اكتبيني يالعيون الفاتنه في ليلك

سخري صفحة سوادك لجلها تحويني

والا يكفيني مكان من تحت تظليلك

يمكن سياجك بعدما يرتفع يحييني

نادميني خففي حد الخجل اصغي لك

بالأحاسيس الوفيره وابتدي من عيني

وحدتي ما تنجلي إلا على قنديلك

بس لو ألقى بصيص النور منك يجيني

قلت لك صبي الأمل لجل احتسي من قيلك

رشفة من حسرتي من ظلمتي تقصيني

خبّري التوت الذي يحضى على تقبيلك

انْ به بين البشر جمر وبرد يغليني

دثري وجه القمر من سوسنك واكليلك

وامنحيني من وميض الطرف ما يكفيني

سمّعيني يا بروز الفجر من ترتيلك

لجل تنساب الجداول بينك وما بيني

النجوم اللي تناظرني ونظراتي لك

بعدها عينك توافقني على تخميني

وينتهي عكس الخطا تحليلي وتحليلك

لين تهديك المسافه لي ولك تهديني

والله اني لو بسطت العمر في تدليلك

ما وهبتك عشق الا ما تخلل فيني

ويا لعيون المبحره لا هزني تفصيلك

هو معك خلي سكون أمواجك يوديني