للنسوان ..
اذا اخترب شي في البيت قولي لزوجش مرة وحدة بس
ماليه داعي كل 6 شهور تذكرينه يروح يصلحه

بطبعي هاديه وقليله الكلام مستمعه اكثر من متحدثه ..طلع زوجي طحان وكله يهدر ..بالفصيح ثرثار ..

بس المرأه الي تطحن الرجال من يتحجى مايسكر بوزة

هههه تعليقات لرجال ضحكتني
يادافع البلاء مسكينة الاتبغي اغراض البيت

انا عن نفسي الحمدلله قايمه بواجب بيتين وتسعة أولاد وزوجي مايرجع إلا الليل

الرجل بطبعه قليل الكلام مشاكله يحاول حلها بعيد عن زوجته أما المرأة تحل جزء من مشاكلها بتكرار الكلام لأنه متنفس لها

زوْجَتَك نِعْمَه وْأمانه وْبَـعَدْ ليْها انْتَـه الأمان
خَلْها في بيتَك مُصانَه وِاْحـْتِـرُمـْها اْبْكِل مَكان
لاتِـجَرِّحْـها اْبـْإهانَـه وْتِـطْعَن اْبْسيْف اللِّسان
وِاذه تِبْغي لَك مَكانَه في الگَلُب،عِطْها الحَنان
وِاْنْتي يالزُوجَه بَعَدْ فِهْمي الحَقيقَه الرّجُل ما يِبْغي غير الإحْتِرام
لاتِحِنِّي عَلى راسه كِل دگيگه وِالعَتَب خفِّيه وِاْخْتِصْري الكلام
وِاذَه جَاشْ البيت لَتْعيقي طَريْقه ترى هو تعبان منْ جهْد الدَّوام
كل طَرَف يِحْتِرُم للثاني حقوقه تُبگه عيشتكم على حُب وَوِآم

اي والله كله تطحن اقول ليها خمس دقايق و بجي تقعد تتصل كل نص ساعة تطحن ما عندها صبر

شلون خمس دقايق وبتجي وهي تتصل كل نص ساعة يعني ما صارت خمس دقايق صارت ساعات تبي تجذب عليها وتسكت عنك

توك تقول خمس دقايق وبجي
يعني من حقها لين اتصلت كل ( نص ) ساعة هههههههه

اني زوجي يعتبر كل كلمة اقولها طحنة ... يعني لما أتكلم وياه و أقول اليه اليوم اولادك صار ليهم چديه يعتبرها طحنة... لما اسولف في اي موضوع يعتبر اني قاعدة المح لموضوعات ثانية و اني اطحن على سالفة معينة ... الاحسن ان الواحد يسكت و لا يعور راْسه خصوصا اذا الرجال هذا أسلوبه ... كبت صار ليه چم شهر بابه مقلوع و ساكته و حاقرة حتى ما يقول اني طحانة

حتى أولاده ما يبي يسمع اخبارهم خوش أبو

المشكلة مو في الطحنة، المشكلة في اختيار الزوجة لوقت الطحنة

واللي بالعكس زوجها خلص ابو الطحنات كلها

المره تتطحن من الظغط الاعليها. طبخ وغسال وتربي وتدرريس وادا بعد تشتغل موبس تطحن بركان تلاقيها بينفجر وتحصل بعد زوح خايب مايساعدها. وجداب. من حقها ولاتصك حلقها

كثر الطحنة اتقصر العمر

ان موش متزوج ولكن بتكلم عن امي الله يحفظها
ماشاء الله من جيت عالدنيا الى الحين ماجفتها ولا مرة تتطل منا اي شيي وحتى مع الوالد
نحترمها كثير ونخجل من كرمها وعطاءها بلاحدود
بيتنا دايما هدوء حتى لضيوف يستغربون ولا كأن موجود احد في البيت
انا الوحيد المحظوظ من اخواني اللي اوصلها كل مكان من بعد ما اترجاها بتوصيل تقولي كلفت عليك ياولدي
على طول احب ايدها من الخجل اقول لها احنا خدامك واللي تامرين علي
واذا تجمعنا معاها على طول تسوي القدوع وكأنا ضيوف
علمتنا معنى الاحترام والصبر والحب

بارك الله فيك من ابن بار بامه الله يرزقك زوجة صالحة وابناء بارين

ولد زويد
الله يحفظها ويخليها ويحميها لكم ويطول في عمرها بارك الله فيك

فتاة عشرينية

هل تتكلم عن أم بحرينية أم من جنسيه اخرى؟

مثل الوالدة الله يحفظها

الزواج تقييد لحرية الرجل

قصدك تقييد لحرية المرأة

من واقع تجربة حيث انني متزوج
وبصراحة مو مقصر مع زوجتي من ناحية المصروف واحتياجات البيت وطلباتها من تقول تبي شي
على طول اجيبه اليها ، بس هي تحب تتطحن وتتحلطم
وتتهمني بالتقصير افلان يسوي جذي وافلان جاب الى مرته
جذي ، وكله يطالعون بعض ويحسدون بعض والضحية الرجال المسكين
يتحلطمون عليه ، ويتهمونه بتقصير ، ومن هالصحيفة الغراء اوجه رساله الى النساء اتقوا الله في ازواجكم ، وطالعو الي في ايدكم ، ولا طالعون غيركم ، علشان ترتاحون نفسيا ، واتركوا عنكم الحسد والغيرة، والقناعة كنز لايفنى

طحنة المرأة من خيابة زوجها وقلة حيلته.
هو لا يلبي الاحتياجات ليس لأنه لا يريد، وانما لتقليل المصروفات؛ لأن أمواله محدودة.
يجب على الرجل البحث عن مصادر دخل أخرى ؛لتلبية احتيجات اسرته المتصاعدة.
عن نفسي، ككل المتزوجين كنت أعاني من قلة مواردي وطحنة زوجتي.
وعندما زادت مواردي عن طريق فتح مشروح تجاري ناجح، بجانب وظيفتي النهارية.
تلقائيا، خفت المشاكل والطحنة، وصرت أنا من يشتري الطلبات قبل أن يطلبوها.
تعب جسدي من الصبح الى الليل، مقابل راحة نفسية ورضا نفس.

ويش نوع المشروع الي فتحته هههههههههههههههه

يقولون الله يبارك فيك ويزيد رزقك حبيبي ويفتحها علينا وعليك. مشاريع واجد شغالة في الانستغرام والمراسلات في الواتساب جاي تسأل الرجال ويش مشروعك.. مشروع يطلع منه بيزتين، الواحد لو ما عنده مهرة يمتهن فيها لو يشتغل بارت تايم بعد الدوام أو يشتغل اوفرتايم يوفر جم فلس عشان طلبات البيت والأهل وعن الطحنة

بغض النظر عن نوع المشروع.
فتحت المشروع قبل 14 سنة، ولا زال شغال.
يستطيع المرأ أن يفتح الكثير من المشاريع بداية من مبالغ صغيرة، ثم يكبر.
يحتاج فقط فكرة، عزيمة، اصرار، مثابرة، وذكاء متوسط.

ويش نوع (المشروع) التجاري

مو بلوتهم هالرجال لو ماتطحن عليهم مايسوون الحاجه !
وحتى ويا الطحنه مايفيد ، يعني لو حاجه قاصره في البيت
بتقوله بيقول أوكي ، بتذكره بيقول اوكي ، عقب تطحن عليه
يتحلطم ليش تطحن عليه .. وفي النهايه المرأه تتصرف !!

والمرأة اذا رجعت من الشغل تعبانه ؟

راحت رجال العز والهيبة وجت رجال ما تعرف العيبة ...اصبح الرجل البحريني ما يعرف العيب ...المرأة تصرف ع نفسها وعيالها وتصرف ع الببت واي تصليح في البيت هي تتصرف واتسويه وهو خل قاعد في القهاوي او السفرات او يصرف ع اهله وهو امقصر على بيته ...صار مثل العلوج الكل يتكلم عنه في الخليج

الهدرة والطحنة من أهم عادات الزوجة ولا عتاب

المرأة كهرمانة وليس بقهرمانة.... المرأة عز واحلى ما فيك النكد ، لأن هذا بسبب نقص في إنجاز مهام الرجل!

لو يفهم انجان ما هدرت ... المشكله لازم تعيد الكلام الف مرة عشان توصل المعلومه

وجان زين يفيد ... والله شمسية المطبخ دشينا السنة الثالثة وللحين ماتبدلت ... لييش ماعنده وقت واذا قلت بقول حق أحد يجي يبدلها لو من بيتهم مايرضى يقول صبري بس أفضى ويلوموني ليش أحن؟ هههه بلوة لرجال بلووووة

اكثر من يطحنون البحارنه حتى وهي في السوق تلبي وتطحن وصوتها عالي كأنها في بيتها الله لا يبلانا

لو ادىي الزواج جديه انجان ما تزوجت ..اصلا انا متزوج متأخر لو مواصل عزوبي يمكن احسن ليي

مو المشكلة انك متزوج متأخر لازم الواحد يحاول يتزوج منوقت و لو حاله ما كان يسمح ليه و هو يعرف يعني ويش زواج و هو قد المسؤولية ما بيتمنى انه ما تزوج نفسك و هل خرابيط

شخبار بعد زينينننه

اتقد قعدة المراة بروحها طول اليوم تحتاج تفضفض واعتقد المشكلة موجودة فقط عند الي ما عندها احد تسولف وتفضفض له

شنسوي ماعندنا الا طحنة زوجي يقولي طحانة وانا اقول هو طحان وبس مانخلص

...... خلصت المواضيع ... خلو النسوان في حالهم الله يهديكم ويصبر النسوان لازم يعيدن الكلام عشان تفهمون.

ما اقول الا حسبي الله ونعم الوكيل في كل رجل ظالم لأهله وبيته ذهب زمن غيره الرجل على زوجته ويش بيصير لو سمع لزوجته وطلباتها من أول مره وهو بيقوم بتنفيذه بطحنه أو من غير طحنه يا ريت الرجال يتعلمون أن هذي زوجتك مو عدوتك ومر عيب لو نفذت ليها طلباتها بالمعقول و يا ريت برحابه صدر بعد

لا يوجد شيئ جميل يسأل الحاجة للإنتباه له! فالجميل بنفسه وطيبته وأخلاقه جذاب ولل يحتاج أن يسأل لينتبه له الآخرون!
وإذا كنت دائما غضبانا وتشتكي فلن يكون لدى الآخرين وقت ليستمعوا إليك!

المرأة التي تطالب بأغراض البيت و الأولاد إمرأة تستحق التقدير، و نحن الرجال واجب علينا التحلي بالصبر و الحلم و حسن الخلق و الابتسام و عدم إسقاط ما نلاقيه خارج البيت من مشاكل على ما يقع داخل البيت، و ذلك بأمر من رسول الله ص و أهل البيت ع ‘ فهو خير الناس لأهله و هو خيرنا من صار خيرًا لأهله، و الأقربون أولى بالمعروف

بعد عدة دراسات علمية أثبت أن السبب الرأيسي لشيب الرأس عند الرجل وزدياد حالات الجنون والعصبية عنده وأقدامه على الأنتحار هو طحنة المرأة ... لو تسوي ليها كل شي وتعطيها عيونك لازم بتطلع ليك شي تطحن علية حتى لو كانت ذبانة تحوم في الحجرة

.

والله هالموضوع يجيب وجع القلب بالنسبه ليي وتدمع عيني ..اللي يقول المرة تطحن ماسالت ليش انا عن نفسي كنت هاديه وبطبيعتي مااحب اتكلم واجد لكن بعد الحياة الزوجيه وانجاب عيالي هنا بدات المشاكل عندي اربعه جهال وموسم الشتا عل الابواب ويش البسهم لين تكلمت صرت طحانه واني لو املك معاش ماذليت نفسي ..الحمدلله عل كل حال ودعائكم بتيسير اموري ويعديها عل خير

المشاكل ليس بسبب الطحنة الزوجة وكثرت المشاكل الاسرية لكن بسبب الفقر لو شعب مرتاح ماديا شان شفتون نسبة الزواج مرتفع ونسبة الانجاب مرتفع وماشفنة عزف الشباب عن الزواج
اشغال تشلخ العافية مافي نسبة للسعادة او الامل
لكن هذي سياسة مقصودة

هذه الناس إله تفهم والنعم هذه التعليقات المحترمة أما أستغفر الله شوف التعليقات إله تحت كل واحد يبي يصير عزابي يفكر بيرتاح نفسياً وأخروياً

الرجال يرجع من الشغل يبي ياكل و ينام و يطلع
و لين اتكلمت المرة يأجل المسؤوليات ،و لين كررت و دمرته يعتبرها طحنة.
هذا الواقع باختصار

لو لا طحنه المرأة لاصبح الاولاد بدون اكل و شرب و لَبْس لان اغلب الرجال لا يتلمسون احتياجات ابنائهم و بيوتهم الا عندما تطلب منهم الزوجه ذلك و تعيده الف مره ، تحياتي لكل امرأة صابره على زوج تعيس

هذا الكلام الصحيح، المرأة لا تطحن من عبث، لو الزوج يؤدي واجباته كرجل، ولا يحمل المرأة فوق طاقتها لما طحنت المرأة، من المؤسف، ان اغلب الرجال يعدون انفسهم ملائكة لا غبار عليهم، وهذا العكس تماماً

بارك الله فيك

صادق والله

عزيزتي الزوجة ، لما يقول لج زوجج قاعدة في البيت مرتاحة ما عندج شغل
لا تشتغلين ، ارتاحي و خلي القرعة ترعى و علميه شنو يصير في البيت اذا اخذتي كم ساعة اجازة !
عزيزتي الزوجة اذا قالج نكديه و تطحنين ، ماطلي بتنفيذ طلباته و بنجوف منو النكدي الي يطحن!

ههههه توصيات إبليسية

اعتقد هذا الموضوع يثير الجدل بين الزوج وزوجته لا الحل، والدليل على هذا في اغلب الردود للمشاركين كلها توضّّح زيادة الوتيره بين الرجل والمرأة...
المفترض نشر الثقافة المناسبه من دورات ثقافية لحل المشاكل الزوجيه من قِبل المختصين.

رجعته من الدوام لازم يسمع كم كلمة حلوة و ما تطلب منه شيء ، أوكي بس هل هو الوحيد الي متعب من العمل ؟
ترى يا معشر الرجال لما ترجع من الدوام و تتذمر على طبخ زوجتك أو ازعاج اولادك زوجتك ما كانت بوقت دوامك راقدة او مرتاحة
و لما انت تكمل غذاك و تطلع او تنام هي تواصل تعبها في اهتمامها بعيالك
فلا كل واحد يطلع فيها و يبي يعطيك العافية ابن عمي ، قبل لا يصير لها تسلمي لي بنت عمي!

تطحن والدليل التعليقات ????????

جرب توصل من البيت ، تسبح تتغذى و تجلس معاها و تسألها تآمرين على شيء ، شنو ناقصكم من أغراض
و أي شيء يحتاج تصليح أو ناقص تسويه بدون تأجيل، و الا اتصل فيها و انت راجع من الدوام ، محتاجين شيء ، و الي محتاجينه تمر تجيبه في طريقك
بتطحن على راسك؟؟
هذا الفرق بين زمن الأول و زمن الحين ، لا تنتظرها تطلب منك و تذكرك بواجباتك و لا تأجلها حتى لا تتراكم عليك و جوف الفرق
اهتم فيها و خل كل شيء عنك ، مثل ما لك حقوق عليك واجبات و أتحدى تتكلم عن النكد بعدها

المراه ما تطحن الا لسبب مابتجي مني و الطريق بتهدر .. و ثانيا الا يقولون يرجعون من الشغل تعابه ليكون احنا قاعدين و الخدم و الحشم يخدمونه احنا بعد نكرف ف هالبيوت و ماعدنا الا هالوسيله نعبر فيها عن تعبنا .. يا رجال خافو الله بسكم ظلم

طحنة النساء نابعة من الظغوط التى تتعرض لها من تربية الاولاد وشغل البيت وواجبات الزوج ومتطلباتة الحقيقة انا اعذر المراه ف المراه امي واختي وبنتي وحبيبتي وزميلتي في العمل،،يجب ان نتقي الله فيهم

افضل شي سويته بحياتي الزواج،
ما في اجمل من المراة
ترتاح لما تجلس معاها
كل هموم الدنيا تذوب عندما تطلع معها الحديقة
المشكلة في الرجل، بخيل، وعيار، ويفكر بس في مصلحته، ويحط كل عيوبه في المراة.
تحمل المراة لبخل الرجل وعيارته يساوي صبر ايوب

قدم واجباتك اول باول ترتاح زوجتك وانت ترتاح والكل يرتاح

الى زائر 45 والعكس صحيح اذا كان الرجل هو الذي يطحن ها لو نسيت

ما يحتاج طحنة ، لان الطحنة تخلي الرجال ما يسوي الشغلة بيحسها تتامر عليه، لكن كلمتين حلوتين في وقت حلو تخلي الامور كلها تستوي .

اَي والله واني أسوي لزوجي مااطحن اطنشه في عصبيته عشان بس يسوي الي أبيه بس هذا يعتمد على شخصية الزوج والزوج العصبي والمتمرد ينجاب بالسياسة مو العنف والطحنة

تطحن الچبد
اذا ما طحنوا يمرضون
كرهونا الدنيا بكبرها

حقيقة
العزوبية تاج على رؤوس العزوبية لا يراه الا المتزوجون

طحنت النسوان في هذا الزمان طلعت وكثرة بسبب تدليع ويمييع الاهل للبنات

الحل الأمثل أمام طحنة النسوان و السكوت طنش تعش تنتعش لأن إذا تابعت طحنت النسوان بيصيدك الهم و المر و المرض

في النهايه هي الخاسره ، بتخسر اخرتها ، لأن حق زوجها عليها كحق الأم على ولده ، فاذا اذته او طحنت عليه ، حتى قرح كبده و تفطرت امعاؤه و زاغت مرارته ، فالتستعد الى النار و بئس المصير

وهو خله يجهز روحه لأن مابطوف على الصراط إن ربك لبالمرصاد تهجرون المره وتبهدلونها في المحاكم وتبيعونها ما وراها ودونها وتجبرونها تدفع مبالغ خياليه وانتون ماتسوون آردي أحمر..الحين من اللي قرحت چبده وانفقعت مرارته؟

هههه ضحكتني ما في أحد فضله مثل فضل الام

طاحنتني الله يطحنها. كل يوم حنه لين جابت لس الضغط

للمرأه حقوق كما لرجال حقوق ولكن كل زمن يختلف و الناس تختلف من جيل الى جيل اختلاف كبير

و فيه طحنة الرجال ، لو الرجل ما عنده لسان ، صدق تحيز و مجتمع ذكوري !!!

هذه سنة الحياة وهدا واجب سواء لبلبت أو هدرة هناك نقص

خلي الرجال يجي من الشغل استقبليه ببتسامة وأقولي ليه يعطيك العافية ابن عمي واغذيه وخليه يأخذ نفس ويرتاح بعدين اطلبي منه اللي تبينه

هههههههههههه.. صعبة تفهم هالشي

لو كان مجتمعنا مثل الغرب كل شي ع كيفنا نسوي في حرية اكثر للمرأة من ناحية الحرية والسكن والاستقلالية جان ما فكرت في يوم اتزوج بالنسبة لي كفتاة الزواج ضروري لمنع النظرات الخاطئة عن المرأة في كل شي تسويه في طلعاتها وغيره وعارفة اني علقت برا الموضوع

طبيعت المره كثيرة الكلام ولا تعرف تتختصر الموضوع ... وعلى الرجل آن يسمع كل الموضوع رغم انه ليس مقتنع بالموضوع

عدم تقصير الرجل ف واجباته يرغم المرأة ع الاحترام والتقدير والحب .

المرأة اذا حصلت حقوقها ما بتحن ولا تزن .

بطبيعة المرأة انها واجد تتكلم والرجل بطبيعته قليل الكلام لو قارناه بالمرأة ، فالشي طبيعي اللي قاعد يصير ، بس المشكلة هو اختيار الوقت المناسب للكلام من الطرفين ، فالمرأة تتعب في البيت وفي العمل اكثر من الرجل ومع هذا يتم التقليل منها و كأنها بلاء !
عزيزي الزوج أحترامك لزوجتك ما يعني ضعف او تنفيذ متطلباتها ما يعني سكانه مرته ! ولكن مثل مالك احتياجات هي لها احتياجات والعكس اختي الكريمة اختاري الاوقات المناسبة للكلام مع الزوج ..مو كل حزة تتكلمين فيه عن مشكلة او مواضيع تعكر صفو الزوج .
أبو حسين

ماشاء الله عليك يازائر رقم ١٣ تعليقك عجيب واااجد عجبني إن دل على شئ فهو دال على نفسك الحلوة محظوظة زوجتك بك ياليت يقتدون بك بقية الأزواج

المره تلبي وتطحن من الضغوطات هي تطبخ وتغسل وتنظف ودريول للجهال وتشتري اغراض البيت والرجال مفرفش ومرتاح وحجته انا اشتغل شاغول يشغلك

فديت الحريم اروح لهم فدوى حتى لو نكديه بعد عسل على قلبي. واللي عنده مرا نكديه كل مانكدت عليه لازم يمسكها من ايدها ويدخل معاها يطحن الحب اللي في رأسها وبتصير وش زينها

اتمنى وضع موضوع عن سبب عزوف الكثير من الشباب سواء كانو ذكور او اناث عن الزواج في المجتمع

الحقيقة هي العكس ان الرجال هم النكديين

ماعجبني في الفيديو اللي يستنكر على المرأة إنها تطلب احتياجاتها
الحين تبون المرأة كل شي تسويه كامل في الحياة ولين طالبت بالأشياء اللي تساعدها في هالشي تضايقتون وقلتون تطحن ونكدية ولين هي طلعت من البيت حق توفرها استنكرتون وقلتون لا تسوين شغل الرجال !! ما ينعرف ليكم صراحة

خلها تحنّ وتطحن وتكرر .. كلامها كله عسل على قلبي !

يا عمري الرومنسي

كل تعليقات الرجال سلبيه لو عندكم ذرة احساس بالمرأه ماكان هذا ردكم .. تحتاج المرأه الى تقدير واهتمام عشان نفسيتها تتحسن بعد عمل يوم طويل من شغل بيت وتلبية طلباتك وطلبات لعيال : )

في رجال يحقرون ويخلونه تستسلم وماتطلب شي لان هو مطنشها من الأساس. وفي رجال حالهم حال الدوشق اللي في البيت يخلي كل شي على المرأه وهي بدال ما تطحن اروح تسوي الشي من نفسها وعلى حسابها وهو قاعد مستانس ولا عنده غيره على أهله . بذمتكم في رجال يخلي زوجته تروح الخباز وهو قاعد في البيت وتروح الخضار والسوق بروحها. لين تكلم حضرته كأنه فرعون يأمر وينهي وهو فلس ما يسوه واحد مريض وبخيل. زين يروح الشغل وهذا واجد عليه. حسافه الوحده تضيع عمرها و شبابها مع شخص مو صاحي . عنها ما توزجت بيت ابوها احسن لها.

مو كل لرجال جدي في رجال مافي نفسهم ،، رجال بمعنى الكلمه تعتمدين عليه عنده حس المسؤوليه ،، وفي النهايه الزواج مثل ....... يا تصيب ويا شريك الحياه يا تخيب

ألف لايك على هالتعليق ..نفس وضعي بالضبط ماعنده غيره كلش اروح الخباز والخضار وشايله مسؤولية البيت كامل وبخيل حده وهو 24 ساعه في بيت أهله يلبي طلباتهم وتحملت لين اكتشفت متزوج اتخذت القرار وطلقته خلع وافتكيت من وجهه ومستحيل ارتبط مره ثانيه محد يروح جهنم برجوله

الله يساعدك اختي ولكن ان خليت خربت. في رجال زينين ونسوان زينين. واللي ما عنده ضمير وما يخاف الله هذا واحد او وحده لا يمسون الاسلام يشي . الدين المعامله.
حسبي الله على كل من ظلمني الله ينتقم منهم فردا فردا. يارب ارني صنعك فيهم.

كنت أسمع المتزوجين يقولون لو زين ما تزوجنا وكنت أقول ليهم طلقوا ؟ وهم يسكتون ! وألحين عرفت أن الزواج حفرة غزيرة ألي يطب فيها ما يطلع منها وخاصة مع وجود الأولاد وكل المشاكل من طحنة المرأة

وليش المشاكل من طحنتها ؟ يمكن انت ماتفهمها

قصدك كل المشاكل من تحت راس الرجال بخيل وماينفق على ولاده ولا زوجته وتارك المسؤوليه كامله على هالفقيره ويخون ولا يهتم في نظافته والفاظه بذيئه وتالي لين المره تكلمت يقول تطحن...

جبتها على الجرح
خنقتني العبرة
الزواج نفس القرقور تدخل بس ماتقدر تطلع
ويذهب عليك عمرك حسرات

باختصار حقيقة وليس افتراء ونقطة على السطر.

والله أن الحريم أغلبهم نكديين أنا تصوروا أنها تطحن عليي تقول عندي في البنك7000 دينار ! تقول شايفة كشف الحساب جايبينه البيت وفتحته وكل بين شهر ورجعت لهالسالفة وديتها البنوك راويتها الأرصدة وبعدهيه تطحن وتزن!

ههههه قولها شكلش يوم تقرين الرقم كنتين نايمه يمكن ٧٠ دينار شفتين الصفر مرتين زود عليهم

بل منكم يالرجال يوم حسيت بتصيدك قمت سحبت 7000 انزين ع الاقل عطها الفين خل تستانس

اذا كانوا طحانين فهذا نتيجة عدم احساس الرجل بها تخيلوا انها 24 ساعه في البيت بالاضافه الى تدريس عيالها وانت يالرجال مشغول بطلعاتك وجياتك واذا سألتك قلت من حقي اطلع انزين وهي مو من حقها تغير بعد كرف هالاسبوع ولا حلال عليك حرام عليها .. هذا سبب واحد من مليون سبب

تتحمل معظم مسؤوليات البيت تربية رعاية تنظيف خمام بروشات مواعين طباخ ثياب حفاظات وعقب كل هذا تبيها تصير عادل إمام ????

دخول القفص الذهب تعاسه ما بعدها تعاسه .. اما حياة العزوبيه و السفرات و التمدد على سواحل البحر فوق الرمال البيضاء راحه نفسيه

هل أنت شخص مريض؟

زائر رقم 14 .. لا يوجد مريض بهذه الدنياء ااواسعة غيرك , تحتاج لعلأج نفسي .. فقد غزت الأمراض النفسية جميعها نفسك فأضحت واهنة عليله .. اترك عنك التزمت و ستسلم

ليت العزوبيه يعود يوما ليعلم ما فعل بنا الزواج
من دمارت حظنه من حصلنه شغل سيده أرتبطنه . لاسفر ولا وناسه ولا شي ولكن لن يصيبنا الا ما كتب الله لنا. المهم انصمنا وتزوجنا ولا مجال للتراجع الى ان يأخذ الله امانته . الله يرحمني مقدما .

ومنهو جودك عن السفر ؟

الفلوس يالطيب تمنع الواحد . طلبات وجهال وقروض ومصاريف مالها اخر وغير مصاريف بيت الوالد. الله كريم. الحمد لله على كل حال.

والله المراءة من تتزوج رجل بخيل وزنان تكره الحياة اني مثلا زوجي بخيل وفوق بخله زنان وطحان واذا مااقول ليه على الحاجة الف مرة مايجيبها ويقول عني طحانة لان اقول ليه يجيب احتايجات اولاده مسكينة المراءة دائما مظلومة الله ينتقم من كل رجل يظلم زوجته

حديث "الزواج سنتي" وغيره من المتفق عليه يدحض ما أنت عليه من تفكير غير سوي، الزواج لم يكن سبب تعاسة فلا تجعل التراكمات السياسية والظلم المنتشر في البلاد التي هي سبب تعاستك في شيء وضعه الله لعباده طريقاً سوياً وهو الزواج.. أصلاً عيب عليكم اتقولون جديه هذا انتون مسلمين لو مسيح أو كفار ويش قلتون!

الرجل بعد عقب التقاعد نكدي خصوصا إذا ما عنده شغل، يدخل روحه في كل شيء.

مو الكل بس الاغلب اي طحانه وزنانه،اولاً بعض الرجال ماعندهم حس مسؤلية فتكون دايركت تعيد الكلام عل وعسى يتنفذ الي قالته سواء مهم او غير مهم،ثانياً اغلب الحريم تحس مخهم مقفل اذا يبغون شي تبتدي الزنه مو لان ماتنفذ طلبها لا بس حكم فرعون ع مزاجها تبيه حالاً بالاً يستوي وكأنه سحر،عن نفسي اكره شي بالدنيا ويستفزني اهو الزنه الزايده وتكرار الكلام مرتين ينرفزني فشلون ان كان مسجل يعيد ع طول اعتقد اني بستخف

ما يبين في عيون الرجال الا ملك الموت يأخذهم ونفتك من قلالة شيمتهم و عدم الرجولة راحت رجالً تقلع الدروازة و جتنا رجال المطنزة و العازة

ما فيه احلى من عيشة الأعزب ..

زاير
هدا الطحنه. اسمها. بهارات الحيا ياجماعه انني الحمدلله عندي ٣ من الجواهر ام علي و ام محمد وبنت حسن وكلهم يرحبو بي الحمدلله تحياتي الى الجميع

اني زوجى مايلبى طلبات البيت والاولاد الى بالزنة لوماالطحنة ماتوا الاولاد من الجوع

اووو الله يوفقك اكيد عادل بينهم وهم راضين على بعض ههههههههه

الموضوع صار كأنه حرب مفتوحه بين الرجال والنساء بينما الطحنه قد تكون من الطرفين لانها صفه غير مختصه في شخص عن الآخر والطحنه ما هي الا احتياجات يجب على الطرفين القيام بها ولكن مع مراعاة الوقت المناسب في طلبها واسلوب غير مزعج للطرف الآخر ...