من كلام الناس... يفر هارباً دون أن يعبأ بالأضرار التي تسبب بها في ممتلكات الغير، وعادةً ما تتكرر هذه الحالة في الحوادث المرورية التي يفر مَنْ قام بها هارباً، فيما يظل صاحب السيارة المتضررة في حيرة من أمره، وأمّا إذا كان من ذوي الدخل المحدود فالأمر يتضاعف عليه. وقد تذهب جرّاء ذلك الحادث روح إنسان بريء.
فهل هذا قلة ذوق؟ أمْ خوف؟ وهل هناك مبرّر لتلك الأفعال؟
صار عندي بالمحرق رجال شيبه لا بارك الله فيه رحت البريد المحرق ووقفت صوب المجلس قلتله بي بروح بأخذ البريد وبروح رجعت من البريد امشي في للسياره مشيتها مو رينه وقفت جريب الشغل لقت تاير جهته السائق مبنشر من البرد المهم بدلته ولا امشي للحين وإلا اشوف تاير اللي ورا جهه الراكب مبنشر من البرد اتصلت للوالد بعد ما سويت زحمه ووقفتها صوب السلمانيه ورفعت السياره ووديناهم محل تواير والمشكله جدد قالوا لنا تحط تيوب أو ترقيع من عند ... المشكله ما شفته الشايب سألت عنهفااوا لي توفى ....
مواقف مستشفى السلمانية مأساة بشكل غير طبيعي. تقعد ساعة تدور بارك محترم بعدها تطلع الا واحد قليل ادب صاك عليك بالعرض! انزين انا شنو ذنبي علشان اتعطل بسبتك؟
بذمتكم هالنوعيه من الناس مو حلال انك تدعم سيارتهم علشان يتأدبون ~_~"
هذا الشي الي يسوي ويهرب جبان وقح ما راح تتحلل له حوبتي ليوم القيامة طبعا الي في بالي كل مرة تشوف شمخ ولا يتفل على السيارة جان هو يقرأ الموضوع . انا ماراح احللك ليوم الدين جان فيك ضمير تعال اعترف الي ياقليل.الذات
اذا كنت تعرفه اشتك في الشرطة بال dna مال التفله بصیدونه
انا سالفتي اعظم من دعم و هرب مره زوجتي طالعه في سيارتها ويا العيال الا متصله فيني تقول السياره فيها رجه (هزه)قوية على طول قلت لها ارجعي البيت و لما رجعت من العمل رحت اشوف السيارة الا المصيبة النتوت مال التواير الاربعا كلهم ابطلين على الحافه طلع واحد عديم ضمير ابطلنهم يبي يبوق الرنقات و ما لحق و هد السيارة و هرب و بيت جارنه انباقو الرنقات السوال وين الذمه والضمير لو صادهم حادث المرا و العيال وراحوا فيها
قله ذوق اصلا عيب الشي الي ما ارضاه على نفسي لازم ما ارضاه على غيري محد يرضى تصير له هالحركه رنا عن نفسي الي يوقف ويعتذر على الكسراه بسيارتي اقول له اوكي حصل خير بس روح الله معاك لكن الي يدعم ويمشي ما ابري ذمته
قله ذوق .. لو افترضنا انه خوف انت تخاف تتحاسب بالدنيا لين هربت خاف من حسابك ويه رب العالمين ذاك الحساب العسير
يفر من مبلغ بسيط بالدنيا يدفعه
الى سيئات يأكل يديه عليها ندما يوم القيامه
ولد زويد
هذلين عديمين تربية وأخلاق ودين لكن عسى ما يتوفق في الدنيا والآخرة كل من يقوم بتلك الحوادث المرورية سواء كان داعم إنسان أو جماد
كذا مرة اجوف تدعم جدامي وناس تمشي اقوم اسجل رقم سيارتهم في ورقة و الوقت وحطها ع السيارة المدعومه
بس اخر مرة في المستشفى دعمت سيارتي التشارجر بنت و راحت وقفت فلباركات الثانيه دشلي السكيورتي يسالني انت راعي التشارجر ترى في وحده دعمت سيارتك ومشت رحت لها الا تقول مسامحه انا خفت وماعرفت شاسوي وكانت بتمشي ولا بتصلح سيارتي خذت رقمها قلتلها تبين مرور او تصلحينها اختارت تصلحها وطلع تصليح البمبر 90 دينار تمت تترجاني اني اصلح سيارتي ال 2016 برع الوكاله وماتبي تصلح بهلسعر وشتكيت عليها وصلحتها فلوكاله ب90
سامحته
مرة واحد دعم سيارتي وحط رقمه لكن ما تصلية له وسامحته على شان كان صريح
صادني هذا الموقف مع جهال إثنين ، شمخوا السياره و صادهم واحد يعرفني أتصل فيني ، سألناهم ليش مشمخين السياره قالوا نفكرها مالت هنود!!! الهندي ما ليه رب يعني ، لأنهم جهال ما حبيت أوصل الموضوع للشرطه ، تواصلنا وي أهلم و وعدوني يصلحون السياره على حسابهم ، بعد ما طلعت الكوتيشن من الوكاله سحبوا عليي و لا كأنه ولدهم مشمخ سيارة جديده ، إذا الأهل جدي شلون الجهال عجل ، لكن لو متصل للشرطه أول ما صدتهم و ما سويت روحي طيب جان ديك الحزه يدفعون غصبا عنهم.
اني شغلي في سوق المحرق وكل مرة ارجع البيت السيارة مشموخة من جهه وزوجي يسألني ويش فيها السيارة. واني أقول ليه ما ادري شكلة حكوها في الباركات. ولا واحد فيهم فيه شيمة يحط رقمة. كله في ذمتهم يوم القيامة ناخذ حسناتهم او نعطيهم سيئاتنه.
فيه مرة كنت طالعة رايحة محل وشفت هندي دعم سيارةرغم كان فيه مسافة يقدر يطوف وهداها وهرب بعد ما مشى كتبت رقم السيارة ولونها وحطيتها في السيارة وقلت فيها انتبه لسيارتك لقد دعمها رجل وهرب . وتركتها ومشيت.
معاي وحدة في الشغل دعمت سيارة في البراكات بالمنامة وشردة وحين نصحناها بأن تبرأ ذمتها قالت وبكل فخر أن إلي سوته شي عادي الكل يسوي مثله ... الضمير مات
تقريبا سنويا اودي السياره السمكره اعدلون الخفسات ويصبغونها وغير العطال ولا مرة شفت احد حاط رقمه كله يدعمون ويهربون ولا كأنه صاير شي بس انه اقول لو كان يدرون الي اسوون هالحركات ان التعويض في الآخره بكون عليه اكبر چان مافكرو يهربون بالأساس
انا موضوعي موكسر انا سرق السيارة وهرب بها وخلني كم يوم بلا سيارة وسرق الا فيها يعني ويش هالناس ماعندهم احساس اذا سرق السيارة مايعرف ان صاحب السيارة راح يتورط شلون يروح شغله ولا عفس السيارة ودعم فيها
اول ما خذت الليسن ريوست و في البارك و خفست السيارة الي واقفة بس خفسة بسيطة يعني حطيت ورقة كتبت في رقم و الوالد و ان بالغلط ههههه و اتصل و سلمناه 25 دينار هو تصليحها اقل بعد قال ااكراج بس يلا ما نبي شي في ذمتنا
توي الشهر الا طاف طالعة من الشغل والا اشوف سيارتي مدعومة
فيه هندي جزاه الله خير شاف الحادث وسجل كل شي
وبما ان احنا شركة تأمين طلعنا من السستم السيارة
وطلعت مو مأمنة .. هو جاي يأمن .. دعم سيارتي وهرب
المشكلة حتى ما حاول يعرف صاحبة السيارة
طلعنا الرقم واتصلنا لصاحب السيارة طلع السايق ماله دعم وصلح سيارته حتى بدون ما يقوله
لو ما طلعنا الرقم واتصلنا جان راحت عليي
لا ذمة ولا ضمير ولا رادع ديني
بس قبله بجم يوم واحد حك سيارة وحدة وياناا .. وببساطة ينشال بالباليس
قعد في الحر يحارسها !
لا هذا ولا ذاك
إنه قلة الأيمان وعدم الوعي الشرعي.
متى سيتمكن من رد هذه المظالم التي سيحملها على ظهره؟
قلة حيا
موت الضمير
والله موقف صادني... سيارتي كل يوم نفس البارك ابركنها بس واحد ما ادري هو سكران والله شنو سالفته حك السيارة من البمبر الا جدام الى قريب باب السايق ... لا رقم لا اعتذار ولا شي ... شنو اتقول عن هاي الفعل ...
مو سالفة هروب بس ، في ناس اذا سبب لك حادث يقول ماله داعي نروح المرور صلح السيارة وبدفع لك قيمة التصليح، واذا صلحتها وطالبته ما تشوف رقعة وجهه !!
قليلين ادب ولا عندهم ضمير اني صادني هالموقف وقال بصلحها لش وعمك اصمخ يوم قلت اليه تكلف جذي قال صوبة قلت اليه سيارتي وكالة اكو الرقم اتصل اسالهم الليت بجم جيف ببوق من عندك وبعدين تم يماطل ويماطل لحد ما قام يرد وطرشت اليه مسج قلت اليه اني مو مسامحتنك ولا محللتنك والحوبة بتجيك بتجيك ابدا عمك اصمخ ولا يهمهم احين جم ثلاث سنوات تقريبا حسبي الله ونعم الوكيل تسوى علىالانسان احد يدعي عليه جدي والله عيب لا ورجال كبير رجوله والقبر ، اني مرة دعمني واحد صار خدوش بس بسيطة خليته يمشي نوقف علة ويش الحمد لله
انا من احك سيارة أحط ورقة أشرح الموضوع وأحط رقمي. ما أبي يوم القيامة أتحاسب على هالشي.
إذا السالفة رجوع للخلف وصارت صدمة خفيفة كلش ماله داعي أنتظر راعي السيارة، أتيسر وهو يتصرف في سيارته
معنى كلامك هذا قلة ذوق .. ولاشنو يعني ماله داعي توقف تنتظره وخله يتصرف بسيارته .... يعني فوق شينه قواة عينه تدعم ومايهمك ليش هالي دعمته اوحكيت سياتره تدري عن ضروفه يقدر يصلحها اولا .... خلو عندكم شوية انسانية وضمير , اليوم انت مايهمك بكرة باذن الله تعالى يصير فيك اخس ان شاء الله
حدثت لي مرة من المرات, حكيت شخص بسبب ان الشارع صغير عبارة عن رايح جاي, ولكن الجيران توقيفهم فيه على طول, وبسس عدم اتساع المكان حكيت سيارته, ومشيت عنه ارتباكا , ومثل الوقت منقهر على البارك الغلط, بس في مثل عصر ذلك اليوم رجعت لسيارته وكتبت رقمي في ورقه وادخلتها داخل الجامة, اتصل فيني وتفاهمنا * خذيناها كراج اعرفه انا وصلحت بمبر ماله*, لو تحصل لي مثل هالحادثه واحد يضع رقمه اذا كان مجرد خدوش بخليه يتوكل على الله .
يمكن خوف
انا كم مره دعمو سيارتي وخاصه جهه السائق البمبر كسروه لي. اقول للي يدعم ويهرب ع الأقل خل ورقة فيها رقم تلفونك. وقول له ترى احنا مفلسين م عندنا فلوس
قلة ذوق وانعدام الضمير
لا خوف ولة قلة ذوق هية قلة تربية.
ماااحب هالحركة ابدا الحمدلله عندي ضمير لو دعمت سيارة حتى ماصادها شي لازم اوقف واعتذر واستسمح منه وحتى لو محد موجود احط رقمي وصادني هالموقف انه بالغلط حكيت سيارة شي بسسسسسيط وقمت نطرت لحد ماطلع راعيها وقلت له واذا يبي اسويها ع حسابي ولكنه رفض وقال مافيها شي ترى حرام تضرر حد
مره من المرات واحد مبركن سيارته ونصها ساده الطريق بالغلط انحكت من سيارتي ع خفيف مشيت....ماادري هل حك السيارة بعد يبي له اخبر صاحبها واعطيه تعويض مالي والله شنو؟؟افيدوني
المفروض كان تكتب ورقه فيها رقمك وتخليها في السيارة الي حكيتها
قله ذوووووق ،
احنا دعمنا واحد مو مبيم سيارته ولا مسجل وتكنسلت سيارتنا وغير الاصابات الي تعرضت ليها اني وزوجي حتى عمليه سوني ،
وفوقها ماحصلت ولا على اي تعويض ????الدنيا خراطه
خوش موضوع
خوش موضوع يالوسط .. بس ركزو على المشاكل مال الزاوج .. لان قاعد اسجل في دفتر تجارب الناس الي مروو فيهاا علشان لين عرست اعرف اسوي مشاكل ههههههه
طبعا بيكون خايف وبيهرب لا ينعلون قفده
انعدام اخلاق ، اذا كنت مستعجل وعندك شي مهم تقدر تحط رقمك على السيارة وتتفاهم ، اما تهرب وما كأنك سويت شي ! عيب وحرام
ناس
فيه ناس يوقف السيارة في المسار الضيق لين دعموه بقول دعموني وقف سيارتك في مكان عدل محد بدعمك
قله الضمير
يم معهد البحرين
كنت ماره وطلع علي واحد من يم مدرسه الاولاد وحك سيارتي عدل وطلبت منه يوقف قال لي وقفي وانا بوقف ووقفت وهرب وطقيت دريشه سيارته وهرب ؟؟بالله عليكم هي ريال
اموت ولا اسوي هالحركه.. لان العواقب جدا لا تغفر ولا تحتمل.. لا فرار من جزاء الله اذا فررت من الناس
هلا هلا!
ليس خوفا ... وليس قلة ذوق ... بل أن هذا الكائن زاوج بين الأمرين .... وفوقهما أنه بلا وازع ديني ... وتعال فچچ اذا كان -كما يدعي- متدين .