ومن بعض المناطق.
* فيه أحد من الأهل؟
- من أي أهل؟ أهلنا؟ لا أحنا ما نسافر... مجانين، المهم عرفت لو لا، هذه الشغلة صارت في 1972 وفي أيام الصيف، النتيجة اللي نجا هو الحجي اللي أقول ليك عنه، يعني السالفة صارت وأنا عمري سنة.
* أقل من سنة بعد... أي شهر صارت تذكرها؟
- اللي أذكره تقريبا يحتمل أن يكون في شهر جون شهر ستة.
* يعني صارت أكثر من طبعة في البحرين؟
- أيه بس طبعات تختلف عن طبعات، أما هذيك اللي يقولون عنها الطبعة الأولى أحنا بعدنا صغار، أما أنا كلش يمكن ثلاث أربع سنين هذيك في 45 - 44 هذيك الأولى، هذيك الطبعة يمكن جعفر ما قدر يشاهدها.
* أي أحلى زمان الحين أو زمان الأول؟
- زمان الأول أحسن من الحين، لأن الأول الناس في رمضان تفتر في البيوت.
* الحين ما يفترون؟
- الحين ما يفترون ما فيه أحد، كان الناس تدرس في المجالس، ألحين مافيه حتى المجالس بندوها، قليل بيتنا يمكن الحين يمكن عشرة أبيوت أللي يدرسون، الأول كامل يدرسون كل الديرة اللي أي واحد عنده مجلس يدرس، ألحين ما ميش، يسوون ختمات.
* أذكر الأول ما أدري في زمنكم موجود أو مو موجود، الأول أحنا عندنا اعتقاد أن بس في رمضان ما نشوف الجن فنسهر واجد، أنت بعد جدي؟ نفس الشي هنا.
- لأن يقولون في رمضان الجن يتغيبون ما يطلعون.
* بس في سترة؟
- كامل.
* في شهر رمضان لعبة يسمونها غييبوه؟
- أيه غييبوه... هذه اللعبة الغييبوه ناس تتغيب مثلا وراء الصندقة، يوقف والبقية توقف أطالع وين أيروحون، إذا تغيبوا واحد ينادي عليهم تعالوا، تعالوا ألحين وين أيحصلهم أتغيبوا خلاص ما ميش أحد، أيطردون وراهم إلين يشوفونهم.
أتذكر أنسوي مربع وهذا المربع أيصير مثل السجن طبعا، هم ينتشرون كل واحد ينخش في مكان يتغيب في مكان، مجموعتين يعني مجموعة تبحث عن المجموعة الثانية أدورها، وأي واحد يمسح على رأس الثاني المجموعة الأولى تمسح على رأس الثاني يجيبونه في وينا في المربع كأنه مصيود في الصيدة يسمونها الصيدة هذي، زين أيجمعونهم كامل شوف ساعات يظل واحد قوي سريع في النهاية يطلع هذيلا كامل يدش عليهم ويطلعهم.
* انزين حجي جعفر سولف لينا الأول أشلون عرست أنت، يقولون الزواج الأول مهر غير.
- الأول مئتين دينار.
* مهرك مئتين دينار أنت، من هو عطاك إياهم لو أنت جمعتها؟
- أنا جمعتها، أشتغل في البحر وفي الشتاء أشتغل في البنيان.
* وشلون تروحون تتقدمون أنت رحت أي الوالد مرة وحدة.
- أيه ولي أمرك هو اللي يروح أنت ماليك شغل، ما تشوف المرة... أنت وحضك عورة عرجة جرفة عمية أنت وجانسك.
* عجل أشلون تختاره بس أيقولون ليك أن الوالد أختارها؟
- الأهل هم اللي يقررون، الأم أو الخوات يطرشونهم إن كان هي إلا متخبية أشدراهم ويش في ظهرها. ما يدرون عنها عمية عرجة عوراء مو شغلتك.
* وفيه خطوبة بعد الأول؟
- فيه خطوبة يخطبونها ويجيبون تالي الشيخ ويعقد بس. لا متشوفها، سيدي زواج الأول بس شهرين. أيه سوون ذبايح ويحلونك، ويسوون ليك زفة العصر والليل.
* بس الزفة ما فيه ألحين، فيه زفة؟
- ألحين ما فيه زفة، ما ميش.
* لأن صعوبة المعيشة فمن جدي ما أحد يسوي.
- لا مو صعوبة المعيشة، ألحين يخلون ليك الريدو يخلون ليك المسجل.
* أبو منير أنا سمعت أن سترة مشهورة بصناعة المديد مهزة والخارجية؟
- الخارجية فقط مهزة كان فيها واحد.
* تذكره ؟
- واحد يسمونه السيد سلمان.
* من سعف النخيل يسوونها؟
- لا مديد أسل، أسل الأول أسل يقوم بالبر في كل مكان أسل، وهذا الأسل ياخذه وينشره ويبسه وبعدين يدخله في خيوط بعد سبحان الله علم الإنسان مالم يعلم، ألحين وين بعدين يسوونه كان يسوونه تالي في بني جمرة، بني جمرة هذلين ثلاث أرباعهم كانوا يسوونه أبو فتيل أو فتيت الله يعلم، المهم هذولين اللي كانوا يسوون الأشياء بكثرة وحتى برانص يسوون، لكن على خفيف.
* الأول ويش الحياة؟
- الأول كان أهني كل نخيل فيه نهرة ماي يمشي غيلم، الرطب إيطيح تنهشها الغيلمة وأحنا نأخذها من بوزها نغسلها بس وناكلها، ما نمرض شارع المجانين يحرسه رب العالمين مرض ما ميش.
* أنزين والأول منهو اللي يسوي ليكم خبز فيه خباز عندكم؟
- الخباز اهني كان سابقا كلش خباز ما ميش قالوا أيسمونه واحد الساري لكن أنا ما شفته من سفالة ما شفناه.
العدد 2542 - الجمعة 21 أغسطس 2009م الموافق 29 شعبان 1430هـ
