مرت شهور الحمل صعبة على صالحة من الخوف ولمحاتاة وتخاف تطلع وعمتها ما تأمن تخليها بروحها ،  وساعات حتى النوم تنام وياها .

ومسعده وخواتها كل ما طلعوا وراها جودتهم جدتهم.

وبعد ما قدرت عليهم يغافلونها ويروحون يضربونها لكن هالنذر عند الحسين الله وجبه .

في الشهر التاسع ، بدا عليها الوجع و ضلت في حجرتها تقاسي خايفة تطلع قدام البنات ، جتها فوزية شافت حالتها : ويشو فيش خالة ؟

طرشتها لابوها : روحي لابوش خله إييب موتره يودني الدختر .

وجاء ليها مو مدلي الدرب دش ليها تفتر من الوجع ، وراح نادى امه ليها بسرعة بسرعة ، وجت بشتها على راسها ما قعدت ، جودها ووصلوها للسيارة .

مسعدة واقفة متخصرة وعيونها بتنبط : عساش ما توصلين عساه يموت وما يعيش .

نطت عليها جدتها : چب ، الله يچبش ، يالله انطمي يا سودة الوجه ، بدل ما تقولين الله يسلمش ، تدعين ؟ ويش خانتكم بلياها ؟

الله يسلمش يا صالحة و تييبين الولد ، و تقر عين ولدي بشوفته .

ودشت السيارة وهي تصرخ من الوجع ومعتوق رجايلة تتراقع من الخوف ،

ويمشي ومتدوده .

ام معتوق خايفة على الولد والمرة : بالعدال يا ولدي لا تدعم ، و على مرتك لا تولد في الموتر تغربلك .

وصلوا الدختر و دشوها غرفة الولادة ، وضلوا برا ينطرون

معتوق ما بند من روحة الحمام ، جاء لامه : ويشو اماه ، ما ولدت له ؟

ام معتوق : لا يا ولدي لالحين ، طلعت الدختورة قالت شوي وبتولد ، لكن من مته ، عيزنا .

قعد على الكرسي ورد قام  راح يطل انچان احد طلع بيسأله .

وشوي الا الممرضة مطلعه له الجاهل على السرير : تستاهل السلامة حجي ، يابوا لك صبي تعال شوفه .

ويش بتسميه ؟

استانس معتوق ومو عارف يضحك لو يصيح راحت ام معتوق تشبك الولد وتتحمد له بالسلامة : تستاهل السلامة يا ولدي ، قرت عينك .

راح للجاهل ويطالع فيه ، ويتلمس جبهته وشعره : باسميه حسين ، لان هذا بركة النذر ، والله وجبه .

وردت البيت والجباب والاغاني عليها من اهلها وخواتها ، وانبطت چبد البنات .

ضل عندها الولد چم يوم فرحانه به ، وما ليها قلب تعطيه البدوية ، برزت فياب الولد واغراضه و خدت له حليب ومرضعه وكل ما سمعت الجاهل يصيح دمعت .

راحت توصل الولد للبدوية و هي متهضمة لكن نذرها لازم توجبه .

وصلها معتوق لبيت البدوية ضربت الباب وطلع ليها صبي صغير : تبون من ؟

صالحة واقفة على الباب وعلى ايدها الجاهل : ام شعبان هنا ؟

لصبي : اي هنا ، نقول ليها من ؟

صالحة : قول ليها صالحة بت رواس ، ماخدة. ولد الدولاب .

لصبي : بقول ليها ، صبروا شوي

تعبت صالحة من الوقفة ، بعدهي تعبانه ، جاء لصبي : دشي داخل

دشت داخل ودش وراها معتوق عنده اغراض الجاهل : يالله ، يا الله ، وحط الشنطة داخل صوب الباب وطلع .

دشت صالحة داخل حجرة البدوية وفلتت روحها على الباب من التعب ، وهي منشغله بجاهل صغير مرخته ودهنت عافيتة ، وقمطته ،التفتت اليها : حياش يا بتي عن الباب دشي داخل لا يلفح الياهل هواء .

قعدت صالحة وفي حضنها ولدها نايم وتطالع فيه .

البدوية ترضع الصغير : چم عمره الياهل ؟

صالحة : سبوع .

البدوية : يووووه بعدش تعبانة يا بتي ، خذي المخده سيحي عليها .لا يتعور ظهرش .

ويش فيه الياهل ؟ مريض لو بيعة ؟

صالحة : بيعة يم شعبان .

البدوية : چم سنة ؟

صالحة : سنتين ، بس بايي ازوره وباييب له حليب وفياب وفوط وحفاظات .

البدوية : كروتي في الشهر 150 ريال .

صالحة : حقش بتاخذينه كامل .

بطحت البدوية الجاهل ، ونادتها : تعالي يا بتي اشوف الياهل ، طاح سره لو لا ؟ مريض لو صاحي ؟

صالحة قامت وفي ايدها الجاهل وعطتها اياها ، بطحته بين رجايلها وبطلت قماطه وحفاظته وتفحصته : اللهم صل على محمد وال محمد ، صاحي الياهل الحمد لله وسره باچر بطيح اكو باري ، مته بتختنونه ؟

صالحة : ابوه يقول اذا كمل السنتين بختنه .

تسحب الشنطه وتعطيها اياها : وهادي اغراضه شوفي اذا قاصرنه شي قولي .

بطلت الشنطة وطالعتها عدل : جيبي له فياب عدل هديلين ما يكفونه وجيبي صابون وشامبو وكريم للياهل .

البدوية : تعطيني الكروة الحين وخليه ورحي ولا تحاتينه ، في عيوني .

بطلت بوكها وطلعت البيزات وعطتها اياها .

طلعت عنه وهي تصيح .

وظلت على هالحال رايحة جاية وحملت بالثاني قبل لا تاخذ الولد ، مرت السنتين وراحت خدت ولدها ، صار حليو و مربرب ويفهم ، وچم شهر وولدت جابت الفاني ، واستانس معتوق ويروح بيت ابوه يفاشر على اخوته : يا مرتضى ويا يوسف جبت لولاد ، غصبا عنكم ، وبعد باجيب صبيان وباحركم ، ما تقدرون تعيبون ولا تتشمتون بعد اليوم .

مرزوقة تسمعهم مستحرة : يا مال الويل چنها ارنبه ، ولدها ما خد سنة ونص وحملت عليه .

اخوته انطموا وسكتوا .

وجابت عقب لصبيين بنية وصبيين ، وكبروا ولادها والبنات الكبار عرسوا وخف شرهم عن صالحة .

لكن مسعده وهي بعيدة ايدها تطال ، تعلمت تسوي اعمال و سحور .

_________________

بشتها : عبائتها

البدوية : هي حاضنة للطفل مقابل أجر لمده محددة

كروتي : الكروة هي الإجرة

باري : متماثل للشفاء

نلتقي في الحلقة التاسعة