يا اخواني الحل بسيط ولو خليت خربتك اذا رحت لوحدة وتشرطت عليك في مئات البنات الي يبون الستر روح لغيرها وخلها قاعدة في بيت ابوها لا تقولون ما في اني بنت عمتي توها متزوجة ما اخدت الا المهر وكان بسيط وحتى شبكة ما اشترت في بنات يربغون الستر اما بتروحون للبنات الي يتفلسفون فاكيد بتتفلسف عليك خلهم يولون ودوروا البنات الي تبغي الستر

هناك من يريد يستر على بناته وهناك من يريد بنك متنقل
الحمدالله زوجنا والدي ولم يشرط على ازواجنا كانت حفله بسيطه في البيت زوجي راتبه جدا قليل وعليه قرض الحمدالله الله بارك الينا في القيل (خدوهم فقراء يغنيهم الله ) اهمشي الزوج الصالح لله الحمد اشكر الله رزقني بزوج يخاف الله فيني قليلون ونادرون الرجال هذا الزمن يبون وحده تشتغل وتصرف عليه لا يمنع الزوجه تشتغل وتساعده لظروف صعوبة الحياه لكن يكون برضاها لا اجبار

صج البنات يطلبون فلوس وايد بس هم كل شي غالي الصالون نروح ليه نفس الخيط ونفس الحفاف اذا عادي قال 5 دينار واذا سمعو انج عروس قالت 10 دينار والجنه بعد نفس الحنه اذا عادي قالت 30 واذا عروس يوصل 80 وغيرها وهو نفس الحنه

بإختصار شديد:
كما تدين تدان الأسره الي بتطلب لبنتها بنك متنقل خل تتاكد ان باجر لما ولدهم بيتقدم لبنت الحلال و اهلها راح ينظرون له على انه بنك متنقل

اغلب الرجال البحرينين فقراء وبخله ما تطلع فلوسه إلا بس حق الزواج وحتى بعضهم يوصل ابهم الحال لدرجه يقصر على بيته وعياله بحجة ماعندي فلوس وتلاقي هو فاتح له بيت ثاني الي ماعنده يصرف على بيت ليش يفتح له بيت ثاني

فئة قليلة اللي يطلق عليها رجال،بهالزمن صاروا من النوادر
مأخذين افكار مغلوطة عن البنات بسبب اشاعات او عوائل ما تعرف شرع الله وتجون وتغلطون علينا
اللي خلقكم خلق غيركم قبل لا تعيفنا نفسكم احنا عفنا أشكالكم اللي ما تستحق لقب زوج لنا لأننا ما نفخر برجال بعقلياتكم
اذا جى رجال عدل عارف ربه وينشد به الظهر ويتحمل المسؤولية ويحطنا بعيونه بابنا مفتوح له مهما كان فقره اما واحد يبي وحدة كاملة واهو ما يسوى خل يستريح
اللي يقولون مو محصلين قنوعات ما أصدقكم لان اشوف قدامي نماذج واجد من اللي تنكرون وجودهم.

اقول لش عاد اصلا المنطق يقول غير هالكلام الهرار اساسا نسبة الزواج زايدة بالبحرين من وين جت يعني من الهوا والي يتزوجون جن احنه قبل محرم صارت ثلاث زيجات في عائلتنا والحمد لله الامور ميسرة وبخير ليش هالطحنة على بنات الناس ما تبغي انقلع برة وخذ لك الي تبغاه عادي في ناس كثيرة تبغي تحسين نسل مساكين خلهم يحسنون نسلهم للمستقبل

هههههههههههه اكيد مال منامه زاءر 66 هههههههه

الحفله كانت بسيطه في البيت لم أطلب منه شيء فوق طاقته ولكنه اليوم يعايرني ويتمنى زوجه موظفه تصرف عليه

عليكم بالسوريات يبون الستر مساكين وثقافتهم غير عن ألي عندنا ببيت ابوها تاكل سمبوسه وتروح بيت زوجها تبي مطعم فاخر بس هههه والسبوسة والعشره ألي بينكم راحت يعني !

عليكم بالصومالين والسودانين فقراء اكثر من سوريا ويبون الستر .
من ظن ان الفتاه مجرد جسم فليعلم ان رجولته مجرد اسم

ويع ويع ويع شنو هالسوقية اذا تعليق ما تعرف تكتب من جم كلمة شلون تبغي تعاشر بنات الاجاويد صدق مسخرة وشرالبلية ما يضحك الله يعينك على نفسك الظاهر بيتكم هارينك سمبوسة فعبالك كل الشعب نفسك بس ترى احنه بالبيت نحب الخبز والجبن بس ما يمنع اذا طلعت اروح مطعم فاخر واستانس بعمري انت شنو حارنك يعني هههههههه

اخرتهم بنات الديره بيتزوجونهم الهنود

ههههههههههه قصدك انتون الي مطيحين في الهنود والفلبينيات اوووو اقصد قبل في الهنود واحين الفلبينيات ويع ويع فريقنا يسمونه فريق الفلبن لا وتشوف اشكال الهال كل فلبن احين يوم صارت الحرب في سوريا رخصوا البنات قمتون تشحنونهم من هناك
عاد نحجز لاهلك واحد من الهنود الي تكلمت عنهم

ههههههههههههههههههههههههههههههههههههههههههههه ونته الصادق

يعني انت بتزوج اخواتك وبناتك للهنود

القناعه كنز لا يفنى واللي يبى الصلاه ماتفوته ...

والله الدعدوع يوم راحوا بيتزوجون بنته قال ليه امبي كشف حساب مايقل عن 35000 الف دينار مدة 6 شهور العن قفده عادلوه الدعدوع عجل خل بتك اتخيس عندك الحوسه الموضوع صحيح ترى مو غشمره

تزوجت زوجي بعد قصة حب وراتبه لايتعدى ال 270 وعليه قرض اهلي مامانعو ولكنهم نصحوني بالصبر لأن الأختيار كان اختياري وكنت مدلله وفعز ف بيت ابوي ,لاتطلبت عليه في حفله ولا في ذهب ولا في شهر عسل , الحمدلله الله وفقنا وتيسرت امورنا وماشالله الحين راتبه صار لايقارن ابدا براتبه اول ماتزوجته لأن فعلا زوجي كان على قد حاله بس طموح وماشاالله عايشين الحين برفاهيه بدون مبالغه , مو العيب البنت تتزوج واحد على قد حاله اذا كان رجال طموح ويحب يطور من نفسه , اما الي على قد حاله و خايب وعديم مسؤوليه لايصلح للزواج

وحتى لو ما توفق وظل على راتبه مع زياده قليله بعد البنات صبورين وما يقولون شي ويراعون ازواجهم ما عليش من الي يتحلطمون هذين قله وماديين

نا أقول بدل هالمسخرة والإسراف في الأعراس سوو حفلة بسيطة كلش وتبرعو بالبيزات للفقراء والمحتاجين، ليش ما نشوف أحد يقول جدي؟ وإلا فالحين بس على المضائف الحسينية وشعائر عاشوراء تقولون إسراف وقللو منها؟ الحين الي يصير في الأعراس مو إسراف؟ تكاليف تتراوح من 2000 دينار الى 10 الف دينار لو تروح للفقارى مو أولى؟
المشكلة إن ما نشوف أحد يتكلم عن هذا الإسراف، ما نشوفكم تتكلمون إلا على مؤمن طبخ عيش على حب الامام (ع) وتقولون عنه مسرف! صدق دنيا مقلوبة!

اي والله صدقت ناس تعبانة والسهر كل الي يطحنون المفشخرجية نفس الي عندنا بالشغل حسبي الله ونعم الوكيل

من حقهم هذي ليلة فرحتها والمبلغ يعتبر ممتاز لو بتفكر فيه لو تدري كم يتطلبون الناس للزواج في دول تعتبر فقير مثل الهند ومصر والاردن چان بتبوس ايدك على النعمه والبنات القنوعات الموجودين عندنا

أنا صاحب رد 55، وكلامي مربوط بأولئك الذين أصدعو رؤوسنا في شهر محرم بقول أن المضائف الحسينية والمآتم تسرف والأولى بدل هذا الإسراف (كما يسمونه) الصرف على الفقراء، أقول لا نرى عضلاتكم إلا على مؤمن طبخ على حب الإمام الحسين عليه السلام ولكنكم تسرفون في الأعراس بحجة أنها ليلة العمر، ليش ما نشوف أحد يقول بدل هالإسراف في الأعراس تبرعو في هالأموال للمحتاجين والفقراء؟؟؟
غريب أمركم، ثم لأنها ليلة العمر (وليلة فرحتها) يجوز الإسراف بهالطريقة؟ شالمسخرة دي؟ شاب يجمع هالمبلغ طول حياته ويضيع في ليلة على هرار!

معاشات شعب البحرين 250 و300 والمسخرة في الأعراس تكلف آلاف الدنانير وتقولين مبلغ ممتاز؟ طول عمره الرجال يكدح يجمع البيزة على البيزة شفتات وغير شفتات آخر شي يضيع في ليلة؟ وعلى ويش على مفوشر!!
لا والحين بعد يخسرون آلاف على هالعرس ومفوشر وغيره وعقب أسبوع الضرب والمضارب وهو ما يباها وهي تبي الطلاق!
أنا أقول بدل هالهرار والخساير والإسراف تبرعو فيه للفقراء والمحتاجين أو لتعمير مسجد أو مأتم حسيني أو مضيف حسيني لتكون بداية الزواج بداية موفقة لأنها بدأت بخير ولم تبدأ على إسراف ما ليه داعي!

البنت وبصورة واضحة جداً تريد الفخفخة و المفاشر و تريد رجل آلي لكي يصغي و يطيع و ينفذ ماتريد !! الطلبات المبالغ فيها يتحملها الرجل فقط، و تنتهي بعدم الاتفاق بين الطرفين و السبب كلاً له ميول في الحياة و له نظرة مختلفة و بعيدة كل البعد عن الاسرة و تكوين عائلة، الشباب في وادي و البنات في وادي ،، البنت يوم ورا يوم تتجرأ اكثر في تصرفاتها في المجتمع و تطهر صورة سيئة للبنت البحرينية !! المقاهي و الملاهي و التصرفات الهابطة !! طبعاً الكلام لفئة كبيرة منهم و ليسوا الجميع !!

صرفنا 2000 دينار للخطوبه و الزواج فقط للإعلان عن الزواج هذا غير المهر و شراء الاثاث هذا غير
الحين بس عشان الناس تدري احنا تزوجنا نصرف 2000
والله حرام
الحين تعال اقنع أهل الزوجه ان الناس تدري او بتدري
البحرين صغيره و سالفه خطوبه او زواج او اذا بتتقدم الى وحده الناس يدرون والله يدرون
في شي اسمه تلفون و وتساب والأخبار تنتشر بسرعه
عطني منطقه في البحرين ما تنشر خبر زواج احد أبناء منطقتهم
صورة الزوج
عقد قران
فلان بن فلان على كريمة فلان بن فلان
وانتهى الموضوع
لا لازم 2000 تدفعها

بنات البحارنة ......تطلع لك الوحدة من بيتها ماتسوى بيزة تنام على سجادة ويا عشرين واحد من اخوتها وخواتها واذا تزوجت تطلع روح الفقير من الطلبات وتمبه فيلا وغرفة نوم كشخة ماكأنها طالعة من بيت ابوها الا چنه حضيرة سبلان وتقعد تتشرط وتتدلع ويلومون الواحد لين اخد سورية ماشاء الله أدب واخلاق واحترام للزوج مو تكبر ونفخة وغرور على الفاضي من حريم البحرين مخوخ گوطي صلصل حتى لو جبتون اعلى الشهادات تبقى السورية هي الذهب وانتون تحت تراب رجولها ولاتسوون ، عطني فاصل!!!!!

اني بعد تصدق خاطري اخذ سوري جميل ووسيم كلامه حلو ويعرف يجامل وينتقي الالفاظ حتى لو من جدب ،مو بحراني طالع من ................ ولبسه يفشل وطالع من اعدادي وفالح بس الى النعره الجذابه والزمط والفتوه المزعومه الا ايه وايه وهوه ولا شي،ولا لايفوتك يتحلطم واجد بعد يبي جميله ومتعلمه تصرف عليه وبدون فلوس مهر ،يعني صراحه يضحك ههه يبي خدامه وتسوي مساج وهو مايسوى ظفر سنور ..اقول صدق العقل زينة الانسان........

ههههه اعصابك لا تتقطع بعدين السورية تفلتك وتروح لغيرك بتصير ما تسوى الظاهر الواقع الي قلته انت جاي منه اكيد بتنزهق من سورية مو شايف خير عايش في ................شرحت حياتك بالضبط عرفتون ليش قلنا ان لو ما عافه الطير ما راح برة والله هالاشكال تتعاشر تلاقيك رايح حق عشرين او ثلاثين وحدة ويوم مااحد عبرك فقعت مرارتك ورحت برة ترى بناتنا مو واقفين عليكم وعلى شاكلتكم ماشيين من الاجاويد عاد بناتك باجر لا تدور ليهم بحراني خذ سوري استر ليهم بعد يمكن يكملون قافلة السبلان الي عندك يالله تحسين نسل

تتكلم عن البحرينيات مان اختك وامكمو منهم ارتقوا شوي بتعليقاتكم ولو كانت عايشه على حصير مو معناته انك تجي وتبي تذلها روح دور الي تنام على ريش نعام اذا مو عاجبنك احمد ربك انهم صبورين

والله لو مو ضروف الحرب الي عندهم چان ما قابلت وجهك وثانياً روح تزوج وجيبها البحرين بشوف الحين ثلاث دول ما يدخلونهم كزوجات الا بطلعت الروح العراق وسوريا وايران روح تزوج بنشوفك يا توم كروز

تم قصف الجبهة بجدارة و شكرا ل ال excellent comments

اسلوب تفكيرك رخيص ، امك واختك مو بحرينيات?
مثل ما الرجال يبي البنت حلوه وسيمه وتدلعه البنت بعد تحب هالشي والبحريني شنو يلبس صروال وفانيله وجفاف عاطفي فليش تشوف عيوب البنت البحرينيه وتغض النظر عن عيوب الرجل البحريني

اختي العزيزة مو هو يشوف اهل هما يسوون شي قدام زوجتك السورية عشان جذي قال هالحجي ترى كلام الانسان انعكاس لحياته وافكاره وهو ما قال هالحج يالا منزل من قدرهم لكن مااقول الا الله يساعد اهلك عليك اكيد ضايقين منك الويل مساكين اذا ترفع النطيحة والمتردية عليهم وتقول ما يسوون تراب رجولها هههه صدق شر البلية ما يضحك
ومثل ما قالوا لو فيه خير ما رماه الطير من الحرة

اتجيبون الضغط بصراحه احنه عنسنه وانتون بس تفكرون مهر غالي وهرار غالي اختارو بنت عدله ولا تطالعون الي تطلب...اطالب الوسط لا تحط لينه مواضيع تقهر وترفع الضغط الشباب لا يعرفون يتكلمون ولا شي

اخيرا في بنات فاهمين الحياة صح ☺

الي عنده حب للثقافات الاخرى تزوج بنت عرب من خارج الخليج، وبتسانس عدل اكل وجو ومافي طحنة

مافي طحنه لان انت بعد مرفهنها ومعززنها ومتحمل بها لانها غريبه وماليها احد وتوديها وتجيبها ومخباها تترسه وتشتري ليها ولابوها ومحسسنها انها ماخذه رجال صدق من كل النواحي ،بنت ديرتك لو اخذتها تلعن امها وجيرانها بعد وتصير اليك هيه سواق ومربي وصراف الي وتجيب اغراض وتودي جهال مدارس ومستشفيات وتبي تقدير بس تقدير بس وما تحصل الا التأمر ، اخوي قل خيرا او اصمت ، الطحنه رجالنا جابوها مو احنا لما يكون حرام علينا فوق كل التضحيات ان حتى نتألم.

والله كارفنها كرف بالمشاوير، تودي وتجيب وتشتغل بعد، وفوق هذا جمال واخلاق ومافي طحنة فول اوبشن، ابدا ما تعترفون انكم راعيات مشاكل

هههههه شر البلية ما يضحك يعن ياعترفت انك من طخة الي مو اوادم والله زوجتي تاج راسي اقول عنها جدي لا وتشتغل بعد تجيب لك فلوس فلوس يا بابا فلوس اهم شي صح مسخرة اللهم عافنا ممن ابتليت به غيرنا
ترى من الحرة ما حصلت بحرينية تتحملك ههههه وي يا زينهم بس الله يخليهم من يخلص شهر صفر بتهل الافراح وبنعرس البنات والشباب الي من برة القرية والي من ولد عمها والي والي وخلي الي مو مرغوب يروح برة يا عيوني قدره

اوووو تعرف تتكلم بعد الي يحب الثقافات انزين من خبرتك علمنا بالثقافات وفصل اكثر واكثر الغدا والعشا ويش تطبخ بنت عمك وبالمرة شنو تلبس وتسوي يعني تعرف انت بعد شر البلية ما يضحك

السبب ليس رتفاع المهور السبب قلة الرواتب عجل واحد معاشة 250 دينار واروح يبغي يفتح بيت ويش بكفي علشان يكفي الله يعين الشباب بس انا كان راتبي 200 دينار ورحت اتزوجت جعت والله لو ما زوجتي كانت متفهمة الوضع شان بعد والحمد لله رزقت بقدومة الشغل والخير والبركة

انت واحد متفهم نفسي ٢٥٠ ما تكفيني بروحي بس الحمد لله الله رزقني ببنت حلال تقدر الضروف مثل اغلب البحرينيات وتراعي الحاله الي احنا فيها بس في ناس يشوف ان صرف دينار على زوجته خساره وهالعينات صعب تفهمها انه بنعمه اسالوا القطايفه كم يكلف علشان يتزوج وقارنوها بنفسكم

فتاة عشرينية

تأكدت تماما انه مافي رجال في الديره .... هم يبحثون عن الجمال و البنت تبحث عن المال و هم لا يلتقون .... الحمدالله على كل حال

يوجد رجال و لكن باختصار يركضون وراء الشهوات و هذا يتناقض مع الزواج الذي يحصن الشباب بالنسبة ل المصروفات هناك عائلات تتطلب و عائلات لا تتطلب اهم شيء عندها أخلاق الشاب و ملفه ما يكون أسود ...

لو انا اكبر منش خديتش ☺

وين عايشين بلا هرار
ماشوف بنت تتطلب
اتكلم من محيطي
ولو بتسوي فهي تسوي من عندها وفلوسها
كله ام الصبي هم اللي يبون اكشخ شي

يالله علا ايدك او ايدش شوفي ليي وحده ماتطلب وبنيه زينه وبعد صفر نملج

وحتى امهاتنا ما يتطلبون مساكين يقولون اخذوها كانها بنتكم وسووا ليها مثل بناتكم بس في اوادم ما ادري من وين يعلقون او وين عايشين

من وجهة نظر نسائية.. أشوف هالشي صح البنات صاير العرس عندهم فخفخة و للفشار .. وسالفة عزيمة قصاص المهر والأشياء الي ماليها داعي الله يعين الفقراء

الى زائر 44

الله يعينج و ينصرج عليه البخيل

نصيحتي تقدم الى اى بنت اذا اردت الزواج وواذا تم رفضك فهذا ليس نهاية العالم فتقدم الى الأخرى فقد ترضى فليس الكل مثل البعض فهناك من يشتري الرجل حتى ولو كان فقير اهم شئ نيتك وماذا تريد.

هذا بالضبظ وجهة نظري في اختيار زوجي رجل على قد حاله ما كنت اطلعه الناس ويش سوت في حفلات الزواج مالهم
والحين ولله الحمد احنا في المحاكم لطلاق لان الرجل طلع يبي وحده تعطيه راتبها و تصرف عليه واني طبعا ما رضيت
و بخيل وما يبي يصرف عليي ولا شئ وحتى لو يجيب اكل للبيت و هذا نارد يجيب ارخص شئ و اسوه شئ و يبيني اكله و هو اكله معظم بره
لكن لو كسرت ظهره في البدية و سويت حفلة اللي يصرف فيها فوق 5000 دينار مو حرام فيه
بنات الناس مو لعبه خله يطلبون و يتشرطون بعد اللي مو قدها لا يتزوج

الله لا يوفقه ، بس مو الكل جدي و اخذي شي معقول مو 5000 ، الصراحة هالايام الناس ماخذة الزواج لعبة و مصالح ، الحالة صعبة

بهرجة وفخفخة وحتى بيضة مايعرفون يسلقون كل هذا بس حق تصوير الى السناب والانسجرام

لا هليام طالعين بعد موضه
حتى المواساه يسوون عشاء وبوفي بعد على احساب ابو الزوجه
من وين تجيبون بس هلفكار الماصخه
والاسراف الى ماليه داعي

محد قال انها اجبار .. اكرام الضيف و حسن الضيافة معروف من أيام النبي .. عاد سووا بوفيه سووا عشا .. ان شاء الله يدبحون جمل بعد ... الا هو .. المهم الواحد يضيف باحسن ما عنده

ههههههه بلوة والله انزين انت قلت على حساب ابو الزوجة اذا هو مستحب انت شكو روح ابلع وخلاص حتي ابو بلوش تططحنون عليه الي يسمعكم البنات يطلبون الفلل والسفر لهاواي ما كان الاعراس ثلاثة ارباعها في ماتم عالم تعبانة

اي والله اسراف ماليه داعي، فالحين بس على المضايف من يجي محرم يقولون إسراف، لكن هم يسرفون في الأعراس وفي شراء السيايير الجديدة والهواتف الباهظة الثمن كل شهر عادي! الله المستعان

شدراني من جا محرم وهم يطحنون على المضيفات ومحرم لكن في اعراسهم وروحاتهم وجياتهم يخسرون بلاوي استحوا شوي على الاقل ماتم الحسين اي فلس تصرفه بيرجع لك غير الفسق على توافه الامور واعرف من هالاشكال واجد وع

الفقيره لم تطلب مني هي و والدها غير 300 دينار مهرا لها حتى أعطتني إياه قبل ليلة الدخله لأتدبر به أمور الحفله المتواضعه.. و لكني عوضطها اليوم عنه اضعاف مضاعفة بعد أن من الله علينا با الخير الوفير و انجبت لي الأولاد و البنات ..كان ذالك في بداية ثمانينيات القرن الماضي..

ودي اصدق بس ؟ قووووووية !!!????

اراني والدي تعليقه للتو
يشهد الله والملائكه اجمعين
ان كل حرف كتبه صحيح ..
عمل والدي ك سائق في بدايه حياته
ولكن من الله عليه بوظيفه محترمه
بعد جهد جهيد ..
احسن تربيتنا... ونحمد الله
على ما وصلنا اليه ..
اطال الله في عمره وعمر والدتي

الله يبلغنا بلاغ خير واهم شي الرجال بهالزمن مو مهم هالسوالف

صراحة اللي ماعنده لا يعرس ولا يبلش روحة ولا بت الناس

الي مايرظون على ولادهم يقصون ظهرهم بالمطالبات لايرظون على ولاد غيرهم
مو حلال عليهم وحرآم على ولاد غيرهم

والله الحين نشوف ناس ماعندي فلوس وزوجتي تبي طلابات والاولاد يبون،، ومانسمع الا تزوج بسورية او مغربية على زوجته في ناس ماتحمد يغلبهم هواهم

الله يعطيك على قد نيتك وخصوصاً اذا طلعت داعشية بعد واجد زين

كاهو في سوريا تتزوج بألف دينار شاملة المصاريف كلها ولا تناديك ابن عمي وتسوي لك حمص وقشطه الصبح...وخلو عنكم (.....) ألي عندنا

عليك بالعافيه عليها
تزوجو وبلونا بال(الجنسية)
وقولو الديرة خربت مب خاربينها الا انتو
حلاة الرقعه منه وفيه ....

سعر زين..شوف ليي ختها خوك...مليت طقطقت البيبان..محد يبغيني فقيروا

عسانا مانتزوج ولاناخد سوريين

اخالف من ينوي الزواج من سورية الرأي . .. تزوجوا العراقيات إن دعت الضروره و إلا بنات بلكم أولى بكم .. و كما قيل .. ...

تعليقي عشان أقول لكم تركو عنكم العنصرية والسورية واللبنانية والبحرينية كلنا عرب

إسمعوا و عوا .. المثل الدارج يقول .. جحا أولى بلحم ثوره… يا شباب .. عليكم با البحرينيات بنات بلدكم فإنهم فقيرات لا يتطلبن الكثير الإ ما تذر منهن و بضغط من والديهن أحيانا .. و الثوب حلاتها رقعتها منها و فيها . ..

جان بتدور ليي وحدة جدي اكون لك من الشاكرين

لو فيه خير ما رماه الطير ههههههههههههه معروف الي يتزوج من برة شنو وليش ثلاثة ارباعهم مااحد بغاهم هني عشان جدي يلوفون على برة

ياريت ماتزوجنه وياحلو العزوبية الزواج تخلي علة على قلبك كانه مسؤول عليك بس فالبيت وين رايح ووين وجاي وجيب فلوس

بعدك لاحق طلق..وبتحصل زوجتك بيت إسكان..وبتزوج محلك غيرك وبيضرب على الصوبين المال والجمال...

اتكلم عن روحك حباب اكو عايشين ولو سألت زوجي وين رايح وين جاي مااخسه مثل ضياقه عيونك مااقول الا الله يعين الفقيره الا ماخدنها

كلامك سليم ..بعد مشارفتي على الستين من عمري و بعد أن أصبح اولأدي و بناتي في مراكز مرموقه عاد لي حنين المراهقة من جديد حيث حرمت من تلك الفتره التي تتبلور من خلألها شخصية الرجل فتزوجت في سن مبكرة برغبة مني و معارضة من والداي بعد قصة حب جمعتنا أنا و هي على كراسي معلمة القرأن

والله في ناس تشتري الرجال لبناتها وهالشي جايفينه وخابرينه..ومايهمهم المهر ولا التكاليف الي تقصم الظهر.. لكن في ناس تبغي رجال شكلات مكينة البيزات ومايهمهم زين هالادمي ولا مو زين مشيته عدلة يصلي يصوم هالسوالف ماتجي على بالهم ادا كان دفيع. وتالي ينصمون فيه وانا اقول يستاهلون.

صح

يمكن في الكتب القديمة بس..

ههههه ضحكتني من قال لك تري بنت خالتي توها متزوجة مااخدت من زوجها الا المهر وهو المعرس الي سوا ليها من عنده حفلة استحب هالشي واكو حامل احين الحمد لله لكن الانسان الي يتحلطم وما يحمد ربه عمره ما يتوفق ويحصل مراده

هناك عائلات بحرينية تبالغ اذا جاء من يخطب ابنتها و تطلب مهر مقدم و شبكة و شقة و مصروفات الفساتين و الهدايا و السفر و الصالة او الفنادق و حفل استقبال و حفل و مائدة طعام كبيرة بعد المقابلة و الموافقة و كله شو و تبدأ الحياة الزوجية بالمشاجرات خيانات و طلاق ..

صح

استملينه من هالسنطوانة
الا عنده يعرس والا ماعنده لايعرس
ترضونها لبنات الناس ولاترضونها على بناتكم وخواتكم

خيييييييييسو

نبغي انعرس بالموجود..وخواتنا مشوا بالمعروف..وأله ما عنده يساعدونه يزوج مو لا يزوج..انانية وجهالة هي...ازوجوا واتركوا عنكم المسلسلات التركية والهرار..

عزيزي واضح انك لاتعي خطورة الموضوع تاخر سن الزواج فيه فساد اخلاقي في المجتمع و المسئولية الأولي على الاسرة و الثانية على رجال الدين و الثالثة على الحكومة و الدليل انتشار اللواط و الزني و السحاقية و المتشبهين بنساء و المتشبهات بالرجال كل هذا الفساد بسبب تاخر سن الزواج الله أسامحك بس الي ارجولة في الماي غير الي ارجولة في النار

الفساد الاخلاقي موجود بنسبة ١٠٠٪ في المجتمع بسبب الانفتاح على قلة الادب بسبب الهواتف الرجال عيونهم في الهواتف ٢٤ ساعة حتى اثناء السياقة .. ثانيا اللي يشوف نفسه مو قد الزواج لا يبهدل بنت الناس ..

انا الزائر رقم ٤٢ و متاخر للان عن الزواج بسبب الضروف الاقتصادية والرواتب المتدنية هذا شي و الشي والاهم الانفتاح و التكنولوجيا و الانترنت و الهواتف الذكية كلها سلاح ذو حدين يعتمد على المستخدمة ان استخدمة استخدام سيئ افسدة و ان احسن استخدامة نفعة هذا يعتمد على الرقابة الذاتية والتي تأتي من تربية الأهل الصحيحة ازرع تحصد