بو هلال... طباخة «ألوان الوسط» الرمضانية التي سترافق القراء الكرام طوال الشهر الكريم وحتى أيام العيد لتعد معكم ما لذ وطاب من الموالح والحلويات والأطباق الخفيفة وصولا إلى «قدوع العيد»... نترككم مع «بو هلال» وطبخها اللذيذ.

بو هلال: شلونكم عيالي اليوم بعلم كل بنيه وكل صبي أكلة بحرينية معروفة في القديم ولكن للحين البيوت تطبخها، وما تخلى منه سفرة عامرة... طبختنا هيه «البلاليط» ياالله حضروا قلمكم وقرطاستكم علشان تسجلون المقاير، يمكن تسوونه على السحور تراه وجبة خفيفة ولا «تغث» الصايم.

البلاليط:

المواد والمقادير: كيسين بلاليط (ها أهم شي يكون ماركته معروفة علشان يصير قوي ولا يصير عجينة) كوب ونص من السكر - ست بيضات - ملح وفلفل- زيت - ماء- هيل مطحون و»قفشتين» من ماي الورد والزعفران.

الطريقة:

- جيبوا قدر متوسط وعبوه ماي وخلوه على النار حتى يغلي، بعدين خلو عليه «البلاليط» حتى تشوفونها استوت نص سويه، عقبها شخلوه (صفوه).

-جيبي القدر نفسه وحطي فيه دهن وخليه يسخن وبعدها ضيفي عليه «البلاليط»... انت إذا حطيتي البلاليط في القدر روحي أخذي الشكر وذوبيه في ماي الورد والزعفران، إذ ذاب كله (كامل) رشيه على البلاليط في القدر وحركيه... بعدين غطي القدر وخليه على نار خفيفة لمدة دقايق.

- في هذي الوقت كسري البيض وخلطيه بالملح والفلفل، وقليه في المقلة على شكل قروص (أقراص).

- ناظري (راقبي) البلاليط، إذ رفعتي غطا القدر وشفتيه معرق (تكون عليه بخار) يعني البلاليط نشف وصار جاهز.

- أخدوا لكم صحن (طبق) وحطوا فيه «البلاليط» وحطوا عليه البيضة... وأكلوها هنا وعافية عليكم.

في شي بغيت أقوله يا عيال، إذا تبون (تريدون) البلاليط تصير بلونين، قبل لا تغلونها (قبل السلق)، قلوها (تقلى بالزيت ثم تسلق)... وبتصير لكم بلونين.

هذي طبختنا اليوم انتظرونا الأسبوع الياي (الجاي) وطبخة (يديدة) جديدة.