بالنسبة حق اللي يقول ان ضغوطات الحياة وأثقال السياسة والظلم ماله دخل أو تأثير على السائق فهو مخطئ تماماً , شي طبيعي وفطري وهذي ما فيها اختلاف وجهات نظر وتعدد آراء .. شي طبيعي مزاجك يكون سيء وما تتقبل أخطاء السائقين الحمقى , مزاجك السيء ما يبرر لك تسيء لغيرك لا في سياقة ولا عمل ولا أي شيء آخر .. لكن إذا أخطأت بالتجاوزات والحماقات تحمل اللي يجيك .. الناس أعصابها فالتة بسبب هالظروف الصعبة ,, الناس اللحين تتكلم عن تأثير مؤشرات السعادة على الفرد ودراسات وناس تقولك مالها دخل !!

توني واصل مدينة عيسى من المحرق
طلعت من المحرق الساعة ٥ ووصلت مدينة عيسى الساعة ٦،٣٠
زحمات وسيدات ومطر
چني ياي من سفر

تصرفات الناس أصبحت غريبة ولا تستطيع التعامل معها الا....

مره طلعت نص الطريق السياره كانت بعيده ابغي بس جانس يعطيني رحمة والدين رفع ايده يوحي الي بحركه ( مجنونه!!) هي أخلاقهم بدون تعميم الي منه وفيك ويستجنون من اشوفون مراه تسوق ( يعني اقدر اسوي اي شي ) وف نفس الوقت ياما من الجاليه الهنديه عمال يعطوني مجال ...
ناس افكرون الشارع بإسمهم عديميييين اخلاق صراحه

للأسف الشديد نعم. باعتقادي ضغوط الحياة والشعور بالظلم وعدم المساواة من الأسباب الأساسية لذلك التخلف. ولكن السبب الأكبر هو ثقافة الأفراد، وهي تختلف من شخص لآخر. لنرى الشعب المصري الأقدع كيف تغير.

ياخي اشدخل ضغوط الحياه و الظلم!

الصراحة البحريني بشكل عام تغيرت سلوكياته سائق أو غير سائق طبعا مو الكل ولكن الصفة الغالبة على مجتمعنا الأنانية وحب الذات تشوفة يتجاوز ويمشي على الطريق الغير المسلفت ويثير الغبار على المارة ويرمي الاوساخ وما يعطي فرصة لأحد يدخل من الشوارع الجانبية واللي يعطيي الناس مجال ينزف من الهرانة يمشي ببطئ شديد لأنة مشغول بالموبايل والله يساعد اللي يتجاوزة وخاصة إذا كانت بنت يعمل معاها فلم هندي .

شئ طبيعي وردة فعل طبيعية أيضا إذا رأى المواطن الأجنبي والغريب القادم من خلف الحدود ينازعه على الشارع والسكن والوظيفة والعلاج والتعليم وبقية الخدمات ، المواطن يريد خيرات بلاده له ولأهله وبقيه مواطنيه وليس للدخلاء الأغراب الذين أكلوا خيرات الوطن وتركوا الفتات للمواطن .

من أمن العقاب أساء الأدب .أصحابي القراء

مرة في زرانيق المنامة امشي بالسيارة، ما أجوف الا السيارة الي قدامي موقفة، قعدت انتظر و الي ورايي يهرنون الا هي منادية على هندي الخباز تطلب خبز، جان زين طلبت و بس، وقفت تنتظر الخبز يبرز، المنطقة صارت مزدحمة و الزحمة امتدت للشارع الرئيسي، و هي ولا جايبة خبر ، و يوم وصل طلعت الربية و بكل برود حطت القير في الدي و مشت و انا اضحك لأنه صراحة لو تحط بالك ايا الناس الأنانية بتموت قهر

نعم فقد البحريني اخلاق السياقة تماما في السنوات الاخيرة . اصبحت السياقة مثل السير في غابة يخطئ عليك بتجاوز او غيره و من ثم يتعنتر و يخرج يده و يؤشر لك فاصبح الموضوع غاية من سيارته أكبر او عضلاته اكثر يفرض سياقته و ان كانت قبيحة و المزعج تطاول شباب وقحين على كبار السن بسبب خلاف في السير لا احترام ولا شيء .

إحنا أهل لمحرق من انحرك سيارتنا من مكانها ايي هندي وياخد البارك
وصرنا نحسب لهم ألف احساب وما نطلع بالسيارة إلا للضرورة

خلك طابوق ولي فيه خير يأخذ البارك مالك هفت تيراته

عندما يخالف القانون من لا يطبق عليه أي قانون فعلى البحرين السلام

كانت البحرين مضرب مثل للالتزام المروري، اما الآن هناك تراجع كبير في الالتزام بالانظمة والقوانين المرورية.

يسوي مخالفه ودفعونه فلوس لكن يقول دفعة بلا لكن ١٠٠ فلس ما يعطي فقير صدقه اودفعة بلا ههههههههههه ٢٠ دينار

أريد أن يقرأ تعليقي هذا مدير المرور
. قبلا كان أكثر سواق الشاحنات الكبيرة ( اللاري ) والسيارات النقل الكبيرة ( التيلرات ) هنود بأغلبهم وكانوا منضبطين جدا ويقودون على مهل ويلتزمون بالجانب الأيمن وكنا لا ننزعج منهم بل أخلاقهم كانت حميدة جدا لكن اليوم وأقولها للأسف حل محل معظمهم سواق بحرينيين همهم الأول السرعة ولفت الإنتباه والتفاخر في الشارع وأصبح أمرهم مخيف في الشوارع وهم سبب كثير من الحوادث ويحزنني أن أقولها الأجنبي أفضل منهم بقيادة هذه المركبات الكبيرة ذات الأحمال الثقيلة ، شوفو لكم حل معاهم

اهم شي حاسب لهم
سياراتهم اكبيرة واقل غلطة معاهم فيها موت والله اسلم الجميع من تهورهم

واجد تالفون وتجدبون اصلا كثير منهم جاليات اطلع الصبح وشوف التجاوزات الي يسوونها وكفو منك تحصل فجة تدخل قبله
واجد تسوون افلام هندية

بحريني مره وحده وقف بسيارته عند البرادة و عطل الناس و تسبب في حادث و صارت ربكة و زحمة
الناس سئلت ليش واقف في الشارع ؟
الجواب يشتري عصير سانكست من البرادة
حالتنا حاله مع بعض البحرينيين

اليوم شفت واحد فالت كوب شاي ورقي من سيارته وهو ماشي ، ضربت عليه هرن

انت منت مروور عشان تزعجه

لو كل شخص رمي مخلفات او تفل في الشارع والناس ضربت ليه هرن تزفه جان الناس بتستحي شوي وبتقلل من الوصاخة الا يسوونها
امس جفت هندي مبطل باب التيلر وتافل كان ودي ازفه لان وصاخة لاخر درجة

.صح لسانك زائر 99

يقولك البحرينيين طيبين واذا دخل عليه احد بالغلط يقوله ويش في حبايبك

قبل الناس تسرع وتلصق في ظهر السيارة، حتى لو يمين وتمشي على السرعة المحددة، والشارع سالك للتجاوز.
ألحين الناس تحترم نفسها أكثر، من صخوهم المخالفات بقانون المرور الجديد. يعني لازم يحطون قانون يفلسكم عشان تصيرون محترمين على الشارع.

أسوء شي أشارة السيتي وانته جاي من ضاحية السيف مجمع السيف للأسف أيام الويكند والأعياد والعطل زحمة وناس عديمة أخلاق وتربية تخطر الي ملتزمين

صارت الشوارع اذا تعطي سيد لأحد يعبر الشارع تحصل من صوبين اجر لانك طوفته وتحصل اجر من الى وراك لانه قاعد يسبك

الله كريم
راحت أخلاق الأوادم

تعطيه سيد اذا في طريقه وحب يتجاوز للشارع الثاني او ان طالع من لفة وبيروح بداية الشارع بالنهاية هذا طريقه اما يطلع لك من اقصى الييار يروح اقصى اليمين ويطلع برة عشان يروح اول الشارع ويدخل قبل الكل هذا لا في اجر ولا هرار هوم اخد مكان غيره ومحاسب على هالشي انت وغيرك لان مثل ما احنه واقفين ننطر دورنا غيرنا وغيرنا الالاف ينطرون وحضراتكم الي يتجاوز والي يعطي سيد بكيفه

والى يقطعون الاشارات بدم بارد الناس صافين في سيد اليسار حق يلفون يسار طابور يجود يمين ويدخل عليهم اول واحد يس يازعم ضارب سقنير وشخليت فيها سقنير انته بعد ولاموب مفتكر فيهم او فالى وراه جاي لايدعمه والى يدش عكس السيد بس حق يطلب من مطعم لوبرادة ويخلي الناس اتدخل السيد الثاني وهو قاعد يتفرج والى العن الوقوف الخاطئ فنص الشارع

في رايي اولا الاجانب
اكثر من 10 اشخاص غير بحرينيين ركبو معاي السيارة وكانو مندهشين من التزام البحرينيين بقواعد المرور ، كثرة السيارات والازدحامات حاليا اجبرت العديد من من كانو يلتزمون قواعد المرور لكسر تلك القواعد ليتمكنو من الهروب من اختناقات الشوارع

مرتين صادني مرة من رجال ومرة من بنت يسوون لي حركة السبابة استغفر الله بس لانة ماعطيتهم جانس

اللي يقول الرجال واللي يقول النسوان واللي يقول الأجانب واللي يقول واللي يقول...
لا اتعممون أول، وثانياً المشاكل اتجي من كل الفئات، في رجال محترمين في الشارع وفي رجال مو محترمين، وفي نسوان محترمات وفي مو محترمات ونفس الشي الأجانب.
اللي يتجاوزون في مسار الطوارئ واللي يجود وسط ويسار ويمشي ٧٠ و ٨٠ ومافي قدامه شي رغم ان سرعة الشارع ١٠٠، واللي يدخن ويرمي الأعقاب في الشارع واللي يطلع بدون سكنير واللي يلصق وراك كأن مغناطيس واللي امركب ليه ليتات اتكفي فريق كامل ويعمي عيونك ولا مفتكر واللي يشغل أغاني يطول عليه هو يبي يدخل جهنم كيفه لا يدخلنا وياه. واللي امركب ليه دبة صوت ويزعج الناس داخل المدن والقرى واللي يقحص واللي يمشي في شارع مسار واحد ويسأل الشارع أمشي عليك لولا ولا يفتكر باللي وراه واللي يبي يلف بس ما يضرب سكنير ويعطل أوادم ثانية صار ليها سنة تنتظر جانس بس ما تدري لأنها ما تدري هذا الشخص بلف لو بروح سيدة، ودلين ما توصيل الوجبات، يتجاوزون السيدات كلها ولما يوصل أول واحد عند الإشارة يخطر خط الإشارة ويوقف قدام أول واحد كأن العيد. واللي يمشي مو مفتكر في ما حواليه وفي الأخير يطلع في التلفون !!

بس لأنك مسجل قاعد تسولف على بالك إنت في مجلس كل الي قلته لا معنى له ولا هدف .

ويش دخل كوني امسجل أو لا ؟
أنا ما كنت امسجل دخول بس لما كتبت خلصت الـ ٥٠٠ حرف فسجلت دخول، وإذا اللي كتبته ماله معنى ولا ليه هدف، شكله انتة واحد من اللي فالينها وينطبق عليك بعض اللي كتبته ومو عاجبنك.

هذاك اول الي كان البحرينين ينضرب فيهم المثل في اخلاق السياقة اما الحين كلش لا وخصوصا الرجال يحبون يتفرعنون على البنات ىيفردون عضلاتهم وصار لي الكثير من المواقف وصلت لدرجة انه يفتح الدريشه ويسب وياشر ويشبر ويعبر ولكن كل مره ماقول الا حسبي الله ونعم الوكيل والله يسلط عليك

اذا الاجنبي شاف السائق البحريني يتجاوز الاخلاقيات هو نفس الشيء بيسوي

كلش انعدمت الاخلاق عند السواق احياننا تلاقي سائق في عمر العشرين يتلفظ بكلمات على مرة في عمر امه هذي اخلاق مع الاسف

2 وقلت احين بيقولون البنات قليلن ادب وما يعرفون يسوقون لان ما عطيته سيد انزين مو مخولة ولا ابي اعطيك مو صح اني اوقف ربع او ثلث ساعة انطر سيدي وانت على البارز تجي وتترزز وترى اقول من احين اني ما بحلل ولا ببري ذمة احد يسوي هالحركة مثل ما انتون مستعجلين ترى احنه بعد عندنا اشغال واورلاد وبيوت نحتاج نروح ل يهم ونتنرفز من السيدات وعيب الي تسوونه

1 هههههه ضحكتوني والله بقول ليكم امس شنو صار حقي كنت عند فخر البحرين الي صوب التويوتا توبلي المهم كان السيد ضارب لبعدين والسيارات تدش علينا من قدام اخدنا تقريبا ربع ساعة على ما وصلنا على السيارات حضرتهم يدشون علينا وصلت اني صراحة بالغصب عطيت واحد سيد لان مو سالفة الناس واقفة قدام واني اعطيهم سيد غير ان عليه اشكال شرعي يا متعلمين يا بتوع المدارس وقف ليي واحد على يميني بهوندا اكاورد وواحد علي يساري بيكب احمر صراحة ما عطيت الهوندا الابيض سيد ويا زعم الميكب عطاه عصبت

يا متعلمة يابتوع المدارس نحتاج إلى مترجم .

ولافهمت شي غير ههههههه

ههههههه بعد اذا انت مخك على قدك ويش ذنب الناس اذا ما تفهم
ما تعرف تقرا مسكين كسرت خاطري والله اعرف مدرس شاطر يقدر يعلمك القراءة شرايك وبلاش بعد شر البلية ما يضحك
ليكون انت راعي السيارة الهوندا والا البيككب الاحمر ومنقهر احين خخخخخخخ بس تحتاج تتعلم القراءة الله يعز الحكومة ما خلت شي في محو الامية بعد مجاني

صحيح ماينفهم للكلام

هو خله يصير عندهم اخلاق حتى يفقدونها

استغرب من شغلة وجدا تنرفزني
الحين مثلا اني في سيد الوسط وابي اروح يسار، انتظر تصير فجة بين السيارة الا صوبي والا وراها عشان اسكنر وادخل،، اوكي السيارة الا صوبي تقدمت وصار مجال ادخل واقوم اسكنر،، الا يصير شنوو؟؟!!
السيارة الا ابي ادخل قدامها تقوم تسرع عشان تسد الفجة ومادخل!
انزين ياخلف جبدي قبل مااسكنر انت ماكان عندك مانع تخلي فجة في السيد ومشغول بالتلفون او متملل تدوس وفجأة ينزل حماسك لما تجوفني بدخل السيد قدامك!

بصراحة احاول التزم بالقوانين قد مااقدر بس احيانا اضطر اخطر السيد مثلا من خلال الخط الاصفر السيد الا عاليمين الا للطوارئ او على لتراب اذا مافي رصيف وادري ان ممنوع بس الزحمة قاتلة وورانا اشغال وتوصيل اطفالنا ومشاوير، وبالنسبة ليي اعطي سيد اوقات واجد.. واذا احد عطاني سيد ارفع ايدي كعلامة شكر او اضرب هرن او دينجر، واذا بغيت سيد وحسيت صاحب السيارة مايبي يعطيني ورافع خشمه عادي مافرض نفسي

كلامك صحيح زائر 5 الازدحامات وتأخر الناس عن أعمالهم تجعل من السائق متضايق ويبحث عن اي فرصة يستغلها ليصل إلى مشواره فيجب على المعنيين أن يزيحو اي أذى من طريق المسلمين ومنها نقاط التفتيش عديمة المعنى والفائدة .

هذا لا شيء مقارنة بسياقتهم داخل المدن و القرى
و اذا بيتكم بجوار مدرسة الله المستعان

كمية عمصرية غير طبيعيه في الردود تخلي الواحد نفسه يهون عن قراءة اي شي كل واحد يرتقي بنفسه بالاول كل شخص يبدأ بنفسه علشان نصير افضل بدل العنصريه هذي

.مشكلة والله انا عطيت فرصه لسيارة امامك إلي وراك يهرن عليك

فقد؟ ليش هو من متى صار عنده عشان يفقدها؟

كل من يرى الناس بعين طبعه اطالع الناس وتفكر فيهم مثل ما تفكر بنفسك ولانك ما تملكها عبالك الكل مثلك وردك اكبر دليل على هالشي
الله يعينك على نفسك صدق هالدنيا متروسة معقددين هههههههه

اي والله معاك حق يا 57 خل يمتلكها بالاول عشان تكون في عداد المفقودات

أكثر مكان يرتفع فيه ضغطي نهاية الهايوي في المنحنى الي ينزلك لجامعة البحرين أو الرفاع، الصبح الناس تجود خط الطوارئ و تتجاوز، حوالي نص الناس الي تمر في هالمنحنى تسوي هالحركة، و أنته بس واقف تطالعهم يتجاوزونك و أنته متأخر على الشغل، و تالي لين عطوهم مخالفات جو يصيحون لك... عطوهم مخالفات بردو حرتنا فيهم

لااعمم ولكن الكثير من البحرينيين لا يتحلون باخلاقيات السياقة

مع الأسف البحريني كلش ما عنده اخلاق في السياقه مره طلعت على بحريني بالغلط في الشارع ...

نعم، ما في أخلاق، الاسباب:
1.التربية والمجتمع
2.مخالفة القانون ممن لا يطالهم القانون
3.غياب الرادع
4.ازدياد عدد المركبات لأسباب ....... !
5.تركيز الاهتمام علي ال.... وترك باقي المشكلات!

نعم نسبة كبيرة من البحرينيين فقدت أخلاق السياقة

انا بالنسبة ليي اشوف ان اكثر ناس غير ملتزمين الاجانب، بس بشكل عام سبب المشكلة الشوارع، بالنسبة ليي اخد مخالفة تجاوز خط اصفر و لا يجي احد يرفع صوته عليي في الشغل لأنه متأخر، لأنه حتى لو تطلع من وقت اوقات تصير الشوارع زحمه عدل و احنا نتعطل

لا تخلي أحد يرفع صوته عليك في الشغل إطلع قبل الوقت المعتاد بنصف ساعة فقط وستصل للعمل قبله لكن ينبغي عليك النوم مبكرا بساعة .

اخلاق سواق السيارات الصغيرة غير واخلاق سواق الشاحنات غير ما ان يركب السيارة ما باقي الا يدوس على السيارات الصغيرة وما عنده اي اهتمام وما في قوانين تتطبق على سواق الشاحنات تشوفه في الشارع يتجاوز بدون اي اهتمام وكانه عنده سيارة سوزكى من مسار الى مسار الله وكيلكم مرة طلعت ابوظبي مع الاهل وركبنا الباص الصغير 16 راكب يمشي على المسار اليمين ولا براضى يغير المسار لما قلت له قال لي ممنوع وفيه غرامة

اقبح طبع شفته الي يخطر السيد كله ويروح يدخل على الي التزموا في الطابور، وثاني اكره شي ان لحد يومي هذا ما شفت ولا مرأة تعطي سيد، مستحيل جنك بايقنها او منتقص كرامتها عكس الرجال، المربع الاصفر الناس موفاهمة ليه وتسد الطريق على غيرها، السياقة صارت كانها لعبو twisted Metal

أني مرا بس ما اعطي النسوان سيد لأن مصدقين روحهم
ما يعطون سيد
ولين اهم محتاجين ست الحسن والجمال تبي الكل يعطيها

بل بل ولا مرة ههههههه يا دافع البلا ليكون انت مثل اخينا الي وقف ليي ويبغي يدش عليي واني ما عطيته سيد لاني با فهيم واقفة ربع ساعة في السيد وغيري توهم جايين يدشون على الي قدامي واحنه نوقف بالربع والثلث ساعة ولو عطيتك وعطيت غيرك سيد يعني غيري بعد بيوقف مثل ماانت مستعجل وتبغي تروح دوامك وبيتك غيرك نفس وقلت في قلبي اكيد بيقول هادي ماعندها اخلاق وما عطتني وبيقعد يشلخ من الصبح لليل لكن الصح ان هو الي ما عندهم اخلاق ترى احنه نقدر بعد نسوي جدي بس الاشكال الشرعي موقفنا شكله انت الي فاهم المواضيع غلط

لو قرأتين تعليقي صح بتلاحظين ان الي تكلمتين عنه كتبت عنه اول في اول نقطة وقلت ان هو اكره شي فيا "فهمية" مثل ما وصفتيني، الي اقصده ان ما تعطي سيد خارج سيناريو الطابور ، مثل لين بتطلع من لفة "اسمح للمرور"

فيه ناس مرضى نفسيا يعلقون على الموضوع برجال ونسوان الموضوع ماله دخل بالرجال او المره
بس تبون تطلعون عقدكم النفسية

لا فيه .. مره كنت ماشية في سيدي والمرور من حقي والسيد واقف من الجهة الاخرى ، طلع احدهم راسه من الدريشة وقعد يصارخ يبي يطوف غصب للجهة الثانية اللي مايمشي السيد فيها واعترضني وبعدين قام يسب في النسوان !! لا ومرته صوبه بعد!!

سياقة البحريني بشكل عام افضل من اي دولة خليجية اخرى
لكن الاجواء السياسية
الضغط
الازدحامات
هي اللي مخلية اخلاقنا في خشمنا

الشهادة لله بدون مدح او مجاملة اخلاق البحرانية في السياقة هادئ اقصد الغالبية واذا عطيتها مجال تشكرك هذا انا اعتبره من الاخلاق الى الاسف بعض السائقات تعطيها المجال كانه تقول لك غصبا عليك

إذا عطيت غيرك مجال بيعطونك الآخرين .

چيف وحنة تم فينة عقل علشان انفقدة في هل ديرة؟!

حل هذه الظواهر اللاخلاقية و الغريبة ، بتوسعة الطرق بشكل عام حتى المدن و القرى لا نتكلم هنا عن الطرق الرئيسية فقط و خلق طرق جديدة و انشاء كوبريات جديدة تربط البحرين بطرق ذكية ، مثلا الا في المنطقة الغربية يبغي يروح المدينة يمر على اكثر من طريق للوصول لوجهته .

الله يهديهم الحين بعض السواق ما باقي الا يطلع حامل بندقية وياويل من يطلع عليه ركدو الله يهديكم

ولد زويد
أي نعم ومن زمان صار من اخس السواق على مستوى العالم ولأنه أخلاقهم زفته صرت نفسهم لا أعطي أي أحد مجال إن شاء الله لو أخوي يبي يطلع علي ما أعطيه مجال بسبب تعمد كثير من السواق من الجنسين يشوفونك بتطلع من لفه يسرع أو ترجع ريوس حتى لو المسافة بعيده يسرع فقط من أجل أن لا تخرج

الظاهر إنت تتعمد تسوي هاللون .

ويه هالون لو هشكل كيفي

الكيف والهوى في المنزل فقط استخدام الشارع العام له أنظمة وقوانين وأعراف وتقاليد فضلا عن آداب الطريق إلتزم بها،،،

يا اخوان لا تعملون السائق البحريني مثال في الاخلاق والسواق الاخرين على خطأ في سواق بحرينيين بدون اخلاق وفي سواق بحرينيين من افضل السواق وبالنسبة للغير بحريني كذلك صح نسبة البحرينيين اعتقد ثقافتهم اكثر من الاسيويين ولكن لا نخلو من العيب

الفساد والظلم والفقر والدخلاء الأغراب كل ذلك انعكس سلبا على هذا المجتمع الذي كان مضرب مثل فيما سبق في اخلاقياته وطيبته وتعاونه .

ماشاء الله حتى الفساد والظلم دخل بعد في السياقة ما استبعد بكره نناقش العنف مع الحيونات كرمكم الله تقول بسبب الفساد والظلم

الرجل يتكلم عن أسباب الضغوط النفسية وهذا ثابت علميا بغض النظر عن صحة تقييمه للأسباب أو اختلافنا مع بعضها أو كلها .

الى الاسف السواق تنقصهم ثقافة بعض قوانين السياقة مثال فتح الطريق للاسعاف والمطافئ وسيارات الامن والبعض منهم يلحق الاسعاف وغيرها من تصرفات خاطئة
شكرا صحيفة الوسط في طرح مواضيع مهمة والى الامام

ساعات اخوي ما في مجال حق نعطي الاسعاف اولويه

فقدان الأخلاق في الطريق العام هو بسبب الازدحامات و الزحام اليومي و في كل شارع و ضيق الشوارع و محدودية الشوارع ، نحتاج الى كوبري يربط المناطق البعيدة بالطريق العام ، نحتاج الى خلق طرق اخرى في البحرين و توسعة الطرق الاخرى الى 5 مسارات .

إنت إطلع من البيت قبل وقتك المعتاد بساعة وما بتشوف الي ذكرته ومن ثم ما بتعنيك تلك الحلول صارت أو لا .

اي بحريني فيهم بالضبط ؟؟

الى الاسف وصلنا الى حالة صعبة من قبل السواق

اقول لكم بالنسبة لي بالعكس متقيد بالقوانين ومتاسمح مع السواق والدنيا ماراح تطير
تصورو مرة في المحرق في وسط الشارع وحدة كبيرة في السن في وسط الشارع بين الشارعين والسيارات تمر عليها ولا كانه في شي وقفت في وسط الشارع وطوفتها مسكينه ماباقي دعاء ما دعته لي معقولة الى هذي الدرجة وصلت اخلاق السائق البحريني تخيل هذي امك خالتك عمتك الله يهديكم

نصيحة الى رئيس الإدارة العامة للمرور ادا يبغي يحل مشاكل البلد من ازدحامات وحوداث وغيرها..سحب جميع رخص السياقة من النساء..المرأة مكانها بيتها فقط مو الشوارع مزاحمة الرجال

ولد زويد
فيه دولة في مجلس التعاون تمنع سياقة النساء روح عيش فيها يا متحجر حيث أنه أكثر المتزوجين خالين مسؤلية البيت على الزوجه توصل الجهال وتروح معاهم مواعيد المستشفى ......والخ

احسنت بارك الله فيك

اذا سحبوا الرخصة من النساء اتفرغ اليهم انت واشكالك الا ما تدرون عن شي في البيت المسؤليه كل هل المراة من روحات وجيات حقكم وحق اولادكم

شكلك مو قادر على مرتك وتحط حرتك في التعليقات اللي يوميا تكتب هالتعليق
نصيحة صير رجال في بيتك واترك عنك التعليقات السخيفة

الله يهديك بدل ما تقول يوقفون رخص السياقة عن الاسيويين تقول سحب رخص سياقة جميع النساء ما تبى بعد يفنشون كل مدرسة وكل دكتورة لانه المراة مكانها البيت

نصيحة إلى زائر رقم 19 روح عيش فى المريخ أفضل لك.
بلا هالكلام المتخلف.
مثل اللي يقعد ويشتم اللي اخترع السيارة وهو مايعرف يصنع إبرة.

الله يكون في عون زوجتك
ياخوفي انت بس الا تطبخ الغدى وتغسل المواعين، فالح لينا المرة مكانها البيت والمرة مكانها الببت

هذا اختصاص المجلس الأعلى للمرور أو لجنة الطرق والتنفيذ يتم من قبل الأشغال والطرق أما المرور مراقب للإلتزام بتنفيذ القوانين والأنظمة .

سواق الباصات ماعندهم اخلاق واغلب الحوادث منهم . شوفو ليكم حل ويا هالباصات

نعم أتفق معاك % 100 أخلاقهم وسياقتهم زفرة خاصه جماعتنا الي منا وفينا

اتفق معاكم 100000%

يمدي البحريني يفتح الدريشة في الشارع العام و يرمي الله يعزكم كيس القمامة ، و لا يقول ليك النظافة من الإيمان !!!
اي ايمان هذا الا يتكلم عنه ؟!
اهم شي يحافظ على سيارته من قذارته
في اختراع اسمه كيس في السياره لكي ترمي قذارتك .

اخلاق ما ميش في الشارع هالايام ... حتى الشيوبة صاروا اضربون اهرنون عند الاشارة قبل لا تولع خضرة
و لا كأنه الاسلام دين الاخلاق و التسامح الكل صار همه نفسه و بس ... بدون مراعاة للاخرين

مافي مشكلة لأن أبوك الشايب صبره أقل ونظره أضعف وسعة صدره أضيق من بلاويكم في البيت .

يعني تبون كل هذه المتغيرات التي حصلت في البحرين والثقافات الدخيلة خليجيا و عربيا و آسيويا ويبقى البحريني صامدا غير منطقي هذا الكلام .

ياجبل ما يهزك ريح إلي أخلاقه وتربيته حسنة ما يتبدل .

كلامك انت الصحيح يا خوي
ونا أول واحد راحت مني كل أخلاقيات السياقة وصرت ابي اوصل بس من كثر السيدات إلي ما اتخلص

لا حد يقول الرجل او المرأة هو الأكثر الذي لا يمتلك اخلاق ، فالمرأة هي زوجة او اخت الذي لا يمتلك اخلاق ، و العكس صحيح ايضا الا نادرا جدا .
فالأخلاق تتوارثها الأجيال .

اطلب من إدارة المرور ان تبحث عن وسائل أخرى غير تخويف الناس بالمخالفات باهضة الثمن بالنسبة لمواطنين رواتبهم 400 او 500 و مراجعة تقييم المخالفات خاصة تلك المخالفات التي لا تضر الآخرين في الشارع .

لا تسوي مخالفات محد بخليك تدفع

أنت تسأل عن أخلاقيات السائق البحريني ؟؟؟
أنت جمعت في البحرين بين عدة ثقافات سواء في الشارع او المدرسة و في الحياة عامة ، هذه نتيجة حتمية البحريني يتأثر بسلوك الاجنبي و الآخر أيضا يتأثر بسلوك البحريني .

فعلاً ذهبت تلك الاخلاقيات التي يتحلى بها السائق البحريني مع رحيل الجيل السابق و بقي القليل ممن يتبعون ذلك الجيل الذهبي و شكراً لرجل المرور المرشد الاستاذ عبدالعزيز بو حجي

شخصيا.. في النزلة من سار للهاي وي
تصير اخلاقي خمام
اوقف في سيد ويش طولة بعدين واحد يجي بيدخل عليي... ليش؟؟ سلامات والله لو تدعمني ما عطيتك سيد
وادارة المرور الله يهديهم حاطين كاميرا ما تشتغل
فعلوا الكاميرا خل نفتك من هالاوادم

إنت بس في هالشارع تصير خمام لو بعد عندك دواعيس غير تصير فيها زبالة .

ادارة المرور شفوا لكم حل مع سواق الباصات لصغار تبع المدارس
جد فلم رعب

أضم صوتي معاك

ياما اتمشكلنا معاهم
غرور وتكبر فيهم على الفاضي
وكل همهم السرعة عشان خط ثاني وثالث ويتسببون ابحوادث وهم ماشين

الواحد ساعات يطلع ع واحد بالغلط
ما يضرب هرن بسيط .. باقي شوي بس و يقتلك هي لو يعطونكم منصب وش تسوون
ولا تطالع واحد مثلا يجي بيتهاوش .. ليش .. يقول حق ويش تطالعني ????????????????????
في هالفئة من الشباب و المراهقين زايد عندها هذا الشيء

اي طبيعي بنفقدها ومعذورين احنا
اذا مشوار بسيط انقع فيه في الشارع ساعة كاملة اي اخلاق تتكلمون عنها
عدلوا شوارعكم
شيلوا نقاط التفتيش اللي تعطل الناس على الفاضي
وسعوا الشوارع بعدين تعالوا تكلموا عن الاخلاق

عذر اقبح من ذنب

اتحفنا بالاسباب ياللي مو عاجبك تعليقي

نعم صحيح، انا اقول نقاط التفتيش بالشكل الحالي سبب اختناق مروري فوق اللي موجود اصلا، و الناس عاملة حسابها تصل لمكانها حسب التقدير الزمني الطبيعي، عشرين دقيقة أو نص ساعة حتى يشوف زحمة ما كانت في تقديره و يضطر يحل مشكلته اللي هي اصلا تسبب بها غيره بطريقته الخاصة، واللي بتظهر في أخلاقنا بالسياقة موضوع المقال، وخلاف ذلك لو التزمتا ثم تأخرنا بيترتب عليها تبعات وأضرار تختلف من شخص لآخر. والمعذرة لا تقول اخرج قبلها ب ساعة، ليه هو احنا كم ساعة عندنا في اليوم نهدرها

صادق الاخر عذر اقبح من ذنب الشارع يحوي الالاف السيارات الي واقفة في الشوارع مثلك ومثل غيرك معنى كلامك الكل يصير قليل ادب والكل يتهاوش مع الكل والوقعة قايمة شلون تفكرون
ترى احنه بعد نسوق سيارات وعندنا دوامات وعاوائل اذا خلصنا شغل نبغي نرجع بيوتنا نرتاح ونستانس
ولا هو طبيعي الحجي الي تقوله شلون تفكر جدي يعني احنه مو عايشين في غابة

مافي شي على الفاضي إذا كنت خصما لأحد المطلوبين مهما كان السبب فستطلب فرض نقاط تفتيش بكثرة لكي يتم ضبط غريمك حتى لو كان السبب حادث سير وعدم تأمين .

لا تشلخ واجد وتشتط بلا خصما لمطلوبين بلا بطيخ تجدبون الجدبة وتصدقونها وبقول لك شي الكل يعرف نقطة التفتيش موجودة في هالمكان خاصة ان مكانهم ثابت من فترة جاوبني من المطلوب الخروف الي بيطلع عشان يصيدونه عند نقطة التفتيش الي حتى طيور السما تدري عنها
يا اخي حدث العاقل بما يعقل بعد اذا انتون بدون عقل احنه عندنا عقل ونفتهم

زائر 110 إنت الي تقرأه في التعليق تفهمه والا بس تبي تكتب أي شيء ،،، سد فراغ المسأله لو تسلية .

اساسا دمار السياقة في البحرين سببها لرجال
لا اخلاق ولا فن
بس يبون يفرضون عضلاتهم

والله لو ما المخالفات محد افتكر في اخلاقيات ولا شي

الشعب في الشارع تحول لشعب بنظام الرأسمالية همه نفسه وفقط روح التكافل الاجتماعية تبند من يركب المواطن سيارته .. ابسط مثال من تضرب سكنير يزيدون سرعتهم اذا هم من بعيد عشان بس ماطوف وكان السكنير هو الرداء الاحمر الي يوضع في مصارعة الثيران ومن يشوفه الثور يهيج السكنير بعد يهيج الناس هذا بس مثال واحد

انا بالعكس اذا اشوف حد ضارب سكنير على طول اخفف واعطي جانس بس العكس الي يدخل بدون سكنير هذا مو من الذوق

ولد زويد
فعلا هذا الشي موجود إن شاء الله لو المسافة 70 متر ويمديك أطوف لو أمامه مرتفع يزيد سرعته لأنك سكنرت عليك بعنصر المفاجئة لف من غير ما تعطي العدو أو الخصم أي إشارة بس بعد في ناس تسب اليوم الي عطيتهم مجال يطلعون عليك ويرفعون الضغط من سياقتهم

إنت قاعد في ميدان معركة ( عدو وخصم ) ويش هالتعابير .

اي عدو وخصم مو عاجبك التعليق أشرب من ماي المطر أخلاقهم في السياقة جدي زفته

السياقة فن واخلاق وذوق

نعم راحت الأخلاق و60% من سببها النساء

شكله النسوان مسببين لك عقدة

خلف عمري تاج راسي نسوان البحرين الشريفات العفيفات كلهن بلا استثناء .