شكا مجموعة من أولياء الأمور مما تقوم به "قروبات" المدارس على إحدى وسائل التواصل الاجتماعي في إجبار أولياء الأمور في دفع مبالغ نقدية مقابل شراء هدية إلى معلمة الفصل.
وقالوا في حديث لـ"الوسط": "إن شراء الهدايا لا يقتصر على عيد الأم كما يعتقد البعض، فبين مناسبة وأخرى نُفاجأ في قروبات المدارس ببدء جمع أموال لشراء هدية للمعلمة، في الوقت الذي يحدّد فيه البعض المبلغ على كل طالب أن يدفعه". وأضافوا "ذلك يعرض العديد من أولياء الأمور إلى الإحراج وخصوصاً أنه يتم كتابة اسم الطلبة الذين دفعوا المبلغ، في الوقت الذي يكتب أيضاً أسماء الطلبة الذين لم يدفعوا مقابل شراء الهدية، مما يعرض الكثير منا إلى الحرج".
وتابعوا "على وزارة التربية والتعليم التحرك من أجل وقف ذلك، إذ إن تقديم هدايا إلى المعلمات والمعلمين يعتبر رشوةً، وخصوصاً أنه لاحظنا أن هناك تمييزاً بين الطالب الذي يقوم بالدفع ومن لا يقوم بالدفع مقابل الهدية، فيجب أن يتوقف ذلك". مضيفين: أن "من يرغب بتقديم هدية للمعلم تقديراً لجهوده فلينتظر نهاية العام الدراسي وبعد النتائج النهائية، إضافةً إلى إنه يجب أن تتوقف عمليات جمع الأموال إلى المعلمة، فالعديد من أولياء الأمور وضعهم المادي متدهور، وكتابة أسماء الطلبة الذين لم يدفعوا يجعلهم في موقف محرج، وخصوصاً أن بعض المجموعات تحدّد مبالغ تتجاوز الثلاثة دنانير، في الوقت الذي لا يمكن للعديد دفع هذا المبلغ بسبب ظروفهم المادية، حتى وإن كان المبلغ زهيداً".
بصراحة تعبت وأني أقرأ التعليقات ورجاء من الوسط إلغاء التعليقــات لاتصير فتنه والناس مو قاصرها فتن
ماعتقد الموضوع يستحق لانه اللي ماعنده مادفع ولايحرج نفسه ولاهم يحزنون وهذا تقدير لجهود المعلم طول السنة افضل من انه الشخص يدفع مبلغ هدية بروحه نجمع دينارين مو بالاكراه ولاينكتب اسم اللي دفع وخلاص ثانيا لقروبات الامهات مستفيدة منها عشان حل الواجبات والنقاش في الحل والاختبارات واللي ينساه الطالب تخدمنه كثير
نحن معلمات نعامل جميع التلاميذ بالمثل ولا نطالبهم بهدايا ولا نريد هدايا نريد نريد نريد من يدفع عنا هدايا التلاميذ فالوزارة في تقشف وتعال انت ايها المعلم وايتها المعلمة شجعوا التلاميذ وكرموهم من اين لنا او ان معاش المعلم وووواااجد ترى احنا اصحاب قروض والتزامات بعد
السلام عليكم جميعا
انا اولادي وبناتي في المدرسة ولم ارا ولا اسمع عن هذا الأمر بتاتن. كل ما في الامر انه وفي بعض الأحيان
وبلئخص في عيد الام تطلب مني بناتي لشراء بعض
الورد تعبيرا منهم عن محبتهم لمعلمتهم لا غير .
والله يوفق الجميع ان شاء الله.
اني بصراحة وحدة من اللي هالموضوع واجد يضايقني لأن دخل زوجي جدا محدود وعلينا متطلبات واااجد وكفاية الأنشطة والتقارير مكلفه
حشى ما صارت دينارين لو ثلاثة دينار بيدفعونها تكريم للمعلم اللي يتعب وياهم ولا قايلين ليهم كل يوم ادفعوها!!
صدق بخيلين
والله اني دفعت البيزات حق معلم ولدي واني مستانسة لان صدق يستاهل على تعبه وياهم وهو يصرف عليهم ويشتري ليهم هدايا اكثر من اللي دفعناه
محد بخيل و عديم ذكاء غيرك لأن انتي ماعندج الا هالفعصون بالمدرسة وحالج المادي ممتاز وقاعدة تهايطين ترى الايام دوارة بجيك اليوم اللي بتصيحين فيه على تدبير الفلس الواحد . خلي عندج احساس بغيرج و دوام الحال من المحال يا ماما متفلسفة وربي هالفعصون عدل مايندرى تجيبين له اخو او لأ علشان المادة والفلس ..
هذا الشخص نفسه بيدفع للمطعم ٣ دينار لسمبوسة جبن
عشان انه مطعم راااقي
وبيستخسر دينارين يدفعها لتكريم المعلم
مع كل الاحترام على تعليقك او تعليقج بس بعض المدرسين ما يستاهلون شيء .. و فيه ناس حالتهم على قدهم و التقدير مو بالهدايه الاجباريه .. و اللي يبي يهدي بدون محد يقول له بيهدي غير جذي فهذي رشوة عيني عينك
لمعلم له كل الشكر و الاحترام . وصاحبات القروب اغلبهم اللي يقترحون هذا الاقتراح لغاية بنفسهم وهذا اللي حصل لقروب المدرسة قامت جمعت الفلوس وتكتب اسامينا علشان تحرج وتضغط على اللي مايقدر و تسوي نفسها قلبها عليهم (خواتي اللي ماتقدر تكلمني خاص!)اساساً انتي ليش تنشرين عالعام اسامي اللي دفعوا و بعد كل هذا اخذت نص المبلغ واشترت كيكة 3كيلو من اختها تطبخ بالبيت بنص السعر اللي جمعته منا يعني نتفة الذهب ارخص من كيكة اختها وبس ثلاث اربع امهات اللي راحوا الحفلة. ان لم تستحي فأفعل ماشئت! هالبدع من سوسات البلا
بارك الله فيكم بالجريدة الوسط.. في الصميم .. تعبنا .
تقديم هذة الهدية للمعلم لاتعتبر رشوة اذا طالعه بيوم مخصص وعلانية ورضا من النفس تقديراااا عن من يستحق ويتفانى في عمله بنسبه للمعلمه ابنائي قليل في حقها اي هدية لانها لاتثمن بشي بس اقل شي نقدر نقدمه اما بنسبة الايلزمون ولي الامر بمبلغ معين هذا في قمه عدم احترام خصوصيه الغير لانه ناس ودها تشارك بس ضروفهم فعلا صعبة يعني وحدة ويانه كانت تبي تشارك بس قالت زوجي عاطل عن العمل فلازم نقدر لو بالقليل وبالاخير الهدية مو بقيمتها .
السلام عليكم ....
هدايا للمعلم .... حسستونا انهم عاطينا ارض او بيت
مااشوف احد كتب بالجرائد بالبواد العريض المعلم هو من يشتري للطالب الهدايا طوال العام
ماابغي اتكلم عن هالامور ... بس صياغة الموضوع كبيرة و تهدم من ممانة المعلم
نشتري هدايا لافضل دفتر
نكرم الطالب الي تحسن مستواه
نكرم الطالب المتميز
وما خفي اعظم
نصيحة يا أولياء الامور خفوا علينا واطلعوا من هالقروبات الي تذلون فيها المعلم.
كلمة لكل معلم ومعلمة جزاكم الله خيرا
هذا مستوى معلمة!؟ يفشل الاسلوب والله
للاسف صياغة الموضوع صياغة ضعيفة وفيه ظلم واجحاف في حق المعلم فأولادنا في المدارس لم نسمع بهذا التهويل الذي عرضته جريدتكم فالمعلم يتعب في تدريس ابناءنا وفي النهاية يواجه هذا الظلم والاجحاف بحقه فو...الله يكون في عونكم يامعلمين
مو بس هدايا تعالوا إلى فعاليات صحتك ألوان تكون ع كاهل الطالب كل مره حلاوه وفاطمه وعصير وغيره لون دون الآخر ويقولون صحتك ألوان يعني ما يصير اكل برتقاله في يوم الأحمر إلا توت أو فراوله أو آماله خطر يعني أصيبوا يا اطباء
سلام عليكم . في بعض الأقسام اتسوي فعاليات الألوان . يقوم هذا القسم يطلب من لجنته الطلابية التابعه للقسم جيبوا فاكهه لونها احمر عصير احمر حلاوه مغلفه احمر وهكذا يزم الأصفر هكذا ويوم الأخضر هكذا وفي الطابور تعرض الأكل ع كل من هب ودب وبعدين توثق الفعاليه باسم القسم وتعالي يا اداره احنا سوينا فعاليات الألوان ونبي حوافز . انا ولية امر اتغربل لما تطلب بنتي ابي رمان . فراوله يطلع الينا مشوار علشان هالكون والفاكهة بالبيت من مو وبرتقال مثلا يعني هذي صحه وتحفيز لاكل الفاكهة لون بدونه يعني ما يصير ناكل برت
اعزائي المعلمين:
كنسلوا سالفة الواتساب لأنها ليست إلزامية
اعزائي أولياء الأمور:
طفشوا المعلمين من المهنه تالي تبچبچوا
سوو موضوع عن القروبات الي المدرسات يعطون الطلبه واجبات بعد انتهاء الدوام الرسمي بحجه نسيت اخبرهم ولا ومايقولون لينا الا المغرب غير الطلبات الي في لقروبات مايقولون ليهم في المدرسه. لين وصلو البيت يخبرونا في لقروب
والله المعلم مو محتاج الى رشاوي لان طول وقته يصرف على الطلبة من جيبه للتشجيع ويصرفها ويهديها اياهم برضا نفس وهذا غير ان المعلم من بداية السنة يصرف بالمئة دينار على تعديل الصف من الوسائل والهدف منه تكون بيئة تعليمية ومحفزة للتعليم وكل هذا مو مذكور جايين تعاتبون معلم ماليه دخل في تصرف ولي أمر حب يكرم المعلم
رشوة؟! شهالعقليه ؟ اغلب الأوقات الي ما يشاركون أساسا ولادهم مو شطار .. و ما نقول كل يوم بنجمع حق هديه .. بس حدث العاقل بما يعقل .. و الاختبارات تثبت كلام المتحدث للجريدة .. اذا درجاته كامله ف الاختبارات ،له الحق ان يقول الاستاذ /ة تفرق بين الي يجيب هديه وبين الي ما يجيب !!
اتهام المعلمون والمعلمات هراء السبب سخافات بعض أولياء الأمور أمهات الفشخرة. طريقة صياغة الموضوع خاطئة مم يجعل مجتمعنا "المهاجم" يقصف المعلمون والمعلمات بصواريخ سكود ههههه، كلنا غلابة ومعترين يا جماعة.
الى زائره ٤١ //
عجل شنو ولادهم متفوقين ( الله يهديهم ونجحهم) لان مااعتقد لو غير ذلك بتحط مبلغ وقدره ع هديه !؟؟؟
الطلبه الي اشتركوا كلهم متفوقين ومتميزييين هذا ف مدرسه ولدي ...
الموضوع مبالغ
وش دخل المدارس و الوزارة و المدرسات في السالفة هذا تصرفات اولياء الأمور و قروبات اولياء الامور لها ايجابيات كما لها سلبيات و العاقل يعرف شلون يستفيد و يعمل ما يرضيه ولا احد يقدر يجبره على شي ما يحبه و الوسط احيانا يخونها التعبير لان العنوان خطأ
ما اعتقد أن المعلمة المحترمة تطلب هدية . و لا أعتقد أن أحد طلب هدية من أحد. عملت في مدرسة خاصة و كان من يقدر و يعطي الهدايا هم اجانب و ليس البحرينيين. و راتب المعلم من الوزارة و ليس من عند أولياء الأمور كي تحسدوننا عليه. و ياليت ما أدرس و أضيع علمي و جهدي لاناس لا تستحق.
صدقتي يتحدث البعض وكان راتب المعلم من جيوبهم ! وراتبه لا يساوي شيئا فهو يصرفه على علاج صحته المهدرة من اجل تعليم ابناءهم ..
المدرس مستنزف الطاقات ومضغوط ومكروف ويستاهل راتب مضاعف
قيم ( كاد المعلم ان يكون رسولا ) تبدلت الى ( يشتغل بفلوس مو ببلاش )
مجتمع من سيء الى أسوء
هجوم غير مبرر على المعلمين والغلط الأكبر من صياعة الخبر ( قروبات مدارس ) والصحيح قروبات أولياء الأمور ، أنا كمعلم ومن واقع تجربة مانبغي من هالمجتمع الا صار همه الوحيد التصيّد على المعلم أي شي لا هدية ولا غيره و السبب هالقروبات التعيسة الا ما ساهمت الا في انحدار التعليم بسبب فلسفة أولياء الامور على المعلمين و من جانب آخر فشخرة أولياء الامور على بعض
بصراحة موضوع مبالغ فيه
وفوضا القروبات هذه نتيجتها
محد مجبور يكرم اي انسان لا معلم ولا طبيب
أولياء الأمور الأفاضل
التكريم بحد ذاته جميل ولو كان بكلمة او قطعة ورقة مكتوب فيها عبارة شكر جميلة خطت بيد احد ابنائها علما بأن المدارس لا تفرض اي مبالغ مالية لتكريم المعلمين وإنما هذه تصرفات شخصية لأولياء أمور مشتركين في وسائل التواصل مع بعضهم ولا تعميم لذلك
والمعلم احيانا يصرف من جيبه لإسعاد طلابه من أجل رسم البهجة والتشجيع على المشاركة والمنافسة الشريفة
صراحة اني اقدم هدية لمعلمة ابنتي تقديرا لها لجهودها فصراحة هي تستاهل متفانية في العمل.. اذا ولي الامر حب يقدر معلم ابنه بهدية هذا مو رشوة والهدية مو واجب ... مصاخة تعالوا جمعوا فلوس كل واحد وكيفه .
اللي يقولون محد جبر احد ،، اصلا مجرد طرح الفكرة وفتح قروب لهالسالفه الواحد بينجبر لا يروح ماي وجهه هذا يسمونه اجبار غير مباشر ،، وغيره ما اشوف ليها سالفة صراحة تبون هدية تقدرون المعلمة بها عندكم نهاية السنه وبداية الفصل الثاني ،، اما سالفة اول الكورس وعيد الام وجاي بعد عيد العمال ويالله بعد نهاية السنة من كل شي طلعو ليها هديه ،، ومن اللي اشوفه اغلب المعلمات خصوصا ابتدائي حلقه اولى خرطي ومايستاهلون!! طول الفصل مافي واجبات وعلى نهاية الفصل يقتلون الجهال!! هالحجي مو عن الكل طبعًا
نعيد ونكرر #####
المشكلة ليست في الهدية .. المشكلة في المعاملة السيئة من المدرس/ـة للطلاب الغير مشاركين في تقديم الهدية ..... افهموا ياناس يا جماعة ياعقلاء!!!
٣ دينار واجد؟ ...فشلة ... وش هالرزالة .. في ناس من كثر البخل ما تطلع من مخباته ربية بالغلط ...طيعا ما انعمم في ناس فعلا فقراء بسبب غياب رب الاسرة او عدم العمل...او من كثر الغلاء ومتطلبات الحياة ..اصبحت ٣ دينار القشة التي قصمت ظهر البعير. الله يكون في عون الكل ... المدرس المسكين اللي يحط من مخباته اوقات كثيرة ..وولي الامر والمسؤوليات اللي عليه ...كلكم مساكين ولا نزعلون هههههههه
هو عيد الام . مو عيد المعلمة .علشان يودون ليها هدية ولو زين بعد تتقبل اي شي .ماتبغي الا الهدية الغالية وهدية الفقيرة ماتبغيها ..
ياناس في يوم مخصص لعيد العمال ..ليش بعد تعبجون الاعياد ماتفرقون..بين الام اللي حملت وربت وسهرت
وبين المعلمة اللي درست وكسرت ظهور الامهات بالطلبات والواجبات والاختبارات واخر الشهر تحصل على راتب قوي مع علاوات وغيرها
ومسكينة هالام حتى ربية ماتحصل من هالابو نهاية الشهر .
اني كمعلمة صار لي 16 سنة لا أقبل بالهدايا ودائما اقول لهم انتم ونجاحكم في المادة الرياضيات هو أكبر هدية ولا اطلب حتى المشروع عليه درجات أرفض أن يأتيني من المكتبه اريد عمل الطالبة بصورة بسيطة جدا علشان لا يكون عبئ على ولي الأمر
يمكن يكون هذا صحيح في نظام الفصل بس اعتقد من رضى أولياء الأمور
أختي المعلمة المثالية شدخل التخصص في الموضوع ؟!
بصراحه الموضوع عاطينه اكبر من حجمه .. مدري دافعين مليون كلها 3 دينار والمعلمات مو محتاجين الهدايا ولا عمرهم طالبوكم اشترو هدايا عندهم رواتبهم والله ناعم عليهم .. والمعلمه مثل الام تربي وتتعب وتابع مشاكل عيالكم ف المدارس اللي ماتخلص كفايه الاحبال الصوتيه مختربه بسبب عيالكم مستكثرين عليها هديه !! يا اخي ماتبي تعطيها منت مجبور ولابتجي توقف ع باب بيتك ليش مايبت لي!! من عطى عطى نفسه .. السالفه كلها ذوق وتقدير لو برساله وكلمه تكفي.. ويالله تركو عنكم هالمواضيع ..
انا كمعلمة صار لي ١٣ سنة في مهنة التعليم ولا مرة اخذت هدية من عند اي طالبة فقط اقبل برسائل المحبة المنبعثة من قلب الطالبة واعتبرتها نوع من انواع الاستراتيجيات لتقويتهم في مهارة الاملاء ولا افرض عليهم ذلك وانما من تأتي برسالة او بطاقة صنعتها لي بنفسها اصححها واعلقها داخل الصف عند طاولتي فلماذا التعميم على جميع المعلمات فمعظم المعلمات لا يقبلون الهدايا وداائما يقولون للطلبة هديتنا هي تقدمكم ونجاحكم وتميزكم .. ارجاء اعادة النظر فيما كتبت انامل البعض
صراحة بخل الخين المعلم يخدم و اتهايرونه بالهدايا ما احد مجبور الموضوع مو مستحق ينكتب
كلامج يعتبر جهل اختي المعلم على العين والراس لكن سالفة انه يخدم ونعايره حطي تحتها خط احنه مانعاير بس يجب مراعاة الحاله الماديه للناس
وسالفة انه يخدم اعتقد انه مو بلاش ويستلم راتب على هالخدمات اذا واحد سوى شي
من دون مقابل هي يسمونه يخدم اما انه يستلم راتب هي مايخدم هذا عمله ويستلم عليه راتب
المعلم المحترم لا يقبل هدايا من احد وهو يشتغل مقابل مرتب شهرى وليس مجانا !
بالفعل يتعرض ولي الأمر للإحراج
فيدفع لحفظ ماء الوجه..
وهناك من المعلمين من يجمع مبالغ من أولياء الأمور، حتى يشتري هداية للمدير ومساعديه.
المدرسه ماليها دخل في الموضوع احنا أولياء الأمور تقديرا منا لجهود المدرسه واهتمامها في بناتنا نحب نكافأها بهديه رمزيه ونتفق مع أولياء الأمور بجمع مبلغ ولي ماتقدر مو مجبوره ومانخلي اسماء منعا لاحراج باقي الطالبات فنقدم الهديه بأسم الطالبات جميعا دون استثناء
اني ولية امر حبيت اقدّر معلمة بنتي وشفت الفكرة مطروحة في القروب وعجبتني وريحتني من البحث والتفكير ،، اشتركت وشكر ا للي ساعدوني ،،
واذا ما عجبتني الفكرة ما بيخطر ع بالي ان المعلمة بتحط في خاطرها على جاهلة ما عطتها هدية .
بنتي بعد يصير خاطرها تكرّم معلماتها لانها تحبهم ، لو ببطاقة او رسالة
وهل التكريم للمعلمة يشترط بان يكون بهدية؟
ترى الوضع صار واجد صعب على ولي الامر وخصوصا اذا كان عنده اكثر من طالب في المدرسة والروضة كل قروب يطلب مبلغ وانت عليك بس تدفع المدرسين ما ينتظرون من ولي الامر هدية يكفيه انهم يقدرون عمله وبعض الي في لقروبات زوجات عاطلين عن العمل او معتقلين اتمنى ان هذي الشيء يتوقف وخصوصاً ان هالشهر نركز على امهاتنا و ام ازواجنا هم الي ليهم الحق في هدية عيد الأم او بما يسمى بعيد النيروز
محد مجبور يدفع او يهدي ..اللي بيهدي يهدي من نفسه مافي معلم او معلم يجبرون احد يهديهم ...
كل الشكر و التقدير إلى كل معلم و معلمه و يستاهلون كل تقدير يكفي انهم يهتمون بيانا أكثر من بعض أولياء الأمور
رشوة و تمييز .. باقي ادانة من الأمم المتحدة
مو لهذي الدرجة
هههه باقي ندخل ترامب
يا ريت يا جريدة الوسط تتكلمون عن المبالغ التي تفرضها المدارس على الرحلات اليوم ولدي جايب ورقة رحله الى( مزرعة ....)3ونص دينار من غير الوجبه مو حرام خلنا نحسبها عدد الصف 33 طالب ×3ونص تقريبا 105 دينار
مو شرط توافق اللي ما عندوش ما يلزموش
غالبا المدرسة الحكومية تاخذ تكلفة الرحلة فقط وهي بقصد الترفيه عن الطلبة ولا يوجد بها ربح غالبا
تكلفة الباص ورسوم الدخول للحديقة تقتضي ذلك
الرشاوي وما أدراك ما الرشاوي المعلم الحقيقي لا يقبل الرشاوي والعمولات
يستاهل هال معلم/معلمه
لوي يشتغل في المدرسة؟؟
ماحصل له شغله غير معلم؟!
قبل شهر فتحت التلفون الصبح الا ضايفيني في قروب هدية عيد الأم الى المعلمه( أصبحنا واصبح الملك لله) طلعت من القروب في نفس اليوم عجل اني اتعب واعور راسي كل يوم بالواجبات والهديه الى المعلمه والمعاش بعد !!!!
المشكلة يكتبون أسماء الطلبة اللي دفعوا و أنه الهدية من طرف فلان و فلان و الخ و اللي ما يدفع ما ينحط اسمه و الجاهل مسكين يحط في خاطر.... مصختونها لازم الوزارة توقفكم عند حدكم لو زين بس 3 دينار المبلغ أكبر من جدي وين المدراء عنهم
خفضوا اسعار المدارس .. بعدها يمكن نفكر ندفع حق هدية !
اي والله شي محرج تعالو دفعو ولي ماعندها تنحرج الا ويحطون اسماء لي دفعو ع الهديه ...ومتعلمين سالفه جديده كل هدايا ذهب ..خاتم والا طقم والمعلمه مدري شلون تقبل هالهديه .. لا فوق هدا في تفرقه من قبل المعلم والا المعلمه الا ع طول يجيب هدايا وحركات يصير يا ذهينه لا تنكتين ترى هالشى واقع..واني عشت وشفته
محد يجبر أحد عشان يشترك ..الموضوع في مبالغه ..مجرد اقتراح يوضع في القروب والا حابه اتشارك اتشارك ..والا مو حابه محد يجبرها
اللي مايحب يشارك مو مجبور يشارك
اني احب اقدر اساتذة اولادي ع مجهودهم ليش مااقدرهم المعلم تعب سنه كامله مع طفلي الا يستحق التقدير؟؟!
للاسف مكبرين الموضوع زياده عن اللزوم لان اذا تشارك الجميع كل طفل بيدفع 500 فلس او دينار لهديه هل هي قليله ع المعلم ؟؟!
في مدارس تلم ضيافة اللقاء التربوي وهداياه من جيس المعلم ... والمعلمة مجبورة ومرغمة تدفع فلوس الهدايا .... الضيافة ..... ولازم تقعد لوقت متأخر وتهد عيالها وبيتها ومن هم بحاجة لها..
والأدهى ... مدرسة تقيم فعاليات اسبوع الاسرة بيع طول الاسبوع والوزارة خبر خييير ....
مع تحيات معلمة ملعونة گفدها في لم الفلوس
انا اقول روحوا حلو مشكلة مدرسة عمار بني ياسر الابتدائية
ويش مشكلتها؟؟
مو بس جذي القهر ان المعلمة اللي تستلم الهدايا وتتفاخر بعرض الهدايا على وسائل التواصل الاجتماعي مثل الانستقرام ولسناب شات وتعالوا شوفوا من اللي يعطيني ويقدرني أقصد (يرشيني) من الطلبة واللي يستحق يكون من الممتازين والمتميزين رغم انه مستواه التعليمي جيد. فعلا هذا ما نلاحظه من تمييز وتفرقه على حسب درجة ومستوى الهدية وقيمتها وما خفي أعظم.
نتمنى من الجهات المعنية وضع حد لهذه المشكلة بمعنى الكلمة ومحاسبة أي إداري و معلم أو معلمة بالخصوص لوقف هذه المهازل والتي باتت تهدد المسيرة التربوية و التعليمية.
السلام عليكم. جميل ان نقدم شكرنا الى المعلمة الفاضلة لكن من الصعب ان نحمل على عاتقنا مبالغ ان كانت بنظر البعض بسيطة الا انها كبيرة لكوننا ندفع لكل معلمات بناتنا و المعلمات دائماً هداياهم تكون ذهب. تكريم المعلمةلعطائها وحتى لو بباقة ورد لماذا نلبسها ذهب؟! المعلمة جاءت لتخدم مجتمعها بمقابل وهو الراتب وتستلمه.في قروب احدى بناتي صاحبة القروب اقترحت هذا الاقتراح ليس من اجل المعلمة بل لمصلحة في نفسها اشترت سلسال لا يتجاوز العشرين دينار بينما اشترت كعكة من اختها تعمل في البيت بستة وعشرون دينار!!!!
مظلوم هالمعلم ... اذا اولياء الامور ابتدعوا أفكار هالتكريم وش ذنب هالمعلم ..المفروض كولي أمر تكون واضح وصارم مع اللي يطرح الفكرة ..ميزانيتي ما تسمح وانتهى الموضوع ؛ حاب تكرم مدرس ولدك ..جيب هديتك بروحك وحسب ميزانيتك
فاضيين يا .... احنا اولياء امور وتقديرنا لخدمات المعلم المخلص في عمله عن طيب خاطر منا مو اجبار
مدرسة .... مه أنها مدرسة خاصة يرفضون بشدة الهدايا حق المدرسين ودايما ترسلون إشعارات بالخصوص.
لو زين جت على المدارس في كل مكان مطلعين لينا بدعه جمعوا لفلانه معرسة و فلانه جاية من السفر و فلانه بتسافر و هذا هو المعاش رايح على هالتجميع
والله ولا اعبرهم كل واحد يسوي اللي يريحه وطنش تعش
محد يقدر يجبر احد .. "تهادَوْا تحابُّوا"
انا معلم وايام خدمتنا بالصفوف وبعدها العمل اللاداري نرفض قبول اي هدية لانها تعتبر غير قانونية اثناء الدوام
الصراحة صدمت انا من هالخبر وانا مع اللي يقول ان هاي الشي يعتبر رشوة واضحة وضوح الشمس والدليل هو التمييز بين الطلبة
شدعوة !! عيد الام هو مو عيد المعلم !!! عجججججيب !
ممنوع ورشوة وسخافة
ليش أنتون مكبرين السالفة الوزارة بصريحة العبارة عندها الهداياممنوعةللمعلمين ولا يبي لها مناشدة ولا مزايدة والخطأ كل الخطأ من تصرف بض أولياء الأمور الجهال .... الفوشريين والعيب كل العيب على المدرس ألي بيقبل هذه الهدايا لأنها تخل بمكانته كمربي فاضل
من المفترض ألا تتدخل المدارس في أمور جمع الأموال وخاصة للاشتراك في هدية واحدة، حيث من يود تقديم هدية لمعلمه، يمكن له أن يقدمها بنفسه وعلى قدر حالته المادية.
يا ريت المعلم ما يقبل اي هدية من الطالب الا تكون رمزية وبعدها الامهات بيتركون عنهم هالسوالف الا ما منها فايدة
كنت أحسب وزارة الصحة هى الأوجب بالإصلاح واليوم تغير رأيي وأرى وزارة التربية والتعليم هى الأولى بالتأهيل والإصلاح ، قال أيش هدايا . . عيب عليكم يابناة الأجيال المفترضة
صح كلامهم اتمنى من الامهات الابتعاد عن هذه السلوكيات التي تحرج الامهات في القروب ثم تحرج الطالب في الصف بين المعلمات والطلبة ويحس انه اقل من باقي الطلبة ويكره الذهاب الى المدرسة....والام التي تود ان تهدي المعلمة هدية تشتري لوحدها بعيدا عن احراج باقي الامهات .
ببساطة ولي الأمر يحذف القروب ويطلع منه ولا احراج ولا إلزام
المشكلة انهم يحطونك في موقف لا تحسد عليه اذا مادفعت راح تسبب احراج الى اولادك واذا دفعت راح تنقص الميزانية اللي حاسبنها انها توصل الى نهاية الشهر نفتك من المشاريع يجيك تكريم المدرسة بأسم عيد الام ونخلص يقولون لك تكريم المتفوقين وبعدها رحله ووووووو وانت بس ادفع ليش شايفينا نايمين على فلوس هييي حسو ترى رواتبنا ماتكفي حدها نهاية الشهر
بالفعل بعض اولياء الامور يحددون مبلغ الدفع لشراء هدية المعلمة .. مما يسبب الحرج لبعض الأسر المتعففة .. ويشعر الطالب بالنقص والحرج من زملائه .. لا بأس بإعطاء المعلم هدية فهو يستحق كل الاحترام والتقدير .. ولكن يرجى مراعاة التفاوت في الطبقات الاجتماعية
والله مشكله البحريني خلاص متظعظع ثلاثه دينار تهزه هز
اكيد انت مدرس
كلام مبالغ فيه لا احد يستطيع اجبار احد على الدفع..
شنو المشكله
الله يزيد ويبارك
هم يقومون بعملهم ويستلمون معاش عليه بعد ليش هالتصرفات واحراج اولياء الامور اللي رواتبهم محدوده وتلاقي عادي اولادهم يحنون عليهم بعد المفترض اللي بيزاته زايده بروحه يودي هديه مو بالعلن وتكون رمزيه مو المبالغه حتى ذهب قاموا ياخذون فسسسق
المشكلة ان المواطن الي راتبة 250 دينار وعنده اطفال ويدفع اقساط سيارة وشقة مو مسؤليته ان يشتري هدية إلزامية للمعلمة او يدفع لها .. إذا كان الشي إختياري فهذا مقبول, اما وضع اسماء الطلبة الي دفعوا والي مادفعوا و وضع مبلغ معين يجب على الطلبة دفعة هذا غير مقبول
سخااااافة :@
نعم هناك عوائل تعيش التقشف وتنتظر نزوال الرواتب بقلق شديد حتا يتمكن من شراء اغراض بيته واي مصروف ولو قليل ياثر على مصروفة الشهري فلا تجبرو احد على مثل هاده الجمع خففو على كاهل رب الاسرة
بصراحه المبلغ ما يكون إجباري وثانيا اللي يقدر بيدفع واللي مايقدر مو اجباري عادي وثانيا المعلمات يستحقون وهذا شي بسيط ف حقهم .. اللي يقدر بيساهم واللي مايقدر مو مجبور يقدر يشتري هديته بروحها
والله المعلم او المعلمة قاعدين يدرسون مو ببلاش
ما يحتاجون لهدايا ولا رشوات هذا واجبهم !
أشعر بالعار وأنا أقرأ مثل هذه الأخبار خاصة بوزارة يفترض إنها للتربية قبل التعليم
وش الكلام ذا... صج ينرفز
الا يبي ينفخ روحه يعطي المعلمة هدية بالسكتة
هلكونا وخصوصا مدارس البنات فمدرسة شهركان كل يوم طلبات صابون لغسل اليد معقم كلينكس والا مشروع نبي بيبسي ونبي عصير وشراب صودا والكثير واحنا بس ادفع وادفع
كل مدارس البنات طلباتهم واااجد
يبغي ليهم ميزانية .
نطالب الوزارة بمحاسبة ومعاقبة جميع المعلمين والمعلمات الذين يقبلون تسلم الهدايا والمبالغ النقدية من الطلاب أو من أولياء الأمور مباشرة في مقابل تقدميهم خدمات مدفوعة الأجر أساساً باعتبار أنهم موظفين حكوميين تابعين لوزارة التربية والتعليم.
للأسف يتم تعميم حادثة في قروب معين ويتم تشويه صورة معظم القروبات ! كوني معلم ولست مشتركا في أي قروب خاص بأولياء الأمور فالفائدة التي يتحصلها الطالب منها قليل والهدف منها معرفة الواجبات اليومية ولكن بعض الأمهات تبالغ كثيرا في جعل القروب غرفة خاصة بها وتحت إدارتها أو مجموعة أمهات فيحدث ما يحدث من ضغط بأساليب متنوعة وبحجج واهية ! ولا دخل للمدرسة أو الوزارة أو المعلم في هذه القروبات لأنها خاصة بأولياء الأمور وليست عامة بحيث يكون كل صف على حدة ! يرجى عدم خلط الأوراق والاعتماد على النشرات الأسبوعية..
الأسلم حظر المجاميع بين المعلمات والأمهات على الواتس آب.
التواصل بشان الواجب المنزلي والأمور الآخرى يحصل في أول وآخر الليل ويومي الجمعة والسبت وحتى آخر يوم من العطل الرسمية يعني قبل بدء الدراسة. والزلزلة تحل على الأب قبل بدء الدراسة وطوال ايام الأسبوع.
جهد وضغط على المعلمة والأمهات 24/7 في غير محل
رشوة وفي وضح النهار وبعض الأمهات يشترون هدايا خاصة للمعلمين أقل ما يقال عنها عييييييب
قروبات الطلبة أساسا ظاهرة سلبية من عدة نواحي، حيث يعتمد الطالب اعتمادا كليا على والدته في متابعة شؤونه، فلا يحمل الطالب أي مسوؤلية سوى حضوره الشخصي للمدرسة.
ناهيك عن المشاكل بين أولياء الأمور والتحريض على المعلمات وتكبير المشاكل وبل خلقها من العدم أحيانا.
أضف إلى ذلك أن من يتابع هذه القروبات أولياء الأمور أنفسهم وليس للمعلم دخل في ذلك حتى التواصل عبر الواتساب حول المنهج الدراسي غير مسموح به حسب قوانين الوزارة
شكل اولادكم متفوقين ويعتمد عليهم مو نفس حالتي ولدي عنده صعوبات تعلم ولولا هالقروبات مع الامهات الله يعطيهم العافية لتعاونهم لوصل الى الرسوب
قم للمعلم وفه التبجيلا ..كاد المعلم ان يكون رسولا
ومن لا يشكر الناس لايشكر الله
وولي الامر الي صعد هالامر اسلوبه غير حضاري وغير منطقي
والامر ليس بالاجبار ...والمعلم يستحق التقدير .... واخص كلامي لمدرسات مدرسة شهركان الابتدائيه للبنات التي تسعى للرقي في ان يعيش التلميذ بيئة مثاليه وراقيه ....