شوله عاد! وشهالبدعه الجديده؟ شفتون وش امسوين؟ امخلين صور عجوز فقيرة تدوّر علب بيبسي من الخمام! اشلون احنه في وين عايشين؟ أكيد الصور مفبركه، واحتمال جايبينها من الهند ويقولون من المحافظه الشماليه! يقصون على من؟ أصلا إحنه ما عندنا فقر هاللون!
أكيد هذي مؤامرة ضد البلد، ولابد من كشف خيوطها للشعب البحريني والرأي العام العالمي، ويمكن كان اتفاق مسبق بين مصور الجريدة وبين العجوز، يعني كلها مسرحية في مسرحية. احنه نعرف ألعابهم زين! العجوز تروح توقف عند الحاوية ويصورونها وبعدين ينشرونها في الجريدة حق تشويه صورة البحرين وضرب الاقتصاد والتشكيك بعملية التنمية في البلاد!
دائما يصيحون ويقولون تمييز وتجنيس وما يشغلونا في القوة والشرطة، امفكرين الشغل في الشرطة هوَنطه أو لعبة يهال، الشغل في الشرطة يحتاج مؤهلات أكاديميه واستعدادات فكريه وقدرات جسديه عاليه، مو مِنّي والدرب! يفكرونها خراطه! تعال وادخل الشرطة!
وبعدين التجنيس... عوّروا راسنا، كأن احنه البلد الوحيد في العالم اللي فيه تجنيس، ما يشوفون امريكا وبريطانيا فيها تجنيس، صحيح هم يجنسون الكفاءات بس احنه بعد نجنس الكفاءات مثلهم، تفكرونا نلعب لو نوزّع الجوازات بالكيلو في البرادات!
بنغلاديش بعد تجنس قبائل بورما، ومالاوي تجنس قبائل النيجر! في أمريكا اللاتينية أكيد سامعين عنها، المكسيك تجنس قبائل الارجنتين والارجنتين تجنس قبائل المكسيك، يعني عملية تبادل حضاري وتجاري وثقافي وديموغرافي وبروليتاري، بس انتون امعورين راسنا بالتجنيس!
وبعدين الفقر موجود في كل دول العالم مب بس عندنا، حتى في السويد وسويسرا وتشيلي وروديسيا البيضاء! يعني ما فيه إلاّ البحرين، امجودين علينا فقر فقر! ومثل هالحالات لازم تتسترون عليها مو تكشفونها للعالم، علشان لا يستغلها الكيان الصهيوني للإضرار بالأمة العربية، أو تستغلها بريطانيا الحاقدة لتشويه القومية العربية، ما تشوفونها من بعد الاستقلال إلى الحين تحاول تنتقم منا فتنشر تقارير ضدنا في إذاعة «بي بي سي» الكجره!
وهذا المصوّر ما عنده شغل يقوم يصوّر الناس وقت الظهر يوم الجمعه، الله هداه، بدل ما يروح يصلي ويكسب ثواب يروح يسوي شوشره بهالصور ويربك الاقتصاد الوطني ويشرّد الاستثمارات ورؤوس الأموال الأجنبيه!
المفروض النيابة العامة ترفع عليه قضيه، وتتخذ كل الإجراءات القانونيه ضده، فما في هناك أحد فوق القانون، ولا تنسون ان مثل هذا العمل بدعه، وكل بدعه ضلاله تجر صاحبها إلى النار!
ثم ان تصوير حرمه فقيره ونشر صورتها في الجريدة إفساد في الأرض، وإحنه نطالب بأن تقطع يده ورجله من خلاف، تطبيقا لحد الحرابه، أو على الأقل حد التعزير، التزاما بتطبيق الحدود الشرعيه!
وإحنه باعتبارنا الناطق الرسمي باسم الوطن، والممثل الشرعي والوحيد لهذا الشعب، نطالب بإلقاء القبض على الأشخاص الثلاثه (المحرّر والمصوّر والكاتب الصحافي) بصفتهم خوارج! وإعطاؤهم مدة 72 ساعة لإعلان التوبة، وإذا ما تابوا بعد ثلاثة أيام، وأعلنوا الندم على نشر الصور، لازم يقطعون رقابهم بالسيف!
رواية الطنبوري
كان يا ما كان في قديم الزمان، من يبحث عن لقمة عيشه في حاويات القمامة ويخفيها تحت عباءته... ومن «يبوق» دجاجا فرنسيا مثلجا من المطابخ وما يخاف؛ لأن بوق الدجاج من علامات الولاء للأوطان!
إقرأ أيضا لـ "قاسم حسين"العدد 1792 - الخميس 02 أغسطس 2007م الموافق 18 رجب 1428هـ
