خير الأمور وسطها
لاندعو للبخل أو تحويل العرس لمجلس عزاء و لا ندعوا للتمثيل و الفشخرة الزايدة
لما تقولون ندعو لعدم الاسراف نوعا ما دعوة ظاهرها زين و باطنها تطبيل للبخلة و المصفعين و هم واجد

اللحظات الصادقه والعفويه هي التي ستبقى خالده بالقلب والعقل اما حركات التمثل لا بعد فتره راح يقولون شكثر كنا اغبياء شنو حركات اليهال الي سويناها جوتي سندرلا وهرار

حلات الشي يكون طبيعي اما حركات التمثيل في رايي الشخصي حركات يهال وتبادل القبلات بين الزوجين شي خاص المفروض ما يكون في الصاله قدام الحضور خصوصا الحضور اعمارهم مختلفه

الناس اللي تسوي اعراسها بأسلوب مبالغ هم الناس اللي يحسون بنقص في جانب معين و يحاولون يكملونه بالتميز في العرس ... يعني ممكن تكون البنت متعقدة من صغرها انها اقل بنت في شلة البنات و ان هم مميزات اكثر منها فتحاول تعوض بحفل زواج أسطوري و احيانا يكون من ام المعرس او العروس اللي تبغي تثبت فيه قدام الناس ان محد ربى و كبر و زوج اولاد مثلها

مافي

مافي احل من زواج قبل

الحمدلله بعد خمس سنوات زواج ثمرته بنت ولد احتفلنا حفلة وحدة لا زلت أذكر لحظات صادقة قطعنا الكعك معا و ألبسني خاتم العرس و قبلني على رأسي كناية عن الاحترام و صورت صور تذكارية مع أخواته و أمه و أمي و عماته .. لحظات محفورة في قلبي لا تذهب لذتها مع الزمن و الله لا يحرم بنت من هالفرحة

مايحتاج يقبلش ع راسش .. انتين متفرغه كل الناس تصور مع عائلتهم مو فاضيين للفشار

وليش ما يقبلها القبلة على الراس دليل المحبة والمعزة اما انتون بعد قلنا مو حليو يتلصق ويقبلها على فمها بس عادي على راسها ما فيا شي ليش تعتبرون كل شي فشار اذا انتون عندكم مشاكل بحياتكم خلوا الي عايشين السعادة يعيشونها صح وعلى راحتهم عجيب امركم

تمثيل سخافة أضاعت لذة اللحظةبعد اسبوع زواجي و بحتفل بشكل عفوي، المفروض لا إفراط و لا تفريط..ناس لهذي السخافة و سلوكيات غير محترمة و ناس بالعكس تحرم حلال الله و تخلي الزوجة تتحسر على أشياء تافهة لحد ما تصير أم أولاد مثل بنت خالي عقب كل هالسنين خاطرها يلبسها رجلها الدبلة بحضور حبايبها ، بس مع الأسف كان متشدد في الدين و ما اعترف فيها كزوجة إلا في حجرة النوم ع السرير كل شي يفسرونه على انه شهوة كلش ما في مشاعر احترام ورسميات زواج مع انه الامام علي قبل الزهرا ع راسها و زفوه إليها بحضور النساء

مجانين، ما نقول إلا يا دافع البلا والبلوى
الله يستر علينا بستره

ظهر الفساد في البر والبحر بما جنت أيدي الناس

حركات مبالغ فيها تصير كريييهه.. واذا على حركات العروس والمعرس للصور كيفهم براحتهم لا تطالعونهم واصلا الناس ذبحتهم هالسوالف ولعيون تتفقق من الزين حق تطالع عدل هههههه
بالنسبه لي سويت حفلة زواج عائليه وبعدها سافرنه شهر العسل الي على مزاجنه بريطانيا وعن لاتصير علينه ديون .. وانصح الكل ان يسون حفله عائليه وفلوسهم يخلونها لشهر البصل يسافرون يستانسون

العاقلة ما اتسوي حفلة و صرف على هرار،اتسوي مبارك بسيط للاهل و الاصدقاء لانه في النهاية اللي بيفرح لش اهلش،خلو بيزاتكم للسفر،طيروا و استانسو،لحظات في العمر ما تنسي قبل ما اتجيبون الاولاد.

الموضوع يستحق النشر في الواتساب

انشروه حتى يشوفون تعليقات عينه من المعازيم وتتوعى الناس لروحها وتترك الاستعراض والاسراف على الفاضي

خير الأمور الوسط المبالغه في نفقات اقامة الافراح مرفوضه من اغلب الناس ناهيك عن البدع المستورده .لكن من المستحب في الشريعه الاسلاميه اشهار الزواج وعمل ضيافه بسيطه يدعى لها الأهل والمقربين ليبارك الله للجميع.

وييييع ويش ذَا
عجل تفصخ الجوتي وتمشي جنها عرجا علشان يلبسها الجوتي خوش
حتى سندريلا مو شدي ويش هالمصاخة !

* قديما كان الزواج بسيط وعلى قد الحال من كل النواحي ونسبة الطلاق 20% اذا مو أقل .
* اما الزواج الحين بهرجه طويلة عريضة وصرف فلوس وحركات رومانسية ونسبة الطلاق مرتفعه جدا بحوالي 70%
يا ترا ليش...؟؟؟؟؟؟

اعراس هالايام ما فيها بركة انتفت البركة من كل شي حتى الاعراس يا رب عفوك

ليش، عطنا التفسير

ما في جدي في كل مكان صراحة اني لا مرة شفت و مو الكل يتطالب

الحمدلله مهري قرآن وخمسين دينار وطقمي الذهب عقب شهر اتسلفه زوجي من 14 سنة وللحين ما شفته وعرسي كان بسيط كلش في بيت ابوي وحدي حصلت بوسة عالجبين وسفرة شهر العسل للحين ماا ذقتها اما الديرة بعد مو مقصرة فينا لا بيت ولا وظيفة واني جامعية !! يعني مطحونين من كل صوب

غلطتش
انا مهري نفسش قرآن وحفلي ملجة في بيت ابويي وعرس جلوه بسيطه وسفره لسوريا قبل الحرب
بس خليته يأخذ لي طقم ذهب

انتين لو طالبة زواج احسن من هذا الذهب
يعني الله يا الذهب رخيص يعني

والله الطقم مو مثل تكاليف حفلة عرس وخطوبه تقعد اتهر من جيسك
طقمي ب 800 دينار بجم يعني
الذهب لبناتي واصلا أهو لي جاب لي أخذني وجاب لي يعني الواحد يحط في اعيونه حصة ملح يتفشل

ترى البنات ما يطلبون
اللي يتكلم من جيسه
اللي حولي كلهم اهل المعرس هم اللي يبون الحفلة والصالة الفلانية
والا البنت تقول اهم شي شهر عسل

زائر 36
عليش نور
أخت زوجي تمت تطحن اختاري صاله عوده أهلنا واجد وإني وحده ماحب هالامور قلت له عندك تدفع اني ما ابغي وحتى بالعرس قالت ماسويتين شي سوي لينا عرس قلت له قال لاخته بتدفعين انتين قالت لا من وين ندفع حقرناهم هي جلوة وخلاص

احنا الحين بنعرس اخويي
واحنا نقول نبغي شي بسيط وخلهم ياخذون الفلوس ويسافرون
واهل العروس يقولون احنا بنعرس بنتنا جم مرة
ولا يطوفش بعد
حفلتين بيسوون
حفلة ملجة بنوزع فيها اطباق والرجال مكسرات
وحفلة خطوبة في صالة ????
واحنا نقول ان قصر عليها وان زاد اليها
والله يبارك ليهم ويتمم على خير

في الأخير
هي لي بتضايق

ما نظلم حظنا صحيح في بنات ما يتشرطون بس في بنات يطلبون واشيا مو معقولة بنت عمي في زواجها ما طلبت شي كل شي كان بسيط احين ولد خالي بيخطب تعالي شوفي الطلبات لستة طويلة انزين ااحنه ولدنا عنده غيره ما عنده مع ان ما عجبني كان في خاطري اقول خلها تولي وروح لغيرها البنات تارسين الديرة اني اخويي سوا جدي راح لوحدة وقامت تتفلسف وتتشرط عليه وهو بخير خلاها وراح لوحدة غيرها فقيرة حليوة مسكينة ما طلبت شي بس هو منه سوا اليها كل الاشياء الي طلبتها الاولى اسال ليش اقول اخد وحدة من اولهامو شايفة خير

واحد من عائلتي بعد نفس الشي حصل بنت و كانت جدا متطلبة لين ما وصلت لدرجة انها تبغي حفلتين للملچة وحدة بس لاهلها و ما تبغي أمه و خواته يحضرون و الحفلة الثانية لعائلته ... طبعا هو ما تحمل و قال خلاص ما بياخذها لأنها اذا كانت من البداية چديه فشلون حياته بتكون وياها عقب

أنته تتعب وأتسوي ليهم الحفلة وتتسلف عشانها وبعدين أتقول ما شافت خير منك!
الإمام علي (ع):
أيما امرأة قالت لزوجها:
ما رأيت منك خيرا قط.
فقد حبط عملها.
(المصدر:مكارم الأخلاق)

ما في احلى من الجلوة وذكر النبي وآله
بلا تمثيليات بلا بطيخ

ذا المعرس لابس بنطلون خالس و العروس لابسة ستارة و هواية الاثنين البحث عن البوكيمون شنو نتوقع في عرسهم

أحلى تعليق في قصف في منتصف الجبهه.. يارب أهدي أولادي وان شاء الله يظهر صاحب الفرج قبل زواجهم ويكون كل شي بما يرضي الله

نفس تفكيري

يا دافع البلا. اشوى ما اروح هالحفلات الماصخة

الحمد لله ما اروح اعراس

اني ضد هذا الذي يسمونه تغيير وآخرتها علاقتهم تنتهي بالطلاق والمبكر ايضا وما في احلى من الزواج التقليدي

لا بأس بحفلة بسيطة ولكن أفضل انفاق الفلوس على سفر بيت شقة مو على ليلة

راحت رجال تنطح الدروازة .. جتنه رجال المسخرة و العادة :) --- عادي ما نستغرب على شباب يمشون و هافهم طالع و بنات يمشون و لابسين كعب ............هم -- ويش نتوقع منهم ؟ للاسف الزواج صار مسخرة بعد ما كان استقرار

الله يرحم ايامنا الرجال يستحي يدش الصاله والحين يدخل ويسوي حركات بعد قدام النسوان هههههههه

انا لا اذهب و لكن اسمع عن الحفلات في عروس عملت شريط سينمائي و عرضته على الشاشة الكبيرة صور طفولتها إلى أن كبرت و صور من طفولة المعرس إلى أن كبر و صور من الخطوبة من ذهب للحفل قال إنه جميل و مميز يوضح مراحل العمر إلى الزواج السعيد

هالأيم البنت نفسها تطلب من الرجال يدخل في الحفلة...

اللي يسوون حركات المراهقين يجيبون لروحهم الحجي
اني رحت عرس المرس دخل مع بنت اخته الا ما يعرفها فكرها العروس وصار القيل والقال
والعروس دخلت حاملينها اخوانها على نفس التابوت وحطوها بنص الصاله وجى المعرس وشالها
والله حاله

قااعد اتخيل الموضوع
هههههههههههههههههههههههههههههههه
حشى الملكة زليخة

خبري هذي الزفة المغربية.. يزفونها فوق كرسي كانها ملكة

ههههههههههههههههههه
المشكلة هالمصاريف الى صرفوها عشان هالمصخر ؟ وكل بس عشان يتكلمون ان في عرس الفلاني صار جدي وأنا متأكد كل هالسيناريوات من صنع الزوجه والزوج ينفذ اهم شي مايرد ليها طلب ... العقل زينه

الشعوب المحترمة لا تفرط في عاداتها وتقاليدها واعرافها .. ومنها تلك التي تتعلق بطرق الخطبة والزواج .. بل وعليها محاربة كل دخيل على تلك العادات والا لن يكون لها تاريخ وسوف تندثر مع الايام .. ولن يكون لها وجود في ثقافة البلدان ايضا

سخافة
والاسخف واللي جاي اسخف
في احد الدول في صالة اعراس دخل نساء ورجال يبكون ويصرخون يحملون تابوت فيه العروس انها ميته فيدخل المعرس فيقبلها فتقوم على قصة الاميرة النائمة
نشفوا دم المعزمين وخربوا العرس من جنازة الى رفص وغنا بعد ويش

استغفر الله شنو هالمهزلة وشنو هالحركات لا بارك الله في الغرب اللي تتعلمون منهم هالسخافات.. لا القهر في النهاية يقولون الناس بس تأكل وتتطمش يعني ما بتتكلم عنهم غصبا عنكم ببتكلمون من هذه التصرفات

لا تعلقون شماعتكم على الغرب الغرب ما قال تعالو قلدو الينا وثانيا ما شفت اجانب سووا هالمناكر حفلاتهم لي كناين وحدائق النقطه الثاثية مو كل العادات التقاليد الي نمشي عليها صح في بعض الاعراف تصير مالها داعي بس لان المجتمع تعود انه يسوويها الناس قامت تخجل ادا ما سوتها كانها جزء من الدستور
لازم الناس تفرق بين الصح والخطا ويكون عندها قناعه باليسير وتخفف مواطن التبديز الموجود والعالب في مجتمعاتنا سواء في البحرين او الخليج بشطل عام

الغرب على قولتك احسن منا، البنية مهرها خاتم، وحفلة وحده على السريع في الكنيسة، و هني ربعكم يمبون الحفلات في اغلى الصالات و اقل شي ثلاث حفلات، ما يدرون ان معاش هالرجال المسكين 400 دينار و معاشه نصه يروح للقروض، صراحة افكر اخذ اجنبية، منها ولادي شقران، و مهرها خاتم و بوستين

من قال لك هالقصة هههههه زواجات الغرب تكلف مبالغ وقدرها عبالك قصة ان قال لها تتزوجيني والخاتم وبس لا بابا عندهم مصاريف تكسر الظهر انا واحد من اهلي تزوج اسبانية زواجهم كلف يمكن 20 الف دينار الفستان كلف مبلغ وقدره ومكان الزواج كلف مبلغ وقدره اذا مو اكثر وكانوا مخففين عليه بعد ما يكلف هرار

يبغي اسبانيه بالعافيه
عساااه
لا ومو اول واحد بحياتها بعدد

أهم شي أنزل على ركبك
بس لو خدت من هذيله لي يجون بفيزه شغاله ما بتركع

يوجد مراهقات و يجب عدم المبالغة في الذوبان و الرومانسية و سمعنا عن حذاء سندريلا منذ سنوات و ايضا عربة سندريلا و في الهند كان عرسان من أصحاب الملايين عملوا بلورة كبيرة على أساس ينزلون إلى الصالة منها و لكنها سقطت و أمس كانت بطلة العشق الممنوع تحتفل في عرس هاديء على البحر ..

بارك الله فيك ام محمود

الشي زايد ناقص ارجو القناعة حتى يتم تزويج كل عازب وعازبة انشاء الله

شخصيا أرى الحفلة مولد في ماتم والناس تبارك للعروس وانتهى

حلاته جدي شي بسيط،و يسافرون

الحفلات كلها فراغه وماليها داعي
اني لي رحت عرس رحت ثمان ونص وطلعت تسع ونص وزوجي بره ينتظرني بعد وش حادي اقعد لنص الليل
حتى زواجي جلوة بسيطه ساعه وطلعت هالتجمعات ماحبها
صديقتي سوت حفلة خطوبه زوجها قال ليها ماقدر اسوي عرس خدت قرض وسوت مخبله

ويي عرست بقرض عليها !!! مو صاحيه حفله بسيطه وخلاص ..الصراحه في امور تصير بين المعاريس في التصوير تفشل والعرس متروس جهال ..اهم شي الزفه ماتكون فوضى والجهال ما يجون في رجايل المعاريس ويدخلون مع بعض هذا احلى شي ..الله يزوج العزابيه

وانتين ما سويتين حفله لو بس حلال على ناس وناس؟؟؟

طبعا لا ما سووويت
ماني مجنونه
جلوة بسيطه وسفر
عجل اخلي زوجي يقترض أو اني افترض عشان حفلة وخرابيط وبسوي نفي الشي لبناتي نستانس بالفلوس مو اصرفها على الناس

زائر 42
طبعا ما سويت بالطريقه مالتكم
اني سويت شي بسيط وفي بيت ابويي حفلة خطوبتي ماكلفتني شي
والجلوة لو ما امي نفخت وجهها ماسويت وسويت بماتم ماكلفنا شي وسافرت ووفرت الفلوس ورممنا المكان بي بنقعد فيه وتزوجنا بدون قروض حسن تدبير لا أكثر ولا اقل

بارك الله فيش،عين العقل

الحفلات نفخ ومنافخ بدون فايده
أجيب ناس تتفرج عليي واعرفهم وما اعرفهم لويه وش حادني
اخد الفلوس واسافر مع زوجي وش حلاوتي

اللي يعيش يا ما يشوف
الله يستر على عيالنا

الكل مسؤول على أفعاله يعني اسوون حركات اطلعون الواحد من طوره انا لو من المعرس طردت الكل..بس هذا الي جعل نفسه بسوي ولعبت فيه الدجاج

احس المبالغة في هالأمور يصير الشي ملفت !! وناس يبغون الشي يلفت الانتباه !! زفة حليوة وبسيطة ،، والسلام عليكم

اني من رواد حفلات الزواج بس مامرت عليي هالحالة بعدها مستورة

ويستعجلونك بالسيئة قبل الحسنة وقد خلت من قبلهم المثلات وإن ربك لذو مغفرة للناس على ظلمهم وإن ربك لشديد العقاب

لا فخفخة يعني أفلان سوة الحفلة في الفندق لفلاني او لازم يسويهة في فندق أفخم او قلة العقل مصيبة.

إن هذا التصرف قلة حياء وذوق.. هنالك حاضرات غير متزوجات يثيرونهم بهذه المواقف المفتعلة.. وحتى لو كانت عفوية لا مبرر لها ، إن هذه ثقافة غربية يجب أن لا تنتشر .. كانت العروس تنكس رأسها خجلا وحياء ليلة زفافها.. إن هءا التصرف لا يرضى به الدين ولا يتناسب أن يفعله مسلمون محافظون أصلا!

هذا ما جنيناه من انحطاط من المسلسلات التركية والهندية والاجنبية وغيرها.
صار الحرام عادي وموضة

لاحول ولا قوة الا بالله
???? تخلف على اصوله لاهو من دينا ومعتقداتنا ولاهو من تراثنا الا يسوون هالحركات ما راقبو الله ؟ الله يستر على تربيتهم لعيالهم ويش بقى بعد ما سووه

من عشر سنوات انا مقاطعة حفلات الزواج مع اننا نسكن قرب .. بسبب السخافات و المناكر مثل دي جي اغاني و الصوت مرتفع و رقص و دلاعة فساتين قصيرة و مكياج أوفر و المعاريس ما يحترمون أنفسهم تطلب منهم المصورة أن يحضنها أو يمسكها بطريقة خادشه أو يقبلها و ملابس العروس عارية جدا .

شاطرة أم محمود

وش دراك امها أم محمود اصلا

وهل يخفى القمر

انتشر في الانستغرام الفيديو الصادم للعروس و هي تلقي كلمات من الحب و الغزل و العريس لم يتمالك نفسه رفع البشت و غطاها به و تبادلوا قبلات ساخنة و كتب في ال comments بأن ما يحدث داخل غرفة النوم المغلقة نراه الآن على المسرح في حفلات الزفاف و هذا ليس من عادات و تقاليد الخليج

لا تجدبون، حضنها لا تبادلو القبل وبلا هريج وبهارات زايدة

ويش خليت هذي ام العريف لازم شوية بهارات و مبالغة

بالمنطق لو أراد حضن العروس فقط لن يستخدم البشت الأسود ...

وين هالفيديو خل نشوفه

الفيديو كان موجود أمس في الانستغرام صفحة اكسبلور Explore و انا كنت أبحث عن حسابات للشنط و شفته بالصدفة .. بس اعتقد ان تم حذفه ..

يالله خير وخاتمت خير
إنعيش وإنشوف
الله لا يبلينة

و احنا شمتوقعين ؟!
لا .. و راح توصل الأمور أبعد من جدي دام هالمسلسلات توصلنا بدون حسيب أو رقيب .. و لا تقولون مسلسلات تركية و بس .. الخليجية شخبارها ؟! عجل في محترمة في الدنيا تسمح لغريب يسوي تدليك لرجولها .. شقالوا تمثيل !!! ترى عادي أشياء ثانية تصير بإسم التمثيل !! حفلات الزواج بالاشياء الدخيلة و المصاريف الزايدة تبين أن احنا متجهين إلى طريق غير آمن أخلاقيا و دينيا .. و شوي شوي عاداتنا و تقاليدنا بتروح .. التجديد مطلوب لكن التقليد المنافي للمكتسبات مرفوض و لازم الناس اللي عاجبنها انهم منبوذين

هرار وتفاهه وما عندهم سالفه

بل تمثيل هابط

ليس تمثيل فقط بل تمثيل هابط ؛؛؛ كلها شهرين ثلاثه وبيصير لمشادخ و لمذابح بينهم وكل هذه أعتقد تفاهات وتصل لحد السخافات..اشقال ؟ قال حذاء يفصخ وتمصص جدام خلق الله !!!

بالضبط... كل اللي يسوون المنكرات و الخرابيط بحفلات الزواج... اشهر و تبدا المشاكل و الطلاق...

وبعدين الحذاء الا لبسها اياه هو نفسه بيفلعها فيه

شدعووه خفوو علينا ترى المسلسلات والافلام ماهي الواقع

قبلات! هذي سخافه وقلة ادب امام الحاضرين

تمثيل وبعد تفوشر والسبب الغيرة ان كل ناس يبون يتفوقون على الباقي

نخالف بشده

والله عيب الحركات الي مافيها غير النحطاط
حنا ناقصين
ابتعادنا عن تعاليم الشريعة
سبب كل المصائب
وين زواج قبل وين الحين

زفاف اليوم تبذير وإسراف بحجة أنه رفيقتي سوت في الصالة الفلانية ومهرها هلقد والهخرابيط ونسوا تعاليم الإسلام المحمدية وصار صعب على الشباب يتزوجون وإذا ناقشتهم يقولون تبي زين ما تبي شوف غيري وطبعا الاهل مالهم شغل..

ولد زويد
أوفقك الرأي وبقوة كلامك صح

صباحو الخير..
للأسف الأغلبية يقلد الغرب بالعادات والتقاليد.كان عاداتنا وتقاليدنا اندثرت.ولا ادفنوها الألبسة من المعتقدات الغريبة والغربية. . يعني الحركات الي يمصون الإصبع فيها عسل ولا في حركات تنرفز في الأعراس اسونها عشان لفت الانتباه. . صراحة في ناس عندهم نقص اذا عندكم شي خليه يكون بينكم مو ناس تدري وش أسون عشان أكون مميزة يعني بس ارجوكم مافي على اعراس الأولين والأغاني الأولين لا تخلونها تتدفن.

افضل شي نظل على عاداتنا وتقاليدنا لان هدا يعتبر تراثنا ..لا يوجد مانع من التغيير ولكن ضمن العادات والتقاليد الخاصه بتراثنا وليس سرقة افكار ليست من عاداتنا ولا تقاليدنا مثل المذكوره اعلاه

سلبية وماتضفي مشاعر صادقة على الزوجين بل فقط للفت الانتباه وشخصيا افتقد رؤية معاريس بالزي الشعبي ، حتى ان ملابس العريس تحوّلت من "بشت وعقال وغترة" الى بدلة رسمية كالاجانب وخصوصًا بين اوساطنا

وكل كلمه والثانيه قالوا ليلة بالعمر
اي ليله اصرف فيها فلوس اقعد ادفع فيها لعشر سنوات
وش فيها يا بنات لو سويتون حفلات اسريه
بقده عوار رأس أكره ماعليي اروح عروس

وليش تدفع شوف ما بقول لك شي مثل ما في بنات تتشرط في بنات ما يبغون الا الستر توه بنت خالتي مخطوبة ما سوت شي ولا طلبت شي حتى طقم دهب مااخدت وهو المعرس من نفسه سوا اليها الي يحطون على روحهم ديون عشان فلانة وعلانة اسمحوا ليي هذا مو صاحي وما عنده عقل البنت بدالها الف بنت وبتحصل بالهبل بش تحتاج تدور

تصنع ممقوت وممل

نطلع من الحفل غصب عنا نغتاب وما يعجبنا شي شدعوه وش خلو لغرفه النوم وترى والله العظيم مافي اجمل من حياء البنت وخصوصا لما تكون عروس مو حركات ورقص وحاله .. الله يهدي بناتنا بس ويعرفون قدرهم وقيمتهم صح

بعد الرقص يا بنتي اهون الا حركات التصوير الي تنرفز تحضن وتبوس عادي بنات واجد يرقصون مع خواتهم او مع اخوانها بس البلوة الحركات الغير لائقة الي تصير بين الزوج والزوجة والي المفروض تكون بينهم بس لكن ويش تقول عدم الحياء في هالزمن اذكر مرة رحت عرس المعرس باس البنت في فمها اني صراحة ما شفت كنت لاهية في شي بس ما شفت الا ناس تصفق وناس تستنكر مقزز احين هالعائلة عمري مااروح ليهم عرس يفشلون صراحة