اذا عوائل كبيرة لازم يحصل جذي ... يعني مثلاً اما تروح بيت جدك و تتهاوشون لازم في شخص كبير يفهم ويوقف الشجار بين الأطفال قبل ما يحصل....
و خصوصاً اذا بدو يلعبون "عن زعم" مصارعة غالباً ما تنتهي مثل هذي الألعاب بإصابة خطرة

السخيف ألا يحط عقله بعقل الطفل ويخسر الأخو والأهل سند له ولولد الولد

ف بعض الامهات مايبغون ولاذرة كلمه ع أولادهم للعلم ( شاقيين الارض وطالعين)
مره ولد حمي شلخ بتي بوكسات وكانت رده الفعل عمتي وقفت ويايي ورده فعل مرت حمي ( زعلت وكبرت السالفه ؟!!!!! ) مادري اقصون ع نفسهم انتون نفسكم ماتتحملون ولادكم مع اخوانهم وتضربونهم وتعاقبونهم بس لين الموقف اصير بت حمي ويه ولدي أو ولدي مع بنت اختي اسووووون دراما تستحق جائزة الأوسكار بجدارة!!!
الكل تاعب مع تربيه اولاده والام تعبت مثل ماانتي تعبتي بس السخافه وقلة الادب لين الام سمعت ولدها فالت كلمه ماترشده وكله وبدي مايكذب!!

صراحه الجمعات ما وراها إلا المشاكل وعوار الرأس إلا ولدك ضرب ولدي والكبار تدخل وتصير الحساسيات .وكل وحده توصي ولدها صير أسد اونمر. .عايشين في غابة مو لمة حبايب

ان الأخطاء من الأطفال كالشجار وغيره من الأمور هو امرا طبيعي ينسجم مع مرحلتهم العمرية
وردت الفعل من الكبار على أفعال الأطفال المختلفة هي سلوك تعليمي وتربوي بالنسبة للأطفال. . ... لذلك أن كانت ردات الفعل على من أولياء الأمور على تصرفات الأطفال غير متزنة فإن الطفل هنا سيتعلم هذا السلوك السيء في معالجة مشاكله القادمة

الجهال في العادة رأيهم من رأي الام ... يعني ممكن أكون اني لطيفة مع الجهال و حابة أتقرب منهم بس حمواتي ينظرون ليي بريبة لأَنِّي غريبة فإذا اعطيهم اكل او حلاوة او حتى اوقات اكسسوارات ... الجهال مساكين يطلعون من شقتي فرحانين عقب اسمع صوت امهاتهم يطلبون منهم يرجعون اللي عطيتهم اياه .. لما اخليهم يلعبون مع اولادي يجون يسحبونهم ... لازم يبغون يسوون تفرقة بين اولاد الاخو و اولاد الأخت

اختي يمكن يبون يعلمونهم يتعيززون
وع قولتش يسبحونهم قصدهم مايقون عيالهم عليش ويثقلون عليش
يعني سوي خير وقطيه بحر ولا تشغلين بالش بهم وحطي اعذار

اني وحدة ما عندي مانع ان اولادي عماتهم يعلمونهم الصح من الغلط .. بس اذا هم من النوع اللي يحبون يباعدون اولادي عنهم و يبغون بس اولادهم و في المناسبات ما يفتكرون في اولادي و ما كأنهم اولاد أخوهم فشيء طبيعي مع الوقت ماراح أتقبل أنهم يكلمون اولادي بأي كلمة ... خصوصا انهم مستغلين عصبية زوجي و من يجي قالوا ليه اولادك سووا و اولادك عملوا حتى يطيح فيهم ضرب

بصراحة الأطفال يتهاوشون ويتصالحون ويظل الكبار الزعل بينهم .
المفروض ما يتدخلون الكبار .
انا مرة بنت حماتي ضربت ولدي شلخت راسه وديناه الامريكي خيطوا له ولا تكلمنا ولا قلنا شي والأثر للحين امبين والحمدلله احنا حبايب عسى دوم حبايب.

اتخسي تشلخ راسه
جان بطابوقه على راسها

هل تؤدي خلافات الأطفال في التجمع الأسبوعي في بيت الجد إلى قطيعة بين الأخوة و الأخوات و بين نسوان الحمي و بين أولاد الخالات و العمات و الاخوال و الاعمام الإجابة نعم و أيضا يحدث ضرب بين الكبار بالبوكس او النسوان يشدون شعر بعض و تحدث حرب البسوس و داحس و الغبراء ...♡♡

زائر 35 .. خلصت الاجازة و بدأ دوام المدارس لهذا السبب قلت مشاركتي في المناقشة يا ذكي ...♡♡

تعليق 29 ... ليس لي لأني أعيش في عزلة و هذا يعني اني لا اجتمع في التجمعات العائلية ولا مع الصديقات ل سنوات طويلة و هذا الموضوع لا يناسبني لأننا نعيش بعيد عن الناس و لكن اسمع عن معارك تحدث اذا اجتمع الاهل يوم الجمعة و هواش الصغار يؤدي إلى زعل الكبار صحيح ...♡♡ ام محمود

لا الشي الاخس اذا جاهل ضرب الثاني، يجي الابو بعدين يضرب الجاهل الا ضرب ولده!
في هالحالة الاهل ليهم حق يتضايقون، الجهال يتهاوشون غير والاهل المفروض مايتدخلون لينهم الا ادا بأدون بعض

المشاكل تحدث عندما يكون عقل الكبار كعقل الصغار... وعندما تغيب الحكمة.

بعض الناس تجيب اولاد بدون ماتربيهم يتركوا الامر للتجارب ويتعلم بروحه حتى لو يشوفوه يكسر في اغراض الآخرين ويضربهم ويوسخهم ولاكأن صاير شي ولين تتكلم ليه زعل امه وابوه المسؤول الاول هم الاب والام يجب ان يعلموا اولادهم الصح والخطأ ويحترم الآخرين حتى يحترموه ومايضرب احد حتى ما احد يضربه اما انهم مخلين القرعة ترعى طبعا ما حد بيقبل وطبيعي بتصير مشاكل

الاطفال لين تهاوشوا بسرعه يتصالحون ويرجعون لبعض
وقلوبهم بريئة لكن العتب ع الكبار الا عقولهم اخس من الجهال
لين تدخلو في هوشات... الله يهدي الجميع

عجل شتقولون عن ولد يجيب المشاكل من كان صغير حق عمته المسكينة كل يجذب على أبوه عمتي ضربتني مع إن عمته أكبر من أبوه كل يجي ويضربها والسبب ولده ولا بعد كل شكاوي عليها في الشرطة مسكينة ما تكلمه ولا تقرب صوبه والتهم تجيها لحد عندها

انا لا اختلف ابدا ابدا مع اخوتي و خواتي و حمواتي و حمياني بخصوص مشاجرات الاطفال لانهم صغار ولايحملون احقاد و ضغائن وبعد بضع دقائق يتصالحون لكن الله يهدي زوجة اخي مخاصمتنا بسبب مشاجرة بنتها مع بنتي ..... ام محمود

قاتل الله الجهل وقبح الله الجهلاء .

المشكلة مو متوقفه على هوشات الجهال بس..!!
المصيبة..
ان وصلنا لمرحله اذا "العم" يزمر على ولد اخوه يزعل الابو والام
ونفس الشي "الخال" اذا زمر على ولد أو بت اخته تزعل الام
انا مره زمت على ولد اخي والابو "اخي" زعل مني وقال لي ارجوك لا تزمر على ولدي وتكسر شخصيته ههههههه

كلام اخوك صح يعني الأطفال سواء أولادك أو أولاد اخوك مو زين ليهم الضرب والصراخ يكسر الشخصية مو لأن صغير معناته يصير سبيل للكبار (الموضوع زعل من هواش الجهال مو تنفيس الكبار غضبهم على الصغار وإدا بيادبون الصغار في أساليب تربوية)

اوافقك الرأي.. لكن غالبا من يستوعب هالحجي دايما يقولون انتي تبالغين -_-

اني ما عندي مشكلة مع هواش الجهال ... جهال بيتهاوشون و بيتصالحون .. بس اوقات الأولاد يكونون مؤذين و لازم ينوضع ليهم حد خصوصا اذا كان الام و الابو يبغون يخلون اولادهم على راحتهم بدون توجيه

الحمد الله احنا في بيت العائلة كل للكبير حق تأديب وضرب الصغير من ابناء اخوته وخواته وازوجهم كذال
الجهال كل هواش على اصغر الاشياء لو تجيب ليهم الاعب مثل بعض اثنينهم يصرون على لعبة واحد10059

اذا الرجال (آباؤهم) زعلوا والي المفروض يفكرون بعقلهم وليس بعواطفهم .. عجل النسوان ما ينلامون اذا نتفوا بعض على سوالف الجهال! يالله خير

للاسف عندنا في عايلتنا قطيعة بسبب خلافات الاطفال. مع ان الاطفال لو تعطيهم الوقت دقايق واتصالحون ولا كأن شي صار

ولد اخوكم يعني ولدكم
ما يحتاج تقولين لامه جوديه
انتين قولي له حبيبي لا تسوي جذي او اخذيه على صوب فهميهم بكل هدوء

اي تعلمنا من و احنا صغار لين احد زفانا من خالاتنا او الكبار نسكت و نبلع العافيه... جهال هالايام يحصلون زبرة يتشكون عند امهاتهم و اجي الام تنفخ عضلاتها حتى على اختها.. الجاهل يتعلم مني حتى لو سوى خطأ فهو محمي من العقاب و الملامة و يتعلم مايحترم الكبار.. اهمشي جهالهم لحد يلمسهم بشعرة،، مشكل ما في الا انتون جبتون جهال

الاطفال بيتهاوشون وبيزعلون ويضربون بعض ويتخاصمون
وعقب عشر دقايق ولا كانه صاير شي
عشان جذي قاااااااااااااااااااعدة لا تتدخل بين الاطفال
لان بتصير حزازيات ولا بتروح مثل الاطفال
التدخل يكون اذا كان ضرب فتمنع هالشي
او اذا كان استهزاء قوي او شي مضر
اما لعب عادي
خلهم بكيفهم

بعض الاشخاص على اشياء تافهه تتهاوش وتكبر الامور من لا شيء
اطفال يلعبون مع بعض يتفاهمون بينهم ولا شأن للكبار

اني مرت حميي تحط بالها ويا بتي ادا تتهاوش ويا ولدها الصغير وتفلصها وتتهاوش بروحها لان اني ماحط بالي ويا جهال عاد اني اسكت وهي تتهاوش ويا عمتي لان اني ساكتة فعمتي دفاع مقدس عن بتي واني اتضحك ههههههههه اتابعهم بنجح

حتى لو كانت صغيرة على الوالظين يعلمون اولادهم السنع مو شطارة اني اسكت والاخرين يدافعون عني لان في النهاية اطفال الاخرين بشر اعتذر عن تصرف ابنتي بأدب وافهم الصغيرة هذا خطأ او اذا ما فهمت الصغيرة اقدم اعتذاري وهدية صغيرة واعزل بنتي لانني مو قادرة اادبها لان مرات تكون الضربات جدا قاسية وموجعة للطفل وحرام نتركهم بدون تدخل صحيح لانهم اصغار بس الاحترام والادب والاعتذار عن ما بدر من الصغار يحل المشكلة ولا يفاقمها

للأسف عندنا في العائلة مثل هذي الحالات .. عندي ولد أخو عفريت مأذي الكل وأبوه وأمه دائما يغطون عليه ويبررون أفعاله ودائما ما يتقصد أبني المعاق وفي يوم جيت من الشغل ومصادفه كان الكل مشغول ماعدا أخته الكبيرة وكانت تشوف الموقف أن أخوها حامل لعبة سيارة حديد ويضرب أبني فكانت ردت فعل سريعه أخذت اللعبة من يدة بسرعه وألمته بسببها وللحين متحاملين علي وعلى زوجتي وحتى أبني على موقف تافه

بنت حماتي الكبيرة ضربت بتي الصغيره، ما تكلمت اني واخدت بتي اسكتها، سألوا من منهو؟ أشروا ع الضاربه، چان تطلع عمتي ام زوجي من طورها ، مو بنت بنتي يالچذابين يا راعين المشاكل، ( بالله عليكم تنبط الچبد لو لا، بتي المضروبه واني ساكته وهي زعلانه مني)

سخيفين

الي يحط باله وبال الجهال هو جاهل وطبيعي يتهاوشون الجهال وبعدين يتصالحون وبعد ليش الزعل بين الكبار والكبار دورهم التأديب والمصالحة بين الجهال ومثلا لما ابو او أم شاف ولده يضرب اولاد اخوه او اخته يعاقبه ويادبه والطرق الثاني يسكت ولا يزعل

الاطفال حاكمهم ميت على مقولة الناس يتهاوشون وثواني تشوفهم من احسن ما يكون على الاهل التغاضي وحل مشاكلهم بمفردهم

اني عندي اولاد ولدي واولاد بنتي أمهاتهم يروحون الشغل والأطفال يتهاوشون مع بعض بنتي تضحك عليهم لكن زوجة ولدي كل يوم تسوي لينا مشكلة وتقول يضربون اولادي وانتين تحبين اولاد بنتك أكثر مع اني والله احبهم كلهم نفس الشئ كلهم احفادي

أحنا ماعندنا سالفة نتهاوش عشان جهال لا أخوان ولا أخوات خلهم يتهاوشون مصيرهم يردون يلعبون مع بعض .. مايتدخل في هواش الأطفال الا اللي عقله صغير .. حتى لو اختي او اخويي صارخوا على عيالي أو العكس عادي بالنسبه ليي لأنها خالته او خاله ويعتبرونهم مثل عيالهم

لو كبر الاهل راسيهم
وخلا الاطفال يلعبون ويتهاوشون مردهم بيتصالحون
ما بصير فيه هواش ولا شي

صح بس اذا جهال قليلين أدب وش نسوي ؟ ولد اخويي شيطان بكل معنى الكلمة ومسوي عصابة ويا اولاد العايلة وكل جمعة يتخوون بأحد اذا انقول لمرت اخويي جوديه تناديه وتقول له عماتك مايبونك ولايحبونك و و و ... شالحل؟

انتون قولوا ليه لا تسوي شي مؤذي لاحد
تخلونها هي تتصرف واضح انها ماتجوف غلط ولدها

بالعكس يكون ردها ببرود حتى اذا اروح بيت ابوي جذيه هي حركاته ... ولما ناخذه على صوب ونفهمه ونحضنه ونقول له حبيبي انت كبير ورجال يزيد جنونه

في بيتنا وقاااايع تصير
الا ولدش ضرب بنتي الا تدخل الاهل
والا عمتي ما تحب عيالي تحب عيال بنتها
احنا متهاوشين وما نكلم بعض والجهال ولا همهم شي اكو يلعبون مع بعض

بكل البساطة أن يكبر الأهل عقلهم خصوصاً النسوان وأن يحكمون بين الجهال بالعدل والإنصاف سواء كان ولدها أو لا..
يعني ماتوقف وية ولدها ضد ولد عمها حتى لو كان غلطان

طبعا مو كل النسوان علشان ما اكون ظالم بس اغلبهم فيهم هالعادات المريضه لكن تبيهم يكبرون عقلهم ويتركون عنهم هالعادات هذا عشم ابليس بالجنة

انا عن نفسي...
اتركهم بحالهم وﻻ اعير أي إهتمام بهم يتهاوشون ويلعبون مع بعض ويتصالحون ﻻاتدخل أبدا بينهم...

نتركهم يتافهمون ايه بعضهم بعض لكبار ماتدخل لانه هم اطفال ادا دخلت لكبار اتصير مشاكل ماليهانهابه. خلهم يتزاعلون دقايق ويتصالحون نشوفهم يوم الجمعه ادا اجتمعو في بيت العائله

احنا تعلمنا من امهاتنا وابائنا ما نتدخل في هواش الاطفال
الاطفال يختلفون ويتزاعلون خمس دقائق ويلعبون ولا كانه صاير شي ولكن الكبار زعلهم يطول اشهر وسنين
اول ما سكنت البيت بنتى الصغيرة جاءت تبكى بنت جارتنا ضربتنى البنت في سنها ست سنوات اخذت بخاطر بنتى قلت لها اذا شفتها راح اضربها ودخلت حجرتي خرجت من البيت الا الثنتين يلعبون امام البيت ولا كانه صاير شي واشتريت لهم عشا وتعشو والحمد لله انا مع جارى من احسن ما يكون في علاقتنا بس محتاج نكبر عقولنا شوي ما نحط عقولنا بعقول الاطفال (حالاوي)

والله الاطفال هم الزوجات والازواج لان عقولهم عقول اطفال والاطفال اعقولهم كبار يتهاوشون ويتخاصمون ويوم ثاني اتشوفهم مع بعض ولا كأن شي صاير اما الازواج والزوجات اتشوفهم اعوام متخاصمين

هههههه كلام صحيح مية بالمية

الأمهات عقولها صغيرة
خير يا طير ولدي ضرب ولدش
الحمدلله والشكر
كبرو عقولكم ذلين جهال جهااااااااااااال
خلهم يضاربون ويتصالحون لا تتدخلون بينهم