ان اخذت غني عيورها اهله وان اخذت فقير عيورها اهلها

انا تزوجتي الفقير الحين بعد 18 سنة زواج للحين يري اني مااسوي لاني ماكلفته عرس ولا مهر ولا شبكة لا إننا تزوجنا عن حب ! واعاني في حياتي

عندي مرت خال للأسف طماعة ادور لبناتها الي لازم مستواه المادي ممتاز اول ما يتقدم تسألهم عن راتبه أو عندهم أهله بخير أو تجار توافق عليه فورا.ليضمن مستقبل بنتها على الرغم بناتها أغلبهم مو دارسين بس حظوظ اتحصل واحد حالته المادية ممتازة والمال تريح صاحبها.ويا حسره من سمعت انا تزوجت وأخذت شخص من عائلة معروفه في البحرين قامت بالتودد لي عشان الصقها في وحدة من بناتها تسألني اذا عندي حمي مو متزوج ودايما تسألني عن حالته المادية وهل يملكون أراضي وهب يملكون شركات.قلت لها لايغرك النسب اصلا هم ماعندهم شي

زائر 62 !!! شفيها اذا الأم تدور لبناتها ، احسن
ونعم الام المثالية وارفع قبعة الاحترام ليها
واذا سألتك معناتها انه ما تبي تمرمر بناتها واعتبرها فعل خير!!!
الصراحة مجتمع غريب ما يبون الام تدور

كل ام تبي لبناتها واولادها الافضل ..

يقولون لش الام تبحث لبناتها عن الماديات والمصالح
وين المثالية ف الموضوع
حفارات الذهب تفهم بعضها.

الحافي المنتف البخيل يلحق والدته

الفلوس بنقول إنها عامل من عوامل السعادة بس مو شي أساسي.. ولو مثلًا كان أحد الطرفين غني لازم بتصيدهم ظروف بالحياة تضغط عليهم وتعيشهم المر..
بالحب والصبر والقناعة والتفاهم وعدم الإهتمام بالماديات و موضات المجتمع وحچي الناس.. تكون السعادة..

على الحظ

والله أخذت زوجي واحنا في نفس المستوى هو فقير وانا من عائلة فقيرة والحمد لله كبرنه مع بعض في كل شي لين وصل زوجي والله انعم علية والحين قاعدين في بيتنه الجميل ما ينقصنه شي وعيالنه عايشين احسن عيشة ولله الحمد والمنه

كنت اسأل نفسي دائما وانا اقرا بالقصص و اشوف الافلام
هل فعلا توجد علاقه جدي فواقعنا؟ والا النوعيه تتحكم في علاقاتنا !
للاسف كلها قصص خيال
لا يوجد في واقعنا سندريلا الخادمه والامير خلنا نقول في حدود الخليج على الاقل .... واذا انوجد انا اجزم انها علاقه مو سعيده

أنا شايف حالة بهالطريقة، الزوج اقل ماديا من عائلة الزوجة، بس لأن الزوجة نازلة لمستوى زوجها المعيشي عايشين زي السمن على العسل،، مهمة القناعة و التواضع
أما إذا الزوجة بتعيش مع رجال مستواه أعلى من مستواها المعيشي، فلازم ما يحسسها ان هي أقل منه و لازم هي بعد ما تكون استغلالية و مادية و منزهقة على الفلس

قبل ما كنت افكر انه الفرق المادي شي مهم ويأثر في نجاح الزواج من عدمه~ ولكن بعد ما جربت واخذت واحد اقل من مستواي المادي شفت انه شي مهم في تقارب على الأقل لأن بالرغم من كل التضحيات المادية والصرف من جيبي وتقليل المصاريف على قده وعدم الطلب~ هو نفسه ما ارتاح وتزعزعت ثقته بنفسه ولما سألته ليش؟ مافي جواب..
والحين كل واحد بطريق بعد ما صار اسمي مطلقة

الزوجة اذا كانت ما تشتغل وما عندها مؤهل هذي تحصلها كل تتشرط وتبي وتبي من طياحة حظها

لا تعمم يا الحبيب، كثير من ربات البيوت متواضعات و طلباتهم قليلة، و كثير عندهم رواتب و مؤهلات و منزهقين على الربية

بالعكس انه متزوجة وماشتغل وماهتم للماديات والحمدلله الرزاق الله المادة مو كلشي في الحياة

المشكله اذا كان بخيل

البخل اساس المصايب

نجاح الزواج أو فشله بحسب عقلية الزوجين وليس رصيدهم المالي

من حق

من حق الاب الذي تعب في تربية بناته ودرسهم ان يبحث عن زوج لبناته اهله تعبانين عليه هو يتعب بعدين يعطيها اي واحد ما يصير

هذي النظرة المادية الاستعلائية، تعب و درسهم، يعني صرف فلوس عليهم و صاروا أحسن من غيرهم، لا يا عمري التربية فكرية و اخلاقية مو دراسة اكاديمية و لا صرف فلوس

؟

الايقول انا ماخذ من زوجتي ولا فلس بعدين يقول هيا مومقصري تصرف على البيب والاولاد غسيل اموال مثلآ

أني الحمد لله جامعية وهو ما عنده حتى ثانوية عامة بس مو مهم لفلوس والدارسة أهم شي التفاهم ، وزوجي كان أيام الخطوبة حده فقير ما يضل من راتبه إلا 20 دينار وصبرت وما حملته فوق طاقته ولا حسسته بالنقص وبعد الزواج الله يسر أموره واشتغل في وظيفة غير وعوضني ع الأيام اللي طافت وصار فترة مفصول ورحت اشتغلت وساندته وعطيته بطاقتي البنك هو اللي يصرف حتى لا يضايق ويحس أني أمن عليه لا سمح الله .الحمد لله أني أقدر الظروف ولازم الوحدة تصبر وتتكيف على ظروف زوجها والقناعة أهم شي .الحمد لله زوجي مقدر وقفتي وياه .

هامان

كل هالحجي وما منيتين عليه هههههههه

هذه القصة مثال للزوجة البحرينية الصالحة، أغلبهم صابرات

زوجي اعلى مني بالدراسة والحمدلله حياتنا مستمرة وماشية العلم مو في الكراس العلم في الراس والواحد يقدر يثقف روحه يعني شنو عطتكم الجامعة من ثقافة الجامعه تخصص معين مو كل الثقافات الواحد يقدر يرتقي بنفسه ويصعد اعلى القمم من غير دراسة اذا العقل شغال

ضل اعزب وعش مستريح ناعم البال

الرزق على الله ومو بيدنا لرجال ، هالحالات تتنوع على نفسياتهم ومدى التوافق ولا يمكن القياس ، النبي تزوج خديجة وقام الدين على مالها ، احد ملاك العقار في البحرين ضاعف ثروة زوجتة اضعاف اضعاف وهو شغبتة بسيطة ، المشكلة ادا جوك اخوان الزوجة غشومين وأكالين حرام هني المشكلة وانت في اشد الحاجة وهم مو معتازين بس الطمع والجشع ..... ، لا يمكن القياس رأيت الإثنيت .....

من تجربه
الزوج متوسط الدخل و تزوج فتاة من عائله غنيه (تجار)
في البدايه لم يعترض احد من العائلتين لكن بعد ٣ سنوات من الزواج تلفظ اخو الزوجه و بحضور جماعه في مجلس رمضاني ان العائله اي الزوجه عطفت على نسيبهم اي الزوج
هنا تدخل اهل الفتنه بين الزوجين و العائلتين وحدث ما حدث
اذا أنتون موافقين عليه ليش الاهانه و التجريح
قبل المقابله موافقين وبعدها موافقين وقبل العقد موافقين وعقبها موافقين
كلمه ( عطفت) لها معنى ثاني عند الناس
ونصيحه الى من يبحث عن زوجه لا تتزوج وحده من عائله غنيه ( بيذلونك )

رد على زائر 32

كلامك موصحيح ..بالعكس واجد ناس عطو بناتهم ناس اقل منهم في المستوى وشالوهم على راسهم ..وفي ناس بين في عيونهم وفيه ناس مايملي عيونهم إلا التراب

الفقر مو عيب .. العيب ان الواحد يضل مكتف يدينه ويقول ما باليد حيلة وما يسعى ليخلي حياته افضل
اني ولله الحمد عندي خير ونعمة ما عندي مانع ارتبط بشخص ماديا أقل مستوى مني اذا كان شخص تاعب على روحه وطموح ..
فما اشوف هالامر يخلف زيجة فاشلة .. الطرفين يحكمون عقلهم ويحترمون ويقدرون بعضهم وبتمشي الحياة من احسن ما يكون
والبنية خل تحاسب لظروف زوجها دام اهي رضت بوضعه لا تخنقه بالطلبات
وسلامتكم

العيب ان الشخص يقعد مكانه ومايتقدم للبنت يعني اذا الصبي مو قد كلمة الزواج ليش يقول لها احبش ويمرمرها يعني لك نية روح للبنية مع هلك واخطبها مالك نية خلها في حال سبيلها

الفوارق التعليمية هي التي تخلف زيجات مليئة بالمشاكل .

مو شرط، التعليم ليه دور بس ويش علاقة دراسة الهندسة مثلا في الحياة الأسرية، شنو بيرسم ليها على الجدار مخططات مباني لو دوائر كهربائية و إلكترونية، أو رسوم ميكانيكا!! المسألة مسألة إطلاع ثقافي و ديني و حسن خلق و تعليم بالحد إلا يخلي الإنسان عنده فهم عقلي و قدرة على إدارة الأمور، و أما الحماقة و سوء التصرف و السلوك الأرعن فهي تختلج حتى المتعلمين و ما ليها علاقة بالمستوى التعليمي،، و احنا لو حضرنا الخطة الدراسية الجامعية غالبا ما راح يكون فيها ولا مادة ليها علاقة بإدارة شؤون الحياة، نعم علم الن

الا دخلنا عليها في المركز الصحي قليلة أدب و تكلمنا بفوقية تحسها مريضة نفسيا و تدخل في خصوصياتنا و تدخل في أمور ما تعنيها، و احسها تستنقص من الدين و التدين سودة الوجه
انا كل حين احاول اسكتها بأسلوب حتى لا تضايق هالبنية الا متقدم ليها، طلعت من عندها و انا وجهي احمر و معصب و ماسك نفسي احتراما للي قاعدة ويانا ولا هذيك ما تستحق احترام

نعم إذا دراس أو دارسة علم نفس أو علم اجتماع، نعم
بس هم هذلين مال علم النفس بحاجة لمن يعالجهم نفسيا، و مال علم الاجتماع بحاجة لمن يحل مشاكلهم الأسرية، نفس هذيك ...الا في احد المستشفيات دخلت عليها انا و البنت الا كنت متقدم ليها و باقي اشوي و افور فيها لأنها جاية تتكلم ويا البنية إن لو كان كلامش صح كنتين ما انفصلتين و بعدين تقول ليها طيب و ليش انفصلتين!،، ابي افهم هذي الحمقا منهو الا موظفنها في هالمكان،، باقي اشوي و اتزودها و اقلب عليها الطاولة، شنو اختلت البلد حتى هذي يشغلونها

ذكرتني بمركز ... مال فحص الزواج الاجتماعيه بكل قلة ادب تنظر لينا بفوقيه وعقب طلبت منه يطلع تقولي لاتاخذينه خل بكلم امش لاتاخذينه هل مركزهم يؤهلهم لهالكلام وهالتدخل اتمنى الحكومه تنظر بهالموضوع

أصلا هم يبون ناس يفسدون في المجتمع و يفرقون بين الأحبة، يبون المجتمع فاسد

النساء ماديات واجد واجد..لذلك حتى لو تزوجت واحد أقل من مستوى عائلتها بتظل تحوم في قلبها ويمكن بعض الاحيان تجرحه وتحسسه انهي اعلى منه وووو...

الزواج قسمه ونصيب ولا توجد قاعدة لنجاح الزواج او فشلة
اهم شي هو تمتع الطرفين بالاخلاق الحميد واحترام كل واحد منهم للأخر
الفوارق قي التعليم او المادة تذوب اذا كنا ذات اخلاق رفيعة ويحترمون بعض
الحمد الله انا زوجتي راتبها دبل عني اربعة اضعاف ولاكن الحمد الله حياة رغيده وللعلم انا لاأخذ منها فلس واحد وفلوسها واهي كيفها وين تصرفهم واهي ما تقصر في مصاريف البيت والاولاد ولا منه ولا تقصير

ما بصير زواج مدام يعرفون يوجد فارق مادي بينهم لكن إن حصل الزواج، الزوج الغني ما بطلق زوجته الفقيرة لأنه هو المسؤول عن مصروفها واهني السالفة محسومة ، لكن إذا الزوجة غنية والزوج فقير اهني يصير المعاير واذا الزوج

" خذوهم فقراء يغنيهم الله من فضله "
لو عمل الطرفين على انجاح ذلك الارتباط بالنزول عن بروجهم والاندماج في النسيج الجديد لخرج مكون تاجه الحب ونتاجه النجاح
لا يبقى الغني على غناه ولا الفقير على فقره
تلك الايام نداولها بين الناس
من يعتقد ان المال هو كل شيء فقد طعم الحياة
الحب يصنع المعجزات

جربنا والله ما نفع
قبلت فيه مع انه اقل مني ماديا وأكاديميا بس قلت اهم شي الأخلاق والرجال ما يعيبه جيبه
بس طلع بدون شخصية، كلمته مو عنده ، وقبل الملجة تراجع وقال ما يبي، ليش؟؟؟ لأَنِّي مو حلوه في نظره
عدال يا الدون جوان

لا يوجد إنسان كامل وخالي من العيوب ولكن الحمدلله شخصيتي جيده

لاغني يظل على غناه ولافقير يظل على فقره والرازق الله وسبحان مغير الأحوال

سبب الخلاف

سبب خلافي مع زوجي مسكين مقدره ليه تعبه وجهده لكن الفارق المادي تقدر اتقول عنه متدني من القروض ولديون الا عليه والوحده من تزوج تستحي اتقول لبيت ابوها عن اي شي ناقصنها وهو مسكين مو مقصر مااحسه مقصر لكن هو سبب الخلاف الا بينا خاطري اتسوق مثل خواتي واسافر وعندي سياره مثلهم بس ظروفه ماتقدر وادري لوتقدر مابقصر...مسكين رجلي كسر خاطري ع عمري بحاول من اليوم اصير وياه زينه ولا اطلب عليه امبيه هو وصحته صدق الله يخليه لييي

تحسسوني ان احنا للحين في زمن الجاهلية بهالأسئلة

(وَأَنْكِحُوا الأَيَامَى مِنْكُمْ وَالصَّالِحِينَ مِنْ عِبَادِكُمْ وَإِمَائِكُمْ إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ وَاللَّهُ وَاسِعٌ عَلِيمٌ )

المشكله لا زالت يا وسط ..
نكتب المشاركه بعدد الحروف المسموح بها و ما ان ننتهي من كتابتها و نرسلها حتى يأتينا الرد بأن كمية الحروف فاقت الكميه المسموح بها… حلو المشكله جزاكم الله خيرا

رد على زائر 5

في التعليق مكتوب أن اهل البنت ساعدوه واكرموه بس هو طلع......

اعتقد لازم يكون انسجام ولو بسيط في الامور المادية ... اعرف واحد عنده شهادة ثانوية .. وماخذ له دكتورة ... هي قبلت به .. وفي البدايه الامور طيبة .. لكن بعد كم شهر توظفت ... وصارت تترفع عليه وكل تطالبه قدام أهله ان يوفر لها مسكن وانه ما يصرف عليها وعلى بنتها ..

حسب وجهة نظري الفارق ليس بالحالة المادية بل بالتعليم . مثلا رجل لديه شهادات علياء يأخذ فتاة غير متعلمة والعكس فيحصل فارق بينهم في التفاهم وهذا يسبب الطلاق

شهادات عليا
شنو بيدرسها هندسة في البيت لو طب لو بيضارب وياها في البورصة، معظم الناس في البحرين متعلمة لا أقل للثنوي، و هذا حسب وجهة نظري كافي، الفارق فقط في مستوى العقل الجوارحي و مستوى العقل العقائدي

اذا وجد الحب الصادق لا تحول الفوازق الماديه في نجاحه .. تزوجت وانا في الصف الثالث ثانوي بمهر قدره 300 بعد ان جمع قلوبنا الحب الصادق , ندخل البحر نحن الاثنين ليلا لنصطاد بعض السمك ليبيعه والدي نهارا بعد ذهابي للمدرسه ..

تصطاد السمك قلتلي ها ؟؟
ههههههههههههه حاسب من خفر السواحل انا اقول لك

على جم الهامور

المفروض الفقير يتزوج غنيه والغنيه تتزوج فقير

علشان يصير توازن في الحياة ويحققون السعاده والاستقرار .. اعرف عائله اغنياء يزوجون بناتهم بفقراء والاب يتكفل ببيت وسياره ومبلغ شهري لبناته يعني الفقير وش يتمنى احسن من هالحياه

ليش لاا

وين المشكله يساعدون زوج بنتهم وبتنهم في الفايده
ليش نربي بناتنا صغار ونعجز عنهم كبار

زواج طمع و الزوج الي جذي كلش ما فيه رجولة ولا عنده كرامة

دلنا بيتهم هالابو هالجناوي هذا خل يتبرك علينا

انا بعد اعرف ناس وقفوا مع رجال بناتهم في مصاريف الزواج وتاثيث الشقة الناس تبي الستر الحمدلله مو مهم فلوسه خذوهم فقراء يغنهم الله من فضله

خلكم واقعيين

زيجات فاشله طبعآ.. بإسم الحب. . خاصه إذا البنت بنت خير ونعمه وهو فقير ..… يظل يهينها ويذلها وينزلها ل مستواه بدل ما يشتغل على روحه ويوصل ل مستواها صدق مريض وعقد .. شفت هالتجربه في وحده اعرفها ..اهلها اكرموه وماقصرو وياه وكانو يعاملونه مثل ولدهم.. كرامة ل بنتهم وطلع نذل ..والنتيجه الطلاق

انزين اذا هم بخير

ليش ما ساعدوه بمشروع او او تكفلوا بمساعدته لمصاريف بنتهم

ما تبغاهم بعد يكدون عليه وعلى اهله مزوجينها رجال لو وش

دلين عليها

زيجات فاشلة

الفوارق المادية تخلف زيجات فاشلة ومريرة أني اغنى من زوجي وكل يطلب افلوس من عندي اليه والى عائلته واذا ماعطيته يعفس الدنيا على راسي واروح عند اهله

الفارق المادي لا يتدخل في نجاح الحياة الزوجية بل الأخلاق و الانسجام .....

هناك ازواج كانوا في الخطوبة مستواهم المادي بسيط و بعد الزواج جاءهم الخير و الوظيفة و الرزق و هناك العكس من كانوا اغنياء و اصبحوا فقراء و بعض الاسر الثرية ترفض ان تخطب لابنهم او لابنتهم واحد حافي منتف يذلها طول عمرها او ان تعيش في بيئة فقيرة و منزل متهالك و لكني اعتقد ان الزواج من اسباب نجاحه الاخلاق و الدين والثقة والاحترام و الانسجام والمشاركة و تحمل المسئوليات والتفاعل الايجابي و الابتعاد عن المشكلات و التعقيدات اعرف نساء تزوجوا من فقراء ولكن هذا الفقير سرق الفلوس والذهب و تزوج الزوجة الثانية

أقول بلا هرار من الصبح

الى 28 عندك مرض نفسي اسمه عقدة النقص

كل واحد فاشل في الكتابة و التعبير و يتهم الآخرين بان ما يكتبونه هرار هو انسان فاشل في الحياة و في الزواج و في التعامل مع المرأة

عندنا أثنين من الأخوة جامعيين واحد صار نصيبه بنت غنية ونفس الخاطبة بحثت لنا للآخر بنت فقيرة اللي غربلتنه الفقيرة ، والغنية طلبت المعتاد ، وهي قمة الأخلاق ، الحين من أحد يقول ليي اخطبي لينا، مباشرة أدور أغنياء أو متوسطين اتعقدت من مشاكل الفقيرة وعقدها .

مشكل الغنية ماتخلص طلباتها ووقعتها وقعة تبي وتبي مفلستنه تفلس تبي تعيش مثل بيت ابوها واكثر والفقيرة وحلليها قنوعة وماتتطليب تنازلت عن كلشي لترضي رب العالمين والستر

الغنى لا يدوم ياما ناس أغنياء وصلو لخط الفقر وياما ناس فقراء الله اغناهم الواحد لايقاس بماله باخلاقه ودينه خذوهم فقراء يغنهم الله من فضله