ما أدري والله ويش فلسفة السفر عند بعض الناس، حالتهم حاله ومنتّفين والكل يطالبهم، الجيران والاخوان والبنوك الإسلامية والغير إسلامية وأشغالهم، وما يتركون عنهم هالمشاريع والتصانيف الفاشلة ومن عرضهم... السفر! والسفر يصبح هم وعبء عليك إذا كنت فقيروه!!

أعرف وحده من المفترض ان توظفها الحكومة بمنصب سفير فوق العادة من كثر سفرها إلى سوريا سنويا!! لا والادهى من هذا كله أنها سنويا تسكن في نفس المُسمى «فندق» وهو عمليا خان أو خربة، وسنويا يبوقون كل فلوسها... ولا تتوب بعد!

احنه نعرف ان السفر له سبع فوائد...وهذا ينطبق طبعا على الناس العدلين، مو على بعض الناس إللي يطبقون «حشر مع الناس... عيد»!!

طوووول السنة يجمعون وصاكين على روحهم ومقصرين على روحهم وعلى عيالهم لا ياكلون مثل الناس ولا يشربون مثل الناس ولا يطلعون مثل الناس، عشاهم ما يتغير بيض ولوبه، نخي خباز، خبز وروب الخ الخ والشاورما والمشويات ما تدخل بيتهم إلا بالغصب، وآخرتها يروحون مع مقاول يقص عليهم ويرقّدهم في الشارع ويرجع عنهم، وتيتي تيتي زي ما رحتي جيتي!

السفر في حالته الطبيعية هو حالة من الاسترخاء ومراجعة النفس وهو حالة من الراحة بعد عناء سنة سواء في الدراسة أو العمل، هو راحة من مقابلة نفس الوجوه ونفس الكلمات إللي تغث كل يوم، والسفر يا جماعة ما هو واجب على كل مؤمن إللي يخلينا نحرص ونستميت لأداءه سنويا، وعدم السفر يا أخواني لا يُعاقب عليه القانون إلا تذبحونه جذي، وما واحد يحزم شنطه وإلا الكل عزّم معاه!!

وويش فيها يعني لين ما سافرتون سنة وحده... ويش فيها يعني لو شاركتونه صيف البحرين المميز في انقطاعات الكهربه وزحمة الشوارع، ولعلمكم ترى صيف البحرين ملئ بالمفاجئات، شيء حوادث سيارات شيء حرايق وإشاعات، وما يطوف أسبوع ما نعيش مصيبة، والصيف توه جاي وبتشوفون، ولا أنسى أقول لكم ترى كل مشروك مبروك!!