يلتقي برنامج «الناصية» الذي يبث اليوم على «الوسط أون لاين» موهبة فنية أبدعت الرسم على صغر سنها. يقال إن «ابن الوز عوام» ويقال أيضا «ذاك الشبل من هذا الأسد»، وضيفنا لهذا الاسبوع أجاد الرسم بالريشة كما هو والده، إنه الموهبة البحرينية عبدالله عبدالعزيز الحلال، عمره 11 عامأ وهو طالب في مدرسة البدر. التقيناه مع والده الفنان البحريني عبدالعزيز الحلال، وهذا نص الحوار:
* منذ متى وأنت ترسم؟
- قبل ما أدش الروضة.
* ترسم الأشياء وهي أمامك أو تتخيلها مثلا؟
- بعضها أتخيلها وبعضها قدامي أشوفها وارسمها.
* أبوك طبعا فنان هل علمك الرسم أم لا اتعلمت بروحك؟
- علمني وأنا قمت أرسم بعد شفته هو يرسم قمت رسمت.
* أنزين دخلت دورات رسم؟ رحت مثلا مراكز؟
- نعم، درست في جمعية البحرين للفنون التشكيلية.
* دخلت مسابقات وحصلت على مراكز؟
- نعم حصلت المركز الأول في مسابقة «فن الطفل».
* كيف تريد تستفيد من هذه الموهبة، يعني ويش أمنيتك؟
- أمنيتي أصير فنان كبير.
* وما هي أفضل رسوماتك بالنسبة إليك؟
- اللي توني أرسمها آخر شي أحسن شي صارت.
* كيف أنت في الدراسة زين لو مو زين؟
- زين أكيد زين.
* ألحين خلنا نسألك حجي عبدالعزيز، طبعا أنت فنان من زمان واشتغلت في عدة جرائد محلية رسام مشهور ومعروف قبل، وين أنت الحين؟
- والله تقريبا شبه متوقف أو أمارس بعض الأشياء البسيطة، بس ما أشارك في معارض.
* شلون اكتشفت موهبة ابنك عبدالله؟ هل بالصدفة مثلا أو هي لا بالفطرة الفن عنده؟
- والله عبدالله الصراحة عنده موهبة واستعداد أنه يصير فنان وتصير إليه مكانه، لأن عبدالله عنده إحساس في العمل وحتى أيسوي العمل أغلبه ما شوفه ألا يراويني، يعني مو قدامي ما أجي اللا يقول ليي هاكو سويت عمل وأشوفه بمستوى أكبر من سنه، وكان يرسم قبل ما يروح الروضه، شاف بعض الرسومات واتأثر بها وبعدين لما قام يطلع بره المدرسة شجعوه بعض المعلمات اللي هي معلمة مديحة الرحمة ما قصرت وياه.
* وهل في بالك أن تطور هذه الموهبة عنده أو فيه خطة في بالك ليه؟
- لا والله عليه هوه، كان قبل حتى في المواد الدراسية متفوق بس قام الحين انشغل ابها الرسومات، المشكلة طرأت عليه الحين هواية جديدة اللي هي أعمال السحر. يسوي أشياء أعمال سحرية وهذي أخذت من وقته وربما أخذت حتى من مجال الرسم، وكان يسوي مجسمات ويرسم ويخط ويسوي مجسمات يعني إليه عدة اتجاهات في العمل الفني.
* هل اتشوف روحك فيه وانت صغير؟
- أيه طبعا بس أنا كنت ما فيه أحد يشجعني من الأسرة وما حد يفهمني طريقة الفن وينتقد أو يشجع وإلا يلمس الجوانب الإيجابية والسلبية فيها، بينما أنا الحين لا بالنسبة ليه أفيده في هذي الناحية. أقدر أقول هذا خطأ هذا صح وأوفر عليه المحاولات الصح والخطأ اللي هي ربما تأخذ منه وقت طويل.
* طبعا هو دخل في الرسم الكريكتوري أو لا في الرسم العادي؟
- رسم، في حتى عندنا نماذج من هني رسم رسم كاريكتوري بس عبدالله ما أعرف أشلون ما يسمع الكلام، هو إذا يبغي يرسم بيرسم أقول ليه مثلا أدرب فيه كتب أتفيده يطلع عليه ما يأخذ بها، يرسم ابروحه وأنا ما أدفعه لازم يصير رسام، هو يشوف نفسه في أي مجال.
* كيف يعني؟
- أنا ما أدفعه لازم يصير نسخة مني والله يمر بالظروف اللي مريت بها، أنا عشت طبعا ظروف مختلفة تماما. الظروف اللي أوجدتني أو الظروف اللي شكلتني غير الظروف اللي شكله هو الحين، احنا الحين فيه مغريات ومشارب كثيرة جدا من التلفزيون من الإنترنت.
* طبعا انت دمجت الرسم الكاريكتوري بالشعر؟
- محاولات للكتابة الشعبية.
* تقدر اتقول لينا بعض اللي كتبته؟
- مثلا الدعايات مثل عندنا الدكاكين اللي حولنا، مثل غازي فردان جارنا:
لو تدري چان تتنكز عند الفردان أحسن كز
تلقى سلندر مشحون من شحنته يتفزز
وأحسن منهم في الخدمة ما بتحصل لو تعجز
* واشلون تدمج الكتابة الشعبية بالرسم الكاريكتوري؟
- تقريبا نفس العملية وانما هذا ياخذ اتجاه الكتابة وهذا يأخذ اتجاه الخط الرسم.
* وهل تتوقع أن عبدالله يجيد هذا الشيء بعد؟
- ربما، وغيره مو أحسن منه، يعني أنا بصراحة أدرس في عبدالله موهبة قوية مو علشان أنه ولدي، لا فعلا وكل من شاهد أعماله سواء في المدرسة سواء في جمعية البحرين اللي راح دورة فيها المعلمات اللي عنده اللي شاف أعماله اللي شارك في المسابقات عبدالله عنده مستوى قوي وادراك حساس بالعمل الفني.
* أذكر سالفه سمعتها أن أنت رحت خربشت على بيت وزعلوا عليك؟
- أيه طبعا أذكر حسينية بيت الطويل هني أول ما مسحوها، بس أن شفت اجدار كبير قمت أرسم، طبعا ما رضوا وأنا ما كنت أدرك لأن شفت مكان فيه فضاء قمت أرسم فيه، وما خليت أهني فوق بيتنا فوق بيت الجيران داخل البيوت، مثل ما قلت ليك اروح أدور عليهم اللي عنده موضوع رسم أرسم ليه مال رمضان مال الحج، وكنت اهني في الديه بعد عند أهلي بعد أرسم ليهم، فكنا نرسم بالفحم بالطباشير المتبقية عندنا اللي نحصل عليها بالقار بقايا علب الصبغ الفارغة. المهم كنا نشتغل بالأشياء المتوفرة فوق السحاحير فوق الكوارتين.
* وهل تعتقد أن هذا الشي غريب على الموهبة ان تطلع بحريني عمره 11 سنة؟
- لا كان قبل ما يروح الروضة يرسم، ومو غريب الصراحة البلد تزخر بالمواهب في القرى، روح فتش في جميع الاتجاهات في الشعر في الرسم في الخط الصراحة بلد اولاده شيء غريب، يعني البحرين صراحة في كل المناطق في كل القرى لو تروح تبحث بتلاقي مواهب بس تريد من يوجهها من يستفيد من الطاقات الي قاعدة تتدفق واحد يوجهها يخليها في الأماكن المناسبة.
* يعني نقدر انقول إن المطلوب توجيه الكوادر الناشئة ورعايتها...
- رعاية واهتمام وتوفير الأدوات التي تشجعهم على أنهم يستفيدون منها ويتخطون ويوصلون إلى المستوى اللي يطمحون إليه، طبعا هي تبقى حجر عثرة عدم وجود الأدوات عدم وجود المشجع الفاهم الواعي. طبعا الناس يمكن يحثونك يقولون لك روح مني روح مني ولكن هم ما يعرفون أن يمكن هذا الطريق يؤدي إلى مكان مسدود، لكن الواحد اللي يعرف الخارطة اللي يقول لك روح مني متى يوجهك فالناقد يعني دائما بصراحة أحنا غياب الناقد المتخصص أو الفاهم أو اللي عنده ثقافة في هذا الجانب هذا وجوده اليه أهمية كبيرة جدا وغيابه يخلي الطاقات تتبعثر مني ومني. ربما الإنسان ايضيع الموهبة اللي عنده وهو ما يدري يروح في اختصاصات ما تصلح ليه، ولكن الناقد اللي يقدر ايشوف ليه مثل التشخيص في المرض والجانب الصحي.
* كلمة أخيرة تقولها
- نتمنى صراحة من عبدالله يكون أكثر اهتماما في جانب الرسم عشان يطور من نفسه. هو قاعد يهمل ما قاعد يشتغل يضيع وقته ويبعثره مني ومني في متابعة التلفزيون والأعمال السحرية والأشياء الكهربائية، يشتغل فيها بعد بس ما يعطي الرسم اهتمام والخط اهتمام، لما كنا في سنه ما خليت اجدار في المنطقة إلا رسمت فوقه ما خليت شنطه ما رحت بيوت الا وأرسم ليهم.
* مشكور على كل يا أستاذ عبدالعزيز...
- شاكرين لك هذا الاهتمام وإتاحة الفرصة لعبدالله ونشكركم ونشكر جريدة «الوسط» على اهتمامها ورعايتها.
العدد 2521 - الجمعة 31 يوليو 2009م الموافق 08 شعبان 1430هـ
كرم حجازي
موفق بأذن الله
مساء الخير
موفق بإذن الله
مـــ\\
مشكووووووووووووووووووووووووووووووور اخوي عالموضوع
4
مششششششششششششكور
الحمد لله
موفق بإذن الله