مازال مرزوق مهتما بالبحث عن جذور اللعنة الدلمونية، وبناء على حديثه مع عدد من المواطنين اتجه إلى الحديث مع احد المواطنين البحرينيين الذين تجنسوا اخيرا وهو من اصل هندي.
مرزوق: بما ان حضارة دلمون القديمة كانت مرتبطة بـ «وادي الاندوس»، وبما اننا نعاني من لعنة دلمونية هي في بدايتها، بودي لو تحدثت معك عن هذا الموضوع لعلنا نجد حلا لوطننا البحرين...
البحريني - الهندي: انته لازم أول شيء يعرف انني اتكلم عربي لأني مولود في البحرين، ومن زمان يشتغل في البحرين. بابا كان يبيع سمبوسة وبعدين اشتغل في البناء وبعدين اشتغل في الحلاقة وبعدين اشتغل في الخياطة وبعدين صار عنده بزنز واجد زين.
ثانيا، لازم إنته يعرف انا ما احب باكستان وهذا مال «الاندوس» صار مال باكستان، وباكستان كانت هند، والحين صارت مو مال الهند. وانا اقول لازم الهند يضرب باكستان بصاروخ نووي، أو بصاروخ «بريثفوي»، وهذا أحسن صاروخ عند الهند، ويمكن يضرب باكستان واجد زين، حتى باكستان ما يسوي جنجال ومشكل...
مرزوق: ستوب، ستوب، انا اتكلم معاك عن دلمون، حضارة البحرين القديمة التي كانت لها علاقة بوادي الرافدين ووادي الاندوس، ويمكن لو نتفاهم مع بعض مثل ما كان اجدادنا يتفاهمون مع بعض، يمكن نقدر نتفاهم مع ارواح دلمون...
البحريني - الهندي: انته مجنون، شنو يقول؟ ارواح دلمون، ولعنة دلمون ما فيه... لازم البحريني يشتغل زين مثل بابا اشتغل واجد زين وبنى واجد في البحرين، وكان يحلق رأس واجد نفر، ويبيع ويشتري وما فيه مشكل وما فيه لعنة دلمون... لعنة دلمون هذا شيء جديد مال اليوم، لأنه في نفر بحريني واجد ما يشتغل، واحنا لازم نساعد بعض ونشتغل مثل بابا مال انا وبابا مال انته... وبعدين ما فيه لعنة دلمون...
مرزوق: ولكن انت عندك خبرات متنوعة ويمكن تساعد «جمعية من لابرج لهم» في البحث عن حل للناس الذين يتضررون من لعنة دلمون...
البحريني - الهندي: انته لازم يعرف ان جمعيات واجد في البحرين ما فيه فايدة، وكل واحد يقول مشكلة، مشكلة، وما فيه واحد يشتغل مثل بابا مال انا وبابا مال انته...
مرزوق: والله انت غربلتنا ببابا مال انا وبابا ما انت... الله يرحم ابوك اذا كان مات... انا اتكلم وياك عن لعنة دلمون وانت تلف وتدور كأنك ما تريد تساعدنا في شيء...
البحريني- الهندي: شوف لا تقول انا ما يبغي يساعد في شيء.. بابا مال انا وانا يساعد البحرين في كل شيء، وفلوس مال انا كله بالحلال وكله عشان أنا اساعد البحرين... وانا يقول ان هذا لعنة دلمون مو شغل مال انا... انته روح اسأل واحد غير انا... أنا مشغول واجد، واذا فيه بحريني يبي شغل انته يعطيه رقم مال انا، وهذا احسن من كلام عن دلمون ما فيه فايدة...
مرزوق: احنا عندنا الالاف يبحثون عن شغل وان شاء الله انطرشهم ليك، ولكن «لعنة دلمون» قضية مهمة، ولازم انت بشترك لحلها، حتي يصير واجد زين.
البحريني - الهندي: انت ليش مايتكلم عربي زين؟
مرزوق: اللعنة الدلمونية حلت علي وتخربطت ... سامحني
إقرأ أيضا لـ "حظك يا مرزوق"العدد 157 - الأحد 09 فبراير 2003م الموافق 07 ذي الحجة 1423هـ
