المشكلة صارت عادة عندهم الشباب التفحيط ، مثلا بين ماتم مدينة عيسى وتوبلي نصف الليل تسمع تفحيط مزعج جدا ، وتتركهم ، وبعدين بعد صلاة الصبح وتعال اسمع تقول القيامة قامت صوت صوت عالي جدا يخليك تنشد له وتشوف طبعة التاير في الأرض ، والمشكلة تخاف تقول لهم شيء ويااااا ويلك تروح فيها ، شنو اسوي مثل ما يقولون ناااااكل حره ونسكت ولا نسبب حق روحنه ويلات ومشاكل

احنا متغربلين في كرزكان .. في باركات مقابل مسجد الامام علي كل يوم يجون بالليل يفحطون ويأذونا .. لايخلونا ننام وازعاااج

الهوشة مو بسبب التفحيط ، وصارت قريب من هاي المكان يا ليت يمنعون هالشي انااا من اهالي المتضررين مع الاسف بسبب مشكله بسيطه راح الاخ المجرم و ضرب الصبيان الله لا يوفقه عسااه يتعفن في السجن و بناخذ حقنا بالقانون وخل اهله يصيحون عليه عاد ستره و لا غير ستره مالت عليه هالمجرم ....

هههههههههه رجع إلى أهله سالم عيب الكلام الي تقوله ارتقي في كلامك يا محترم

ههههههههههه غصبا عنك طلع سالم الله يحفظه ويخليه ويطول عمره ههههه حقود هههههههخ

من كلامك واضح والله كيف نوعية المتضرررين من اهلك اذا هذا اسلوبك جدي فجدا واضح ان المتضرررين غلطانين من الاسلوب ... ارتق واختار كلماتك الي مليون راح يقراها

أعتقد أن هذي الأشخاص ما عنده رخصة قيادة و السيارات المستخدمة غير مامنه ولا مسجله

القانون ماايسوي شي همهم بس غرامه من جدي المشاكل اتزيد المفروض سجن بعد

الغلط غلط وهدا الكلام مامنه فايدة والازم قانون يردع فيه مكان مخصص للتفحيط وبسكم كلام هرار لا تدخلون الدنيا سايبه

جهل ما فوقه جهل! إنا لله وإنا إليه راجعون

صيروا اوادم فشلتونا شباب "جنكل"

يا جماعة الحل اذا كانت الهوشة بسبب التفحيط ان الدولة تخصص يوم بشكل اسبوعي نفس شهر رمضان لممارسة هذة الهواية اما ردع و سجن وغرامات و عقوبات المفروض بعد ما يخصص محل اسبوعي و بشكل منظم هذة رياضة لها محبينها الموضوع سهل خصص و بعدين عاقب المتجاوزين اما مافي اهتمام لهذة الطاقات و لا في تنظيم فعاليات اكيد بنجوف هالامور
اما اذا كان الشجار خارج عن التفحيط فالبلد فيه قانون و كل مخطئ ياخذ جزاه و شكرا

للعلم فقط حلبة البحرين الدولية مفتوحة للجميع في يوم الاثنين لسباق 7 دينار و3 دينار لتفحيط كامل عشرة دينار وفيها كل الاستعدادات الاسعاف موجود المطافئ موجودين منظمين السباق موجودين منصة موجودة للجمهور وعندك من الساعة 7 مساء الى الساعة 11

الحمد لله مناطقنا ما فيها مثل تلك الازعاج لانه مفتوحه لرجال الامن ولرجال المرور الله لا يغير علينا وينعم علينا بالامن والامان والاستقرار

البعض ردودهم ساخره والبعض يقول اهلهم ماعرفو يربونهم او ماربوهم مافي اهل ماتعبو بتربية اولادهم ربو اولادهم احسن تربيه بس الأم شنو ذنبها لما ولدها يمشي وي ناس مشيتهم غلط الا الله مايهديه تعبان الله يهديهم ويصلحهم يارب ويساعد قلب اهاليهم

هذي المفروض يبيلهم كمين وتالي توقيف ومحاكمة وسجن لمدة شهر مع الاشغال الشاقة

اني واحد من أهالي سترة و منزلي قريب جدا من الحدث ، بشكل ليلي هذا الإزعاج و المسخرة ، أولا اعاتب على وزارة الداخلية وثانيا قلة أدب ، علما بأن التفحيط في المنطقة الصناعية وقريب من معسكر تابع إلى قوة دفاع البحرين وشكرا.

والله ماينعرف لكم ... اذا كانت دوريات الامن في المنطقة تقعدون تسون وتألفون قصص من الخيال ... واذا مافي دوريات تقولون العتب على وزارة الداخلية ؟؟؟

التفحيط في الصناعيه يا بابا والشرطه مو عاطتنهم وجه يفحطون في شارع رئيسي ويسكرونه بالساعه تيلرات وسيارات صغيره تمر هناك الشارع مو مال ستره بس لا تتكلم وانت ما تدري بالدنيا

يالله يالله وين قريب صناعيه وين و شركات و البيوت وين يا حظي

اني من ستره وإني عادي عندي يفحطون ف كل مكان والله الكل صاير ف البحرين يلعب .. هم فحطو ما راحو فنادق وشربو خمر جان تبون الشرطه والحكومه والمرور .. مقدرتكم ع هالشباب اللي تعبو منكم ويبون يتسلون وبعدين هي مشاجره اهليه يعني لسكان ستره ما نسمح لأي أحد يتدخل ..

واذا قتلوا جاهل او شايب بعدين بعد قولوا احنه اهل وما صار الا الخير.....وش هالهرار

انت مريض نفسيا او مريضه نفسيا ... وكأن ستره لها قوانينها الخاصة ؟؟؟ شقال قال مانسمح احد بتدخل .

واني بعد من سترة .. واقول لك فشلووونا .. يتهاوشون بسچاچين!!! .. و اللي يفحطون يزعجونا ويشكلون خطر ع المارة ..

انا استغرب من التعليقات الي تقول تشديد وما ادري ويش ، الجماعة الي تتكلمون عنهم اولادكم و اخوانكم واصاحبكم الاولى انكم تنصحونهم و توعونهم و ترشدونهم ، قل خيراً او اصمت الحل مو بالقوة والسجن والقضايا لان اذا تم استخدام الطريقة الخاطئة لمعالجة هذه الظاهرة الي علقوا بالتعليقات السلبية هم اول المتظررين ، واضح ان شاء الله

اذا الا يقحصون قعدوا اسبوع اسبوعين في السجن بيعقلون

يعني النصحية يات الحين .. وليش ماتنصحونهم على طول عشان يبتعدون عن الامور الاخرى ؟؟؟ وانت تعرف القصد ... وثاني شي انت ترضاها على نفسك وعائلتك اذا يسون ازعاج يم بيتكم كل ليلة !!!

مو كليله تره بس لسبوع مره جدي

الله يشافيهم. وتكون هالسالفة عبرة للجميع. وان شاء الله ماتتكر.

حسبي الله ونعم الوكيل فيهم اللي يفحطون بكل مكانزليل و نهار اغلبهم محششين مخدرات ومن احد يكلمهم افتعلوا جريمة. يجب على دوريات الشرطة ان تستجيب لنداءات الاهالي من ازعاج المفحطين ووضع رقم خاص للشكاوي

زين تسوون الداخلية كفو، يستحقون التأديب، الي ما بيلتزم بالحق العام وبسبب إزعاج يتفضل ابوزعبل أبوابه مفتوحة ، وش قال اسحلة بيضاء يالله اكلها احين سجل اجرامي يخرب سمهتك و سجن عالاقل سنه

الحل النهائي والعادل
سحب الرخص نهائي ممن سبب المشكلة
وتنتهي السالفة.

الي بيفحط والي بخمس يروح عند بيتهم لا يأذي الناس
فية بعظ لبيوت عندهم مرظى وفية بعظ لبيوت عندهم كبار في السن
وفية ناس عليها اشغال
وفية ناس توها جاية من لشغال

أكثر من مرة شخصيا اتصل للمرور على هاتف رقم 199 يقول لي نرسل دورية خبر خير ولا أحد يطب من الداخلية

الخبر الي منتشر و هو مؤكد السبب مو التفحيط ولاكن بسبب خلاف بينهم وهم كانو في مكان التفحيط و الطرفين من الجمهور وليس المفحطين
اما بالنسبه للي يقولون ازعاج ارد علبهم واقول المكان بعيد عن البيوت و الشارع داخل المنطقه الصناعيه و مايسبب اي ادى بسبب ان الشارع هدا مايطوفون عليه ال وقت الدوام فقط السارع حق شركات بس

كل واحد فيكم أفكر في مصلحته مو في المصلحه العامه .... التشديد اليي تتكلمون عنه بضرنه كامل

أشلون يظرنا ياهلاكو القانون لازم يطبق على الجميع

اي قانون إلا تتكلم عنه سؤالي ليك هو في الديره قانون ?

لاتبوق لاتخاف التشديد لن يشمل الا المستهترين و الغوغائين

..
التفحيط والتخميس والمواتر سيكل ازعاج موجود في جميع القرى ، وهذا الدور لوقف طيش الشباب يجب ان يكون على عاتق اهالي القرى انفسهم لمعرفة بعضهم البعض .

الأهالي ما يقدرون يسوون شي
الشباب المزعجين ما بيوقفون ازعاجهم لأن احد من الديرة كلمهم

صدقني لو اي شخص من القرى يحاول التحدث لهؤلاء ويوقفهم عند حدهم أو يبلغ المرور عنهم، سيخرجونه من الملة ويتهمونه بأبشع التهم التخابر و العمالة وغيراها .. ويروجون الاشاعات التي تسئ بسمعته وسيصبح منبوذ من قبل اغلب سكان القرية

ظاهرة التفحيط وإزعاج الناس صارت في المناطق ومع الأسف مافي رادع من الحكومه اتجاههم

يجب اولا على اهالي هذه المنطقة توفير الأمن لرجال الشرطة ورجال المرور من الاعتداءات حتى يتم تطبيق القانون

بعض الاهالي عنيفين ودائما عندهم رفض للآخر. الله يهديهم.

ما يحبون بعض
ما يحبون بعض

للاسف هائولاء المستهترين مثل العصابات و أبأهم معهم حيث يعلم الاب ان ابنه لا يملك رخصة سياقة ولفقدان ادارة المرور واجبها و تشجيعها لمثل هذا الاستهتار تتعاطف معهم نتمنى من الجهات الخاصة اتخاذ اشد التدابير للقضاء على هذه الفئة الفاسدة و المستهترة نحن نطالب بعقوبة صارمة لهم

الله يحفظً شباب ستره

المرور يعلم بهذا الامر ورغم ذلك لا يضع حد لهذا الموضوع فأين الكاميرات الامنية التي توقف هؤلاء الصبية من هذه الممارسات التي اصبحت مصدر ازعاج وانتهاك للأرواح

زاعجينه هالاشكال المتخلفة في كل مكان، وصلنه 2017 وللحين هالعقول عايشة بينه

ظاهرة أصبحت مصدر ازعاج شديد اضافة لخطورتها على ارواح الناس وللأسف دائرة المرور ما اتخذت اي اجراء

سيكل يا جماعة ...اي رخصة...اللحين بيطلعون قانون رخصة سياقة سيكل

التفحيط سبب مشاكل وأضرار كثيرة للسائقين قبل الناس اللي حوالينهم وخصوصاً انه يقام من غير تنظيم وتنسيق مع الجهات المختصة بهذا النوع من الرياضات .
انتبهوا لانفسكم مانبي أحد شباب يصيده شي مؤلم ويتأسف عليه من يحبه من اصدقائه وأهله.
وياريت في جهة تتبنى هذول الشباب حتى ماتصير مشاكل مع الاهالي من سكان المنطقة.

الحكم عليهم شهر بس مو تحت المكيف ووجبات ثلاث
شهر مع الأشغال الشاقة يشيل صخر خرسانه سيارات خربانه يعني ما تجي الليل إلا شاق حيله شق. شوف يتوب لو ما يتوب

من أمن العقوبة ساء الأدب
أنا أقترح على الحكومة تشديد العقوبة على المفحط والمشاهد لهم وعقوبة السجن وحدها لا تكفي هؤلاء المتهورين المزعجين

قلة تربيه وثقافة،، أتمنى أتخاذ الأجراءات صارمة ضدهم وحبسهم وتشهيرهم بالصحف المحلية وغرامة مالية كبيرة ليكون رادع لهم ولغيرهم ..

التشهير جريمه يا فالح

الله يغربلهم ....

انا اقول لو يحكمونهم نفس الامارات اخلونهم تنظيف الشوارع 3 اشهر وخصوصا في شهور الصيف عاى الاقل يمكن يحس انه يأدي الناس

صراحة يبي ليهم
يستحقون

....،، الموضوع كله انه واحد طاح من موتر سيكل وفِي واحد قام يضحك وجو اصحاب الا طاح وضربو الا ضحك المضروب طلع سكين وضربهم

اصحاب المواتر سيكل مجعجين وخاصة بعد منتصف الليل وشكلهم يتعمدون الازعاج المفروض يطبق القانون عليهم

صحيح كلامك عندنا كم واحد هني بالبلاد القديم زاعجينا بالدراجات النارية لليل و نهار وإذا الواحد كلمهم يتمردون ويستفزونه بإخراج صوت عالي من الدراجة النارية ياريت المرور يشوفون لـ هالظاهرة حل !!

المشكله مو في لتخميس ودليل كلهم ماعندهم سيارات تخميس الشجار صار عع موتر سيكل

بسك جذب
القصة ناقصة

عيب شباب

...


بدل ما يروحون يدرسون

تفضل

ياريت يتخذون معاهم الإجراءات اللازمه اذونا ...

في ستره قولوا بعد بحرينيين جدد وعادات دخيله

شكلك جديد

اي والله الي علي راسه بطحة

تنچّب أهووو

هنا
بحرينين اصليين

بعد تخلي المعنيين عن مسؤوليتهم بمحاسبة المستهترين المفحطين تدخل الأهالي لمعالجة هذه الظاهره الغريبه على المجتمع و النتيجه شجار و ضرب بالأسلحة البيضاء لهذا على إدارة المرور تشديد على المواقع التي يتواجد بها المستهترين الذين يستعرضون بسياراتهم يهددون سلامة مستخدمي الطريق و بزعجون الأهالي بأصوات محركات السيارات أصبحت بعض الاحياء السكنية مثل حلبة الفورمولا ون

للأسف كثير من السلوكيات الخاطئة تحدث من الشباب و خاصتا المراهقين من التفحيط و السرعة الزائدة و إخراج أصوات مزعجة من السيارات و لا من حسيب من النرور

بصراحه
قله ادب

اغلب المفحطين يقومون بإزالة لوحات أرقام سياراتهم

هم إلا جابوه ألا روحهم

بااال عاد حتى لوفحط مو لهدرجه يتهاوشون بالسجاجين جيفه ليهم قلب جدي يسون الله يشافيهم المصابين لو الدولة يحطون قانون غرامات يمكن يكون عدد المتهورين اقل

نطالب إدارة المرور بوضع كاميرات ضبط المخالفات فى كل شوارع وأزقة سترة وذلك لردع كل من تسول له نفسه الخروج على قانون المرور وإيذاء وأزعاج من يسكن فى هذه الجزيرة الهادئة.

هالبلد سيبانه صدق دريد لحام يوم سوه اسم حارته كل من ايده له

الله يهديهم شباب

الموضوع انه لصبي طااح وقامو يضحكون عليه وشبت الهوشه بينهم

الله يحفظ شباب سترة ويطول اعمارهم ان شاء الله

بصراحة تعتبر سترة والمالكية من اكثر القرى التي بها شباب مستهترين ولا يحترمون لا الصغير ولا الكبير لذا ارجوا من إدارة المور زيادة الدوريات وخاصة في الفترة المساءيه

سواد الله ويهك...يمكن انت الي ماتحترم لا الكبير ولا الصغير ...اذا هاذا ردّك تطلع نفس الي اتهوشو بسجاجين

عزيزي الهوشة بسترة اشدخل المالجية.. ....

شدخل المالجيه في السالفه الظاهر مافي غيرك مستهتر

قلة الادب والتعبير السيئ يعرف من المتكلم ... فأن تعمم على جميع ابناء القرية وتصف قرية أخرى وتبعد وتنزه باقي القرى الاخرى فأنت مخطئ لان لا يوجد احد بعيد عن هذه المشكلة اليوم هنا غدا هناك إن لم يكن هناك رادع عن تكرار المشكلة وقانون يضبط المخالفين

وبعد
كرزكان من اكثر المناطق بها مشاكل

فعلا المالكية مأساة في قلة الذوق في السياقة

الشجار كان اكثر من شخص ضد شخص واحد فقط ..وكلامي صحيح ١٠٠٪١٠٠ ..
صح كانو في موقع تفحيط بس ماكان سبب السجار التفحيط ..

انزين جان كتبت السبب تعطينا معلومة ناقصة

معلوماتك مثل وزارة الاسكان دايما ناقصة

على إدارة المرور المراقبة وإعطاء المحفطين مخالفات كونهم متعمدين ويزعجون الناس

المفروض سحب رخص السياقة منهم

يحتاجون لقانون رادع

المفروض سحب رخص ومصادرة السيارتهم وتوقيفهم لمدة شهرويكون درس الى الاخرين

صراحه الظاهره صار مصدر ازعاج الجميع والضرر لكل الناس من ضمنهم انا هذه الظاهره شكلت خطوره وانكسار في سيارتي والسبب تهور الشباب بالسيارات

مشكله
.
لماذا نطالب بمحل خاص للتحفيط.
هل نعمل بدون عقل.لماذا التسرع ونضرب بعضنا بعض.لماذا نتغب الاخرين لعمد الاهتمام بالاخلاق.
والادب.